೨. ಛಳಭಿಜಾತಿಸುತ್ತವಣ್ಣನಾ

೫೭. ತತಿಯೇ ಅಭಿಜಾತಿಯೋತಿ ಏತ್ಥ ಅಭಿ-ಸದ್ದೋ ಉಪಸಗ್ಗಮತ್ತಂ, ನ ಅತ್ಥವಿಸೇಸಜೋತಕೋತಿ ಆಹ ‘‘ಛ ಜಾತಿಯೋ’’ತಿ. ಅಭಿಜಾಯತೀತಿ ಏತ್ಥಾಪಿ ಏಸೇವ ನಯೋ.

ಉರಬ್ಭೇ ಹನನ್ತೀತಿ ಓರಬ್ಭಿಕಾ. ಏವಂ ಸೂಕರಿಕಾದಯೋ ವೇದಿತಬ್ಬಾ. ರೋದೇನ್ತಿ ಕುರುರಕಮ್ಮನ್ತತಾಯ ಸಪ್ಪಟಿಬದ್ಧೇ ಸತ್ತೇ ಅಸ್ಸೂನಿ ಮೋಚೇನ್ತೀತಿ ರುದ್ದಾ, ತೇ ಏವ ಲುದ್ದಾ ರ-ಕಾರಸ್ಸ ಲ-ಕಾರಂ ಕತ್ವಾ. ಇಮಿನಾ ಅಞ್ಞೇಪಿ ಯೇ ಕೇಚಿ ಮಾಗವಿಕಾ ನೇಸಾದಾ ವುತ್ತಾ, ತೇ ಪಾಪಕಮ್ಮಪ್ಪಸುತತಾಯ ‘‘ಕಣ್ಹಾಭಿಜಾತೀ’’ತಿ ವದತಿ.

ಭಿಕ್ಖೂತಿ ಚ ಬುದ್ಧಸಾಸನೇ ಭಿಕ್ಖೂ. ತೇ ಕಿರ ಸಚ್ಛನ್ದರಾಗೇನ ಪರಿಭುಞ್ಜನ್ತೀತಿ ಅಧಿಪ್ಪಾಯೇನ ಚತೂಸು ಪಚ್ಚಯೇಸು ಕಣ್ಟಕೇ ಪಕ್ಖಿಪಿತ್ವಾ ಖಾದನ್ತೀತಿ ‘‘ಕಣ್ಟಕವುತ್ತಿಕಾ’’ತಿ ವದತಿ. ಕಸ್ಮಾತಿ ಚೇ? ಯಸ್ಮಾ ತೇ ಪಣೀತೇ ಪಚ್ಚಯೇ ಪಟಿಸೇವನ್ತೀತಿ ತಸ್ಸ ಮಿಚ್ಛಾಗಾಹೋ. ಞಾಯಲದ್ಧೇಪಿ ಪಚ್ಚಯೇ ಭುಞ್ಜಮಾನಾ ಆಜೀವಕಸಮಯಸ್ಸ ವಿಲೋಮಗ್ಗಾಹಿತಾಯ ಪಚ್ಚಯೇಸು ಕಣ್ಟಕೇ ಪಕ್ಖಿಪಿತ್ವಾ ಖಾದನ್ತಿ ನಾಮಾತಿ ವದತೀತಿ. ಅಥ ವಾ ಕಣ್ಟಕವುತ್ತಿಕಾ ಏವಂನಾಮಕಾ ಏಕೇ ಪಬ್ಬಜಿತಾ, ಯೇ ಸವಿಸೇಸಂ ಅತ್ತಕಿಲಮಥಾನುಯೋಗಂ ಅನುಯುತ್ತಾ. ತಥಾ ಹಿ ತೇ ಕಣ್ಟಕೇ ವತ್ತನ್ತಾ ವಿಯ ಹೋನ್ತೀತಿ ‘‘ಕಣ್ಟಕವುತ್ತಿಕಾ’’ತಿ ವುತ್ತಾ. ಇಮಮೇವ ಚ ಅತ್ಥವಿಕಪ್ಪಂ ಸನ್ಧಾಯಾಹ ‘‘ಕಣ್ಟಕವುತ್ತಿಕಾತಿ ಸಮಣಾ ನಾಮೇತೇ’’ತಿ.

ಲೋಹಿತಾಭಿಜಾತಿ ನಾಮ ನಿಗಣ್ಠಾ ಏಕಸಾಟಕಾತಿ ವುತ್ತಾ. ತೇ ಕಿರ ಠತ್ವಾ ಭುಞ್ಜನನಹಾನಪ್ಪಟಿಕ್ಖೇಪಾದಿವತಸಮಾಯೋಗೇನ ಪುರಿಮೇಹಿ ದ್ವೀಹಿ ಪಣ್ಡರತರಾ.

ಅಚೇಲಕಸಾವಕಾತಿ ಆಜೀವಕಸಾವಕೇ ವದತಿ. ತೇ ಕಿರ ಆಜೀವಕಲದ್ಧಿಯಾ ಸುವಿಸುದ್ಧಚಿತ್ತತಾಯ ನಿಗಣ್ಠೇಹಿಪಿ ಪಣ್ಡರತರಾ. ಏವಞ್ಚ ಕತ್ವಾ ಅತ್ತನೋ ಪಚ್ಚಯದಾಯಕೇ ನಿಗಣ್ಠೇಹಿಪಿ ಜೇಟ್ಠಕತರೇ ಕರೋತಿ.

ಆಜೀವಕಾ ಆಜೀವಕಿನಿಯೋ ‘‘ಸುಕ್ಕಾಭಿಜಾತೀ’’ತಿ ವುತ್ತಾ. ತೇ ಕಿರ ಪುರಿಮೇಹಿ ಚತೂಹಿ ಪಣ್ಡರತರಾ. ನನ್ದಾದಯೋ ಹಿ ತಥಾರೂಪಂ ಆಜೀವಕಪ್ಪಟಿಪತ್ತಿಂ ಉಕ್ಕಂಸಂ ಪಾಪೇತ್ವಾ ಠಿತಾ, ತಸ್ಮಾ ನಿಗಣ್ಠೇಹಿ ಆಜೀವಕಸಾವಕೇಹಿ ಚ ಪಣ್ಡರತರಾತಿ ‘‘ಪರಮಸುಕ್ಕಾಭಿಜಾತೀ’’ತಿ ವುತ್ತಾ.

ಬಿಲಂ ಓಲಗ್ಗೇಯ್ಯುನ್ತಿ ಮಂಸಭಾಗಂ ನ್ಹಾರುನಾ ವಾ ಕೇನಚಿ ವಾ ಗನ್ಥಿತ್ವಾ ಪುರಿಸಸ್ಸ ಹತ್ಥೇ ವಾ ಕೇಸೇ ವಾ ಓಲಮ್ಬನವಸೇನ ಬನ್ಧೇಯ್ಯುಂ. ಇಮಿನಾ ಸತ್ಥಧಮ್ಮಂ ನಾಮ ದಸ್ಸೇತಿ. ಸತ್ಥವಾಹೋ ಕಿರ ಮಹಾಕನ್ತಾರಂ ಪಟಿಪನ್ನೋ ಅನ್ತರಾಮಗ್ಗೇ ಗೋಣೇ ಮತೇ ಮಂಸಂ ಗಹೇತ್ವಾ ಸಬ್ಬೇಸಂ ಸತ್ಥಿಕಾನಂ ‘‘ಇದಂ ಖಾದಿತ್ವಾ ಏತ್ತಕಂ ಮೂಲಂ ದಾತಬ್ಬ’’ನ್ತಿ ಕೋಟ್ಠಾಸಂ ಓಲಮ್ಬತಿ. ಗೋಣಮಂಸಂ ನಾಮ ಖಾದನ್ತಾಪಿ ಅತ್ಥಿ, ಅಖಾದನ್ತಾಪಿ ಅತ್ಥಿ, ಖಾದನ್ತಾಪಿ ಮೂಲಂ ದಾತುಂ ಸಕ್ಕೋನ್ತಾಪಿ ಅಸಕ್ಕೋನ್ತಾಪಿ. ಸತ್ಥವಾಹೋ ಯೇನ ಮೂಲೇನ ಗೋಣೋ ಗಹಿತೋ, ತಂ ಮೂಲಂ ಸತ್ಥಿಕೇಹಿ ಧಾರಣತ್ಥಂ ಸಬ್ಬೇಸಂ ಬಲಕ್ಕಾರೇನ ಕೋಟ್ಠಾಸಂ ದತ್ವಾ ಮೂಲಂ ಗಣ್ಹಾತಿ. ಅಯಂ ಸತ್ಥಧಮ್ಮೋ.

ಕಣ್ಹಾಭಿಜಾತಿಯೋ ಸಮಾನೋತಿ ಕಣ್ಹೇ ನೀಚಕುಲೇ ಜಾತೋ ಹುತ್ವಾ. ಕಣ್ಹಧಮ್ಮನ್ತಿ ಪಚ್ಚತ್ತೇ ಉಪಯೋಗವಚನನ್ತಿ ಆಹ ‘‘ಕಣ್ಹಸಭಾವೋ ಹುತ್ವಾ ಅಭಿಜಾಯತೀ’’ತಿ, ತಂ ಅನ್ತೋಗಧಹೇತುಅತ್ಥಂ ಪದಂ, ಉಪ್ಪಾದೇತೀತಿ ಅತ್ಥೋ. ತಸ್ಮಾ ಕಣ್ಹಂ ಧಮ್ಮಂ ಅಭಿಜಾಯತೀತಿ ಕಾಳಕಂ ದಸದುಸ್ಸೀಲ್ಯಧಮ್ಮಂ ಉಪ್ಪಾದೇತಿ. ಸುಕ್ಕಂ ಧಮ್ಮಂ ಅಭಿಜಾಯತೀತಿ ಏತ್ಥಾಪಿ ಇಮಿನಾ ನಯೇನ ಅತ್ಥೋ ವೇದಿತಬ್ಬೋ. ಸೋ ಹಿ ‘‘ಅಹಂ ಪುಬ್ಬೇಪಿ ಪುಞ್ಞಾನಂ ಅಕತತ್ತಾ ನೀಚಕುಲೇ ನಿಬ್ಬತ್ತೋ, ಇದಾನಿ ಪುಞ್ಞಂ ಕರಿಸ್ಸಾಮೀ’’ತಿ ಪುಞ್ಞಸಙ್ಖಾತಂ ಪಣ್ಡರಧಮ್ಮಂ ಕರೋತಿ.

ಅಕಣ್ಹಂ ಅಸುಕ್ಕಂ ನಿಬ್ಬಾನನ್ತಿ ಸಚೇ ಕಣ್ಹಂ ಭವೇಯ್ಯ, ಕಣ್ಹವಿಪಾಕಂ ದದೇಯ್ಯ ಯಥಾ ದಸವಿಧಂ ದುಸ್ಸೀಲ್ಯಧಮ್ಮಂ. ಸಚೇ ಸುಕ್ಕಂ, ಸುಕ್ಕವಿಪಾಕಂ ದದೇಯ್ಯ ಯಥಾ ದಾನಸೀಲಾದಿಕುಸಲಕಮ್ಮಂ. ದ್ವಿನ್ನಮ್ಪಿ ಅಪ್ಪದಾನತೋ ‘‘ಅಕಣ್ಹಂ ಅಸುಕ್ಕ’’ನ್ತಿ ವುತ್ತಂ. ನಿಬ್ಬಾನಞ್ಚ ನಾಮ ಇಮಸ್ಮಿಂ ಅತ್ಥೇ ಅರಹತ್ತಂ ಅಧಿಪ್ಪೇತಂ ‘‘ಅಭಿಜಾಯತೀ’’ತಿ ವಚನತೋ. ತಞ್ಹಿ ಕಿಲೇಸನಿಬ್ಬಾನನ್ತೇ ಜಾತತ್ತಾ ನಿಬ್ಬಾನಂ ನಾಮ ಯಥಾ ‘‘ರಾಗಾದೀನಂ ಖಯನ್ತೇ ಜಾತತ್ತಾ ರಾಗಕ್ಖಯೋ, ದೋಸಕ್ಖಯೋ, ಮೋಹಕ್ಖಯೋ’’ತಿ. ಪಟಿಪ್ಪಸ್ಸಮ್ಭನವಸೇನ ವಾ ಕಿಲೇಸಾನಂ ನಿಬ್ಬಾಪನತೋ ನಿಬ್ಬಾನಂ. ತಂ ಏಸ ಅಭಿಜಾಯತಿ ಪಸವತಿ. ಇಧಾಪಿ ಹಿ ಅನ್ತೋಗಧಹೇತು ಅತ್ಥಂ ‘‘ಜಾಯತೀ’’ತಿ ಪದಂ. ಅಟ್ಠಕಥಾಯಂ ಪನ ‘‘ಜಾಯತೀ’’ತಿ ಇಮಸ್ಸ ಪಾಪುಣಾತೀಹಿ ಅತ್ಥಂ ಗಹೇತ್ವಾವ ‘‘ನಿಬ್ಬಾನಂ ಪಾಪುಣಾತೀ’’ತಿ ವುತ್ತಂ. ಸುಕ್ಕಾಭಿಜಾತಿಯೋ ಸಮಾನೋತಿ ಸುಕ್ಕೇ ಉಚ್ಚಕುಲೇ ಜಾತೋ ಹುತ್ವಾ. ಸೇಸಮೇತ್ಥ ಸುವಿಞ್ಞೇಯ್ಯಮೇವ.

ಛಳಭಿಜಾತಿಸುತ್ತವಣ್ಣನಾ ನಿಟ್ಠಿತಾ.