೭. ಖೇಮಸುತ್ತವಣ್ಣನಾ

೪೯. ಸತ್ತಮೇ ವುತ್ಥಬ್ರಹ್ಮಚರಿಯವಾಸೋತಿ ನಿವುತ್ಥಬ್ರಹ್ಮಚರಿಯವಾಸೋ. ಕತಕರಣೀಯೋತಿ ಏತ್ಥ ಕರಣೀಯನ್ತಿ ಪರಿಞ್ಞಾಪಹಾನಭಾವನಾಸಚ್ಛಿಕಿರಿಯಮಾಹ. ತಂ ಪನ ಯಸ್ಮಾ ಚತೂಹಿ ಮಗ್ಗೇಹಿ ಪಚ್ಚೇಕಂ ಚತೂಸು ಸಚ್ಚೇಸು ಕತ್ತಬ್ಬತ್ತಾ ಸೋಳಸವಿಧಂ ವೇದಿತಬ್ಬಂ. ತೇನಾಹ ‘‘ಚತೂಹಿ ಮಗ್ಗೇಹಿ ಕತ್ತಬ್ಬ’’ನ್ತಿ. ಖನ್ಧಕಿಲೇಸಅಭಿಸಙ್ಖಾರಸಙ್ಖಾತಾ ತಯೋ ಓಸೀದಾಪನಟ್ಠೇನ ಭಾರಾ ವಿಯಾತಿ ಭಾರಾ. ತೇ ಓಹಿತಾ ಓರೋಪಿತಾ ನಿಕ್ಖಿತ್ತಾ ಪಾತಿತಾ ಏತೇನಾತಿ ಓಹಿತಭಾರೋ. ತೇನಾಹ ‘‘ಖನ್ಧಭಾರಂ…ಪೇ… ಓತಾರೇತ್ವಾ ಠಿತೋ’’ತಿ. ಅನುಪ್ಪತ್ತೋ ಸದತ್ಥನ್ತಿ ಅನುಪ್ಪತ್ತಸದತ್ಥೋ. ಸದತ್ಥೋತಿ ಚ ಸಕತ್ಥಮಾಹ ಕ-ಕಾರಸ್ಸ ದ-ಕಾರಂ ಕತ್ವಾ. ಏತ್ಥ ಹಿ ಅರಹತ್ತಂ ಅತ್ತನೋ ಯೋನಿಸೋಮನಸಿಕಾರಾಯತ್ತತ್ತಾ ಅತ್ತೂಪನಿಬನ್ಧಟ್ಠೇನ ಸಸನ್ತಾನಪರಿಯಾಪನ್ನತ್ತಾ ಅತ್ತಾನಂ ಅವಿಜಹನಟ್ಠೇನ ಅತ್ತನೋ ಉತ್ತಮತ್ಥೇನ ಚ ಅತ್ತನೋ ಅತ್ಥತ್ತಾ ‘‘ಸಕತ್ಥೋ’’ತಿ ವುಚ್ಚತಿ. ತೇನಾಹ ‘‘ಸದತ್ಥೋ ವುಚ್ಚತಿ ಅರಹತ್ತ’’ನ್ತಿ. ಸಮ್ಮದಞ್ಞಾ ವಿಮುತ್ತೋತಿ ಸಮ್ಮಾ ಅಞ್ಞಾಯ ವಿಮುತ್ತೋ, ಅಚ್ಛಿನ್ನಭೂತಾಯ ಮಗ್ಗಪಞ್ಞಾಯ ಸಮ್ಮಾ ಯಥಾಭೂತಂ ದುಕ್ಖಾದೀಸು ಯೋ ಯಥಾ ಜಾನಿತಬ್ಬೋ, ತಥಾ ಜಾನಿತ್ವಾ ವಿಮುತ್ತೋತಿ ಅತ್ಥೋ. ತೇನಾಹ ‘‘ಸಮ್ಮಾ ಹೇತುನಾ’’ತಿಆದಿ. ವಿಮುತ್ತೋತಿ ಚ ದ್ವೇ ವಿಮುತ್ತಿಯೋ ಸಬ್ಬಸ್ಸ ಚಿತ್ತಸಂಕಿಲೇಸಸ್ಸ ಮಗ್ಗೋ ನಿಬ್ಬಾನಾಧಿಮುತ್ತಿ ಚ. ನಿಬ್ಬಾನೇ ಅಧಿಮುಚ್ಚನಂ ತತ್ಥ ನಿನ್ನಪೋಣಪಬ್ಭಾರತಾಯ. ಅರಹಾ ಸಬ್ಬಕಿಲೇಸೇಹಿ ವಿಮುತ್ತಚಿತ್ತತ್ತಾ ಚಿತ್ತವಿಮುತ್ತಿಯಾ ವಿಮುತ್ತೋ. ನಿಬ್ಬಾನಂ ಅಧಿಮುತ್ತತ್ತಾ ನಿಬ್ಬಾನೇ ವಿಮುತ್ತೋ. ಸೇಸಮೇತ್ಥ ಉತ್ತಾನಮೇವ.

ಖೇಮಸುತ್ತವಣ್ಣನಾ ನಿಟ್ಠಿತಾ.