೩. ಉಗ್ಗಹಸುತ್ತವಣ್ಣನಾ

೩೩. ತತಿಯೇ ಸಬ್ಬಪಠಮಂ ಉಟ್ಠಾನಸೀಲಾತಿ ರತ್ತಿಯಾ ವಿಭಾಯನವೇಲಾಯ ಸಾಮಿಕೇ ಪರಿಜನೇ ಸೇಯ್ಯಾಯ ಅವುಟ್ಠಿತೇ ಸಬ್ಬಪಠಮಂ ಉಟ್ಠಾನಸೀಲಾ. ಸಾಮಿಕಂ ದಿಸ್ವಾ ನಿಸಿನ್ನಾಸನತೋ ಅಗ್ಗಿದಡ್ಢಾ ವಿಯ ಪಠಮಮೇವ ವುಟ್ಠಹನ್ತೀತಿ ವಾ ಪುಬ್ಬುಟ್ಠಾಯಿನಿಯೋ. ಕಿಂಕಾರನ್ತಿ ಕಿಂಕರಣೀಯಂ, ಕಿಂಕರಣಭಾವೇನ ಪುಚ್ಛಿತ್ವಾ ಕಾತಬ್ಬವೇಯ್ಯಾವಚ್ಚನ್ತಿ ಅತ್ಥೋ. ತಂ ಪಟಿಸ್ಸುಣನ್ತಾ ವಿಚರನ್ತೀತಿ ಕಿಂಕಾರಪ್ಪಟಿಸ್ಸಾವಿನಿಯೋ. ಮನಾಪಂಯೇವ ಕಿರಿಯಂ ಕರೋನ್ತಿ ಸೀಲೇನಾತಿ ಮನಾಪಚಾರಿನಿಯೋ. ಪಿಯಮೇವ ವದನ್ತಿ ಸೀಲೇನಾತಿ ಪಿಯವಾದಿನಿಯೋ.

ತತ್ರುಪಾಯಾಯಾತಿ ತತ್ರ ಕಮ್ಮೇ ಸಾಧೇತಬ್ಬಉಪಾಯಭೂತಾಯ ವೀಮಂಸಾಯ. ತೇನಾಹ ‘‘ತಸ್ಮಿಂ ಉಣ್ಣಾಕಪ್ಪಾಸಸಂವಿಧಾನೇ’’ತಿಆದಿ. ಅಲಂ ಕಾತುನ್ತಿ ಕಾತುಂ ಸಮತ್ಥಾ. ಅಲಂ ಸಂವಿಧಾತುನ್ತಿ ವಿಚಾರೇತುಂ ಸಮತ್ಥಾ. ತೇನಾಹ ‘‘ಅಲಂ ಕಾತುಂ ಅಲಂ ಸಂವಿಧಾತುನ್ತಿ ಅತ್ತನಾ ಕಾತುಮ್ಪಿ ಪರೇಹಿ ಕಾರಾಪೇತುಮ್ಪೀ’’ತಿಆದಿ. ಸೇಸಮೇತ್ಥ ಸುವಿಞ್ಞೇಯ್ಯಮೇವ.

ಉಗ್ಗಹಸುತ್ತವಣ್ಣನಾ ನಿಟ್ಠಿತಾ.