೭-೯. ಚೋದನಾಸುತ್ತಾದಿವಣ್ಣನಾ

೧೬೭-೯. ಸತ್ತಮೇ ವತ್ಥುಸನ್ದಸ್ಸನಾತಿ ಯಸ್ಮಿಂ ವತ್ಥುಸ್ಮಿಂ ಆಪತ್ತಿ, ತಸ್ಸ ಸರೂಪತೋ ದಸ್ಸನಂ. ಆಪತ್ತಿಸನ್ದಸ್ಸನಾತಿ ಯಂ ಆಪತ್ತಿಂ ಸೋ ಆಪನ್ನೋ, ತಸ್ಸಾ ದಸ್ಸನಂ. ಸಂವಾಸಪ್ಪಟಿಕ್ಖೇಪೋತಿ ಉಪೋಸಥಪ್ಪವಾರಣಾದಿಸಂವಾಸಸ್ಸ ಪಟಿಕ್ಖಿಪನಂ ಅಕರಣಂ. ಸಾಮೀಚಿಪ್ಪಟಿಕ್ಖೇಪೋತಿ ಅಭಿವಾದನಾದಿಸಾಮೀಚಿಕಿರಿಯಾಯ ಅಕರಣಂ. ಚೋದಯಮಾನೇನಾತಿ ಚೋದೇನ್ತೇನ. ಚುದಿತಕಸ್ಸ ಕಾಲೋತಿ ಚುದಿತಕಸ್ಸ ಚೋದೇತಬ್ಬಕಾಲೋ. ಪುಗ್ಗಲನ್ತಿ ಚೋದೇತಬ್ಬಪುಗ್ಗಲಂ. ಉಪಪರಿಕ್ಖಿತ್ವಾತಿ ‘‘ಅಯಂ ಚುದಿತಕಲಕ್ಖಣೇ ತಿಟ್ಠತಿ, ನ ತಿಟ್ಠತೀ’’ತಿ ವೀಮಂಸಿತ್ವಾ. ಅಯಸಂ ಆರೋಪೇತೀತಿ ‘‘ಇಮೇ ಮಂ ಅಭೂತೇನ ಅಬ್ಭಾಚಿಕ್ಖನ್ತಾ ಅಯಸಂ ಬ್ಯಸನಂ ಉಪ್ಪಾದೇನ್ತೀ’’ತಿ ಭಿಕ್ಖೂನಂ ಅಯಸಂ ಉಪ್ಪಾದೇತಿ. ಅಟ್ಠಮನವಮಾನಿ ಉತ್ತಾನತ್ಥಾನೇವ.

ಚೋದನಾಸುತ್ತಾದಿವಣ್ಣನಾ ನಿಟ್ಠಿತಾ.