೭-೧೦. ಅಸಪ್ಪುರಿಸದಾನಸುತ್ತಾದಿವಣ್ಣನಾ

೧೪೭-೧೫೦. ಸತ್ತಮೇ ಅಸಕ್ಕಚ್ಚನ್ತಿ ಅನಾದರಂ ಕತ್ವಾ. ದೇಯ್ಯಧಮ್ಮಸ್ಸ ಅಸಕ್ಕಚ್ಚಕರಣಂ ನಾಮ ಅಸಮ್ಪನ್ನಂ ಕರೋತೀತಿ ಆಹ ‘‘ನ ಸಕ್ಕರಿತ್ವಾ ಸುಚಿಂ ಕತ್ವಾ ದೇತೀ’’ತಿ, ಉತ್ತಣ್ಡುಲಾದಿದೋಸವಿರಹಿತಂ ಸುಚಿಸಮ್ಪನ್ನಂ ಕತ್ವಾ ನ ದೇತೀತಿ ಅತ್ಥೋ. ಅಚಿತ್ತೀಕತ್ವಾತಿ ನ ಚಿತ್ತೇ ಕತ್ವಾ, ನ ಪೂಜೇತ್ವಾತಿ ಅತ್ಥೋ. ಪೂಜೇನ್ತೋ ಹಿ ಪೂಜೇತಬ್ಬವತ್ಥುಂ ಚಿತ್ತೇ ಠಪೇತಿ, ನ ತತೋ ಬಹಿ ಕರೋತಿ. ಚಿತ್ತಂ ವಾ ಅಚ್ಛರಿಯಂ ಕತ್ವಾ ಪಟಿಪತ್ತಿವಿಕರಣಂ ಸಮ್ಭಾವನಕಿರಿಯಾ, ತಪ್ಪಟಿಕ್ಖೇಪತೋ ಅಚಿತ್ತೀಕರಣಂ ಅಸಮ್ಭಾವನಕಿರಿಯಾ. ಅಗಾರವೇನ ದೇತೀತಿ ಪುಗ್ಗಲೇ ಅಗರುಂ ಕರೋನ್ತೋ ನಿಸೀದನಟ್ಠಾನೇ ಅಸಮ್ಮಜ್ಜಿತ್ವಾ ಯತ್ಥ ವಾ ತತ್ಥ ವಾ ನಿಸೀದಾಪೇತ್ವಾ ಯಂ ವಾ ತಂ ವಾ ಆಧಾರಕಂ ಠಪೇತ್ವಾ ದಾನಂ ದೇತಿ. ಅಸಹತ್ಥಾತಿ ನ ಅತ್ತನೋ ಹತ್ಥೇನ ದೇತಿ, ದಾಸಕಮ್ಮಕರೋದೀಹಿ ದಾಪೇತಿ. ಅಪವಿದ್ಧಂ ದೇತೀತಿ ಅನ್ತರಾ ಅಪವಿದ್ಧಂ ವಿಚ್ಛೇದಂ ಕತ್ವಾ ದೇತಿ. ತೇನಾಹ ‘‘ನ ನಿರನ್ತರಂ ದೇತೀ’’ತಿ. ಅಥ ವಾ ಅಪವಿದ್ಧಂ ದೇತೀತಿ ಉಚ್ಛಿಟ್ಠಾದಿಛಡ್ಡನೀಯಧಮ್ಮಂ ವಿಯ ಅವಕ್ಖಿತ್ತಕಂ ಕತ್ವಾ ದೇತಿ. ತೇನಾಹ ‘‘ಛಡ್ಡೇತುಕಾಮೋ ವಿಯ ದೇತೀ’’ತಿ. ‘‘ಅದ್ಧಾ ಇಮಸ್ಸ ದಾನಸ್ಸ ಫಲಮೇವ ಆಗಚ್ಛತೀ’’ತಿ ಏವಂ ಯಸ್ಸ ಕಮ್ಮಸ್ಸಕತಾದಿಟ್ಠಿ ಅತ್ಥಿ, ಸೋ ಆಗಮನದಿಟ್ಠಿಕೋ, ಅಯಂ ಪನ ನ ತಾದಿಸೋತಿ ಅನಾಗಮನದಿಟ್ಠಿಕೋ. ತೇನಾಹ ‘‘ಕತಸ್ಸ ನಾಮ ಫಲಂ ಆಗಮಿಸ್ಸತೀ’’ತಿಆದಿ. ಅಟ್ಠಮಾದೀಸು ನತ್ಥಿ ವತ್ತಬ್ಬಂ.

ಅಸಪ್ಪುರಿಸದಾನಸುತ್ತಾದಿವಣ್ಣನಾ ನಿಟ್ಠಿತಾ.

ತಿಕಣ್ಡಕೀವಗ್ಗವಣ್ಣನಾ ನಿಟ್ಠಿತಾ.

ತತಿಯಪಣ್ಣಾಸಕಂ ನಿಟ್ಠಿತಂ.