೩. ಕುಹಕಸುತ್ತವಣ್ಣನಾ

೮೩. ತತಿಯೇ ತೀಹಿ ಕುಹನವತ್ಥೂಹೀತಿ ಸಾಮನ್ತಜಪ್ಪನಇರಿಯಾಪಥಸನ್ನಿಸ್ಸಿತಪಚ್ಚಯಪ್ಪಟಿಸೇವನಭೇದತೋ ತಿಪ್ಪಭೇದೇಹಿ ಕುಹನವತ್ಥೂಹಿ. ತಿವಿಧೇನ ಕುಹನವತ್ಥುನಾ ಲೋಕಂ ಕುಹಯತಿ ವಿಮ್ಹಾಪಯತಿ ‘‘ಅಹೋ ಅಚ್ಛರಿಯಪುರಿಸೋ’’ತಿ ಅತ್ತನಿ ಪರೇಸಂ ವಿಮ್ಹಯಂ ಉಪ್ಪಾದೇತೀತಿ ಕುಹಕೋ. ಲಾಭಸಕ್ಕಾರತ್ಥಿಕೋ ಹುತ್ವಾ ಲಪತಿ ಅತ್ತಾನಂ ದಾಯಕಂ ವಾ ಉಕ್ಖಿಪಿತ್ವಾ ಯಥಾ ಸೋ ಕಿಞ್ಚಿ ದದಾತಿ, ಏವಂ ಉಕ್ಕಾಚೇತ್ವಾ ಕಥೇತೀತಿ ಲಪಕೋ. ನಿಮಿತ್ತಂ ಸೀಲಂ ತಸ್ಸಾತಿ ನೇಮಿತ್ತಿಕೋ, ನಿಮಿತ್ತೇನ ವಾ ಚರತಿ, ನಿಮಿತ್ತಂ ವಾ ಕರೋತೀತಿ ನೇಮಿತ್ತಿಕೋ. ನಿಮಿತ್ತನ್ತಿ ಚ ಪರೇಸಂ ಪಚ್ಚಯದಾನಸಞ್ಞುಪ್ಪಾದಕಂ ಕಾಯವಚೀಕಮ್ಮಂ ವುಚ್ಚತಿ. ನಿಪ್ಪೇಸೋ ಸೀಲಮಸ್ಸಾತಿ ನಿಪ್ಪೇಸಿಕೋ. ನಿಪ್ಪಿಸತೀತಿ ವಾ ನಿಪ್ಪೇಸೋ, ನಿಪ್ಪೇಸೋಯೇವ ನಿಪ್ಪೇಸಿಕೋ. ನಿಪ್ಪೇಸೋತಿ ಚ ಸಠಪುರಿಸೋ ವಿಯ ಲಾಭಸಕ್ಕಾರತ್ಥಂ ಅಕ್ಕೋಸನುಪ್ಪಣ್ಡನಪರಪಿಟ್ಠಿಮಂಸಿಕತಾದಿ.

ಕುಹಕಸುತ್ತವಣ್ಣನಾ ನಿಟ್ಠಿತಾ.