(೧೯) ೪. ಬ್ರಾಹ್ಮಣವಗ್ಗೋ

೧-೩. ಯೋಧಾಜೀವಸುತ್ತಾದಿವಣ್ಣನಾ

೧೮೧-೧೮೩. ಚತುತ್ಥಸ್ಸ ಪಠಮಾದೀನಿ ಉತ್ತಾನತ್ಥಾನೇವ.

೪. ಅಭಯಸುತ್ತವಣ್ಣನಾ

೧೮೪. ಚತುತ್ಥೇ ಸೋಚತೀತಿ ಚಿತ್ತೇ ಉಪ್ಪನ್ನಬಲವಸೋಕೇನ ಸೋಚತಿ, ಚಿತ್ತಸನ್ತಾಪೇನ ಅನ್ತೋ ನಿಜ್ಝಾಯತೀತಿ ಅತ್ಥೋ. ಕಿಲಮತೀತಿ ತಸ್ಸೇವ ಸೋಕಸ್ಸ ವಸೇನ ಕಾಯೇ ಚ ಉಪ್ಪನ್ನದುಕ್ಖೇನ ಕಿಲಮತಿ. ಪರಿದೇವತೀತಿ ಸೋಕುದ್ದೇಹಕವಸೇನ ತಂ ತಂ ವಿಪ್ಪಲಪನ್ತೋ ವಾಚಾಯ ಪರಿದೇವತಿ. ಉರತ್ತಾಳಿನ್ತಿ ಉರತ್ತಾಳಂ, ಉರಂ ತಾಳೇತ್ವಾತಿ ಅತ್ಥೋ. ತೇನಾಹ ‘‘ಉರಂ ತಾಳೇತ್ವಾ’’ತಿ. ಕಙ್ಖಾವಿಚಿಕಿಚ್ಛಾತಿ ಏತ್ಥ ‘‘ಏಕಮೇವಿದಂ ಪಞ್ಚಮಂ ನೀವರಣಂ. ಕಿಂ ನು ಖೋ ಇದ’’ನ್ತಿ ಆರಮ್ಮಣಂ ಕಙ್ಖನತೋ ಕಙ್ಖಾ, ‘‘ಇದಮೇವ ವರ’’ನ್ತಿ ನಿಚ್ಛೇತುಂ ಅಸಮತ್ಥಭಾವತೋ ‘‘ವಿಚಿಕಿಚ್ಛಾ’’ತಿ ವುಚ್ಚತಿ – ‘‘ಧಮ್ಮಸಭಾವಂ ವಿಚಿನನ್ತೋ ಕಿಚ್ಛತಿ, ವಿಗತಾ ಚಿಕಿಚ್ಛಾ’’ತಿ ವಾ ಕತ್ವಾ.

ಅಭಯಸುತ್ತವಣ್ಣನಾ ನಿಟ್ಠಿತಾ.

೫. ಬ್ರಾಹ್ಮಣಸಚ್ಚಸುತ್ತವಣ್ಣನಾ

೧೮೫. ಪಞ್ಚಮೇ ಏತ್ಥಾತಿ ಏತಸ್ಮಿಂ ಸುಞ್ಞತಾನುಪಸ್ಸನಾಧಿಕಾರೇ. ಕ್ವಚೀತಿ ಕತ್ಥಚಿ ಠಾನೇ, ಕಾಲೇ, ಧಮ್ಮೇ ವಾ. ಅಥ ವಾ ಕ್ವಚೀತಿ ಅಜ್ಝತ್ತಂ ಬಹಿದ್ಧಾ ವಾ. ಅತ್ತನೋ ಅತ್ತಾನನ್ತಿ ಸಕತ್ತಾನಂ ‘‘ಅಯಂ ಖೋ, ಭೋ ಬ್ರಹ್ಮಾ, ಮಹಾಬ್ರಹ್ಮಾ…ಪೇ… ವಸೀ ಪಿತಾ ಭೂತಭಬ್ಯಾನ’’ನ್ತಿಆದಿನಾ (ದೀ. ನಿ. ೧.೪೨) ಪರೇಹಿ ಪರಿಕಪ್ಪಿತಂ ಅತ್ತಾನಞ್ಚ ಕಸ್ಸಚಿ ಕಿಞ್ಚನಭೂತಂ ನ ಪಸ್ಸತೀತಿ ದಸ್ಸೇನ್ತೋ ‘‘ಕಸ್ಸಚೀ’’ತಿಆದಿಮಾಹ. ತತ್ಥ ಪರಸ್ಸಾತಿ ಪರಜಾತಿ ಪರೋ ಪುರಿಸೋತಿ ವಾ ಏವಂ ಗಹಿತಸ್ಸ. ನ ಚ ಮಮ ಕ್ವಚನೀತಿ ಏತ್ಥ ಮಮ-ಸದ್ದೋ ಅಟ್ಠಾನಪ್ಪಯುತ್ತೋತಿ ಆಹ ‘‘ಮಮ-ಸದ್ದಂ ತಾವ ಠಪೇತ್ವಾ’’ತಿ. ಪರಸ್ಸ ಚಾತಿ ಅತ್ತನೋ ಅಞ್ಞಸ್ಸ. ಪರೋ ಪುರಿಸೋ ನಾಮ ಅತ್ಥಿ ಮಮತ್ಥಾಯ ಠಿತೋ. ತಸ್ಸ ವಸೇನ ಮಯ್ಹಂ ಸಬ್ಬಂ ಇಜ್ಝತೀತಿ ಏಕಚ್ಚದಿಟ್ಠಿಗತಿಕಪರಿಕಪ್ಪಿತವಸೇನ ಪರಂ ಅತ್ತಾನಂ ತಞ್ಚ ಅತ್ತನೋ ಕಿಞ್ಚನಭೂತಂ ನ ಪಸ್ಸತೀತಿ ದಸ್ಸೇನ್ತೋ ‘‘ನ ಚ ಕ್ವಚನೀ’’ತಿಆದಿಮಾಹ. ಏತ್ಥ ಚ ನಾಹಂ ಕ್ವಚನೀತಿ ಸಕಅತ್ತನೋ ಸಬ್ಭಾವಂ ನ ಪಸ್ಸತಿ. ನ ಕಸ್ಸಚಿ ಕಿಞ್ಚನತಸ್ಮಿನ್ತಿ ಸಕಅತ್ತನೋ ಏವ ಕಸ್ಸಚಿ ಅತ್ತನಿಯತಂ ನ ಪಸ್ಸತಿ. ನ ಚ ಮಮಾತಿ ಏತಂ ದ್ವಯಂ ಯಥಾರಹಂ ಸಮ್ಬನ್ಧಿತಬ್ಬಂ, ಅತ್ಥಿ-ಪದಂ ಪಚ್ಚೇಕಂ. ನ ಚ ಕ್ವಚನಿ ಪರಸ್ಸ ಅತ್ತಾ ಅತ್ಥೀತಿ ಪರಸ್ಸ ಅತ್ತನೋ ಅಭಾವಂ ಪಸ್ಸತಿ. ತಸ್ಸ ಪರಸ್ಸ ಅತ್ತನೋ ಮಮ ಕಿಞ್ಚನತಾ ನತ್ಥೀತಿ ಪರಸ್ಸ ಅತ್ತನೋ ಅನತ್ತನಿಯತಂ ಪಸ್ಸತಿ. ಏವಂ ಅಜ್ಝತ್ತಂ ಬಹಿದ್ಧಾ ಖನ್ಧಾನಂ ಅತ್ತತ್ತನಿಯಸುಞ್ಞತಾ-ಸುದ್ಧಸಙ್ಖಾರಪುಞ್ಜತಾ-ಚತುಕೋಟಿಕಸುಞ್ಞತಾಪರಿಗ್ಗಣ್ಹನೇನ ನಿಟ್ಠಾ ಹೋತಿ. ಸೇಸಮೇತ್ಥ ಸುವಿಞ್ಞೇಯ್ಯಮೇವ.

ಬ್ರಾಹ್ಮಣಸಚ್ಚಸುತ್ತವಣ್ಣನಾ ನಿಟ್ಠಿತಾ.

೬. ಉಮ್ಮಗ್ಗಸುತ್ತವಣ್ಣನಾ

೧೮೬. ಛಟ್ಠೇ ಆಕಡ್ಢೀಯತೀತಿ ಚಿತ್ತವಸಿಕೋ ಲೋಕೋ ತತ್ಥ ತತ್ಥ ಉಪಕಡ್ಢೀಯತಿ. ತೇಸಂಯೇವೇತ್ಥ ಗಹಣಂ ವೇದಿತಬ್ಬನ್ತಿ ಯೇ ಅಪರಿಞ್ಞಾತವತ್ಥುಕಾ ಚಿತ್ತಸ್ಸ ವಸಂ ಗಚ್ಛನ್ತಿ, ತೇಸಂಯೇವ ಗಹಣಂ. ನ ಹಿ ಪರಿಞ್ಞಾತಕ್ಖನ್ಧಾ ಪಹೀನಕಿಲೇಸಾ ಚಿತ್ತಸ್ಸ ವಸಂ ಗಚ್ಛನ್ತಿ, ಚಿತ್ತಂ ಪನ ಅತ್ತನೋ ವಸೇ ವತ್ತೇನ್ತಿ. ಸಹ ಸೀಲೇನಾತಿ ಚಾರಿತ್ತವಾರಿತ್ತಸೀಲೇನ ಸದ್ಧಿಂ. ಪುಬ್ಬಭಾಗಪಟಿಪದನ್ತಿ ಧುತಙ್ಗಮಾದಿಂ ಕತ್ವಾ ಯಾವ ಗೋತ್ರಭುಞಾಣಂ, ತಾವ ಪವತ್ತೇತಬ್ಬಂ ಸಮಥವಿಪಸ್ಸನಾಸಙ್ಖಾತಂ ಸಮ್ಮಾಪಟಿಪದಂ. ಸೇಸಂ ಸುವಿಞ್ಞೇಯ್ಯಮೇವ.

ಉಮ್ಮಗ್ಗಸುತ್ತವಣ್ಣನಾ ನಿಟ್ಠಿತಾ.

೭. ವಸ್ಸಕಾರಸುತ್ತವಣ್ಣನಾ

೧೮೭. ಸತ್ತಮೇ ವಸ್ಸಕಾರೋ ಬ್ರಾಹ್ಮಣೋ ಮಗಧಮಹಾಮತ್ತೋತಿ ಏತ್ಥ ವಸ್ಸಕಾರೋತಿ ತಸ್ಸ ಬ್ರಾಹ್ಮಣಸ್ಸ ನಾಮಂ. ಮಹತಿಯಾ ಇಸ್ಸರಿಯಮತ್ತಾಯ ಸಮನ್ನಾಗತೋ ಮಹಾಮತ್ತೋ. ಇಸ್ಸರಿಯಮತ್ತಾಯಾತಿ ಚ ಇಸ್ಸರಿಯಪ್ಪಮಾಣೇನಾತಿ ಅತ್ಥೋ, ಇಸ್ಸರಿಯೇನ ಚೇವ ವಿತ್ತೂಪಕರಣೇನ ಚಾತಿ ಏವಂ ವಾ ಏತ್ಥ ಅತ್ಥೋ ದಟ್ಠಬ್ಬೋ, ಉಪಭೋಗೂಪಕರಣಾನಿಪಿ ಹಿ ಲೋಕೇ ‘‘ಮತ್ತಾ’’ತಿ ವುಚ್ಚನ್ತಿ. ಮಗಧರಞ್ಞೋ, ಮಗಧರಟ್ಠೇ ವಾ ಮಹಾಮತ್ತೋತಿ ಮಗಧಮಹಾಮತ್ತೋ. ತುದಿಸಞ್ಞಿತೋ ಗಾಮೋ ನಿವಾಸೋ ಏತಸ್ಸಾತಿ ತೋದೇಯ್ಯೋ. ತೇನೇವಾಹ ‘‘ತುದಿಗಾಮವಾಸಿಕಸ್ಸಾ’’ತಿ. ತುದಿಗಾಮವಾಸಿತಾ ಚಸ್ಸ ತತ್ಥ ಅಧಿಪತಿಭಾವೇನಾತಿ ದಟ್ಠಬ್ಬಾ. ಸೋ ಹಿ ತಂ ಗಾಮಂ ಸೋಣದಣ್ಡೋ ವಿಯ, ಚಮ್ಪಂ ಕೂಟದನ್ತೋ ವಿಯ, ಖಾಣುಮತಂ ಅಧಿಪತಿಭಾವೇನ ಅಜ್ಝಾವಸತಿ. ಮಹದ್ಧನೋ ಹೋತಿ ಪಞ್ಚಚತ್ತಾಲೀಸಕೋಟಿವಿಭವೋ. ಪರಿಸತೀತಿ ಪರಿಸಾಯಂ, ಜನಸಮೂಹೇತಿ ಅತ್ಥೋ. ತೇನಾಹ ‘‘ಸನ್ನಿಪತಿತಾಯ ಪರಿಸಾಯಾ’’ತಿ. ಅಭಿಪ್ಪಸನ್ನೋತಿ ಏತ್ಥ ಅಭಿಕ್ಕಮನತ್ಥೋ ಅಭಿ-ಸದ್ದೋತಿ ಆಹ ‘‘ಅತಿಕ್ಕಮ್ಮ ಪಸನ್ನೋ’’ತಿ, ಪಸಾದನೀಯಂ ಠಾನಂ ಅತಿಕ್ಕಮಿತ್ವಾ ಅಪ್ಪಸಾದನೀಯಟ್ಠಾನೇ ಪಸನ್ನೋತಿ ಅಧಿಪ್ಪಾಯೋ. ತಂ ತಂ ಕಿಚ್ಚಂ ಅತ್ಥಂ ಪಸ್ಸತೀತಿ ಅತ್ಥದಸಾ, ಅಲಂ ಸಮತ್ಥಾ ಪಟಿಬಲಾ ಅತ್ಥದಸಾ ಅಲಮತ್ಥದಸಾ, ಅಲಮತ್ಥದಸೇ ಅತಿಸಯನ್ತೀತಿ ಅಲಮತ್ಥದಸತರಾ. ತೇನಾಹ ‘‘ಅತ್ಥೇ ಪಸ್ಸಿತುಂ ಸಮತ್ಥಾ’’ತಿಆದಿ. ನೇವ ಸಪ್ಪುರಿಸಂ ನ ಅಸಪ್ಪುರಿಸಂ ಜಾನಾತಿ ಸಪ್ಪುರಿಸಧಮ್ಮಾನಂ ಅಸಪ್ಪುರಿಸಧಮ್ಮಾನಞ್ಚ ಯಾಥಾವತೋ ಅಜಾನನತೋ. ಸೇಸಮೇತ್ಥ ಉತ್ತಾನಮೇವ.

ವಸ್ಸಕಾರಸುತ್ತವಣ್ಣನಾ ನಿಟ್ಠಿತಾ.

೮. ಉಪಕಸುತ್ತವಣ್ಣನಾ

೧೮೮. ಅಟ್ಠಮೇ ನಿಬ್ಬತ್ತಿವಸೇನ ನಿರಯಂ ಅರಹತಿ, ನಿರಯಸಂವತ್ತನಿಯೇನ ವಾ ಕಮ್ಮುನಾ ನಿರಯೇ ನಿಯುತ್ತೋತಿ ನೇರಯಿಕೋ. ಅವೀಚಿಮ್ಹಿ ಉಪ್ಪಜ್ಜಿತ್ವಾ ತತ್ಥ ಆಯುಕಪ್ಪಸಞ್ಞಿತಂ ಅನ್ತರಕಪ್ಪಂ ತಿಟ್ಠತೀತಿ ಕಪ್ಪಟ್ಠೋ. ನಿರಯೂಪಪತ್ತಿಂ ಪರಿಹರಣವಸೇನ ತಿಕಿಚ್ಛಿತುಂ ಅಸಕ್ಕುಣೇಯ್ಯೋತಿ ಅತೇಕಿಚ್ಛೋ. ಅಪರಿಯಾದಿನ್ನಾವಾತಿ ಅಪರಿಕ್ಖೀಣಾಯೇವ. ಸಚೇ ಹಿ ಏಕೋ ಭಿಕ್ಖು ಕಾಯಾನುಪಸ್ಸನಂ ಪುಚ್ಛತಿ, ಅಞ್ಞೋ ವೇದನಾನುಪಸ್ಸನಂ…ಪೇ… ಚಿತ್ತಾನುಪಸ್ಸನಂ. ‘‘ಇಮಿನಾ ಪುಟ್ಠೇ ಅಹಂ ಪುಚ್ಛಾಮೀ’’ತಿ ಏಕೋ ಏಕಂ ನ ಓಲೋಕೇತಿ, ಏವಂ ಸನ್ತೇಪಿ ತೇಸಂ ವಾರೋ ಪಞ್ಞಾಯತಿ ಏವ, ಬುದ್ಧಾನಂ ಪನ ವಾರೋ ನ ಪಞ್ಞಾಯತಿ. ವಿದತ್ಥಿಚತುರಙ್ಗುಲಂ ಛಾಯಂ ಅತಿಕ್ಕಮನತೋ ಪುರೇತರಂಯೇವ ಭಗವಾ ಚುದ್ದಸವಿಧೇನ ಕಾಯಾನುಪಸ್ಸನಂ, ನವವಿಧೇನ ವೇದನಾನುಪಸ್ಸನಂ, ಸೋಳಸವಿಧೇನ ಚಿತ್ತಾನುಪಸ್ಸನಂ, ಪಞ್ಚವಿಧೇನ ಧಮ್ಮಾನುಪಸ್ಸನಂ ಕಥೇತಿ. ತಿಟ್ಠನ್ತು ವಾ ಏವಂ ಚತ್ತಾರೋ. ಸಚೇ ಹಿ ಅಞ್ಞೇ ಚತ್ತಾರೋ ಸಮ್ಮಪ್ಪಧಾನೇಸು, ಅಞ್ಞೇ ಇದ್ಧಿಪಾದೇಸು, ಅಞ್ಞೇ ಪಞ್ಚಿನ್ದ್ರಿಯೇಸು, ಅಞ್ಞೇ ಪಞ್ಚಬಲೇಸು, ಅಞ್ಞೇ ಸತ್ತಬೋಜ್ಝಙ್ಗೇಸು, ಅಞ್ಞೇ ಅಟ್ಠಮಗ್ಗಙ್ಗೇಸು ಪಞ್ಹೇ ಪುಚ್ಛೇಯ್ಯುಂ, ತಮ್ಪಿ ಭಗವಾ ಕಥೇಯ್ಯ. ತಿಟ್ಠನ್ತು ವಾ ಏತೇ ಅಟ್ಠ. ಸಚೇ ಅಞ್ಞೇ ಸತ್ತತಿಂಸ ಜನಾ ಬೋಧಿಪಕ್ಖಿಯೇಸು ಪಞ್ಹೇ ಪುಚ್ಛೇಯ್ಯುಂ, ತಮ್ಪಿ ಭಗವಾ ತಾವದೇವ ಕಥೇಯ್ಯ. ಕಸ್ಮಾ? ಯಾವತಾ ಹಿ ಲೋಕಿಯಮಹಾಜನೇ ಏಕಂ ಪದಂ ಕಥೇನ್ತೇ ತಾವ ಆನನ್ದತ್ಥೇರೋ ಅಟ್ಠ ಪದಾನಿ ಕಥೇತಿ. ಆನನ್ದತ್ಥೇರೇ ಪನ ಏಕಂ ಪದಂ ಕಥೇನ್ತೇಯೇವ ಭಗವಾ ಸೋಳಸ ಪದಾನಿ ಕಥೇತಿ. ಕಸ್ಮಾ? ಭಗವತೋ ಹಿ ಜಿವ್ಹಾ ಮುದು, ದನ್ತಾವರಣಂ ಸುಫುಸಿತಂ, ವಚನಂ ಅಗಳಿತಂ, ಭವಙ್ಗಪರಿವಾಸೋ ಲಹುಕೋ. ತೇನ ವುತ್ತಂ – ‘‘ಅಪರಿಯಾದಿನ್ನಾವಸ್ಸ ತಥಾಗತಸ್ಸ ಧಮ್ಮದೇಸನಾ, ಅಪರಿಯಾದಿನ್ನಂ ಧಮ್ಮಪದಬ್ಯಞ್ಜನ’’ನ್ತಿ.

ತತ್ಥ ಧಮ್ಮದೇಸನಾತಿ ತನ್ತಿಟ್ಠಪನಾ. ಧಮ್ಮಪದಬ್ಯಞ್ಜನನ್ತಿ ಏತ್ಥ ಧಮ್ಮೋತಿ ಪಾಳಿ. ಪಜ್ಜತಿ ಅತ್ಥೋ ಏತೇನಾತಿ ಪದಂ. ವಾಕ್ಯಞ್ಚ ಪದೇನೇವ ಸಙ್ಗಹಿತಂ. ಅತ್ಥಂ ಬ್ಯಞ್ಜೇತೀತಿ ಬ್ಯಞ್ಜನಂ, ಅಕ್ಖರಂ. ತಞ್ಹಿ ಪದವಾಕ್ಯಂ ಪರಿಚ್ಛಿಜ್ಜಮಾನಂ ತಂ ತಂ ಅತ್ಥಂ ಬ್ಯಞ್ಜೇತಿ ಪಕಾಸೇತಿ. ಏತೇನ ಅಪರಾಪರೇಹಿ ಪದಬ್ಯಞ್ಜನೇಹಿ ಸುಚಿರಮ್ಪಿ ಕಾಲಂ ಕಥೇನ್ತಸ್ಸ ತಥಾಗತಸ್ಸ ನ ಕದಾಚಿ ತೇಸಂ ಪರಿಯಾದಾನಂ ಅತ್ಥೀತಿ ದಸ್ಸೇತಿ. ಗುಣಧಂಸೀತಿ ಗುಣಧಂಸನಸೀಲೋ. ಪಗಬ್ಬೋತಿ ವಾಚಾಪಾಗಬ್ಬಿಯೇನ ಸಮನ್ನಾಗತೋ.

ಉಪಕಸುತ್ತವಣ್ಣನಾ ನಿಟ್ಠಿತಾ.

೯. ಸಚ್ಛಿಕರಣೀಯಸುತ್ತವಣ್ಣನಾ

೧೮೯. ನವಮೇ ನಾಮಕಾಯೇನಾತಿ ಸಹಜಾತನಾಮಕಾಯೇನ. ಸೇಸಮೇತ್ಥ ಉತ್ತಾನಮೇವ.

ಸಚ್ಛಿಕರಣೀಯಸುತ್ತವಣ್ಣನಾ ನಿಟ್ಠಿತಾ.

೧೦. ಉಪೋಸಥಸುತ್ತವಣ್ಣನಾ

೧೯೦. ದಸಮೇ ತುಣ್ಹೀಭೂತಂ ತುಣ್ಹೀಭೂತನ್ತಿ ಆಮೇಡಿತವಚನಂ ಬ್ಯಾಪನಿಚ್ಛಾವಸೇನ ವುತ್ತನ್ತಿ ಆಹ ‘‘ಯತೋ ಯತೋ ಅನುವಿಲೋಕೇತೀ’’ತಿ. ಅನುವಿಲೋಕೇತ್ವಾತಿ ಏತ್ಥ ಅನು-ಸದ್ದೋಪಿ ಬ್ಯಾಪನಿಚ್ಛಾವಚನಮೇವಾತಿ ಅನು ಅನು ವಿಲೋಕೇತ್ವಾತಿ ಅತ್ಥೋ, ಪಞ್ಚಪಸಾದಪ್ಪಟಿಮಣ್ಡಿತಾನಿ ಅಕ್ಖೀನಿ ಉಮ್ಮೀಲೇತ್ವಾ ತತೋ ತತೋ ವಿಲೋಕೇತ್ವಾತಿ ವುತ್ತಂ ಹೋತಿ. ಅಲನ್ತಿ ಯುತ್ತಂ, ಓಪಾಯಿಕನ್ತಿ ಅತ್ಥೋ ‘‘ಅಲಮೇವ ನಿಬ್ಬಿನ್ದಿತು’’ನ್ತಿಆದೀಸು (ದೀ. ನಿ. ೨.೨೭೨; ಸಂ. ನಿ. ೨.೧೨೪-೧೨೬) ವಿಯ. ಪುಟಬನ್ಧನೇನ ಪರಿಹರಿತ್ವಾ ಅಸಿತಬ್ಬಂ ಪುಟೋಸಂ ಸಮ್ಬಲಂ ಅ-ಕಾರಸ್ಸ ಓ-ಕಾರಂ ಕತ್ವಾ. ತೇನಾಹ ‘‘ಪಾಥೇಯ್ಯ’’ನ್ತಿ. ಸೇಸಮೇತ್ಥ ಸುವಿಞ್ಞೇಯ್ಯಮೇವ.

ಉಪೋಸಥಸುತ್ತವಣ್ಣನಾ ನಿಟ್ಠಿತಾ.

ಬ್ರಾಹ್ಮಣವಗ್ಗವಣ್ಣನಾ ನಿಟ್ಠಿತಾ.