೩-೪. ಮಹಾಕೋಟ್ಠಿಕಸುತ್ತಾದಿವಣ್ಣನಾ

೧೭೩-೪. ತತಿಯೇ ಫಸ್ಸಾಯತನಾನನ್ತಿ ಏತ್ಥ ಆಕರಟ್ಠೋ ಆಯತನಸದ್ದೋತಿ ಆಹ ‘‘ಫಸ್ಸಾಕರಾನ’’ನ್ತಿಆದಿ. ‘‘ಸುವಣ್ಣಾಯತನಂ, ರಜತಾಯತನ’’ನ್ತಿಆದೀಸು ಆಕರೋಪಿ ‘‘ಆಯತನ’’ನ್ತಿ ವುತ್ತೋ, ಸಞ್ಜಾತಿಸಮೋಸರಣಾದಿವಸೇನಪಿ ಆಯತನಟ್ಠೋ ಲಬ್ಭತಿಯೇವ. ಮಾ-ಇತಿ ಪಟಿಸೇಧೇ ನಿಪಾತೋ. ಸ್ವಾಯಂ ಛನ್ನಂ ಫಸ್ಸಾಯತನಾನಂ ಅಸೇಸಂ ವಿರಾಗನಿರೋಧಾ ಅತ್ಥಞ್ಞಂ ವಚನಂ ಕಿಞ್ಚೀತಿ ಸನ್ಧಾಯಾಹಾತಿ ಆಹ ‘‘ಮಾ ಭಣೀತಿ ಅತ್ಥೋ’’ತಿ. ಪಞ್ಚಫಸ್ಸಾಯತನಾನಿ ನಿರುದ್ಧಾನೀತಿ ಚಕ್ಖಾದೀನಞ್ಚ ತತ್ಥ ಅಭಾವಂ ಸನ್ಧಾಯ ವದತಿ. ಛಟ್ಠಸ್ಸಾತಿ ಮನಾಯತನಸ್ಸ. ಚತುತ್ಥೇ ನತ್ಥಿ ವತ್ತಬ್ಬಂ.

ಮಹಾಕೋಟ್ಠಿಕಸುತ್ತಾದಿವಣ್ಣನಾ ನಿಟ್ಠಿತಾ.