೭-೧೦. ಖಿಪ್ಪನಿಸನ್ತಿಸುತ್ತಾದಿವಣ್ಣನಾ

೯೭-೧೦೦. ಸತ್ತಮೇ ಖಿಪ್ಪನಿಸನ್ತೀತಿ ಖಿಪ್ಪಪಞ್ಞೋ. ತೇನಾಹ ‘‘ಖಿಪ್ಪನಿಸಾಮನೋ’’ತಿಆದಿ. ಅನುರೂಪಧಮ್ಮನ್ತಿ ಲೋಕುತ್ತರಾಧಿಗಮಸ್ಸ ಅನುಚ್ಛವಿಕಸಭಾವಂ. ಕಲ್ಯಾಣಾ ಸುನ್ದರಾ ಪರಿಮಣ್ಡಲಪದಬ್ಯಞ್ಜನಾ ವಾಚಾ ಅಸ್ಸಾತಿ ಕಲ್ಯಾಣವಾಚೋ. ತೇನಾಹ ‘‘ಸುನ್ದರವಚನೋ’’ತಿ. ಕಲ್ಯಾಣಂ ಮಧುರಂ ವಾಕ್ಕರಣಂ ಉದಾಹಾರಘೋಸೋ ಅಸ್ಸಾತಿ ಕಲ್ಯಾಣವಾಕ್ಕರಣೋ. ಗುಣಪರಿಪುಣ್ಣಭಾವೇನ ಪೂರೇ ಪುಣ್ಣಭಾವೇ ಭವಾತಿ ಪೋರೀ, ತಾಯ ಪೋರಿಯಾ. ತೇನಾಹ ‘‘ಗುಣಪರಿಪುಣ್ಣಾಯಾ’’ತಿ. ಪುರೇ ಭವತ್ತಾ ಪೋರಿಯಾ ನಾಗರಿಕಿತ್ಥಿಯಾ ಸುಖುಮಾಲತ್ತನೇನ ಸದಿಸಾತಿ ಪೋರೀ, ತಾಯ ಪೋರಿಯಾ. ‘‘ಸುಖುಮಾಲತ್ತನೇನಾ’’ತಿ ಇಮಿನಾ ತಸ್ಸಾ ವಾಚಾಯ ಮುದುಸಣ್ಹಭಾವೋ ವುತ್ತೋ. ಅಪಲಿಬುದ್ಧಾಯಾತಿ ಪಿತ್ತಸೇಮ್ಹಾದೀಹಿ ನ ಪಲಿವೇಠಿತಾಯ. ಅದೋಸಾಯಾತಿ ಸನ್ದಿದ್ಧವಿಲಮ್ಬಿತಾದಿದೋಸರಹಿತಾಯ ಅಗಳಿತಪದಬ್ಯಞ್ಜನಾಯಾತಿ ಅಪತಿತಪದಬ್ಯಞ್ಜನಾಯ ಅವಿರಹಿತಪದಬ್ಯಞ್ಜನಾಯ. ಉಭಯಮೇತಂ ಅನೇಲಗಲಾಯಾತಿ ಇಮಸ್ಸೇವ ಅತ್ಥವಚನಂ. ಅನೇಲಗಲಾಯಾತಿ ಹಿ ಅನೇಲಾಯ ಚೇವ ಅಗಲಾಯ ಚಾತಿ ಅತ್ಥೋ. ಅತ್ಥಂ ವಿಞ್ಞಾಪೇತುಂ ಸಮತ್ಥಾಯಾತಿ ಆದಿಮಜ್ಝಪರಿಯೋಸಾನಂ ಪಾಕಟಂ ಕತ್ವಾ ಭಾಸಿತತ್ಥಸ್ಸ ವಿಞ್ಞಾಪನಸತ್ಥಾಯ. ಅಟ್ಠಮನವಮದಸಮಾನಿ ಉತ್ತಾನತ್ಥಾನೇವ.

ಖಿಪ್ಪನಿಸನ್ತಿಸುತ್ತಾದಿವಣ್ಣನಾ ನಿಟ್ಠಿತಾ.

ಅಸುರವಗ್ಗವಣ್ಣನಾ ನಿಟ್ಠಿತಾ.

ದುತಿಯಪಣ್ಣಾಸಕಂ ನಿಟ್ಠಿತಂ.