೭. ಚತುಮಹಾರಾಜಸುತ್ತವಣ್ಣನಾ

೩೭. ಸತ್ತಮೇ ಅಮಾ ಸಹ ವತ್ತನ್ತಿ ತಸ್ಮಿಂ ತಸ್ಮಿಂ ಕಿಚ್ಚೇತಿ ಅಮಚ್ಚಾ, ಸಹಿತಾ. ಪರಿಸತಿ ಭವಾತಿ ಪಾರಿಸಜ್ಜಾ, ಪರಿವಾರಟ್ಠಾನಿಯಾ ಪರಿಸಾಪರಿಯಾಪನ್ನಾ. ತೇನಾಹ ‘‘ಪರಿಚಾರಿಕದೇವತಾ’’ತಿ. ತಾತಾತಿ ಆಲಪನಂ. ಏವನ್ತಿ ‘‘ಕಚ್ಚಿ ಬಹೂ ಮನುಸ್ಸಾ’’ತಿಆದಿನಾ ವುತ್ತಾಕಾರೇನ. ಅಟ್ಠ ವಾರೇತಿ ಏಕಸ್ಮಿಂ ಅಡ್ಢಮಾಸೇ ಚತುಕ್ಖತ್ತುಂ ತಥಾ ಇತರಸ್ಮಿನ್ತಿ ಏವಂ ಅಟ್ಠ ವಾರೇ. ಅಧಿಟ್ಠಹನ್ತೀತಿ ಅಧಿತಿಟ್ಠನ್ತಿ. ಪಟಿಜಾಗರೋನ್ತೀತಿ ಪಟಿ ಪಟಿ ಜಾಗರೋನ್ತಿ. ಪುಞ್ಞಂ ಕರೋನ್ತಾ ಹಿ ಸತ್ತಾ ಜಾಗರೋನ್ತಿ ನಾಮ ಕಾತಬ್ಬಕಿಚ್ಚಪ್ಪಸುತತ್ತಾ, ಇತರೇ ಪನ ಸುಪನ್ತಿ ನಾಮ ಸಹಿತಪರಹಿತವಿಮುತ್ತತ್ತಾ. ಚಾತುದ್ದಸಿಉಪೋಸಥಸ್ಸ ಅನುಗಮನಂ ವಿಯ ಪನ್ನರಸಿಉಪೋಸಥಸ್ಸ ಪಚ್ಚುಗ್ಗಮನಂ ನ ಲಬ್ಭತಿ ದಿವಸಾಭಾವತೋ.

ತತೋತಿ ತತೋ ತತೋ. ತಂ ಉಪನಿಸ್ಸಾಯಾತಿ ತಾ ತಾ ಗಾಮನಿಗಮರಾಜಧಾನಿಯೋ ಉಪನಿಸ್ಸಾಯ. ಅಧಿವತ್ಥಾತಿ ಆರಾಮವನರುಕ್ಖಾದೀಸು ಅಧಿವತ್ಥಾ ದೇವತಾ. ತೇತಿ ತೇ ದೇವಾ. ಸನ್ಧಾಯ ಕಥೇತೀತಿ ಭಗವಾ ಕಥೇತಿ. ವುತ್ತನ್ತಿ ಅಟ್ಠಕಥಾಯಂ ವುತ್ತಂ.

ನಿಚ್ಚಂ ನಿಬದ್ಧಂ ಉಪೋಸಥೋ ಸಂವಚ್ಛರೇ ಸಂವಚ್ಛರೇ ಪಟಿ ಪಟಿ ಹರಿತಬ್ಬತೋ ಪವತ್ತೇತಬ್ಬತೋ ಪಾಟಿಹಾರಿಯಪಕ್ಖೋ ನಾಮ. ಗುಣಙ್ಗೇಹೀತಿ ಉಪೋಸಥಙ್ಗೇಹಿ.

ವುತ್ಥವಾಸೋತಿ ವುಸಿತಬ್ರಹ್ಮಚರಿಯವಾಸೋ. ಕತ್ತಬ್ಬಕಿಚ್ಚನ್ತಿ ದುಕ್ಖಾದೀಸು ಪರಿಞ್ಞಾತಾದಿಕಿಚ್ಚಂ. ಓತಾರೇತ್ವಾತಿ ಛಡ್ಡೇತ್ವಾ. ಪರಿಕ್ಖೀಣಭವಸಂಯೋಜನೋತಿ ಸಬ್ಬಸೋ ಖೀಣಭವಬನ್ಧನೋ. ಕಾರಣೇನ ಜಾನಿತ್ವಾತಿ ವಿಪಸ್ಸನಾಪಞ್ಞಾಸಹಿತಾಯ ಮಗ್ಗಪಞ್ಞಾಯ ಚತ್ತಾರಿ ಅರಿಯಸಚ್ಚಾನಿ ಜಾನಿತ್ವಾ.

ಜಾನನ್ತೋತಿ ‘‘ಅರಹನ್ತಾನಂ ಅನುಕರಣಪ್ಪಟಿಪತ್ತಿ ಏಸಾ, ಯದಿದಂ ಸಮ್ಮದೇವ ಉಪೋಸಥಾನುಟ್ಠಾನ’’ನ್ತಿ ಏವಂ ಉಪೋಸಥಕಮ್ಮಸ್ಸ ಗುಣಂ ಜಾನನ್ತೋ. ಏವರೂಪೇನಾತಿ ಯಾದಿಸೋ ಭಗವತೋ ಉಪೋಸಥಭಾವೋ ವಿಹಿತೋ, ಏವರೂಪೇನ ಅರಹನ್ತಾನುಕರಣೇನ ಉಪೋಸಥಕಮ್ಮೇನ. ಸಕ್ಕಾ ಪಹಿತತ್ತೋ ವಿಪಸ್ಸನಂ ಉಸ್ಸುಕ್ಕಾಪೇತ್ವಾ ಖೀಣಾಸವಸಮ್ಪತ್ತಿಂ ಪಾಪುಣಿತುಂ. ಅಟ್ಠಮಂ ಉತ್ತಾನತ್ಥಮೇವ ಸತ್ತಮೇ ವುತ್ತನಯತ್ತಾ.

ಚತುಮಹಾರಾಜಸುತ್ತವಣ್ಣನಾ ನಿಟ್ಠಿತಾ.