೫. ಹತ್ಥಕಸುತ್ತವಣ್ಣನಾ

೩೫. ಪಞ್ಚಮೇ ಆಳವಿಯನ್ತಿ ಆಳವಿರಟ್ಠೇ, ನ ಆಳವಿನಗರೇ. ತೇನಾಹ ‘‘ಆಳವಿಯನ್ತಿ ಆಳವಿರಟ್ಠೇ’’ತಿ. ಅಥಾತಿ ಅವಿಚ್ಛೇದತ್ಥೇ ನಿಪಾತೋ. ತತ್ಥ ಭಗವತೋ ನಿಸಜ್ಜಾಯ ಅವಿಚ್ಛಿನ್ನಾಯ ಏವಾತಿ ಅತ್ಥೋ. ತೇನಾಹ ‘‘ಏವ’’ನ್ತಿಆದಿ. ಹತ್ಥತೋ ಹತ್ಥಂ ಗತತ್ತಾತಿ ಆಳವಕಸ್ಸ ಯಕ್ಖಸ್ಸ ಹತ್ಥತೋ ಸಮ್ಮಾಸಮ್ಬುದ್ಧಸ್ಸ ಹತ್ಥಂ, ತತೋ ರಾಜಪುರಿಸಾನಂ ಹತ್ಥಂ ಗತತ್ತಾ.

ಮಾಘಸ್ಸಾತಿ ಮಾಘಮಾಸಸ್ಸ. ಏವಂ ಫಗ್ಗುನಸ್ಸಾತಿ ಏತ್ಥಾಪಿ. ಖುರನ್ತರೇಹಿ ಕದ್ದಮೋ ಉಗ್ಗನ್ತ್ವಾ ತಿಟ್ಠತೀತಿ ಕದ್ದಮೋ ಖುರನ್ತರೇಹಿ ಉಗ್ಗನ್ತ್ವಾ ತಿಟ್ಠತಿ. ಚತೂಹಿ ದಿಸಾಹಿ ವಾಯನ್ತೋ ವಾತೋ ವೇರಮ್ಭೋತಿ ವುಚ್ಚತಿ ವೇರಮ್ಭವಾತಸದಿಸತ್ತಾ.

ಪಞ್ಚದ್ವಾರಕಾಯನ್ತಿ ಪಞ್ಚದ್ವಾರಾನುಸಾರೇನ ಪವತ್ತಂ ವಿಞ್ಞಾಣಕಾಯಂ. ಖೋಭಯಮಾನಾತಿ ಕಿಲೇಸಖೋಭವಸೇನ ಖೋಭಯಮಾನಾ ಚಿತ್ತಂ ಸಙ್ಖೋಭಂ ಕರೋನ್ತಾ. ಚೇತಸಿಕಾತಿ ಮನೋದ್ವಾರಿಕಚಿತ್ತಸನ್ನಿಸ್ಸಿತಾ. ತೇನಾಹ ‘‘ಮನೋದ್ವಾರಂ ಖೋಭಯಮಾನಾ’’ತಿ. ಸೋ ರಾಗೋತಿ ತಂಸದಿಸೋ ರಾಗೋ. ಭವತಿ ಹಿ ತಂಸದಿಸೇ ತಬ್ಬೋಹಾರೋ ಯಥಾ ‘‘ಸಾ ಏವ ತಿತ್ತಿರಿಕಾ, ತಾನಿ ಏವ ಓಸಧಾನೀ’’ತಿ. ಯಾದಿಸೋ ಹಿ ಏಕಸ್ಸ ಪುಗ್ಗಲಸ್ಸ ಉಪ್ಪಜ್ಜನಕರಾಗೋ, ತಾದಿಸೋ ಏವ ತತೋ ಅಞ್ಞಸ್ಸ ರಾಗಭಾವಸಾಮಞ್ಞತೋ. ತೇನ ವುತ್ತಂ ‘‘ತಥಾರೂಪೋ ರಾಗೋ’’ತಿಆದಿ. ಇಚ್ಛಿತಾಲಾಭೇನ ರಜನೀಯೇಸು ವಾ ನಿರುದ್ಧೇಸು ವತ್ಥೂಸು ದೋಮನಸ್ಸುಪ್ಪತ್ತಿಯಾ ದೋಸಪರಿಳಾಹಾನಂ ಸಮ್ಭವೋ ವೇದಿತಬ್ಬೋ.

ನ ಲಿಮ್ಪತಿ ಅನುಪಲಿತ್ತಚಿತ್ತತ್ತಾ. ಸೀತಿಭೂತೋ ನಿಬ್ಬುತಸಬ್ಬಪರಿಳಾಹತ್ತಾ. ಆಸತ್ತಿಯೋ ವುಚ್ಚನ್ತಿ ತಣ್ಹಾಯೋ ತತ್ಥ ತತ್ಥ ಆಸಞ್ಜನಟ್ಠೇನ. ದರಥನ್ತಿ ಪರಿಳಾಹಜಾತಂ. ಚೇತಸೋತಿ ಸಾಮಿವಚನಂ.

ಹತ್ಥಕಸುತ್ತವಣ್ಣನಾ ನಿಟ್ಠಿತಾ.