೧೦. ಆಧಿಪತೇಯ್ಯಸುತ್ತವಣ್ಣನಾ

೪೦. ದಸಮೇ ಅಭಿಭವಿತ್ವಾ ಪವತ್ತನಟ್ಠೇನ ಅಧಿಪತಿ ಯಂ ಕಿಞ್ಚಿ ಜೇಟ್ಠಕಂ ನ ಕಾರಕಂ ಅತ್ತಾನಂ ಅಧಿಪತೀತಿ ಕತ್ವಾ ಅತ್ತಾ ಏವ ಅಧಿಪತಿ, ತತೋ ಆಗತಂ ಅತ್ತಾಧಿಪತೇಯ್ಯಂ. ತೇನಾಹ ‘‘ಅತ್ತಾನ’’ನ್ತಿಆದಿ. ಲೋಕನ್ತಿ ಸತ್ತಲೋಕಂ. ಸೋ ಚ ಖೋ ಇದ್ಧಿವಿಧಾದಿಗುಣವಿಸೇಸಯುತ್ತೋ ಅಧಿಪ್ಪೇತೋ ಅಧಿಪತಿಭಾವಸ್ಸ ಅಧಿಪ್ಪೇತತ್ತಾ. ನವವಿಧಂ ಲೋಕುತ್ತರಧಮ್ಮನ್ತಿ ಉಕ್ಕಟ್ಠನಿದ್ದೇಸೇನ ವುತ್ತಂ. ಇತಿ ಭವೋತಿ ಏವಂ ಸಮ್ಪತ್ತಿಭವೋ, ತತ್ಥ ಏವಂ ಅಭಿವುದ್ಧೀತಿ. ಸಮ್ಪತ್ತಿಭವಸ್ಸ ಹೇತೂತಿ ತಂತಂಸಮ್ಪತ್ತಿಭವಸ್ಸ ತತ್ಥ ಚ ಅಭಿವುದ್ಧಿಯಾ ಹೇತು. ಜಾತಿನಿಮಿತ್ತಸ್ಸ ಕಮ್ಮಭವಸ್ಸ ಕತೂಪಚಿತತ್ತಾ ಜಾತಿ ಅನ್ತೋಪವಿಟ್ಠಾ. ಜರಾದೀಸುಪಿ ಏಸೇವ ನಯೋ ಹೇತುಸಿದ್ಧಿಯಾ ಫಲಸಿದ್ಧಿತೋ.

ಅಸಲ್ಲೀನನ್ತಿ ನ ಸಙ್ಕೋಚಪ್ಪತ್ತಂ. ಉಪಟ್ಠಿತಾತಿ ಕಾಯಾದಿಸಭಾವಸಲ್ಲಕ್ಖಣವಸೇನ ಉಪಟ್ಠಿತಾ. ಅಸಮ್ಮುಟ್ಠಾ ಸಮ್ಮೋಸಾಭಾವತೋ. ಅಸಾರದ್ಧೋತಿ ಸಾರಮ್ಭಸ್ಸ ಸಾರಮ್ಭಹೇತೂನಞ್ಚ ವಿಕ್ಖಮ್ಭನೇನ ಅಸಾರದ್ಧೋ. ಏಕಗ್ಗಂ ಅನೇಕಗ್ಗಭಾವಸ್ಸ ದೂರಸಮುಸ್ಸಾಪಿತತ್ತಾ. ನಿಮ್ಮಲಂ ಕತ್ವಾತಿ ರಾಗಾದಿಮಲಾನಂ ಅಪನಯನೇನ ಮಲರಹಿತಂ ಕತ್ವಾ. ಗೋಪಾಯತೀತಿ ಸಂಕಿಲೇಸಾನತ್ಥತೋ ರಕ್ಖತಿ. ಅಯನ್ತಿ ಏವಂಪಟಿಪನ್ನೋ ಭಿಕ್ಖು. ಸುದ್ಧಮತ್ತಾನಂ ಪರಿಹರತಿ ಅಸುದ್ಧಭಾವಸ್ಸ ಕಿಲೇಸಸ್ಸಪಿ ಅಭಾವತೋ.

ಅತಿಕ್ಕಮಿತ್ವಾ ಮಞ್ಞಸೀತಿ ಅಸಕ್ಖಿಂ ಕತ್ವಾ ಮಞ್ಞಸಿ. ತಾಯ ತಣ್ಹಾಯ ನಿಬ್ಬತ್ತೋತಿ ತಮ್ಮಯೋ, ತಣ್ಹಾವಸಿಕೋ. ತಸ್ಸ ಭಾವೋ ತಮ್ಮಯತಾ, ತಸ್ಸಾ ತಮ್ಮಯತಾಯ ಅಭಾವೇನ. ನ ಹಾಯತಿ ಪಞ್ಞಾದಿಗುಣವೇಪುಲ್ಲಪ್ಪತ್ತಿಯಾ.

ಆಧಿಪತೇಯ್ಯಸುತ್ತವಣ್ಣನಾ ನಿಟ್ಠಿತಾ.

ದೇವದೂತವಗ್ಗವಣ್ಣನಾ ನಿಟ್ಠಿತಾ.