೩. ಸಙ್ಖಾರಸುತ್ತವಣ್ಣನಾ

೨೩. ತತಿಯೇ ವಿವಿಧೇಹಿ ಆಕಾರೇಹಿ ಆಬಾಧನತೋ ಬ್ಯಾಬಾಧೋವ ಬ್ಯಾಬಜ್ಝಂ, ಕಾಯಿಕಂ ಚೇತಸಿಕಞ್ಚ ದುಕ್ಖಂ. ಸಹ ಬ್ಯಾಬಜ್ಝೇನ ವತ್ತತೀತಿ ಸಬ್ಯಾಬಜ್ಝಂ. ತೇನಾಹ ‘‘ಸದುಕ್ಖ’’ನ್ತಿ. ಚೇತನಾರಾಸಿನ್ತಿ ಪುಬ್ಬಚೇತನಾದಿರಾಸಿಂ. ಚೇತನಂ ಪುನಪ್ಪುನಂ ಪವತ್ತೇನ್ತೋ ‘‘ರಾಸಿಂ ಕರೋತಿ ಪಿಣ್ಡಂ ಕರೋತೀ’’ತಿ ಚ ವುತ್ತೋ. ಸದುಕ್ಖನ್ತಿ ನಿರನ್ತರದುಕ್ಖಂ. ತೇನಾಹ ‘‘ಸಾಬಾಧಂ ನಿರಸ್ಸಾದ’’ನ್ತಿ. ಅತ್ಥೀತಿ ಉಜುಕಂ ದುಕ್ಖವೇದನಾ ನತ್ಥೀತಿ ಅವತ್ತಬ್ಬತ್ತಾ ವುತ್ತಂ. ಅನಿಟ್ಠಸಭಾವತ್ತಾ ಅನಿಟ್ಠಾರಮ್ಮಣತ್ತಾ ಚ ದುಕ್ಖಪಕ್ಖಿಕಾವ ಸಾ ದಟ್ಠಬ್ಬಾ. ನ ಹಿ ಅಕುಸಲವಿಪಾಕಾ ಇಟ್ಠಾ ನಾಮ ಅತ್ಥೀ, ಕುಸಲವಿಪಾಕಾ ಪನ ಉಪೇಕ್ಖಾವೇದನಾ ತತ್ಥ ಅಪ್ಪಾವಸರಾ. ಅಟ್ಠಕಥಾಯಂ ಪನ ನಿರಯಸ್ಸ ದುಕ್ಖಬಹುಲತ್ತಾ ದುಕ್ಖಸ್ಸ ಚ ತತ್ಥ ಬಲವತಾಯ ಸಾ ಅಬ್ಬೋಹಾರಿಕಟ್ಠಾನೇ ಠಿತಾತಿ ವುತ್ತಂ. ಉಪಮಂ ಕತ್ವಾ ಆಹಟೋ ವಿಸೇಸೋ ವಿಯ ಸಾಮಞ್ಞಸ್ಸ ಯಥಾ ಅಯೋಪಿಣ್ಡಿರೋಹಿನೋ ವಿಯ ರೂಪಾನನ್ತಿ. ಪಟಿಭಾಗಉಪಮಾತಿ ಪಟಿಬಿಮ್ಬಉಪಮಾ.

ತೇ ಅಗ್ಗಹೇತ್ವಾತಿ ಹೇಟ್ಠಿಮಬ್ರಹ್ಮಲೋಕೇ ಅಗ್ಗಹೇತ್ವಾ. ವೋಮಿಸ್ಸಕಸುಖದುಕ್ಖನ್ತಿ ವಿಮಿಸ್ಸಕಸುಖದುಕ್ಖಂ ಪೀತಿಮಿಸ್ಸಕಭಾವತೋ. ಕಮ್ಮನ್ತಿ ಪಾಪಕಮ್ಮಂ. ಕಮ್ಮಸೀಸೇನ ಫಲಂ ವದತಿ. ಕಾಮಞ್ಚೇತ್ಥ ‘‘ಅಬ್ಯಾಬಜ್ಝಂ ಲೋಕಂ ಉಪಪಜ್ಜತೀ’’ತಿ ಆಗತಂ, ‘‘ಅಬ್ಯಾಬಜ್ಝಾ ಫಸ್ಸಾ ಫುಸನ್ತೀ’’ತಿ ಪನ ವಚನೇನ ಲೋಕುತ್ತರಫಸ್ಸಾಪಿ ಸಙ್ಗಯ್ಹನ್ತೀತಿ ‘‘ತೀಣಿ ಸುಚರಿತಾನಿ ಲೋಕಿಯಲೋಕುತ್ತರಮಿಸ್ಸಕಾನಿ ಕಥಿತಾನೀ’’ತಿ ವುತ್ತಂ.

ಸಙ್ಖಾರಸುತ್ತವಣ್ಣನಾ ನಿಟ್ಠಿತಾ.