೪. ಭರಣ್ಡುಕಾಲಾಮಸುತ್ತವಣ್ಣನಾ

೧೨೭. ಚತುತ್ಥೇ ಆಳಾರಕಾಲಾಮಕಾಲೇತಿ ಆಳಾರಕಾಲಾಮಾನಂ ಧರಮಾನಕಾಲೇ. ಪರಿಞ್ಞನ್ತಿ ಪಹಾನಪರಿಞ್ಞಂ. ಸಾ ಹಿ ಸಮತಿಕ್ಕಮೋ, ನ ಇತರಾ. ತೇನಾಹ ‘‘ಪರಿಞ್ಞಾ ನಾಮ ಸಮತಿಕ್ಕಮೋ’’ತಿ. ಏತ್ಥ ಚ ಪಠಮೋ ಸತ್ಥಾ ರೂಪಾವಚರಸಮಾಪತ್ತಿಲಾಭೀ ದಟ್ಠಬ್ಬೋ, ದುತಿಯೋ ಅರೂಪಾವಚರಸಮಾಪತ್ತಿಲಾಭೀ, ತತಿಯೋ ಸಮ್ಮಾಸಮ್ಬುದ್ಧೋ ದಟ್ಠಬ್ಬೋ. ವುತ್ತಞ್ಹೇತಂ ಪುಗ್ಗಲಪಞ್ಞತ್ತಿಯಂ (ಪು. ಪ. ೧೩೦) –

‘‘ಯ್ವಾಯಂ ಸತ್ಥಾ ಕಾಮಾನಂ ಪರಿಞ್ಞಂ ಪಞ್ಞಾಪೇತಿ, ನ ರೂಪಾನಂ ಪರಿಞ್ಞಂ ಪಞ್ಞಾಪೇತಿ, ನ ವೇದನಾನಂ ಪರಿಞ್ಞಂ ಪಞ್ಞಾಪೇತಿ, ರೂಪಾವಚರಸಮಾಪತ್ತಿಯಾ ಲಾಭೀ ಸತ್ಥಾ ತೇನ ದಟ್ಠಬ್ಬೋ. ಯ್ವಾಯಂ ಸತ್ಥಾ ಕಾಮಾನಞ್ಚ ಪರಿಞ್ಞಂ ಪಞ್ಞಾಪೇತಿ, ರೂಪಾನಞ್ಚ ಪರಿಞ್ಞಂ ಪಞ್ಞಾಪೇತಿ, ನ ವೇದನಾನಂ ಪರಿಞ್ಞಂ ಪಞ್ಞಾಪೇತಿ, ಅರೂಪಾವಚರಸಮಾಪತ್ತಿಯಾ ಲಾಭೀ ಸತ್ಥಾ ತೇನ ದಟ್ಠಬ್ಬೋ. ಯ್ವಾಯಂ ಸತ್ಥಾ ಕಾಮಾನಞ್ಚ ಪರಿಞ್ಞಂ ಪಞ್ಞಾಪೇತಿ, ರೂಪಾನಞ್ಚ ಪರಿಞ್ಞಂ ಪಞ್ಞಾಪೇತಿ, ವೇದನಾನಞ್ಚ ಪರಿಞ್ಞಂ ಪಞ್ಞಾಪೇತಿ, ಸಮ್ಮಾಸಮ್ಬುದ್ಧೋ ಸತ್ಥಾ ತೇನ ದಟ್ಠಬ್ಬೋ’’ತಿ.

ತತ್ಥ ತಿತ್ಥಿಯಾ ಸಮಯಂ ಜಾನನ್ತಾ ಕಾಮಾನಂ ಪರಿಞ್ಞಂ ಪಞ್ಞಾಪೇಯ್ಯುಂ ಪಠಮಜ್ಝಾನಂ ವದಮಾನಾ. ರೂಪಾನಂ ಪರಿಞ್ಞಂ ಪಞ್ಞಾಪೇಯ್ಯುಂ ಅರೂಪರಾಗಂ ವದಮಾನಾ. ವೇದನಾಪರಿಞ್ಞಂ ಪಞ್ಞಾಪೇಯ್ಯುಂ ಅಸಞ್ಞಾರಾಗಂ ವದಮಾನಾ. ತೇ ಪನ ‘‘ಇದಂ ನಾಮ ಪಠಮಜ್ಝಾನಂ, ಅಯಂ ರೂಪಭವೋ, ಅಯಂ ಅಸಞ್ಞಾಭವೋ’’ತಿಪಿ ನ ಜಾನನ್ತಿ. ತೇ ಪಞ್ಞಾಪೇತುಂ ಅಸಕ್ಕೋನ್ತಾಪಿ ಕೇವಲಂ ‘‘ಪಞ್ಞಾಪೇಮಾ’’ತಿ ವದನ್ತಿ. ತಥಾಗತೋ ಪನ ಕಾಮಾನಂ ಪರಿಞ್ಞಂ ಅನಾಗಾಮಿಮಗ್ಗೇನ ಪಞ್ಞಾಪೇತಿ, ರೂಪವೇದನಾನಂ ಅರಹತ್ತಮಗ್ಗೇನ. ಏವಮೇತ್ಥ ದ್ವೇ ಜನಾ ಬಾಹಿರಕಾ, ಏಕೋ ಸಮ್ಮಾಸಮ್ಬುದ್ಧೋತಿ ಇಮಸ್ಮಿಂ ಲೋಕೇ ತಯೋ ಸತ್ಥಾರೋ ನಾಮ.

ಭರಣ್ಡುಕಾಲಾಮಸುತ್ತವಣ್ಣನಾ ನಿಟ್ಠಿತಾ.