೧೦. ಲೇಖಸುತ್ತವಣ್ಣನಾ

೧೩೩. ದಸಮೇ ಥಿರಟ್ಠಾನತೋತಿ ಥಿರಟ್ಠಾನತೋವ. ಪಾಸಾಣೇ ಲೇಖಸದಿಸಾ ಪರಾಪರಾಧನಿಬ್ಬತ್ತಾ ಕೋಧಲೇಖಾ ಯಸ್ಸ ಸೋ ಪಾಸಾಣಲೇಖೂಪಮಸಮನ್ನಾಗತೋ ಪಾಸಾಣಲೇಖೂಪಮೋತಿ ವುತ್ತೋ. ಏವಂ ಇತರೇಪಿ. ಅನುಸೇತೀತಿ ಅಪ್ಪಹೀನತಾಯ ಅನುಸೇತಿ. ನ ಖಿಪ್ಪಂ ಲುಜ್ಜತೀತಿ ನ ಅನ್ತರಾ ನಸ್ಸತಿ ಕಮ್ಮಟ್ಠಾನೇನೇವ ನಸ್ಸನತೋ. ಏವಮೇವನ್ತಿ ಏವಂ ತಸ್ಸಪಿ ಪುಗ್ಗಲಸ್ಸ ಕೋಧೋ ನ ಅನ್ತರಾ ಪುನದಿವಸೇ ವಾ ಅಪರದಿವಸೇ ವಾ ನಿಟ್ಠಾತಿ, ಅದ್ಧನಿಯೋ ಪನ ಹೋತಿ, ಮರಣೇನೇವ ನಿಟ್ಠಾತೀತಿ ಅತ್ಥೋ. ಕಕ್ಖಳೇನಾತಿ ಅತಿಕಕ್ಖಳೇನ ಧಮ್ಮಚ್ಛೇದಕೇನ ಥದ್ಧವಚನೇನ. ಸಂಸನ್ದತೀತಿ ಏಕೀಭವತಿ. ಸಮ್ಮೋದತೀತಿ ನಿರನ್ತರೋ ಹೋತೀತಿ ಏವಮೇತ್ಥ ಅತ್ಥೋ ದಟ್ಠಬ್ಬೋ.

ಅಥ ವಾ ಸನ್ಧಿಯತೀತಿ ಠಾನಗಮನಾದೀಸು ಕಾಯಕಿರಿಯಾಸು ಕಾಯೇನ ಸಮೋಧಾನಂ ಗಚ್ಛತಿ, ತಿಲತಣ್ಡುಲಾ ವಿಯ ಮಿಸ್ಸೀಭಾವಂ ಉಪೇತೀತಿ ಅತ್ಥೋ. ಸಂಸನ್ದತೀತಿ ಚಿತ್ತಕಿರಿಯಾಸು ಚಿತ್ತೇನ ಸಮೋಧಾನಂ ಗಚ್ಛತಿ, ಖೀರೋದಕಂ ವಿಯ ಏಕೀಭಾವಂ ಉಪೇತೀತಿ ಅತ್ಥೋ. ಸಮ್ಮೋದತೀತಿ ಉದ್ದೇಸಪರಿಪುಚ್ಛಾದೀಸು ವಚೀಕಿರಿಯಾಸು ವಾಚಾಯ ಸಮೋಧಾನಂ ಗಚ್ಛತಿ, ವಿಪ್ಪವಾಸಾಗತೋಪಿ ಪಿಯಸಹಾಯಕೋ ವಿಯ ಪಿಯತರಭಾವಂ ಉಪೇತೀತಿ ಅತ್ಥೋ. ಅಪಿಚ ಕಿಚ್ಚಕರಣೀಯೇಸು ತೇಹಿ ಸದ್ಧಿಂ ಆದೀತೋವ ಏಕಕಿರಿಯಾಭಾವಂ ಉಪಗಚ್ಛನ್ತೋ ಸನ್ಧಿಯತಿ, ಯಾವ ಮಜ್ಝಾ ಪವತ್ತನ್ತೋ ಸಂಸನ್ದತಿ, ಯಾವ ಪರಿಯೋಸಾನಾ ಅನಿವತ್ತನ್ತೋ ಸಮ್ಮೋದತೀತಿ ವೇದಿತಬ್ಬೋ.

ಲೇಖಸುತ್ತವಣ್ಣನಾ ನಿಟ್ಠಿತಾ.

ಕುಸಿನಾರವಗ್ಗವಣ್ಣನಾ ನಿಟ್ಠಿತಾ.