೧೧. ಸಙ್ಕವಾಸುತ್ತವಣ್ಣನಾ

೯೨. ಏಕಾದಸಮೇ ವಿಹಾರಪಟಿಬದ್ಧನವಕಮ್ಮಾದಿಭಾರಂ ಹರತಿ ಪವತ್ತೇತೀತಿ ಭಾರಹಾರೋ. ತೇನೇವಾಹ ‘‘ನವೇ ಆವಾಸೇ ಸಮುಟ್ಠಾಪೇತಿ, ಪುರಾಣೇ ಪಟಿಜಗ್ಗತೀ’’ತಿ. ಸಿಕ್ಖಿತಬ್ಬತೋ ಸಿಕ್ಖಾ, ಪಜ್ಜಿತಬ್ಬತೋ, ಪಜ್ಜನ್ತಿ ಏತೇಹೀತಿ ವಾ ಪದಾನಿ, ಸಿಕ್ಖಾಯೇವ ಪದಾನಿ ಸಿಕ್ಖಾಪದಾನೀತಿ ಆಹ ‘‘ಸಿಕ್ಖಾಸಙ್ಖಾತೇಹಿ ಪದೇಹೀ’’ತಿ. ದಸ್ಸೇತೀತಿ ಪಚ್ಚಕ್ಖತೋ ದಸ್ಸೇತಿ, ಹತ್ಥಾಮಲಕಂ ವಿಯ ಪಾಕಟೇ ವಿಭೂತೇ ಕತ್ವಾ ವಿಭಾವೇತಿ. ಗಣ್ಹಾಪೇತೀತಿ ತೇ ಧಮ್ಮೇ ಮನಸಾ ಅನುಪಕ್ಖಿತೇ ದಿಟ್ಠಿಯಾ ಸುಪ್ಪಟಿವಿದ್ಧೇ ಕಾರೇನ್ತೋ ಉಗ್ಗಣ್ಹಾಪೇತಿ. ಸಮುಸ್ಸಾಹೇತೀತಿ ಸಮಾಧಿಮ್ಹಿ ಉಸ್ಸಾಹಂ ಜನೇತಿ. ಪಟಿಲದ್ಧಗುಣೇಹೀತಿ ತಾಯ ದೇಸನಾಯ ತನ್ನಿಸ್ಸಯಪಚ್ಚತ್ತಪುರಿಸಕಾರೇನ ಚ ತೇಸಂ ಪಟಿವಿದ್ಧಗುಣೇಹಿ. ವೋದಾಪೇತೀತಿ ತೇಸಂ ಚಿತ್ತಸನ್ತಾನಂ ಅಸ್ಸದ್ಧಿಯಾದಿಕಿಲೇಸಮಲಾಪಗಮನೇನ ಪಭಸ್ಸರಂ ಕರೋತಿ. ಸಣ್ಹಂ ಸಣ್ಹಂ ಕಥೇತೀತಿ ಅತಿವಿಯ ಸುಖುಮಂ ಕತ್ವಾ ಕಥೇತಿ.

ಅಚ್ಚಯನಂ ಸಾಧುಮರಿಯಾದಂ ಮದ್ದಿತ್ವಾ ವೀತಿಕ್ಕಮನಂ ಅಚ್ಚಯೋತಿ ಆಹ ‘‘ಅಪರಾಧೋ’’ತಿ. ಅಚ್ಚೇತಿ ಅತಿಕ್ಕಮತಿ ಏತೇನಾತಿ ವಾ ಅಚ್ಚಯೋ, ವೀತಿಕ್ಕಮಸ್ಸ ಪವತ್ತನಕೋ ಅಕುಸಲಧಮ್ಮೋ. ಸೋ ಏವ ಅಪರಜ್ಝತಿ ಏತೇನಾತಿ ಅಪರಾಧೋ. ಸೋ ಹಿ ಅಪರಜ್ಝನ್ತಂ ಪುರಿಸಂ ಅಧಿಭವಿತ್ವಾ ಪವತ್ತತಿ. ತೇನಾಹ ‘‘ಅತಿಕ್ಕಮ್ಮ ಅಧಿಭವಿತ್ವಾ ಪವತ್ತೋ’’ತಿ. ಪಟಿಗ್ಗಣ್ಹಾತೂತಿ ಅಧಿವಾಸನವಸೇನ ಸಮ್ಪಟಿಚ್ಛತೂತಿ ಅತ್ಥೋತಿ ಆಹ ‘‘ಖಮತೂ’’ತಿ. ಸದೇವಕೇನ ಲೋಕೇನ ನಿಸ್ಸರಣನ್ತಿ ಅರಣೀಯತೋ ಅರಿಯೋ, ತಥಾಗತೋತಿ ಆಹ ‘‘ಅರಿಯಸ್ಸ ವಿನಯೇತಿ ಬುದ್ಧಸ್ಸ ಭಗವತೋ ಸಾಸನೇ’’ತಿ. ಪುಗ್ಗಲಾಧಿಟ್ಠಾನಂ ಕರೋನ್ತೋತಿ ಕಾಮಂ ‘‘ವುದ್ಧಿ ಹೇಸಾ’’ತಿ ಧಮ್ಮಾಧಿಟ್ಠಾನವಸೇನ ವಾಕ್ಯಂ ಆರದ್ಧಂ, ತಥಾಪಿ ದೇಸನಂ ಪನ ಪುಗ್ಗಲಾಧಿಟ್ಠಾನಂ ಕರೋನ್ತೋ ‘‘ಸಂವರಂ ಆಪಜ್ಜತೀ’’ತಿ ಆಹಾತಿ ಯೋಜನಾ.

ಸಙ್ಕವಾಸುತ್ತವಣ್ಣನಾ ನಿಟ್ಠಿತಾ.

ಸಮಣವಗ್ಗವಣ್ಣನಾ ನಿಟ್ಠಿತಾ.