೮-೯. ದುತಿಯಮಹಾಪಞ್ಹಸುತ್ತಾದಿವಣ್ಣನಾ

೨೮-೨೯. ಅಟ್ಠಮೇ ಏವಂನಾಮಕೇತಿ ಕಜಙ್ಗಲಾತಿ ಏವಂ ಇತ್ಥಿಲಿಙ್ಗವಸೇನ ಲದ್ಧನಾಮಕೇ ಮಜ್ಝಿಮಪ್ಪದೇಸಸ್ಸ ಮರಿಯಾದಭೂತೇ ನಗರೇ. ‘‘ನಿಗಮೇ’’ತಿಪಿ ವದನ್ತಿ, ‘‘ನಿಚುಲವನೇ’’ತಿಪಿ ವದನ್ತಿ. ನಿಚುಲಂ ನಾಮ ಏಕಾ ರುಕ್ಖಜಾತಿ, ‘‘ನೀಪರುಕ್ಖೋ’’ತಿಪಿ ವದನ್ತಿ. ತೇನ ಸಞ್ಛನ್ನೋ ಮಹಾವನಸಣ್ಡೋ, ತತ್ಥ ವಿಹರತೀತಿ ಅತ್ಥೋ. ಹೇತುನಾ ನಯೇನಾತಿ ಚ ಹೇಟ್ಠಾ ವುತ್ತಮೇವ. ನನು ಚ ‘‘ಏಸೋ ಚೇವ ತಸ್ಸ ಅತ್ಥೋ’’ತಿ ಕಸ್ಮಾ ವುತ್ತಂ. ಭಗವತಾ ಹಿ ಚತ್ತಾರೋತಿಆದಿಪಞ್ಹಬ್ಯಾಕರಣಾ ಚತ್ತಾರೋ ಆಹಾರಾ, ಪಞ್ಚುಪಾದಾನಕ್ಖನ್ಧಾ, ಛ ಅಜ್ಝತ್ತಿಕಾನಿ ಆಯತನಾನಿ, ಸತ್ತ ವಿಞ್ಞಾಣಟ್ಠಿತಿಯೋ, ಅಟ್ಠ ಲೋಕಧಮ್ಮಾ ದಸ್ಸಿತಾ. ಭಿಕ್ಖುನಿಯಾ ಪನ ಚತ್ತಾರೋ ಸತಿಪಟ್ಠಾನಾ, ಪಞ್ಚಿನ್ದ್ರಿಯಾನಿ, ಛ ನಿಸ್ಸಾರಣೀಯಾ ಧಾತುಯೋ, ಸತ್ತ ಬೋಜ್ಝಙ್ಗಾ, ಅರಿಯೋ ಅಟ್ಠಙ್ಗಿಕೋ ಮಗ್ಗೋತಿ ದಸ್ಸಿತಧಮ್ಮಾ ಅಞ್ಞೋಯೇವತ್ಥೋ ಭಿಕ್ಖುನಿಯಾ ದಸ್ಸಿತೋತಿ ಚೋದನಂ ಸನ್ಧಾಯಾಹ ‘‘ಕಿಞ್ಚಾಪೀ’’ತಿಆದಿ. ನವಮೇ ನತ್ಥಿ ವತ್ತಬ್ಬಂ.

ದುತಿಯಮಹಾಪಞ್ಹಸುತ್ತಾದಿವಣ್ಣನಾ ನಿಟ್ಠಿತಾ.