೧-೮. ವಾಹನಸುತ್ತಾದಿವಣ್ಣನಾ

೮೧-೮೮. ಚತುತ್ಥಸ್ಸ ಪಠಮೇ ವಿಮರಿಯಾದೀಕತೇನಾತಿ ನಿಮ್ಮರಿಯಾದೀಕತೇನ. ಚೇತಸಾತಿ ಏವಂವಿಧೇನ ಚಿತ್ತೇನ ವಿಹರತಿ. ತತ್ಥ ದ್ವೇ ಮರಿಯಾದಾ ಕಿಲೇಸಮರಿಯಾದಾ ಚ ಆರಮ್ಮಣಮರಿಯಾದಾ ಚ. ಸಚೇ ಹಿಸ್ಸ ರೂಪಾದಿಕೇ ಆರಬ್ಭ ರಾಗಾದಯೋ ಉಪ್ಪಜ್ಜೇಯ್ಯುಂ, ಕಿಲೇಸಮರಿಯಾದಾ ತೇನ ಕತಾ ಭವೇಯ್ಯ. ತೇಸು ಪನಸ್ಸ ಏಕೋಪಿ ನ ಉಪ್ಪನ್ನೋತಿ ಕಿಲೇಸಮರಿಯಾದಾ ನತ್ಥಿ. ಸಚೇ ಪನಸ್ಸ ರೂಪಾದಿಧಮ್ಮೇ ಆವಜ್ಜೇನ್ತಸ್ಸ ಏಕಚ್ಚೇ ಆಪಾಥಂ ನಾಗಚ್ಛೇಯ್ಯುಂ, ಏವಮಸ್ಸ ಆರಮ್ಮಣಮರಿಯಾದಾ ಭವೇಯ್ಯ. ತೇ ಪನಸ್ಸ ಧಮ್ಮೇ ಆವಜ್ಜೇನ್ತಸ್ಸ ಆಪಾಥಂ ಅನಾಗತಧಮ್ಮೋ ನಾಮ ನತ್ಥೀತಿ ಆರಮ್ಮಣಮರಿಯಾದಾಪಿ ನತ್ಥಿ. ಇಧ ಪನ ಕಿಲೇಸಮರಿಯಾದಾ ಅಧಿಪ್ಪೇತಾತಿ ಆಹ ‘‘ಕಿಲೇಸಮರಿಯಾದಂ ಭಿನ್ದಿತ್ವಾ’’ತಿಆದಿ. ತತಿಯಾದೀಸು ನತ್ಥಿ ವತ್ತಬ್ಬಂ.

ವಾಹನಸುತ್ತಾದಿವಣ್ಣನಾ ನಿಟ್ಠಿತಾ.