೧೬. ಏಕಧಮ್ಮಪಾಳಿ

(೧೬) ೩. ಏಕಧಮ್ಮಪಾಳಿ-ತತಿಯವಗ್ಗವಣ್ಣನಾ

೩೦೮. ತತಿಯಸ್ಸ ಪಠಮೇ ಅಯಾಥಾವದಿಟ್ಠಿಕೋತಿ ಅನಿಚ್ಚಾದಿಭಾವೇಸು ಧಮ್ಮೇಸು ನಿಚ್ಚಾತಿಆದಿನಾ ಉಪ್ಪನ್ನದಿಟ್ಠಿಕೋ. ತೇನಾಹ – ‘‘ತಾಯೇವ ಮಿಚ್ಛಾದಿಟ್ಠಿಯಾ ವಿಪರೀತದಸ್ಸನೋ’’ತಿ ಸದ್ಧಮ್ಮಾತಿ ಏತ್ಥ ಸನ್ತೋ ಪಸತ್ಥೋ ಸುನ್ದರೋ ಧಮ್ಮೋ, ಯೋ ಮನುಸ್ಸಧಮ್ಮೋತಿಪಿ ವುಚ್ಚತಿ. ತತೋ ಹಿ ಮಿಚ್ಛಾದಿಟ್ಠಿಕೋ ಪರಂ ವುಟ್ಠಾಪೇಯ್ಯ, ನ ಅರಿಯಧಮ್ಮತೋ. ತೇನಾಹ – ‘‘ದಸಕುಸಲಕಮ್ಮಪಥಧಮ್ಮತೋ’’ತಿ. ಏವರೂಪಾತಿ ಇಮಿನಾ ಪಾಥಿಕಪುತ್ತಾದಿಕೇ ಸಙ್ಗಣ್ಹಾತಿ.

೩೦೯. ಸಬ್ಬಞ್ಞುಬೋಧಿಸತ್ತೋತಿ ಸಬ್ಬಞ್ಞುಭಾಗೀ ಬೋಧಿಸತ್ತೋ. ಆದಿ-ಸದ್ದೇನ ಪೂರಿತಪಾರಮಿಕಾ ಪಚ್ಚೇಕಬೋಧಿಸತ್ತಾ ಏಕಚ್ಚಸಾವಕಬೋಧಿಸತ್ತಾ ಚ ಸಙ್ಗಯ್ಹನ್ತಿ.

೩೧೦. ಪರಮಾತಿ ಮಹಾಸಾವಜ್ಜಭಾವೇನ ಪರಮಾ, ಉಕ್ಕಂಸಗತಾತಿ ಅತ್ಥೋ. ತೇಸನ್ತಿ ಆನನ್ತರಿಯಕಮ್ಮಾನಂ. ಪರಿಚ್ಛೇದೋತಿ ವಿಪಾಕವಸೇನ ಪರಿಯೋಸಾನಂ. ವಟ್ಟಸ್ಸ ಮೂಲಂ, ತತೋ ತಂಸಮಙ್ಗೀಪುಗ್ಗಲೋ ವಟ್ಟಸ್ಸ ಖಾಣೂತಿ ವುಚ್ಚತಿ. ತೇನಾಹ – ‘‘ತಾಯಾ’’ತಿಆದಿ. ತಞ್ಚೇ ಗಾಹಂ ನ ವಿಸ್ಸಜ್ಜೇತಿ, ತಸ್ಸ ಪುನಪಿ ತಬ್ಭಾವಾವಹತ್ತಾ ವುತ್ತಂ – ‘‘ಭವತೋ ವುಟ್ಠಾನಂ ನತ್ಥೀ’’ತಿ, ನ ಪನ ಸಬ್ಬಸೋ ವುಟ್ಠಾನಸ್ಸ ಅಭಾವತೋ. ಯಾದಿಸೇ ಹಿ ಪಚ್ಚಯೇ ಪಟಿಚ್ಚ ಅಯಂ ತಂ ದಸ್ಸನಂ ಓಕ್ಕನ್ತೋ ಪುನ ಕದಾಚಿ ತಪ್ಪಟಿಪಕ್ಖೇ ಪಚ್ಚಯೇ ಪಟಿಚ್ಚ ತತೋ ಸೀಸುಕ್ಖಿಪನಮಸ್ಸ ನ ಹೋತೀತಿ ನ ವತ್ತಬ್ಬಂ. ಅಕುಸಲಞ್ಹಿ ನಾಮೇತಂ ಅಬಲಂ ದುಬ್ಬಲಂ, ನ ಕುಸಲಂ ವಿಯ ಮಹಾಬಲಂ. ಅಞ್ಞಥಾ ಸಮ್ಮತ್ತನಿಯಾಮೋ ವಿಯ ಮಿಚ್ಛತ್ತನಿಯಾಮೋಪಿ ಅಚ್ಚನ್ತಿಕೋ ಸಿಯಾ, ನ ಚ ಮಿಚ್ಛತ್ತನಿಯಾಮೋ ಅಚ್ಚನ್ತಿಕೋ. ತೇನೇವ ಪಪಞ್ಚಸೂದನಿಯಂ (ಮ. ನಿ. ಅಟ್ಠ. ೨.೧೦೦) –

‘‘ಕಿಂ ಪನೇಸ ಏಕಸ್ಮಿಂಯೇವ ಅತ್ತಭಾವೇ ನಿಯತೋ ಹೋತಿ, ಉದಾಹು ಅಞ್ಞಸ್ಮಿಮ್ಪೀತಿ? ಏಕಸ್ಮಿಂಯೇವ ನಿಯತೋ, ಆಸೇವನವಸೇನ ಭವನ್ತರೇಪಿ ತಂ ದಿಟ್ಠಿಂ ರೋಚೇತಿ ಏವಾ’’ತಿ –

ವುತ್ತಂ. ತತೋಯೇವ ಚ ಸುಮಙ್ಗಲವಿಲಾಸಿನಿಯಮ್ಪಿ (ದೀ. ನಿ. ಅಟ್ಠ. ೧.೧೭೦-೧೭೨) ವುತ್ತಂ –

‘‘ಯೇ ವಾ ಪನ ತೇಸಂ ಲದ್ಧಿಂ ಗಹೇತ್ವಾ ರತ್ತಿಟ್ಠಾನೇ ದಿವಾಟ್ಠಾನೇ ನಿಸಿನ್ನಾ ಸಜ್ಝಾಯನ್ತಿ ವೀಮಂಸನ್ತಿ, ತೇಸಂ ‘ಕರೋತೋ ನ ಕರೀಯತಿ ಪಾಪಂ, ನತ್ಥಿ ಹೇತು, ನತ್ಥಿ ಪಚ್ಚಯೋ, ಮತೋ ಉಚ್ಛಿಜ್ಜತೀ’ತಿ ತಸ್ಮಿಂ ಆರಮ್ಮಣೇ ಮಿಚ್ಛಾಸತಿ ಸನ್ತಿಟ್ಠತಿ, ಚಿತ್ತಂ ಏಕಗ್ಗಂ ಹೋತಿ, ಜವನಾನಿ ಜವನ್ತಿ. ಪಠಮಜವನೇ ಸತೇಕಿಚ್ಛಾ ಹೋನ್ತಿ, ತಥಾ ದುತಿಯಾದೀಸು. ಸತ್ತಮೇ ಬುದ್ಧಾನಮ್ಪಿ ಅತೇಕಿಚ್ಛಾ ಅನಿವತ್ತಿನೋ ಅರಿಟ್ಠಕಣ್ಟಕಸದಿಸಾ, ತತ್ಥ ಕೋಚಿ ಏಕಂ ದಸ್ಸನಂ ಓಕ್ಕಮತಿ, ಕೋಚಿ ದ್ವೇ, ಕೋಚಿ ತೀಣಿಪಿ, ಏಕಸ್ಮಿಂ ಓಕ್ಕನ್ತೇಪಿ ದ್ವೀಸು ತೀಸು ಓಕ್ಕನ್ತೇಸುಪಿ ನಿಯತಮಿಚ್ಛಾದಿಟ್ಠಿಕೋವ ಹೋತಿ. ಪತ್ತೋ ಸಗ್ಗಮಗ್ಗಾವರಣಞ್ಚೇವ ಮೋಕ್ಖಮಗ್ಗಾವರಣಞ್ಚ, ಅಭಬ್ಬೋ ತಸ್ಸತ್ತಭಾವಸ್ಸ ಅನನ್ತರಂ ಸಗ್ಗಮ್ಪಿ ಗನ್ತುಂ, ಪಗೇವ ಮೋಕ್ಖಂ, ವಟ್ಟಖಾಣು ನಾಮೇಸ ಸತ್ತೋ ಪಥವಿಗೋಪಕೋ, ಯೇಭುಯ್ಯೇನ ಏವರೂಪಸ್ಸ ಭವತೋ ವುಟ್ಠಾನಂ ನತ್ಥೀ’’ತಿ.

ಪಿಟ್ಠಿಚಕ್ಕವಾಳೇತಿ ಝಾಯಮಾನಚಕ್ಕವಾಳಸ್ಸ ಪರತೋ ಏಕಸ್ಮಿಂ ಓಕಾಸೇ. ಯಂ ಝಾಯಮಾನಾನಂ ಅಜ್ಝಾಯಮಾನಾನಞ್ಚ ಚಕ್ಕವಾಳಾನಮನ್ತರಂ, ಯತ್ಥ ಲೋಕನ್ತರಿಕನಿರಯಸಮಞ್ಞಾ, ತಾದಿಸೇ ಏಕಸ್ಮಿಂ ಓಕಾಸೇ. ಪಚ್ಚತಿಯೇವಾತಿ ಚಕ್ಕವಾಳೇ ಝಾಯಮಾನೇ ಅಜ್ಝಾಯಮಾನೇಪಿ ಅತ್ತನೋ ಕಮ್ಮಬಲೇನ ಪಚ್ಚತಿಯೇವ.

೩೧೧. ಚತುತ್ಥೇ ‘‘ಮಾ ಖಲೀ’’ತಿ ವಚನಂ ಉಪಾದಾಯ ಏವಂಲದ್ಧನಾಮೋತಿ ತಂ ಕಿರ ಸಕದ್ದಮಾಯ ಭೂಮಿಯಾ ತೇಲಘಟಂ ಗಹೇತ್ವಾ ಗಚ್ಛನ್ತಂ, ‘‘ತಾತ, ಮಾ ಖಲೀ’’ತಿ ಸಾಮಿಕೋ ಆಹ. ಸೋ ಪಮಾದೇನ ಖಲಿತ್ವಾ ಪತಿತ್ವಾ ಸಾಮಿಕಸ್ಸ ಭಯೇನ ಪಲಾಯಿತುಂ ಆರದ್ಧೋ. ಸಾಮಿಕೋ ಉಪಧಾವಿತ್ವಾ ಸಾಟಕಕಣ್ಣೇ ಅಗ್ಗಹೇಸಿ. ಸೋ ಸಾಟಕಂ ಛಡ್ಡೇತ್ವಾ ಅಚೇಲಕೋ ಹುತ್ವಾ ಪಲಾತೋ ಪಣ್ಣೇನ ವಾ ತಿಣೇನ ವಾ ಪಟಿಚ್ಛಾದೇತುಮ್ಪಿ ಅಜಾನನ್ತೋ ಜಾತರೂಪೇನೇವ ಏಕಂ ಗಾಮಂ ಪಾವಿಸಿ. ಮನುಸ್ಸಾ ತಂ ದಿಸ್ವಾ ‘‘ಅಯಂ ಸಮಣೋ ಅರಹಾ ಅಪ್ಪಿಚ್ಛೋ, ನತ್ಥಿ ಇಮಿನಾ ಸದಿಸೋ’’ತಿ ಪೂವಭತ್ತಾದೀನಿ ಗಹೇತ್ವಾ ಉಪಸಙ್ಕಮಿತ್ವಾ ‘‘ಮಯ್ಹಂ ಸಾಟಕಂ ಅನಿವತ್ಥಭಾವೇನ ಇದಂ ಉಪ್ಪನ್ನ’’ನ್ತಿ ತತೋ ಪಟ್ಠಾಯ ಸಾಟಕಂ ಲಭಿತ್ವಾಪಿ ನ ನಿವಾಸೇಸಿ, ತದೇವ ಚ ಪಬ್ಬಜ್ಜಂ ಅಗ್ಗಹೇಸಿ. ತಸ್ಸ ಸನ್ತಿಕೇ ಅಞ್ಞೇಪಿ ಅಞ್ಞೇಪೀತಿ ಪಞ್ಚಸತಾ ಮನುಸ್ಸಾ ಪಬ್ಬಜಿಂಸು. ತಂ ಸನ್ಧಾಯೇತಂ ವುತ್ತಂ – ‘‘ಮಾ ಖಲೀತಿ ವಚನಂ ಉಪಾದಾಯ ಏವಂಲದ್ಧನಾಮೋ ತಿತ್ಥಕರೋ’’ತಿ.

ಸಮಾಗತಟ್ಠಾನೇತಿ ದ್ವಿನ್ನಂ ನದೀನಂ ಉದಕಪ್ಪವಾಹಸ್ಸ ಸನ್ನಿಪಾತಟ್ಠಾನೇ. ದ್ವಿನ್ನಂ ಉದಕಾನನ್ತಿ ದ್ವಿನ್ನಂ ಉದಕಪ್ಪವಾಹಾನಂ. ಯಥಾವುತ್ತಟ್ಠಾನೇ ಮಚ್ಛಗ್ಗಹಣತ್ಥಂ ಖಿಪಿತಬ್ಬತೋ ಖಿಪ್ಪಂ, ಕುಮಿನಂ, ತದೇವ ಇಧ ಖಿಪ್ಪನ್ತಿ ವುತ್ತಂ. ತೇನಾಹ – ‘‘ಕುಮಿನ’’ನ್ತಿ. ಉಚ್ಛೂಹೀತಿ ಉದಕಉಚ್ಛೂಹಿ. ತುಚ್ಛಪುರಿಸೋ ಅರಿಯಧಮ್ಮಾಭಾವತೋ. ಝಾನಮತ್ತಮ್ಪಿ ಹಿ ತಸ್ಸ ನತ್ಥೇವ, ಕುತೋ ಅರಿಯಮಗ್ಗೋ. ಮನುಸ್ಸಖಿಪ್ಪಂ ಮಞ್ಞೇತಿ ಮನುಸ್ಸಾ ಪತಿತ್ವಾ ಬ್ಯಸನಪ್ಪತ್ತಿಅತ್ಥಂ ಓಟ್ಟಿತಂ ಕುಮಿನಂ ವಿಯ. ತೇನಾಹ – ‘‘ಮಹಾಜನಸ್ಸಾ’’ತಿಆದಿ.

೩೧೨. ಪಞ್ಚಮಾದೀಸು ಬಾಹಿರಕಸಾಸನನ್ತಿ ಅವಿಸೇಸೇನ ವುತ್ತಂ – ತಸ್ಸ ಸಬ್ಬಸ್ಸಪಿ ಅನಿಯ್ಯಾನಿಕತ್ತಾ ಸತ್ಥುಪಟಿಞ್ಞಸ್ಸಪಿ ಅಸಬ್ಬಞ್ಞುಭಾವತೋ. ತೇನಾಹ – ‘‘ತತ್ಥ ಹೀ’’ತಿಆದಿ. ಗಣೋತಿ ಸಾವಕಗಣೋ. ತಥಾಭಾವಾಯಾತಿ ಆಚರಿಯೇನ ವುತ್ತಾಕಾರತಾಯ ಸಮಙ್ಗಿಭಾವತ್ಥಂ. ಜಙ್ಘಸತನ್ತಿ ಬಹೂ ಅನೇಕೇ ಸತ್ತೇ. ಸಮಕಮೇವ ಅಕುಸಲಂ ಪಾಪುಣಾತೀತಿ ತೇಸಂ ಸಬ್ಬೇಸಂ ಏಕಜ್ಝಂ ಸಮಾದಪನೇಪಿ ತೇಸಂ ಅಕುಸಲೇನ ಸಮಕಮೇವ ಅಕುಸಲಂ ಪಾಪುಣಾತಿ ಏಕಜ್ಝಂ ಬಹೂನಂ ಸಮಾದಪನೇಪಿ ತಥಾ ಉಸ್ಸಹನಸ್ಸ ಬಲವಭಾವತೋ. ವಿಸುಂ ವಿಸುಂ ಸಮಾದಪನೇ ವತ್ತಬ್ಬಮೇವ ನತ್ಥಿ. ಯಥಾ ಹಿ ಧಮ್ಮಚರಿಯಾಯಂ ಸಮಕಮೇವಾತಿ ವತ್ತಬ್ಬಾ ಕಲ್ಯಾಣಮಿತ್ತತಾ, ಏವಂ ಅಧಮ್ಮಚರಿಯಾಯಂ ಅಕಲ್ಯಾಣಮಿತ್ತತಾತಿ.

೩೧೩. ಸುಟ್ಠು ಅಕ್ಖಾತೇತಿ ಏಕನ್ತತೋ ನಿಯ್ಯಾನಿಕಭಾವೇನ ಅಕ್ಖಾತೇ. ಸತ್ಥಾ ಚ ಸಬ್ಬಞ್ಞೂ ಹೋತೀತಿ ಅಸಬ್ಬಞ್ಞುನೋ ನಿಯ್ಯಾನಿಕಭಾವೇನ ಕಥೇತುಂ ಅಸಕ್ಕುಣೇಯ್ಯತ್ತಾ. ಧಮ್ಮೋ ಚ ಸ್ವಾಕ್ಖಾತೋ ಸಮ್ಮಾಸಮ್ಬುದ್ಧಪ್ಪವೇದಿತತ್ತಾ. ಗಣೋ ಚ ಸುಪ್ಪಟಿಪನ್ನೋ ಸತ್ಥಾರಾ ಸುವಿನೀತತ್ತಾ. ಸಮಾದಪಕೋ ಹೀತಿಆದಿ ಸುಪ್ಪಟಿಪತ್ತಿಯಾ ನಿದಸ್ಸನಂ ದಟ್ಠಬ್ಬಂ.

೩೧೪. ಪಮಾಣಂ ಜಾನಿತಬ್ಬನ್ತಿ ‘‘ಅಯಂ ಏತ್ತಕೇನ ಯಾಪೇತಿ, ಇಮಸ್ಸ ಏತ್ತಕಂ ದಾತುಂ ಯುತ್ತ’’ನ್ತಿ ಏವಂ ಪಮಾಣಂ ಜಾನಿತಬ್ಬಂ. ಅತಿರೇಕೇ…ಪೇ… ನಿಬ್ಬಾನಸಮ್ಪತ್ತಿ ವಾ ನತ್ಥಿ ದುರಕ್ಖಾತತ್ತಾ ಧಮ್ಮಸ್ಸ. ತಸ್ಸಾತಿ ಪಟಿಗ್ಗಾಹಕಸ್ಸ. ಅಪ್ಪಿಚ್ಛಪಟಿಪದಾ ನಾಮ ನತ್ಥಿ ದುರಕ್ಖಾತೇ ಧಮ್ಮವಿನಯೇತಿ ಅಧಿಪ್ಪಾಯೋ.

೩೧೫. ದಾಯಕಸ್ಸ ವಸೋ ನಾಮ ಉಳಾರುಳಾರತಾಭೇದೋ ಅಜ್ಝಾಸಯೋ. ದೇಯ್ಯಧಮ್ಮಸ್ಸ ಪನ ಥೋಕಬಹುತಾವ ದೇಯ್ಯಧಮ್ಮಸ್ಸ ವಸೋ ನಾಮ. ಅತ್ತನೋ ಥಾಮೋತಿ ಯಾಪನಪ್ಪಮಾಣಂ. ಯದಿ ಹೀತಿಆದಿ ‘‘ಕಥ’’ನ್ತಿಆದಿನಾ ಸಙ್ಖೇಪತೋ ವುತ್ತಸ್ಸ ಅತ್ಥಸ್ಸ ವಿವರಣಂ. ಅನುಪ್ಪನ್ನಸ್ಸಾತಿ ಅನುಪ್ಪನ್ನೋ ಅಸ್ಸ ಪುಗ್ಗಲಸ್ಸ. ಚಕ್ಖುಭೂತೋ ಹೋತೀತಿ ಮಹಾಜನಸ್ಸ ಚಕ್ಖು ವಿಯ ಹೋತಿ. ಸಾಸನಂ ಚಿರಟ್ಠಿತಿತಂ ಕರೋತೀತಿ ಅನುಪ್ಪನ್ನಲಾಭುಪ್ಪಾದನೇನ ಮಹಾಜನಸ್ಸ ಪಸಾದುಪ್ಪಾದನೇನ ಚ ಚಿರಟ್ಠಿತಿಕಂ ಕರೋತಿ.

ಕುಟುಮ್ಬರಿಯವಿಹಾರೇತಿ ಕುಟುಮ್ಬರಿಯಗಾಮಸನ್ನಿಸ್ಸಿತವಿಹಾರೇ. ಭುಞ್ಜನತ್ಥಾಯಾತಿ ತಸ್ಮಿಂಯೇವ ಗೇಹೇ ನಿಸೀದಿತ್ವಾ ಭುಞ್ಜನತ್ಥಾಯ. ಗಹೇತ್ವಾ ಗಮನತ್ಥಾಯಾತಿ ಗೇಹತೋ ಬಹಿ ಗಹೇತ್ವಾ ಗಮನತ್ಥಾಯ. ಧುರಭತ್ತಾನೀತಿ ನಿಚ್ಚಭತ್ತಾನಿ. ಚೂಳುಪಟ್ಠಾಕನ್ತಿ ವೇಯ್ಯಾವಚ್ಚಕರಂ. ವೀಮಂಸಿತ್ವಾತಿ ಯಥಾ ಉದ್ದಿಸ್ಸ ಕತಂ ನ ಹೋತಿ, ಏವಂ ವೀಮಂಸಿತ್ವಾ. ಮಹಾಜನೋ ಅಪ್ಪಿಚ್ಛೋ ಭವಿತುಂ ಮಞ್ಞತೀತಿ ಮಹಾಜನೋ ಸಯಂ ಅಪ್ಪಿಚ್ಛೋ ಭವಿತುಂ ಮಞ್ಞತಿ ದಿಟ್ಠಾನುಗತಿಂ ಆಪಜ್ಜನೇನ. ಮಹಾಜನಸ್ಸಾತಿ ಬಹುಜನಸ್ಸ. ಅವತ್ಥರಿತ್ವಾತಿ ವಿತ್ಥಾರಿಕಂ ಕತ್ವಾ.

೩೧೬. ಪಞ್ಚಾತಪತಪ್ಪನಂ ಚತೂಸು ಪಸ್ಸೇಸು ಅಗ್ಗಿಸನ್ತಾಪಸ್ಸ ಉಪರಿ ಸೂರಿಯಸನ್ತಾಪಸ್ಸ ಚ ತಪ್ಪನಂ, ತಞ್ಚ ಖೋ ಗಿಮ್ಹಕಾಲೇ. ಛಿನ್ನಪ್ಪಪಾತಪಬ್ಬತಸಿಖರತೋ ಪತನಂ ಮರುಪ್ಪಪಾತಪತನಂ. ಪುಬ್ಬಣ್ಹಾದೀಸು ಆದಿಚ್ಚಾಭಿಮುಖಾವಟ್ಟನಂ ಆದಿಚ್ಚಾನುಪರಿವತ್ತನಂ.

೩೧೭. ಅಯಮ್ಪೀತಿ ಸ್ವಾಕ್ಖಾತೇ ಧಮ್ಮವಿನಯೇ ಕುಸೀತೋಪಿ. ಸಾಮಞ್ಞನ್ತಿ ತಪಚರಣಂ. ದುಪ್ಪರಾಮಟ್ಠನ್ತಿ ಮಿಚ್ಛಾಚರಿತಂ ಸಂಕಿಲಿಟ್ಠಂ. ನಿರಯಾಯುಪಕಡ್ಢತೀತಿ ನಿರಯದುಕ್ಖಾಯ ನಂ ಕಡ್ಢತಿ.

೩೧೮. ವುತ್ತಪ್ಪಕಾರೇತಿ ಪಞ್ಚಾತಪತಪ್ಪನಾದಿಕೇ ವುತ್ತಪ್ಪಕಾರೇ.

೩೧೯. ಏವನ್ತಿ ವುತ್ತಪ್ಪಕಾರಾಯ ಚಿತ್ತಪ್ಪಸಾದವ್ಹಯಸುಪ್ಪಟಿಪತ್ತಿಯಾ. ತೇನ ಸಮಣಧಮ್ಮಕರಣಸುಖಞ್ಚ ಸಙ್ಗಣ್ಹಾತಿ.

೩೨೦. ನವಕನಿಪಾತೇತಿ ಇಮಸ್ಮಿಂಯೇವ ಅಙ್ಗುತ್ತರನಿಕಾಯೇ ವಕ್ಖಮಾನಂ ನವಕನಿಪಾತಂ ಸನ್ಧಾಯಾಹ. ನವ ಪುಗ್ಗಲಾತಿ ಸತ್ತಕ್ಖತ್ತುಪರಮಕೋಲಂಕೋಲಾದಯೋ ನವ ಪುಗ್ಗಲಾ. ಸಬ್ಬತ್ಥಾತಿ ಇಮಸ್ಮಿಂ ಸುತ್ತೇ ವುತ್ತಾವಸಿಟ್ಠೇಸು ಸಬ್ಬೇಸು ಸುತ್ತೇಸು.

ತತಿಯವಗ್ಗವಣ್ಣನಾ ನಿಟ್ಠಿತಾ.