೮. ಅಟ್ಠಮೋ ಪರಿಚ್ಛೇದೋ

ಪಕಿಣ್ಣಕನಿದ್ದೇಸೋ

೪೭೫. ಇದಾನಿ ಪನ ಸಬ್ಬೇಸಂ, ಏತೇಸಂ ಮಾನಸಂ ಮಯಾ;

ಪಾಟವತ್ಥಾಯ ಭಿಕ್ಖೂನಂ, ಕಥೀಯತಿ ಪಕಿಣ್ಣಕಂ.

೪೭೬. ಪನ್ಥಮಕ್ಕಟಕೋ ನಾಮ, ದಿಸಾಸು ಪನ ಪಞ್ಚಸು;

ತತ್ಥ ಸುತ್ತಂ ಪಸಾರೇತ್ವಾ, ಜಾಲಮಜ್ಝೇ ನಿಪಜ್ಜತಿ.

೪೭೭. ಪಠಮಾಯ ದಿಸಾಯೇತ್ಥ, ಸುತ್ತೇ ಪನ ಪಸಾರಿತೇ;

ಪಾಣಕೇನ ಪಟಙ್ಗೇನ, ಘಟ್ಟಿತೇ ಮಕ್ಖಿಕಾಯ ವಾ.

೪೭೮. ನಿಪನ್ನಟ್ಠಾನತೋ ಕಿಞ್ಚಿ, ಚಲಿತ್ವಾ ಉಣ್ಣನಾಭಿ ತು;

ಗನ್ತ್ವಾ ಸುತ್ತಾನುಸಾರೇನ, ಯೂಸಂ ಪಿವತಿ ತಸ್ಸ ಸಾ.

೪೭೯. ಪುನಾಗನ್ತ್ವಾನ ತತ್ಥೇವ, ನಿಪಜ್ಜತಿ ಯಥಾಸುಖಂ;

ಏವಮೇವ ಕರೋತೇವ, ದಿಸಾಸು ದುತಿಯಾದಿಸು.

೪೮೦. ಪಸಾದಾ ಪಞ್ಚ ದಟ್ಠಬ್ಬಾ, ಸುತ್ತಂ ಪಞ್ಚದಿಸಾಸ್ವಿವ;

ಚಿತ್ತಂ ಪನ ಚ ದಟ್ಠಬ್ಬಂ, ಮಜ್ಝೇ ಮಕ್ಕಟಕೋ ವಿಯ.

೪೮೧. ಪಾಣಕಾದೀಹಿ ಸುತ್ತಸ್ಸ, ತಸ್ಸ ಸಙ್ಘಟ್ಟನಾ ವಿಯ;

ಪಸಾದಾನಂ ತು ದಟ್ಠಬ್ಬಾ, ಘಟ್ಟನಾರಮ್ಮಣೇನ ಹಿ.

೪೮೨. ಚಲನಂ ವಿಯ ತಂಮಜ್ಝೇ, ನಿಪನ್ನಾಯುಣ್ಣನಾಭಿಯಾ;

ಪಸಾದಘಟ್ಟನಂ ತತ್ಥ, ಗಹೇತ್ವಾರಮ್ಮಣಂ ಪನ.

೪೮೩. ಮನೋಧಾತುಕ್ರಿಯಾಚಿತ್ತಂ, ಭವಙ್ಗಾವಟ್ಟನಂ ಮತಂ;

ತಸ್ಸಾ ಸುತ್ತಾನುಸಾರಂವ, ವೀಥಿಚಿತ್ತಪವತ್ತನಂ.

೪೮೪. ಸೀಸೇ ಪನಸ್ಸ ವಿಜ್ಝಿತ್ವಾ, ಯೂಸಪಾನಂವ ಚೇತಸೋ;

ಆರಮ್ಮಣೇಸು ದಟ್ಠಬ್ಬಂ, ಜವನಸ್ಸ ಪವತ್ತನಂ.

೪೮೫. ಪುನಾಗನ್ತ್ವಾ ಯಥಾ ಸುತ್ತ-ಜಾಲಮಜ್ಝೇ ನಿಪಜ್ಜನಂ;

ವತ್ಥುಂಯೇವ ಚ ನಿಸ್ಸಾಯ, ಚಿತ್ತಸ್ಸ ಪರಿವತ್ತನಂ.

೪೮೬. ಇದಂ ತು ಪನ ಓಪಮ್ಮಂ, ಅತ್ಥಂ ದೀಪೇತಿ ಕಿಂ ತು ಹಿ;

ಆರಮ್ಮಣೇನ ಪಠಮಂ, ಪಸಾದೇ ಘಟ್ಟಿತೇ ಪನ.

೪೮೭. ಪಸಾದವತ್ಥುತೋ ಚಿತ್ತಾ, ವತ್ಥುಸನ್ನಿಸ್ಸಿತಂ ಮನೋ;

ತತೋ ಹಿ ಪಠಮಂಯೇವ, ಜಾಯತೀತಿ ಹಿ ದೀಪಿತಂ.

೪೮೮. ಏಕೇಕಾರಮ್ಮಣಂ ದ್ವೀಸು, ದ್ವೀಸು ದ್ವಾರೇಸು ಸಬ್ಬಸೋ;

ಆಗಚ್ಛತಿ ತೇನಾಪಾಥಂ, ಅಯಮತ್ಥೋಪಿ ದೀಪಿತೋ.

೪೮೯. ರೂಪಂ ಚಕ್ಖುಪಸಾದಮ್ಹಿ, ಘಟ್ಟಿತ್ವಾ ತಙ್ಖಣೇ ಪನ;

ಮನೋದ್ವಾರೇ ತಥಾಪಾಥ-ಮಾಗಚ್ಛತಿ ನಿಸಂಸಯೋ.

೪೯೦. ಖಗೋ ಯಥಾ ಹಿ ರುಕ್ಖಗ್ಗೇ, ನಿಲೀಯನ್ತೋವ ಸಾಖಿನೋ;

ಸಾಖಂ ಘಟ್ಟೇತಿ ತಸ್ಸೀಧ, ಛಾಯಾ ಫರತಿ ಭೂಮಿಯಂ.

೪೯೧. ಸಾಖಾಯ ಘಟ್ಟನಚ್ಛಾಯಾ, ಫರಣಾನಿ ಚ ಸಬ್ಬಸೋ;

ಅಪುಬ್ಬಾಚರಿಮಂ ಏಕ-ಕ್ಖಣಸ್ಮಿಂಯೇವ ಜಾಯರೇ.

೪೯೨. ಏವಮೇವ ಚ ರೂಪಸ್ಸ, ಪಸಾದಸ್ಸ ಚ ಘಟ್ಟನಂ;

ಭವಙ್ಗಚಲನಸ್ಸಾಪಿ, ಪಚ್ಚಯತ್ತೇನ ಅತ್ಥತೋ.

೪೯೩. ತಥೇವ ಚ ಮನೋದ್ವಾರೇ, ಆಪಾಥಗಮನಮ್ಪಿ ಚ;

ಅಪುಬ್ಬಾಚರಿಮಂ ಏಕ-ಕ್ಖಣಸ್ಮಿಂಯೇವ ಹೋತಿತಿ.

೪೯೪. ತತೋ ಭವಙ್ಗಂ ಛಿನ್ದಿತ್ವಾ, ಚಕ್ಖುದ್ವಾರೇ ಯಥಾಕ್ಕಮಂ;

ಆವಜ್ಜನೇ ಸಮುಪ್ಪನ್ನೇ, ದಸ್ಸನೇ ಸಮ್ಪಟಿಚ್ಛನೇ.

೪೯೫. ಸನ್ತೀರಣೇ ಸಮುಪ್ಪನ್ನೇ, ತತೋ ವೋಟ್ಠಬ್ಬನೇಪಿ ಚ;

ಕುಸಲಂ ಜವನಂ ಚಿತ್ತಂ, ತಥಾಕುಸಲಮೇವ ವಾ.

೪೯೬. ಏಸೋ ಏವ ನಯೋ ಸೋತ-ದ್ವಾರಾದೀಸುಪಿ ವಿಞ್ಞುನಾ;

ಅವಿಸೇಸೇನ ವಿಞ್ಞೇಯ್ಯೋ, ಸದ್ದಾದೀನಂ ತು ಘಟ್ಟನೇ.

೪೯೭. ದೋವಾರಿಕೋಪಮಾದೀನಿ, ಏತಸ್ಸತ್ಥಸ್ಸ ದೀಪನೇ;

ಉದ್ಧರಿತ್ವಾನ ತಾನೇತ್ಥ, ದಸ್ಸೇತಬ್ಬಾನಿ ವಿಞ್ಞುನಾ.

೪೯೮. ಅಸಮ್ಭೇದೇನ ಚಕ್ಖುಸ್ಸ, ರೂಪಾಪಾಥಗಮೇನ ಚ;

ಆಲೋಕನಿಸ್ಸಯೇನಾಪಿ, ಸಮನಕ್ಕಾರಹೇತುನಾ.

೪೯೯. ಪಚ್ಚಯೇಹಿ ಪನೇತೇಹಿ, ಸಮೇತೇಹಿ ಚತೂಹಿಪಿ;

ಜಾಯತೇ ಚಕ್ಖುವಿಞ್ಞಾಣಂ, ಸಮ್ಪಯುತ್ತೇಹಿ ತಂ ಸಹ.

೫೦೦. ಅಸಮ್ಭೇದೇನ ಸೋತಸ್ಸ, ಸದ್ದಾಪಾಥಗಮೇನ ಚ;

ಆಕಾಸನಿಸ್ಸಯೇನಾಪಿ, ಸಮನಕ್ಕಾರಹೇತುನಾ.

೫೦೧. ಪಚ್ಚಯೇಹಿ ಪನೇತೇಹಿ, ಸಮೇತೇಹಿ ಚತೂಹಿಪಿ;

ಜಾಯತೇ ಸೋತವಿಞ್ಞಾಣಂ, ಸಮ್ಪಯುತ್ತೇಹಿ ತಂ ಸಹ.

೫೦೨. ಅಸಮ್ಭೇದೇನ ಘಾನಸ್ಸ, ಗನ್ಧಾಪಾಥಗಮೇನ ಚ;

ವಾಯೋಸನ್ನಿಸ್ಸಯೇನಾಪಿ, ಸಮನಕ್ಕಾರಹೇತುನಾ.

೫೦೩. ಪಚ್ಚಯೇಹಿ ಪನೇತೇಹಿ, ಸಮೇತೇಹಿ ಚತೂಹಿಪಿ;

ಜಾಯತೇ ಘಾನವಿಞ್ಞಾಣಂ, ಸಮ್ಪಯುತ್ತೇಹಿ ತಂ ಸಹ.

೫೦೪. ಅಸಮ್ಭೇದೇನ ಜಿವ್ಹಾಯ, ರಸಾಪಾಥಗಮೇನ ಚ;

ಆಪೋಸನ್ನಿಸ್ಸಯೇನಾಪಿ, ಸಮನಕ್ಕಾರಹೇತುನಾ.

೫೦೫. ಪಚ್ಚಯೇಹಿ ಪನೇತೇಹಿ, ಸಮೇತೇಹಿ ಚತೂಹಿಪಿ;

ಜಾಯತೇ ಜಿವ್ಹಾವಿಞ್ಞಾಣಂ, ಸಮ್ಪಯುತ್ತೇಹಿ ತಂ ಸಹ.

೫೦೬. ಅಸಮ್ಭೇದೇನ ಕಾಯಸ್ಸ, ಫೋಟ್ಠಬ್ಬಾಪಾಥಸಙ್ಗಮಾ;

ಪಥವೀನಿಸ್ಸಯೇನಾಪಿ, ಸಮನಕ್ಕಾರಹೇತುನಾ.

೫೦೭. ಪಚ್ಚಯೇಹಿ ಪನೇತೇಹಿ, ಸಮೇತೇಹಿ ಚತೂಹಿಪಿ;

ಜಾಯತೇ ಕಾಯವಿಞ್ಞಾಣಂ, ಸಮ್ಪಯುತ್ತೇಹಿ ತಂ ಸಹ.

೫೦೮. ಅಸಮ್ಭೇದಾ ಮನಸ್ಸಾಪಿ, ಧಮ್ಮಾಪಾಥಗಮೇನ ಚ;

ವತ್ಥುಸನ್ನಿಸ್ಸಯೇನಾಪಿ, ಸಮನಕ್ಕಾರಹೇತುನಾ.

೫೦೯. ಪಚ್ಚಯೇಹಿ ಪನೇತೇಹಿ, ಸಮೇತೇಹಿ ಚತೂಹಿಪಿ;

ಮನೋವಿಞ್ಞಾಣಮೇವಂ ತು, ಸಮ್ಪಯುತ್ತೇಹಿ ಜಾಯತೇ.

೫೧೦. ಮನೋ ಭವಙ್ಗಚಿತ್ತನ್ತಿ, ವೇದಿತಬ್ಬಂ ವಿಭಾವಿನಾ;

ಆವಜ್ಜನಕ್ರಿಯಾಚಿತ್ತಂ, ಸಮನಕ್ಕಾರೋತಿ ಸಞ್ಞಿತಂ.

೫೧೧. ವತ್ಥುಸನ್ನಿಸ್ಸಯೇನಾತಿ, ನಾಯಂ ಸಬ್ಬತ್ಥ ಗಚ್ಛತಿ;

ಭವಂ ತು ಪಞ್ಚವೋಕಾರಂ, ಸನ್ಧಾಯ ಕಥಿತೋ ಪನ.

೫೧೨. ಪಟಿಸನ್ಧಾದಿಚಿತ್ತಾನಿ, ಸಬ್ಬಾನೇಕೂನವೀಸತಿ;

ಕಾಮೇ ದಸ ಚ ರೂಪೇಸು, ಪಞ್ಚ ಚತ್ತಾರಿರೂಪಿಸು.

೫೧೩. ಕಮ್ಮಂ ಕಮ್ಮನಿಮಿತ್ತಞ್ಚ, ತಥಾ ಗತಿನಿಮಿತ್ತಕಂ;

ಇದಂ ಹಿ ತಿವಿಧಂ ತೇಸಂ, ಆರಮ್ಮಣಮುದೀರಿತಂ.

೫೧೪. ಕಾಮಾವಚರಸನ್ಧೀನಂ, ಪರಿತ್ತಾರಮ್ಮಣಂ ಮತಂ;

ಪಚ್ಚುಪ್ಪನ್ನಮತೀತಂ ವಾ, ಹೋತಿ ನತ್ಥಿ ಅನಾಗತಂ.

೫೧೫. ಅಟ್ಠೇವ ಚ ಮಹಾಪಾಕಾ, ತೀಣಿ ಸನ್ತೀರಣಾನಿ ಚ;

ಏಕಾದಸವಿಧಂ ಚಿತ್ತಂ, ತದಾರಮ್ಮಣಸಞ್ಞಿತಂ.

೫೧೬. ಏಕಾದಸವಿಧೇ ಚಿತ್ತೇ, ತದಾರಮ್ಮಣಸಞ್ಞಿತೇ;

ದಸ ಪುಞ್ಞವಿಪಾಕಾನಿ, ಏಕಂ ಹೋತಿ ಅಪುಞ್ಞಜಂ.

೫೧೭. ಮಹಾಪಾಕಾ ನ ಜಾಯನ್ತೇ, ರೂಪಾರೂಪಭವದ್ವಯೇ;

ಕಾಮೇ ರೂಪೇ ಭವೇ ಚೇವ, ಹೋತಿ ಸನ್ತೀರಣತ್ತಯಂ.

೫೧೮. ತದಾರಮ್ಮಣಚಿತ್ತಾನಿ, ಯಾನಿ ವುತ್ತಾನಿ ಸತ್ಥುನಾ;

ತೇಸು ಚಿತ್ತಂ ಪನೇಕಮ್ಪಿ, ರೂಪಾರೂಪಭವದ್ವಯೇ.

೫೧೯. ನ ತದಾರಮ್ಮಣಂ ಹುತ್ವಾ, ಪವತ್ತತಿ ಕದಾಚಿಪಿ;

ಕಸ್ಮಾ ನ ಹೋತಿ ಚೇ ತತ್ಥ, ಬೀಜಸ್ಸಾಭಾವತೋ ಪನ.

೫೨೦. ಪಟಿಸನ್ಧಿಬೀಜಂ ನತ್ಥೇತ್ಥ, ಕಾಮಾವಚರಸಞ್ಞಿತಂ;

ರೂಪಾದಿಗೋಚರೇ ತಸ್ಸ, ಭವೇಯ್ಯ ಜನಕಂ ತು ಯಂ.

೫೨೧. ಚಕ್ಖುವಿಞ್ಞಾಣಕಾದೀನಂ, ನತ್ಥಿತಾಪಜ್ಜತೀತಿ ಚೇ;

ನಿನ್ದ್ರಿಯಾನಂ ಪವತ್ತಾನು-ಭಾವತೋ ಚಿತ್ತಸಮ್ಭವೋ.

೫೨೨. ಏಕನ್ತೇನ ಯಥಾ ಚೇತಂ, ತದಾರಮ್ಮಣಮಾನಸಂ;

ನಪ್ಪವತ್ತತಿ ಸಬ್ಬಮ್ಪಿ, ರೂಪಾರೂಪಭವದ್ವಯೇ.

೫೨೩. ಅಕಾಮಾವಚರಧಮ್ಮೇಪಿ, ತದೇತಂ ನಾನುಬನ್ಧತಿ;

ಕಸ್ಮಾ ಅಜನಕತ್ತಾ ಹಿ, ಜನಕಸ್ಸಾಸಮಾನತೋ.

೫೨೪. ಜನಕಂ ತೇನ ತುಲ್ಯಂ ವಾ, ಕಾಮಾವಚರಸಞ್ಞಿತಂ;

ಕುಸಲಾಕುಸಲಾದಿಂ ತು, ಜವನಂ ಅನುಬನ್ಧತಿ.

೫೨೫. ಕಾಮಾವಚರಧಮ್ಮಾಪಿ, ಯೇ ಮಹಗ್ಗತಗೋಚರಾ;

ಹುತ್ವಾ ವತ್ತನ್ತಿ ತೇ ಚಾಪಿ, ಇದಂ ನೇವಾನುಬನ್ಧತಿ.

೫೨೬. ಪರಿತ್ತಾರಮ್ಮಣತ್ತಾ ಚ, ಏಕನ್ತೇನ ಪನಸ್ಸ ಹಿ;

ತಥಾಪರಿಚಿತತ್ತಾ ಚ, ನಾನುಬನ್ಧತಿ ಸಬ್ಬದಾ.

೫೨೭. ಕಿಂ ತೇನ ಯುತ್ತಿವಾದೇನ, ವುತ್ತಂ ಅಟ್ಠಕಥಾಸು ಹಿ;

ತದಾರಮ್ಮಣಚಿತ್ತಾನಿ, ಏಕಾದಸಪಿ ಸಬ್ಬಸೋ.

೫೨೮. ನಾಮಗೋತ್ತಂ ಪನಾರಬ್ಭ, ಜವನೇ ಜವಿತೇಪಿ ಚ;

ತದಾರಮ್ಮಣಂ ನ ಗಣ್ಹನ್ತಿ, ರೂಪಾರೂಪಭವೇಸು ವಾ.

೫೨೯. ಯದಾ ಪಞ್ಞತ್ತಿಮಾರಬ್ಭ, ಜವನೇ ಜವಿತೇಪಿ ವಾ;

ತಥಾ ವಿಪಸ್ಸನಾಯಾಪಿ, ಲಕ್ಖಣಾರಮ್ಮಣಾಯ ಚ.

೫೩೦. ತದಾರಮ್ಮಣಾ ನ ಲಬ್ಭನ್ತಿ, ಮಿಚ್ಛತ್ತನಿಯತೇಸುಪಿ;

ನ ಲೋಕುತ್ತರಧಮ್ಮೇಪಿ, ಆರಬ್ಭ ಜವನೇ ಗತೇ.

೫೩೧. ತಥಾ ಮಹಗ್ಗತೇ ಧಮ್ಮೇ, ಆರಬ್ಭ ಜವನೇ ಪನ;

ಪಟಿಸಮ್ಭಿದಾಞಾಣಾನಿ, ಆರಬ್ಭ ಜವಿತೇಪಿ ಚ.

೫೩೨. ಮನೋದ್ವಾರೇಪಿ ಸಬ್ಬೇಸಂ, ಜವನಾನಮನನ್ತರಂ;

ತದಾರಮ್ಮಣಚಿತ್ತಾನಿ, ಭವನ್ತಿ ಅನುಪುಬ್ಬತೋ.

೫೩೩. ನ ವಿಜ್ಜತಿ ಮನೋದ್ವಾರೇ, ಘಟ್ಟನಾರಮ್ಮಣಸ್ಸ ಹಿ;

ಕಥಂ ಭವಙ್ಗತೋ ಹೋತಿ, ವುಟ್ಠಾನಂ ಪನ ಚೇತಸೋ.

೫೩೪. ಮನೋದ್ವಾರೇಪಿ ಆಪಾಥ-ಮಾಗಚ್ಛನ್ತೇವ ಗೋಚರಾ;

ಘಟ್ಟನಾಯ ವಿನಾ ತಸ್ಮಾ, ಚಿತ್ತಾನಂ ಹೋತಿ ಸಮ್ಭವೋ.

೫೩೫. ದ್ವಾದಸಾಪುಞ್ಞಚಿತ್ತಾನಂ, ವಿಪಾಕಾ ಸತ್ತಸತ್ತತಿ;

ಭವನ್ತಿ ಚತುರಾಸೀತಿ, ಪಾಪಪಾಕಾ ಪವತ್ತಿಯಂ.

೫೩೬. ಏಕಾದಸವಿಧಾನಂ ತು, ಹಿತ್ವಾ ಉದ್ಧಚ್ಚಮಾನಸಂ;

ಏಕಾದಸವಿಧಾ ಚೇವ, ಭವನ್ತಿ ಪಟಿಸನ್ಧಿಯೋ.

೫೩೭. ಕ್ರಿಯಚಿತ್ತೇಸು ಸಬ್ಬೇಸು, ಜವನಂ ನ ಚ ಹೋತಿ ಯಂ;

ತಂ ವೇ ಕರಣಮತ್ತತ್ತಾ, ವಾತಪುಪ್ಫಸಮಂ ಮತಂ.

೫೩೮. ಜವನತ್ತಂ ತು ಸಮ್ಪತ್ತಂ, ಕಿಚ್ಚಸಾಧನತೋ ಪನ;

ಛಿನ್ನಮೂಲಸ್ಸ ರುಕ್ಖಸ್ಸ, ಪುಪ್ಫಂವ ಅಫಲಂ ಸಿಯಾ.

೫೩೯. ಪಟಿಚ್ಚ ಪನ ಏತಸ್ಮಾ, ಫಲಮೇತೀತಿ ಪಚ್ಚಯೋ;

ಯೋ ಧಮ್ಮೋ ಯಸ್ಸ ಧಮ್ಮಸ್ಸ, ಠಿತಿಯುಪ್ಪತ್ತಿಯಾಪಿ ವಾ.

೫೪೦. ಉಪಕಾರೋ ಹಿ ಸೋ ತಸ್ಸ, ಪಚ್ಚಯೋತಿ ಪವುಚ್ಚತಿ;

ಸಮ್ಭವೋಪಭವೋ ಹೇತು, ಕಾರಣಂ ಪಚ್ಚಯೋ ಮತೋ.

೫೪೧. ಲೋಭಾದಿ ಪನ ಯೋ ಧಮ್ಮೋ, ಮೂಲಟ್ಠೇನುಪಕಾರಕೋ;

ಹೇತೂತಿ ಪನ ಸೋ ಧಮ್ಮೋ, ವಿಞ್ಞಾತಬ್ಬೋ ವಿಭಾವಿನಾ.

೫೪೨. ಲೋಭೋ ದೋಸೋ ಚ ಮೋಹೋ ಚ,

ತಥಾಲೋಭಾದಯೋ ತಯೋ;

ಛಳೇವ ಹೇತುಯೋ ಹೋನ್ತಿ,

ಜಾತಿತೋ ನವಧಾ ಸಿಯುಂ.

೫೪೩. ಧಮ್ಮಾನಂ ಕುಸಲಾದೀನಂ, ಕುಸಲಾದಿತ್ತಸಾಧಕೋ;

ಮೂಲಟ್ಠೋತಿ ವದನ್ತೇವಂ, ಏಕೇ ಆಚರಿಯಾ ಪನ.

೫೪೪. ಏವಂ ಸನ್ತೇ ತು ಹೇತೂನಂ, ತಂಸಮುಟ್ಠಾನರೂಪಿಸು;

ಹೇತುಪಚ್ಚಯತಾ ನೇವ, ಸಮ್ಪಜ್ಜತಿ ಕದಾಚಿಪಿ.

೫೪೫. ನ ಹಿ ತೇ ಪನ ರೂಪಾನಂ, ಸಾಧೇನ್ತಿ ಕುಸಲಾದಿಕಂ;

ನ ತೇಸಂ ಪನ ರೂಪಾನಂ, ಪಚ್ಚಯಾ ನ ಚ ಹೋನ್ತಿ ತೇ.

೫೪೬. ತಸ್ಮಾ ಹಿ ಕುಸಲಾದೀನಂ, ಕುಸಲಾದಿತ್ತಸಾಧಕೋ;

ಮೂಲಟ್ಠೋತಿ ನ ಗನ್ತಬ್ಬೋ, ವಿಞ್ಞುನಾ ಸಮಯಞ್ಞುನಾ.

೫೪೭. ಸುಪ್ಪತಿಟ್ಠಿತಭಾವಸ್ಸ, ಸಾಧನೇನುಪಕಾರಕೋ;

ಮೂಲಟ್ಠೋತಿ ಚ ಹೇತೂನಂ, ವಿಞ್ಞಾತಬ್ಬೋ ವಿಭಾವಿನಾ.