೯. ನವಮೋ ಪರಿಚ್ಛೇದೋ

ಪುಞ್ಞವಿಪಾಕಪಚ್ಚಯನಿದ್ದೇಸೋ

೫೬೦. ಬಾತ್ತಿಂಸ ಪಾಕಚಿತ್ತಾನಿ, ಲೋಕಿಕಾನೇವ ಯಾನಿ ಹಿ;

ಏತೇಸಂ ಪಾಕಚಿತ್ತಾನಂ, ಪಟಿಸನ್ಧಿಪವತ್ತಿಸು.

೫೬೧. ಪುಞ್ಞಾಪುಞ್ಞಾದಿಸಙ್ಖಾರಾ, ಯಥಾ ಯೇಸಞ್ಚ ಪಚ್ಚಯಾ;

ಭವಾದೀಸು ತಥಾ ತೇಪಿ, ವಿಞ್ಞಾತಬ್ಬಾ ವಿಭಾವಿನಾ.

೫೬೨. ತಯೋ ಭವಾ ಚತಸ್ಸೋ ಚ, ಯೋನಿಯೋ ಗತಿಪಞ್ಚಕಂ;

ವಿಞ್ಞಾಣಟ್ಠಿತಿಯೋ ಸತ್ತ, ಸತ್ತಾವಾಸಾ ನವೇರಿತಾ.

೫೬೩. ಕಾಮೇ ಪುಞ್ಞಾಭಿಸಙ್ಖಾರ-ಸಞ್ಞಿತಾ ಅಟ್ಠ ಚೇತನಾ;

ನವನ್ನಂ ಪಾಕಚಿತ್ತಾನಂ, ಕಾಮೇ ಸುಗತಿಯಂ ಪನ.

೫೬೪. ನಾನಾಕ್ಖಣಿಕಕಮ್ಮೂಪ-ನಿಸ್ಸಯಪಚ್ಚಯೇಹಿ ಚ;

ದ್ವೇಧಾ ಹಿ ಪಚ್ಚಯಾ ತೇಸಂ, ಭವನ್ತಿ ಪಟಿಸನ್ಧಿಯಂ.

೫೬೫. ಉಪೇಕ್ಖಾಸಹಿತಾಹೇತು-ಮನೋವಿಞ್ಞಾಣಧಾತುಯಾ;

ವಿನಾ ಪರಿತ್ತಪಾಕಾನಂ, ಹೋನ್ತಿ ದ್ವೇಧಾ ಪವತ್ತಿಯಂ.

೫೬೬. ತಾಯೇವ ಚೇತನಾ ರೂಪ-ಭವೇ ದ್ವೇಧಾವ ಪಚ್ಚಯಾ;

ಪಞ್ಚನ್ನಂ ಪಾಕಚಿತ್ತಾನಂ, ಭವನ್ತಿ ಹಿ ಪವತ್ತಿಯಂ.

೫೬೭. ಅಟ್ಠನ್ನಂ ತು ಪರಿತ್ತಾನಂ, ಕಾಮೇ ದುಗ್ಗತಿಯಂ ತಥಾ;

ಪವತ್ತೇ ಪಚ್ಚಯಾ ಹೋನ್ತಿ, ನ ಹೋನ್ತಿ ಪಟಿಸನ್ಧಿಯಂ.

೫೬೮. ಹೋನ್ತಿ ವುತ್ತಪ್ಪಕಾರಾವ, ಕಾಮೇ ಸುಗತಿಯಂ ತಥಾ;

ಸೋಳಸನ್ನಂ ವಿಪಾಕಾನಂ, ಪವತ್ತೇ ಪಟಿಸನ್ಧಿಯಂ.

೫೬೯. ರೂಪೇ ಪುಞ್ಞಾಭಿಸಙ್ಖಾರಾ, ರೂಪಾವಚರಭೂಮಿಯಂ;

ಪಞ್ಚನ್ನಂ ಪಾಕಚಿತ್ತಾನಂ, ಪಚ್ಚಯಾ ಪಟಿಸನ್ಧಿಯಂ.

೫೭೦. ಹೋನ್ತಿಮಾಪುಞ್ಞಸಙ್ಖಾರಾ, ಕಾಮೇ ದುಗ್ಗತಿಯಂ ದ್ವಿಧಾ;

ವಿಞ್ಞಾಣಸ್ಸ ಪನೇಕಸ್ಸ, ಪಚ್ಚಯಾ ಪಟಿಸನ್ಧಿಯಂ.

೫೭೧. ಛನ್ನಂ ಪನ ಪವತ್ತೇವ, ಹೋನ್ತಿ ನೋ ಪಟಿಸನ್ಧಿಯಂ;

ಸತ್ತನ್ನಮ್ಪಿ ಭವನ್ತೇವ, ಪವತ್ತೇ ಪಟಿಸನ್ಧಿಯಂ.

೫೭೨. ಕಾಮೇ ಸುಗತಿಯಂ ತೇಸಂ, ಸತ್ತನ್ನಮ್ಪಿ ತಥೇವ ಚ;

ಪವತ್ತೇ ಪಚ್ಚಯಾ ಹೋನ್ತಿ, ನ ಹೋನ್ತಿ ಪಟಿಸನ್ಧಿಯಂ.

೫೭೩. ವಿಞ್ಞಾಣಾನಂ ಚತುನ್ನಮ್ಪಿ, ತೇಸಂ ರೂಪಭವೇ ತಥಾ;

ಪವತ್ತೇ ಪಚ್ಚಯಾ ಹೋನ್ತಿ, ನ ಹೋನ್ತಿ ಪಟಿಸನ್ಧಿಯಂ.

೫೭೪. ಸೋ ಚ ಕಾಮಭವೇನಿಟ್ಠ-ರೂಪಾದಿಉಪಲದ್ಧಿಯಂ;

ಅನಿಟ್ಠರೂಪಾದಯೋ ಪನ, ಬ್ರಹ್ಮಲೋಕೇ ನ ವಿಜ್ಜರೇ.

೫೭೫. ತಥೇವಾನೇಞ್ಜಸಙ್ಖಾರೋ, ಅರೂಪಾವಚರಭೂಮಿಯಂ;

ಚತುನ್ನಂ ಪಾಕಚಿತ್ತಾನಂ, ಪವತ್ತೇ ಪಟಿಸನ್ಧಿಯಂ.

೫೭೬. ಏವಂ ತಾವ ಭವೇಸ್ವೇತೇ, ಪಟಿಸನ್ಧಿಪವತ್ತಿಸು;

ಯಥಾ ಚ ಪಚ್ಚಯಾ ಹೋನ್ತಿ, ತಥಾ ಞೇಯ್ಯಾ ವಿಭಾವಿನಾ.

೫೭೭. ಏಸೇವ ಚ ನಯೋ ಞೇಯ್ಯೋ, ಯೋನಿಆದೀಸು ತತ್ರಿದಂ;

ಆದಿತೋ ಪನ ಪಟ್ಠಾಯ, ಮುಖಮತ್ತನಿದಸ್ಸನಂ.

೫೭೮. ಅವಿಸೇಸೇನ ಪುಞ್ಞಾಭಿ-ಸಙ್ಖಾರೋ ದ್ವಿಭವೇಸುಪಿ;

ದತ್ವಾನ ಪಟಿಸನ್ಧಿಂ ತು, ಸಬ್ಬಪಾಕಂ ಜನೇತಿ ಸೋ.

೫೭೯. ತಥಾ ಚತೂಸು ವಿಞ್ಞೇಯ್ಯೋ, ಅಣ್ಡಜಾದೀಸು ಯೋನಿಸು;

ಬಹುದೇವಮನುಸ್ಸಾನಂ, ಗತೀಸು ದ್ವೀಸು ಏವ ಚ.

೫೮೦. ತಥಾ ನಾನತ್ತಕಾಯಾದಿ-ವಿಞ್ಞಾಣಾನಂ ಠಿತೀಸುಪಿ;

ತಥಾ ವುತ್ತಪ್ಪಕಾರಸ್ಮಿಂ, ಸತ್ತಾವಾಸೇ ಚತುಬ್ಬಿಧೇ.

೫೮೧. ಏವಂ ಪುಞ್ಞಾಭಿಸಙ್ಖಾರೋ, ಭವಾದೀಸು ಯಥಾರಹಂ;

ಏಕವೀಸತಿಪಾಕಾನಂ, ಪಚ್ಚಯೋ ಹೋತಿ ಚ ದ್ವಿಧಾ.

೫೮೨. ಕಾಮೇ ಅಪುಞ್ಞಸಙ್ಖಾರೋ, ಭವೇ ಚತೂಸು ಯೋನಿಸು;

ತೀಸು ಗತೀಸು ಏಕಿಸ್ಸಾ, ವಿಞ್ಞಾಣಟ್ಠಿತಿಯಾಪಿ ಚ.

೫೮೩. ಸತ್ತಾವಾಸೇ ಪನೇಕಸ್ಮಿಂ,

ಉಹೋತಿ ಸೋ ಪಚ್ಚಯೋ ದ್ವಿಧಾ;

ಸತ್ತನ್ನಂ ಪಾಕಚಿತ್ತಾನಂ,

ಪವತ್ತೇ ಪಟಿಸನ್ಧಿಯಂ.

೫೮೪. ತಥೇವಾನೇಞ್ಜಸಙ್ಖಾರೋ, ಏಕಾರೂಪಭವೇ ಪುನ;

ಏಕಿಸ್ಸಾ ಯೋನಿಯಾ ಚೇವ, ಏಕಿಸ್ಸಾ ಗತಿಯಾಪಿ ಚ.

೫೮೫. ತೀಸು ಚಿತ್ತಟ್ಠಿತೀಸ್ವೇವ, ಸತ್ತಾವಾಸೇ ಚತುಬ್ಬಿಧೇ;

ಚತುನ್ನಂ ಪಾಕಚಿತ್ತಾನಂ, ದ್ವೇಧಾ ಸೋ ಹೋತಿ ಪಚ್ಚಯೋ.

೫೮೬. ಪಟಿಸನ್ಧಿಪವತ್ತೀನಂ, ವಸೇನೇವ ಭವಾದಿಸು;

ವಿಜಾನಿತಬ್ಬಾ ಸಙ್ಖಾರಾ, ಯಥಾ ಯೇಸಞ್ಚ ಪಚ್ಚಯಾ.

೫೮೭. ನ ರೂಪಾರೂಪಧಮ್ಮಾನಂ, ಸಙ್ಕನ್ತಿ ಪನ ವಿಜ್ಜತಿ;

ಸಙ್ಕನ್ತಿಭಾವೇ ಅಸತಿ, ಪಟಿಸನ್ಧಿ ಕಥಂ ಸಿಯಾ.

೫೮೮. ನತ್ಥಿ ಚಿತ್ತಸ್ಸ ಸಙ್ಕನ್ತಿ, ಅತೀತಭವತೋ ಇಧ;

ತತೋ ಹೇತುಂ ವಿನಾ ತಸ್ಸ, ಪಾತುಭಾವೋ ನ ವಿಜ್ಜತಿ.

೫೮೯. ಸುಲದ್ಧಪಚ್ಚಯಂ ರೂಪಾ-ರೂಪಮತ್ತಂ ತು ಜಾಯತಿ;

ಉಪ್ಪಜ್ಜಮಾನಮೇವಂ ತು, ಲಭಿತ್ವಾ ಪಚ್ಚಯಂ ಪನ.

೫೯೦. ಭವನ್ತರಮುಪೇತೀತಿ, ಸಮಞ್ಞಾಯ ಪವುಚ್ಚತಿ;

ನ ಚ ಸತ್ತೋ ನ ಚ ಜೀವೋ, ನ ಅತ್ತಾ ವಾಪಿ ವಿಜ್ಜತಿ.

೫೯೧. ತಯಿದಂ ಪಾಕಟಂ ಕತ್ವಾ, ಪಟಿಸನ್ಧಿಕ್ಕಮಂ ಪನ;

ದಸ್ಸಯಿಸ್ಸಾಮಹಂ ಸಾಧು, ನಿಬೋಧಥ ಸುದುಬ್ಬುಧಂ.

೫೯೨. ಅತೀತಸ್ಮಿಂ ಭವೇ ತಸ್ಸ, ಆಸನ್ನಮರಣಸ್ಸ ಹಿ;

ಹರಿತಂ ತಾಲಪಣ್ಣಂವ, ಪಕ್ಖಿತ್ತಂ ಆತಪೇ ಪನ.

೫೯೩. ಸುಸ್ಸಮಾನೇ ಸರೀರಸ್ಮಿಂ, ನಟ್ಠೇ ಚಕ್ಖುನ್ದ್ರಿಯಾದಿಕೇ;

ಹದಯವತ್ಥುಮತ್ತಸ್ಮಿಂ, ಠಿತೇ ಕಾಯಪ್ಪಸಾದಿಕೇ.

೫೯೪. ವತ್ಥುಸನ್ನಿಸ್ಸಿತಂ ಚಿತ್ತಂ, ಹೋತಿ ತಸ್ಮಿಂ ಖಣೇಪಿ ಚ;

ಪುಬ್ಬಾನುಸೇವಿತಂ ಕಮ್ಮಂ, ಪುಞ್ಞಂ ವಾಪುಞ್ಞಮೇವ ವಾ.

೫೯೫. ಕಮ್ಮಂ ಕಮ್ಮನಿಮಿತ್ತಂ ವಾ, ಆಲಮ್ಬಿತ್ವಾ ಪವತ್ತತಿ;

ಏವಂ ಪವತ್ತಮಾನಂ ತಂ, ವಿಞ್ಞಾಣಂ ಲದ್ಧಪಚ್ಚಯಂ.

೫೯೬. ಅವಿಜ್ಜಾಯ ಪಟಿಚ್ಛನ್ನಾ-ದೀನವೇ ವಿಸಯೇ ಪನ;

ತಣ್ಹಾ ನಮೇತಿ ಸಙ್ಖಾರಾ, ಖಿಪನ್ತಿ ಸಹಜಾ ಪನ.

೫೯೭. ನ ಮೀಯಮಾನಂ ತಣ್ಹಾಯ, ತಂ ಸನ್ತತಿವಸಾ ಪನ;

ಓರಿಮಾ ಪನ ತೀರಮ್ಹಾ, ಆಲಮ್ಬಿತ್ವಾನ ರಜ್ಜುಕಂ.

೫೯೮. ಮಾತಿಕಾತಿಕ್ಕಮೋವೇತಂ, ಪುರಿಮಂ ಜಹತಿ ನಿಸ್ಸಯಂ;

ಅಪರಂ ಕಮ್ಮಸಮ್ಭೂತಂ, ಲಮ್ಬಿತ್ವಾ ವಾಪಿ ನಿಸ್ಸಯಂ.

೫೯೯. ತಂ ಪನಾರಮ್ಮಣಾದೀಹಿ, ಪಚ್ಚಯೇಹಿ ಪವತ್ತತಿ;

ಪುರಿಮಂ ಚವನಂ ಏತ್ಥ, ಪಚ್ಛಿಮಂ ಪಟಿಸನ್ಧಿ ತು.

೬೦೦. ತದೇತಂ ನಾಪಿ ಪುರಿಮಾ, ಭವತೋಪಿ ಇಧಾಗತಂ;

ಕಮ್ಮಾದಿಞ್ಚ ವಿನಾ ಹೇತುಂ, ಪಾತುಭೂತಂ ನ ಚೇವ ತಂ.

೬೦೧. ಏತ್ಥ ಚೇತಸ್ಸ ಚಿತ್ತಸ್ಸ, ಪುರಿಮಾ ಭವತೋ ಪನ;

ಇಧಾನಾಗಮನೇತೀತ-ಭವಹೇತೂಹಿ ಸಮ್ಭವೇ.

೬೦೨. ಪಟಿಘೋಸದೀಪಮುದ್ದಾದೀ, ಭವನ್ತೇತ್ಥ ನಿದಸ್ಸನಾ;

ಯಥಾ ಆಗನ್ತ್ವಾ ಅಞ್ಞತ್ರ, ಹೋನ್ತಿ ಸದ್ದಾದಿಹೇತುಕಾ.

೬೦೩. ಏವಮೇವ ಚ ವಿಞ್ಞಾಣಂ, ವೇದಿತಬ್ಬಂ ವಿಭಾವಿನಾ;

ಸನ್ತಾನಬನ್ಧತೋ ನತ್ಥಿ, ಏಕತಾ ವಾಪಿ ನಾನತಾ.

೬೦೪. ಸತಿ ಸನ್ತಾನಬನ್ಧೇ ತು, ಏಕನ್ತೇನೇಕತಾ ಸಿಯಾ;

ಖೀರತೋ ದಧಿಸಮ್ಭೂತಂ, ನ ಭವೇಯ್ಯ ಕದಾಚಿಪಿ.

೬೦೫. ಅಥಾಪಿ ಪನ ಏಕನ್ತ-ನಾನತಾ ಸಾ ಭವೇಯ್ಯ ಚೇ;

ಖೀರಸಾಮೀ ನರೋ ನೇವ, ದಧಿಸಾಮೀ ಭವೇಯ್ಯ ಸೋ.

೬೦೬. ತಸ್ಮಾ ಏತ್ಥ ಪನೇಕನ್ತ-ಏಕತಾನಾನತಾಪಿ ವಾ;

ನ ಚೇವ ಉಪಗನ್ತಬ್ಬಾ, ವಿಞ್ಞುನಾ ಸಮಯಞ್ಞುನಾ.

೬೦೭. ನನು ಏವಮಸಙ್ಕನ್ತಿ-ಪಾತುಭಾವೇ ತಸ್ಸ ಸತಿ;

ಯೇ ಇಮಸ್ಮಿಂ ಮನುಸ್ಸತ್ತ-ಭಾವೇ ಖನ್ಧಾಭಿಸಮ್ಭವಾ.

೬೦೮. ತೇಸಂ ಇಧ ನಿರುದ್ಧತ್ತಾ, ಕಮ್ಮಸ್ಸ ಫಲಹೇತುನೋ;

ಪರತ್ಥಾಗಮತೋ ಚೇವ, ಇಧ ತಸ್ಸ ಕತಸ್ಸ ಹಿ.

೬೦೯. ಅಞ್ಞಸ್ಸ ಅಞ್ಞತೋ ಚೇವ, ಕಮ್ಮತೋ ತಂ ಫಲಂ ಸಿಯಾ;

ತಸ್ಮಾ ನ ಸುನ್ದರಂ ಏತಂ, ವಿಧಾನಂ ಸಬ್ಬಮೇವ ಚ.

ಏತ್ಥಾಹ –

೬೧೦. ಸನ್ತಾನೇ ಯಂ ಫಲಂ ಏತಂ, ನಾಞ್ಞಸ್ಸ ನ ಚ ಅಞ್ಞತೋ;

ಬೀಜಾನಂ ಅಭಿಸಙ್ಖಾರೋ, ಏತಸ್ಸತ್ಥಸ್ಸ ಸಾಧಕೋ.

೬೧೧. ಏಕಸ್ಮಿಂ ಪನ ಸನ್ತಾನೇ, ವತ್ತಮಾನಂ ಫಲಂ ಪನ;

ಅಞ್ಞಸ್ಸಾತಿಪಿ ವಾ ನೇವ, ಅಞ್ಞತೋ ವಾ ನ ಹೋತಿ ತಂ.

೬೧೨. ಬೀಜಾನಂ ಅಭಿಸಙ್ಖಾರಾ, ಏತಸ್ಸತ್ಥಸ್ಸ ಸಾಧಕೋ;

ಬೀಜಾನಂ ಅಭಿಸಙ್ಖಾರೇ, ಕತೇ ತು ಮಧುಆದಿನಾ.

೬೧೩. ತಸ್ಸ ಬೀಜಸ್ಸ ಸನ್ತಾನೇ, ಪಠಮಂ ಲದ್ಧಪಚ್ಚಯೋ;

ಮಧುರೋ ಫಲಸೋ ತಸ್ಸ, ಹೋತಿ ಕಾಲನ್ತರೇ ಪನ.

೬೧೪. ನ ಹಿ ತಾನಿ ಹಿ ಬೀಜಾನಿ, ಅಭಿಸಙ್ಖರಣಮ್ಪಿ ವಾ;

ಪಾಪುಣನ್ತಿ ಫಲಟ್ಠಾನಂ, ಏವಂ ಞೇಯ್ಯಮಿದಮ್ಪಿ ಚ.

೬೧೫. ಬಾಲಕಾಲೇ ಪಯುತ್ತೇನ, ವಿಜ್ಜಾಸಿಪ್ಪೋಸಧಾದಿನಾ;

ದೀಪೇತಬ್ಬೋ ಅಯಂ ವುದ್ಧ-ಕಾಲಸ್ಮಿಂ ಫಲದಾಯಿನಾ.

೬೧೬. ಏವಂ ಸನ್ತೇಪಿ ತಂ ಕಮ್ಮಂ, ವಿಜ್ಜಮಾನಮ್ಪಿ ವಾ ಪನ;

ಫಲಸ್ಸ ಪಚ್ಚಯೋ ಹೋತಿ, ಅಥ ವಾವಿಜ್ಜಮಾನಕಂ.

೬೧೭. ವಿಜ್ಜಮಾನಂ ಸಚೇ ಹೋತಿ, ತಪ್ಪವತ್ತಿಕ್ಖಣೇ ಪನ;

ಭವಿತಬ್ಬಂ ವಿಪಾಕೇನ, ಸದ್ಧಿಮೇವ ಚ ಹೇತುನಾ.

೬೧೮. ಅಥ ವಾವಿಜ್ಜಮಾನಂ ತಂ, ನಿರುದ್ಧಂ ಪಚ್ಚಯೋ ಭವೇ;

ಪವತ್ತಿಕ್ಖಣತೋ ಪುಬ್ಬೇ, ಪಚ್ಛಾ ನಿಚ್ಚಫಲಂ ಸಿಯಾ.

ವುಚ್ಚತೇ –

೬೧೯. ಕಟತ್ತಾ ಪಚ್ಚಯೋ ಕಮ್ಮಂ, ತಸ್ಮಾ ನಿಚ್ಚಫಲಂ ನ ಚ;

ಪಾಟಿಭೋಗಾದಿಕಂ ಕಮ್ಮಂ, ವೇದಿತಬ್ಬಂ ನಿದಸ್ಸನಂ.

೬೨೦. ಕಟತ್ತಾಯೇವ ತಂ ಕಮ್ಮಂ, ಫಲಸ್ಸ ಪನ ಪಚ್ಚಯೋ;

ನ ಚಸ್ಸ ವಿಜ್ಜಮಾನತ್ತಂ, ತಸ್ಸ ವಾವಿಜ್ಜಮಾನತಾ.

೬೨೧. ಅಭಿಧಮ್ಮಾವತಾರೋಯಂ, ಪರಮತ್ಥಪಕಾಸನೋ;

ಸೋತಬ್ಬೋ ಪನ ಸೋತೂನಂ, ಪೀತಿಬುದ್ಧಿವಿವಡ್ಢನೋ.

ಇತಿ ಅಭಿಧಮ್ಮಾವತಾರೇ ಪುಞ್ಞವಿಪಾಕಪಚ್ಚಯನಿದ್ದೇಸೋ ನಾಮ

ನವಮೋ ಪರಿಚ್ಛೇದೋ.