೩. ತತಿಯೋ ಪರಿಚ್ಛೇದೋ

ಚೇತಸಿಕವಿಭಾಗನಿದ್ದೇಸೋ

೮೯. ಸಬ್ಬೇ ಚೇತಸಿಕಾ ವುತ್ತಾ, ಬುದ್ಧೇನಾದಿಚ್ಚಬನ್ಧುನಾ;

ನಾಮಸಾಮಞ್ಞತೋಯೇವ, ದ್ವೇಪಞ್ಞಾಸ ಭವನ್ತಿ ತೇ.

ಸೇಯ್ಯಥಿದಂ – ಫಸ್ಸೋ ವೇದನಾ ಸಞ್ಞಾ ಚೇತನಾ ವಿತಕ್ಕೋ ವಿಚಾರೋ ಪೀತಿ ಚಿತ್ತೇಕಗ್ಗತಾ ವೀರಿಯಂ ಜೀವಿತಂ ಛನ್ದೋ ಅಧಿಮೋಕ್ಖೋ ಮನಸಿಕಾರೋ ತತ್ರಮಜ್ಝತ್ತತಾ ಸದ್ಧಾ ಸತಿ ಹಿರೀ ಓತ್ತಪ್ಪಂ ಅಲೋಭೋ ಅದೋಸೋ ಅಮೋಹೋ ಕಾಯಪ್ಪಸ್ಸದ್ಧಿಆದೀನಿ ಛ ಯುಗಾನಿ, ತಿಸ್ಸೋ ವಿರತಿಯೋ, ಕರುಣಾ ಮುದಿತಾ ಲೋಭೋ ದೋಸೋ ಮೋಹೋ ಉದ್ಧಚ್ಚಂ ಮಾನೋ ದಿಟ್ಠಿ ಇಸ್ಸಾ ಮಚ್ಛರಿಯಂ ಕುಕ್ಕುಚ್ಚಂ ಥಿನಂ ಮಿದ್ಧಂ ವಿಚಿಕಿಚ್ಛಾ ಅಹಿರಿಕಂ ಅನೋತ್ತಪ್ಪಞ್ಚಾತಿ.

೯೦. ಚತುಪಞ್ಞಾಸಧಾ ಕಾಮೇ, ರೂಪೇ ಪಞ್ಚದಸೇರಿತಾ;

ತೇ ಹೋನ್ತಿ ದ್ವಾದಸಾರೂಪೇ, ಚತ್ತಾಲೀಸಮನಾಸವಾ.

೯೧. ಏಕವೀಸಸತಂ ಸಬ್ಬೇ, ಚಿತ್ತುಪ್ಪಾದಾ ಸಮಾಸತೋ;

ಏತೇಸು ತೇಸಮುಪ್ಪತ್ತಿಂ, ಉದ್ಧರಿತ್ವಾ ಪನೇಕಕಂ.

೯೨. ಫಸ್ಸಾದೀನಂ ತು ಧಮ್ಮಾನಂ, ಪವಕ್ಖಾಮಿ ಇತೋ ಪರಂ;

ಪಾಟವತ್ಥಾಯ ಭಿಕ್ಖೂನಂ, ಚಿತ್ತಚೇತಸಿಕೇಸ್ವಹಂ.

೯೩. ಏಕಗ್ಗತಾ ಮನಕ್ಕಾರೋ, ಜೀವಿತಂ ಫಸ್ಸಪಞ್ಚಕಂ;

ಅಟ್ಠೇತೇ ಅವಿನಿಬ್ಭೋಗಾ, ಏಕುಪ್ಪಾದಾ ಸಹಕ್ಖಯಾ.

೯೪. ಫಸ್ಸೋ ಚ ವೇದನಾ ಸಞ್ಞಾ, ಚೇತನಾ ಜೀವಿತಿನ್ದ್ರಿಯಂ;

ಏಕಗ್ಗತಾ ಮನಕ್ಕಾರೋ, ಸಬ್ಬಸಾಧಾರಣಾ ಇಮೇ.

೯೫. ವಿತಕ್ಕೋ ಪಞ್ಚಪಞ್ಞಾಸ-ಚಿತ್ತೇಸು ಸಮುದೀರಿತೋ;

ಚಾರೋ ಛಸಟ್ಠಿಚಿತ್ತೇಸು, ಜಾಯತೇ ನತ್ಥಿ ಸಂಸಯೋ.

೯೬. ಏಕಪಞ್ಞಾಸಚಿತ್ತೇಸು, ಪೀತಿ ತೇಸಟ್ಠಿಯಾ ಸುಖಂ;

ಉಪೇಕ್ಖಾ ಪಞ್ಚಪಞ್ಞಾಸ-ಚಿತ್ತೇ ದುಕ್ಖಂ ತು ತೀಸು ಹಿ.

೯೭. ಹೋತಿ ದ್ವಾಸಟ್ಠಿಚಿತ್ತೇಸು, ಸೋಮನಸ್ಸಿನ್ದ್ರಿಯಂ ಪನ;

ದುಕ್ಖಿನ್ದ್ರಿಯಂ ಪನೇಕಸ್ಮಿಂ, ತಥೇಕಮ್ಹಿ ಸುಖಿನ್ದ್ರಿಯಂ.

೯೮. ಪಞ್ಚುತ್ತರಸತೇ ಚಿತ್ತೇ, ವೀರಿಯಂ ಆಹ ನಾಯಕೋ;

ಚತುತ್ತರಸತೇ ಚಿತ್ತೇ, ಸಮಾಧಿನ್ದ್ರಿಯಮಬ್ರವಿ.

೯೯. ಸಬ್ಬಾಹೇತುಕಚಿತ್ತಾನಿ, ಠಪೇತ್ವಾ ಚೇಕಹೇತುಕೇ;

ಏಕುತ್ತರಸತೇ ಚಿತ್ತೇ, ಛನ್ದಸ್ಸುಪ್ಪತ್ತಿಮುದ್ದಿಸೇ.

೧೦೦. ಠಪೇತ್ವಾ ದಸ ವಿಞ್ಞಾಣೇ, ವಿಚಿಕಿಚ್ಛಾಯುತಮ್ಪಿ ಚ;

ದಸುತ್ತರಸತೇ ಚಿತ್ತೇ, ಅಧಿಮೋಕ್ಖೋ ಉದೀರಿತೋ.

೧೦೧. ಸದ್ಧಾ ಸತಿ ಹಿರೋತ್ತಪ್ಪಂ, ಅಲೋಭಾದೋಸಮಜ್ಝತಾ;

ಛಳೇವ ಯುಗಳಾ ಚಾತಿ, ಧಮ್ಮಾ ಏಕೂನವೀಸತಿ.

೧೦೨. ಏಕನವುತಿಯಾ ಚಿತ್ತೇ, ಜಾಯನ್ತಿ ನಿಯತಾ ಇಮೇ;

ಅಹೇತುಕೇಸು ಚಿತ್ತೇಸು, ಅಪುಞ್ಞೇಸು ನ ಜಾಯರೇ.

೧೦೩. ಏಕೂನಾಸೀತಿಯಾ ಚಿತ್ತೇ, ಪಞ್ಞಾ ಜಾಯತಿ ಸಬ್ಬದಾ;

ಅಟ್ಠವೀಸತಿಯಾ ಚಿತ್ತೇ, ಕರುಣಾಮುದಿತಾ ಸಿಯುಂ.

೧೦೪. ಕಾಮಾವಚರಪುಞ್ಞೇಸು, ಸಬ್ಬಲೋಕುತ್ತರೇಸು ಚ;

ಚತ್ತಾಲೀಸವಿಧೇ ಚಿತ್ತೇ, ಸಾಟ್ಠಕೇ ವಿರತಿತ್ತಯಂ.

೧೦೫. ಸದ್ಧಾ ಸತಿ ಹಿರೋತ್ತಪ್ಪಂ, ಅಲೋಭಾದಿತ್ತಯಮ್ಪಿ ಚ;

ಯುಗಳಾನಿ ಛ ಮಜ್ಝತ್ತಂ, ಕರುಣಾಮುದಿತಾಪಿ ಚ.

೧೦೬. ತಥಾ ವಿರತಿಯೋ ತಿಸ್ಸೋ, ಸಬ್ಬೇ ತೇ ಪಞ್ಚವೀಸತಿ;

ಕುಸಲಾಬ್ಯಾಕತಾ ಚಾಪಿ, ಕುಸಲೇನ ಪಕಾಸಿತಾ.

೧೦೭. ಅಹಿರೀಕಮನೋತ್ತಪ್ಪಂ, ಮೋಹೋ ಉದ್ಧಚ್ಚಮೇವ ಚ;

ದ್ವಾದಸಾಪುಞ್ಞಚಿತ್ತೇಸು, ನಿಯತಾಯೇವ ಜಾಯರೇ.

೧೦೮. ಲೋಭೋ ದೋಸೋ ಚ ಮೋಹೋ ಚ, ಮಾನೋ ದಿಟ್ಠಿ ಚ ಸಂಸಯೋ;

ಮಿದ್ಧಮುದ್ಧಚ್ಚಕುಕ್ಕುಚ್ಚಂ, ಥಿನಂ ಮಚ್ಛರಿಯಮ್ಪಿ ಚ.

೧೦೯. ಅಹಿರೀಕಮನೋತ್ತಪ್ಪಂ, ಇಸ್ಸಾ ಚ ದೋಮನಸ್ಸಕಂ;

ಏತೇ ಅಕುಸಲಾ ವುತ್ತಾ, ಏಕನ್ತೇನ ಮಹೇಸಿನಾ.

೧೧೦. ಲೋಭೋ ಅಟ್ಠಸು ನಿದ್ದಿಟ್ಠೋ, ವುತ್ತಾ ಚತೂಸು ದಿಟ್ಠಿತು;

ಮಾನೋ ದಿಟ್ಠಿವಿಯುತ್ತೇಸು, ದೋಸೋದ್ವೀಸ್ವೇವ ಜಾಯತೇ.

೧೧೧. ಇಸ್ಸಾಮಚ್ಛೇರಕುಕ್ಕುಚ್ಚಾ, ದ್ವೀಸು ಜಾಯನ್ತಿ ನೋ ಸಹ;

ವಿಚಿಕಿಚ್ಛಾ ಪನೇಕಸ್ಮಿಂ, ಥಿನಮಿದ್ಧಂ ತು ಪಞ್ಚಸು.

೧೧೨. ಫಸ್ಸೋ ಚ ವೇದನಾ ಸಞ್ಞಾ, ಚೇತನಾ ಜೀವಿತಂ ಮನೋ;

ವಿತಕ್ಕೋ ಚ ವಿಚಾರೋ ಚ, ಪೀತಿ ವೀರಿಯಸಮಾಧಿ ಚ.

೧೧೩. ಛನ್ದೋ ಚೇವಾಧಿಮೋಕ್ಖೋ ಚ, ಮನಸಿಕಾರೋ ಚ ಚುದ್ದಸ;

ಕುಸಲಾಕುಸಲಾ ಚೇವ, ಹೋನ್ತಿ ಅಬ್ಯಾಕತಾಪಿ ಚ.

೧೧೪. ಏಕೂನತಿಂಸಚಿತ್ತೇಸು, ಝಾನಂ ಪಞ್ಚಙ್ಗಿಕಂ ಮತಂ;

ಚತುಝಾನಙ್ಗಯುತ್ತಾನಿ, ಸತ್ತತಿಂಸಾತಿ ನಿದ್ದಿಸೇ.

೧೧೫. ಏಕಾದಸವಿಧಂ ಚಿತ್ತಂ, ತಿವಙ್ಗಿಕಮುದೀರಿತಂ;

ಚತುತಿಂಸವಿಧಂ ಚಿತ್ತಂ, ದುವಙ್ಗಿಕಮುದೀರಿತಂ.

೧೧೬. ಸಭಾವೇನಾವಿತಕ್ಕೇಸು, ಝಾನಙ್ಗಾನಿ ನ ಉದ್ಧರೇ;

ಸಬ್ಬಾಹೇತುಕಚಿತ್ತೇಸು, ಮಗ್ಗಙ್ಗಾನಿ ನ ಉದ್ಧರೇ.

೧೧೭. ತೀಣಿ ಸೋಳಸಚಿತ್ತೇಸು, ಇನ್ದ್ರಿಯಾನಿ ವದೇ ಬುಧೋ;

ಏಕಸ್ಮಿಂ ಪನ ಚತ್ತಾರಿ, ಪಞ್ಚ ತೇರಸಸುದ್ಧರೇ.

೧೧೮. ಸತ್ತ ದ್ವಾದಸಚಿತ್ತೇಸು, ಇನ್ದ್ರಿಯಾನಿ ಜಿನೋಬ್ರವಿ;

ಏಕೇನೂನೇಸು ಅಟ್ಠೇವ, ಚತ್ತಾಲೀಸಮನೇಸು ಚ.

೧೧೯. ಚತ್ತಾಲೀಸಾಯ ಚಿತ್ತೇಸು, ನವಕಂ ನಾಯಕೋಬ್ರವಿ;

ಏವಂ ಇನ್ದ್ರಿಯಯೋಗೋಪಿ, ವೇದಿತಬ್ಬೋ ವಿಭಾವಿನಾ.

೧೨೦. ಅಮಗ್ಗಙ್ಗಾನಿ ನಾಮೇತ್ಥ, ಅಟ್ಠಾರಸ ಅಹೇತುಕಾ;

ಝಾನಙ್ಗಾನಿ ನ ವಿಜ್ಜನ್ತಿ, ವಿಞ್ಞಾಣೇಸು ದ್ವಿಪಞ್ಚಸು.

೧೨೧. ಏಕಂ ಚಿತ್ತಂ ದುಮಗ್ಗಙ್ಗಂ, ತಿಮಗ್ಗಙ್ಗಾನಿ ಸತ್ತಸು;

ಚತ್ತಾಲೀಸಾಯ ಚಿತ್ತೇಸು, ಮಗ್ಗೋ ಸೋ ಚತುರಙ್ಗಿಕೋ.

೧೨೨. ಪಞ್ಚದ್ದಸಸು ಚಿತ್ತೇಸು, ಮಗ್ಗೋ ಪಞ್ಚಙ್ಗಿಕೋ ಮತೋ;

ವುತ್ತೋ ದ್ವತ್ತಿಂಸಚಿತ್ತೇಸು, ಮಗ್ಗೋ ಸತ್ತಙ್ಗಿಕೋಪಿ ಚ.

೧೨೩. ಮಗ್ಗೋ ಅಟ್ಠಸು ಚಿತ್ತೇಸು, ಮತೋ ಅಟ್ಠಙ್ಗಿಕೋತಿ ಹಿ;

ಏವಂ ತು ಸಬ್ಬಚಿತ್ತೇಸು, ಮಗ್ಗಙ್ಗಾನಿ ಸಮುದ್ಧರೇ.

೧೨೪. ಬಲಾನಿ ದ್ವೇ ದ್ವಿಚಿತ್ತೇಸು, ಏಕಸ್ಮಿಂ ತೀಣಿ ದೀಪಯೇ;

ಏಕಾದಸಸು ಚತ್ತಾರಿ, ಛ ದ್ವಾದಸಸು ನಿದ್ದಿಸೇ.

೧೨೫. ಏಕೂನಾಸೀತಿಯಾ ಸತ್ತ, ಸೋಳಸೇವಾಬಲಾನಿ ತು;

ಚಿತ್ತಮೇವಂ ತು ವಿಞ್ಞೇಯ್ಯಂ, ಸಬಲಂ ಅಬಲಮ್ಪಿ ಚ.

೧೨೬. ಝಾನಙ್ಗಮಗ್ಗಙ್ಗಬಲಿನ್ದ್ರಿಯಾನಿ,

ಚಿತ್ತೇಸು ಜಾಯನ್ತಿ ಹಿ ಯೇಸು ಯಾನಿ;

ಮಯಾ ಸಮಾಸೇನ ಸಮುದ್ಧರಿತ್ವಾ,

ವುತ್ತಾನಿ ಸಬ್ಬಾನಿಪಿ ತಾನಿ ತೇಸು.

ಇತಿ ಅಭಿಧಮ್ಮಾವತಾರೇ ಚೇತಸಿಕವಿಭಾಗನಿದ್ದೇಸೋ ನಾಮ

ತತಿಯೋ ಪರಿಚ್ಛೇದೋ.