೪. ಚತುತ್ಥೋ ಪರಿಚ್ಛೇದೋ

ಏಕವಿಧಾದಿನಿದ್ದೇಸೋ

೧೨೭. ಇತೋ ಪರಂ ಪವಕ್ಖಾಮಿ, ನಯಮೇಕವಿಧಾದಿಕಂ;

ಆಭಿಧಮ್ಮಿಕಭಿಕ್ಖೂನಂ, ಬುದ್ಧಿಯಾ ಪನ ವುದ್ಧಿಯಾ.

೧೨೮. ಸಬ್ಬಮೇಕವಿಧಂ ಚಿತ್ತಂ, ವಿಜಾನನಸಭಾವತೋ;

ದುವಿಧಞ್ಚ ಭವೇ ಚಿತ್ತಂ, ಅಹೇತುಕಸಹೇತುತೋ.

೧೨೯. ಪುಞ್ಞಾಪುಞ್ಞವಿಪಾಕಾ ಹಿ, ಕಾಮೇ ದಸ ಚ ಪಞ್ಚ ಚ;

ಕ್ರಿಯಾ ತಿಸ್ಸೋತಿ ಸಬ್ಬೇಪಿ, ಅಟ್ಠಾರಸ ಅಹೇತುಕಾ.

೧೩೦. ಏಕಸತ್ತತಿ ಸೇಸಾನಿ, ಚಿತ್ತುಪ್ಪಾದಾ ಮಹೇಸಿನಾ;

ಸಹೇತುಕಾತಿ ನಿದ್ದಿಟ್ಠಾ, ತಾದಿನಾ ಹೇತುವಾದಿನಾ.

೧೩೧. ಸವತ್ಥುಕಾವತ್ಥುಕತೋ, ತಥೋಭಯವಸೇನ ಚ;

ಸಬ್ಬಂ ವುತ್ತಪಕಾರಂ ತು, ತಿವಿಧಂ ಹೋತಿ ಮಾನಸಂ.

೧೩೨. ಸಬ್ಬೋ ಕಾಮವಿಪಾಕೋ ಚ, ರೂಪೇ ಪಞ್ಚದಸಾಪಿ ಚ;

ಆದಿಮಗ್ಗೋ ಸಿತುಪ್ಪಾದೋ, ಮನೋಧಾತು ಕ್ರಿಯಾಪಿ ಚ.

೧೩೩. ದೋಮನಸ್ಸದ್ವಯಞ್ಚಾಪಿ, ತೇಚತ್ತಾಲೀಸ ಮಾನಸಾ;

ನುಪ್ಪಜ್ಜನ್ತಿ ವಿನಾ ವತ್ಥುಂ, ಏಕನ್ತೇನ ಸವತ್ಥುಕಾ.

೧೩೪. ಅರೂಪಾವಚರಪಾಕಾ ಚ, ಏಕನ್ತೇನ ಅವತ್ಥುಕಾ;

ದ್ವಾಚತ್ತಾಲೀಸ ಸೇಸಾನಿ, ಚಿತ್ತಾನುಭಯಥಾ ಸಿಯುಂ.

೧೩೫. ಏಕೇಕಾರಮ್ಮಣಂ ಚಿತ್ತಂ, ಪಞ್ಚಾರಮ್ಮಣಮೇವ ಚ;

ಛಳಾರಮ್ಮಣಕಞ್ಚೇತಿ, ಏವಮ್ಪಿ ತಿವಿಧಂ ಸಿಯಾ.

೧೩೬. ವಿಞ್ಞಾಣಾನಿ ಚ ದ್ವೇಪಞ್ಚ, ಅಟ್ಠ ಲೋಕುತ್ತರಾನಿ ಚ;

ಸಬ್ಬಂ ಮಹಗ್ಗತಞ್ಚೇವ, ಠಪೇತ್ವಾಭಿಞ್ಞಮಾನಸಂ.

೧೩೭. ತೇಚತ್ತಾಲೀಸ ವಿಞ್ಞೇಯ್ಯಾ, ಏಕೇಕಾರಮ್ಮಣಾ ಪನ;

ಮನೋಧಾತುತ್ತಯಂ ತತ್ಥ, ಪಞ್ಚಾರಮ್ಮಣಮೀರಿತಂ.

೧೩೮. ತೇಚತ್ತಾಲೀಸ ಸೇಸಾನಿ, ಛಳಾರಮ್ಮಣಿಕಾ ಮತಾ;

ತಥಾ ಚ ತಿವಿಧಂ ಚಿತ್ತಂ, ಕುಸಲಾಕುಸಲಾದಿತೋ.

೧೩೯. ಅಹೇತುಂ ಏಕಹೇತುಞ್ಚ, ದ್ವಿಹೇತುಞ್ಚ ತಿಹೇತುಕಂ;

ಏವಂ ಚತುಬ್ಬಿಧಂ ಚಿತ್ತಂ, ವಿಞ್ಞಾತಬ್ಬಂ ವಿಭಾವಿನಾ.

೧೪೦. ಹೇಟ್ಠಾ ಮಯಾಪಿ ನಿದ್ದಿಟ್ಠಾ, ಅಟ್ಠಾರಸ ಅಹೇತುಕಾ;

ವಿಚಿಕಿಚ್ಛುದ್ಧಚ್ಚಸಂಯುತ್ತಂ, ಏಕಹೇತುಮುದೀರಿತಂ.

೧೪೧. ಕಾಮೇ ದ್ವಾದಸಧಾ ಪುಞ್ಞ-ವಿಪಾಕಕ್ರಿಯತೋ ಪನ;

ದಸಧಾಕುಸಲಾ ಚಾತಿ, ಬಾವೀಸತಿ ದುಹೇತುಕಾ.

೧೪೨. ಕಾಮೇ ದ್ವಾದಸಧಾ ಪುಞ್ಞ-ವಿಪಾಕಕ್ರಿಯತೋ ಪನ;

ಸಬ್ಬಂ ಮಹಗ್ಗತಞ್ಚೇವ, ಅಪ್ಪಮಾಣಂ ತಿಹೇತುಕಂ.

೧೪೩. ರೂಪೀರಿಯಾಪಥವಿಞ್ಞತ್ತಿ-ಜನಕಾಜನಕಾದಿತೋ;

ಏವಞ್ಚಾಪಿ ಹಿ ತಂ ಚಿತ್ತಂ, ಹೋತಿ ಸಬ್ಬಂ ಚತುಬ್ಬಿಧಂ.

೧೪೪. ದ್ವಾದಸಾಕುಸಲಾ ತತ್ಥ, ಕುಸಲಾ ಕಾಮಧಾತುಯಾ;

ತಥಾ ದಸ ಕ್ರಿಯಾ ಕಾಮೇ, ಅಭಿಞ್ಞಾಮಾನಸಂ ದ್ವಯಂ.

೧೪೫. ಸಮುಟ್ಠಾಪೇನ್ತಿ ರೂಪಾನಿ, ಕಪ್ಪೇನ್ತಿ ಇರಿಯಾಪಥಂ;

ಜನಯನ್ತಿ ಚ ವಿಞ್ಞತ್ತಿಂ, ಇಮೇ ದ್ವತ್ತಿಂಸ ಮಾನಸಾ.

೧೪೬. ಕುಸಲಾ ಚ ಕ್ರಿಯಾ ಚೇವ, ತೇ ಮಹಗ್ಗತಮಾನಸಾ;

ಅಟ್ಠಾನಾಸವಚಿತ್ತಾನಿ, ಛಬ್ಬೀಸತಿ ಚ ಮಾನಸಾ.

೧೪೭. ಸಮುಟ್ಠಾಪೇನ್ತಿ ರೂಪಾನಿ, ಕಪ್ಪೇನ್ತಿ ಇರಿಯಾಪಥಂ;

ಚೋಪನಂ ನ ಚ ಪಾಪೇನ್ತಿ, ದ್ವಿಕಿಚ್ಚಾ ನಿಯತಾ ಇಮೇ.

೧೪೮. ಠಪೇತ್ವಾ ದಸ ವಿಞ್ಞಾಣೇ, ವಿಪಾಕಾ ದ್ವೀಸು ಭೂಮಿಸು;

ಕ್ರಿಯಾ ಚೇವ ಮನೋಧಾತು, ಇಮಾನೇಕೂನವೀಸತಿ.

೧೪೯. ಸಮುಟ್ಠಾಪೇನ್ತಿ ರೂಪಾನಿ, ನ ಕರೋನ್ತಿತರದ್ವಯಂ;

ಪುನ ದ್ವೇಪಞ್ಚವಿಞ್ಞಾಣಾ, ವಿಪಾಕಾ ಚ ಅರೂಪಿಸು.

೧೫೦. ಸಬ್ಬೇಸಂ ಸನ್ಧಿಚಿತ್ತಞ್ಚ, ಚುತಿಚಿತ್ತಞ್ಚಾರಹತೋ;

ನ ಕರೋನ್ತಿ ತಿಕಿಚ್ಚಾನಿ, ಇಮೇ ಸೋಳಸ ಮಾನಸಾ.

೧೫೧. ಏಕದ್ವಿತಿಚತುಟ್ಠಾನ-ಪಞ್ಚಟ್ಠಾನಪಭೇದತೋ;

ಪಞ್ಚಧಾ ಚಿತ್ತಮಕ್ಖಾಸಿ, ಪಞ್ಚನಿಮ್ಮಲಲೋಚನೋ.

೧೫೨. ಕುಸಲಾಕುಸಲಾ ಸಬ್ಬೇ, ಚಿತ್ತುಪ್ಪಾದಾ ಮಹಾಕ್ರಿಯಾ;

ಮಹಗ್ಗತಾ ಕ್ರಿಯಾ ಚೇವ, ಚತ್ತಾರೋ ಫಲಮಾನಸಾ.

೧೫೩. ಸಬ್ಬೇವ ಪಞ್ಚಪಞ್ಞಾಸ, ನಿಪ್ಪಪಞ್ಚೇನ ಸತ್ಥುನಾ;

ಜವನಟ್ಠಾನತೋಯೇವ, ಏಕಟ್ಠಾನೇ ನಿಯಾಮಿತಾ.

೧೫೪. ಪುನ ದ್ವೇಪಞ್ಚವಿಞ್ಞಾಣಾ, ದಸ್ಸನೇ ಸವನೇ ತಥಾ;

ಘಾಯನೇ ಸಾಯನೇ ಠಾನೇ, ಫುಸನೇ ಪಟಿಪಾಟಿಯಾ.

೧೫೫. ಮನೋಧಾತುತ್ತಿಕಂ ಠಾನೇ, ಆವಜ್ಜನೇ ಪಟಿಚ್ಛನೇ;

ಅಟ್ಠಸಟ್ಠಿ ಭವನ್ತೇತೇ, ಏಕಟ್ಠಾನಿಕತಂ ಗತಾ.

೧೫೬. ಪುನ ದ್ವಿಟ್ಠಾನಿಕಂ ನಾಮ, ಚಿತ್ತದ್ವಯಮುದೀರಿತಂ;

ಸೋಮನಸ್ಸಯುತಂ ಪಞ್ಚ-ದ್ವಾರೇ ಸನ್ತೀರಣಂ ಸಿಯಾ.

೧೫೭. ತದಾರಮ್ಮಣಂ ಛದ್ವಾರೇ, ಬಲವಾರಮ್ಮಣೇ ಸತಿ;

ತಥಾ ವೋಟ್ಠಬ್ಬನಂ ಹೋತಿ, ಪಞ್ಚದ್ವಾರೇಸು ವೋಟ್ಠಬೋ.

೧೫೮. ಮನೋದ್ವಾರೇಸು ಸಬ್ಬೇಸಂ, ಹೋತಿ ಆವಜ್ಜನಂ ಪನ;

ಇದಂ ದ್ವಿಟ್ಠಾನಿಕಂ ನಾಮ, ಹೋತಿ ಚಿತ್ತದ್ವಯಂ ಪನ.

೧೫೯. ಪಟಿಸನ್ಧಿಭವಙ್ಗಸ್ಸ, ಚುತಿಯಾ ಠಾನತೋ ಪನ;

ಮಹಗ್ಗತವಿಪಾಕಾ ತೇ, ನವ ತಿಟ್ಠಾನಿಕಾ ಮತಾ.

೧೬೦. ಅಟ್ಠ ಕಾಮಾ ಮಹಾಪಾಕಾ, ಪಟಿಸನ್ಧಿಭವಙ್ಗತೋ;

ತದಾರಮ್ಮಣತೋ ಚೇವ, ಚುತಿಟ್ಠಾನವಸೇನ ಚ.

೧೬೧. ಚತುಟ್ಠಾನಿಕಚಿತ್ತಾನಿ, ಅಟ್ಠ ಹೋನ್ತೀತಿ ನಿದ್ದಿಸೇ;

ಕುಸಲಾಕುಸಲಪಾಕಂ ತು-ಪೇಕ್ಖಾಸಹಗತದ್ವಯಂ.

೧೬೨. ಸನ್ತೀರಣಂ ಭವೇ ಪಞ್ಚ-ದ್ವಾರೇ ಛದ್ವಾರಿಕೇಸು ಚ;

ತದಾರಮ್ಮಣತಂ ಯಾತಿ, ಬಲವಾರಮ್ಮಣೇ ಸತಿ.

೧೬೩. ಪಟಿಸನ್ಧಿಭವಙ್ಗಾನಂ, ಚುತಿಟ್ಠಾನವಸೇನ ಚ;

ಪಞ್ಚಟ್ಠಾನಿಕಚಿತ್ತನ್ತಿ, ಇದಂ ದ್ವಯಮುದೀರಿತಂ.

೧೬೪. ಪಞ್ಚಕಿಚ್ಚಂ ದ್ವಯಂ ಚಿತ್ತಂ, ಚತುಕಿಚ್ಚಂ ಪನಟ್ಠಕಂ;

ತಿಕಿಚ್ಚಂ ನವಕಂ ದ್ವೇ ತು, ದ್ವಿಕಿಚ್ಚಾ ಸೇಸಮೇಕಕಂ.

೧೬೫. ಭವಙ್ಗಾವಜ್ಜನಞ್ಚೇವ, ದಸ್ಸನಂ ಸಮ್ಪಟಿಚ್ಛನಂ;

ಸನ್ತೀರಣಂ ವೋಟ್ಠಬ್ಬನಂ, ಜವನಂ ಭವತಿ ಸತ್ತಮಂ.

೧೬೬. ಛಬ್ಬಿಧಂ ಹೋತಿ ತಂ ಛನ್ನಂ, ವಿಞ್ಞಾಣಾನಂ ಪಭೇದತೋ;

ಸತ್ತಧಾ ಸತ್ತವಿಞ್ಞಾಣ-ಧಾತೂನಂ ತು ಪಭೇದತೋ.

೧೬೭. ಏಕೇಕಾರಮ್ಮಣಂ ಛಕ್ಕಂ, ಪಞ್ಚಾರಮ್ಮಣಭೇದತೋ;

ಛಳಾರಮ್ಮಣತೋ ಚೇವ, ಹೋತಿ ಅಟ್ಠವಿಧಂ ಮನೋ.

೧೬೮. ತತ್ಥ ದ್ವೇಪಞ್ಚವಿಞ್ಞಾಣಾ, ಹೋನ್ತಿ ಏಕೇಕಗೋಚರಾ;

ರೂಪಾರಮ್ಮಣಿಕಾ ದ್ವೇ ತು, ದ್ವೇ ದ್ವೇ ಸದ್ದಾದಿಗೋಚರಾ.

೧೬೯. ಸಬ್ಬಂ ಮಹಗ್ಗತಂ ಚಿತ್ತಂ, ಪಞ್ಚಾಭಿಞ್ಞಾವಿವಜ್ಜಿತಂ;

ಸಬ್ಬಂ ಲೋಕುತ್ತರಞ್ಚೇತಿ, ಏಕೇಕಾರಮ್ಮಣಂ ಭವೇ.

೧೭೦. ಏಕೇಕಾರಮ್ಮಣಂ ಛಕ್ಕ-ಮಿದಂ ಞೇಯ್ಯಂ ವಿಭಾವಿನಾ;

ಪಞ್ಚಾರಮ್ಮಣಿಕಂ ನಾಮ, ಮನೋಧಾತುತ್ತಯಂ ಭವೇ.

೧೭೧. ಕಾಮಾವಚರಚಿತ್ತಾನಿ, ಚತ್ತಾಲೀಸಂ ತಥೇಕಕಂ;

ಅಭಿಞ್ಞಾನಿ ಚ ಸಬ್ಬಾನಿ, ಛಳಾರಮ್ಮಣಿಕಾನಿತಿ.

೧೭೨. ಚಿತ್ತಂ ನವವಿಧಂ ಹೋತಿ, ಸತ್ತವಿಞ್ಞಾಣಧಾತುಸು;

ಪಚ್ಛಿಮಞ್ಚ ತಿಧಾ ಕತ್ವಾ, ಕುಸಲಾಕುಸಲಾದಿತೋ.

೧೭೩. ಪುಞ್ಞಾಪುಞ್ಞವಸೇನೇವ, ವಿಪಾಕಕ್ರಿಯಭೇದತೋ;

ಛಸತ್ತತಿವಿಧೋ ಭೇದೋ, ಮನೋವಿಞ್ಞಾಣಧಾತುಯಾ.

೧೭೪. ಮನೋಧಾತುಂ ದ್ವಿಧಾ ಕತ್ವಾ, ವಿಪಾಕಕ್ರಿಯಭೇದತೋ;

ನವಧಾ ಪುಬ್ಬವುತ್ತೇಹಿ, ದಸಧಾ ಹೋತಿ ಮಾನಸಂ.

೧೭೫. ಧಾತುದ್ವಯಂ ತಿಧಾ ಕತ್ವಾ, ಪಚ್ಛಿಮಂ ಪುನ ಪಣ್ಡಿತೋ;

ಏಕಾದಸವಿಧಂ ಚಿತ್ತಂ, ಹೋತೀತಿ ಪರಿದೀಪಯೇ.

೧೭೬. ಮನೋವಿಞ್ಞಾಣಧಾತುಮ್ಪಿ, ಕುಸಲಾಕುಸಲಾದಿತೋ;

ಚತುಧಾ ವಿಭಜಿತ್ವಾನ, ವದೇ ದ್ವಾದಸಧಾ ಠಿತಂ.

೧೭೭. ಭವೇ ಚುದ್ದಸಧಾ ಚಿತ್ತಂ, ಚುದ್ದಸಟ್ಠಾನಭೇದತೋ;

ಪಟಿಸನ್ಧಿಭವಙ್ಗಸ್ಸ, ಚುತಿಯಾವಜ್ಜನಸ್ಸ ಚ.

೧೭೮. ಪಞ್ಚನ್ನಂ ದಸ್ಸನಾದೀನಂ, ಸಮ್ಪಟಿಚ್ಛನಚೇತಸೋ;

ಸನ್ತೀರಣಸ್ಸ ವೋಟ್ಠಬ್ಬ-ಜವನಾನಂ ವಸೇನ ಚ.

೧೭೯. ತದಾರಮ್ಮಣಚಿತ್ತಸ್ಸ, ತಥೇವ ಠಾನಭೇದತೋ;

ಏವಂ ಚುದ್ದಸಧಾ ಚಿತ್ತಂ, ಹೋತೀತಿ ಪರಿದೀಪಯೇ.

೧೮೦. ಭೂಮಿಪುಗ್ಗಲನಾನಾತ್ತ-ವಸೇನ ಚ ಪವತ್ತಿತೋ;

ಬಹುಧಾ ಪನಿದಂ ಚಿತ್ತಂ, ಹೋತೀತಿ ಚ ವಿಭಾವಯೇ.

೧೮೧. ಏಕವಿಧಾದಿನಯೇ ಪನಿಮಸ್ಮಿಂ,

ಯೋ ಕುಸಲೋ ಮತಿಮಾ ಇಧ ಭಿಕ್ಖು;

ತಸ್ಸಭಿಧಮ್ಮಗತಾ ಪನ ಅತ್ಥಾ,

ಹತ್ಥಗತಾಮಲಕಾ ವಿಯ ಹೋನ್ತಿ.

ಇತಿ ಅಭಿಧಮ್ಮಾವತಾರೇ ಏಕವಿಧಾದಿನಿದ್ದೇಸೋ ನಾಮ

ಚತುತ್ಥೋ ಪರಿಚ್ಛೇದೋ.