೪. ವೀಥಿಪರಿಕಮ್ಮಕಥಾ

೧೨೬. ಪಠಮಾವಜ್ಜನಂ ಪಞ್ಚ-ದಸನ್ನಂ ಪರತೋ ಭವೇ;

ದುತಿಯಾವಜ್ಜನಂ ಹೋತಿ, ಏಕವೀಸತಿತೋ ಪರಂ.

೧೨೭. ಏಕಮ್ಹಾ ಪಞ್ಚವಿಞ್ಞಾಣಂ, ಪಞ್ಚಮ್ಹಾ ಸಮ್ಪಟಿಚ್ಛನಂ;

ಸುಖಸನ್ತೀರಣಂ ಹೋತಿ, ಪಞ್ಚವೀಸತಿತೋ ಪರಂ.

೧೨೮. ಸತ್ತತಿಂಸತಿತೋ ಹೋತಿ, ಉಪೇಕ್ಖಾತೀರಣದ್ವಯಂ;

ವೋಟ್ಠಬ್ಬನಸರೂಪಾನಂ, ದ್ವಿನ್ನಂ ಕಾಮಜವಾ ಪರಂ.

೧೨೯. ಮಗ್ಗಾಭಿಞ್ಞಾ ಪರಂ ದ್ವಿನ್ನಂ, ತಿಣ್ಣನ್ನಂ ಲೋಕಿಯಪ್ಪನಾ;

ಫಲಾ ಚತುನ್ನಂ ಪಞ್ಚನ್ನಂ, ಉಪರಿಟ್ಠಫಲದ್ವಯಂ.

೧೩೦. ಭವನ್ತಿ ಚತ್ತಾಲೀಸಮ್ಹಾ, ಸುಖಪಾಕಾ ದ್ವಿಹೇತುಕಾ;

ತಥೇಕಚತ್ತಾಲೀಸಮ್ಹಾ, ಉಪೇಕ್ಖಾಯ ಸಮಾಯುತಾ.

೧೩೧. ಹೋನ್ತಿ ಸತ್ತತಿತೋ ಕಾಮೇ, ಸುಖಪಾಕಾ ತಿಹೇತುಕಾ;

ದ್ವಾಸತ್ತತಿಮ್ಹಾ ಜಾಯನ್ತಿ, ಉಪೇಕ್ಖಾಸಹಿತಾ ಪನ.

೧೩೨. ಏಕೂನಸಟ್ಠಿತೋ ರೂಪ-ಪಾಕಾ ಪಾಕಾ ಅರೂಪಿನೋ;

ಕಮಾಟ್ಠಚತ್ತಾಲೀಸಮ್ಹಾ, ತಥೇಕದ್ವಿತಿಹೀನತೋ.

೧೩೩. ಪುಬ್ಬಸಙ್ಗಹಮಿಚ್ಚೇವಂ, ವಿಗಣೇತ್ವಾ ವಿಚಕ್ಖಣೋ;

ಪರಸಙ್ಗಹಸಙ್ಖ್ಯಾದಿಂ, ವಿಭಾವೇಯ್ಯ ವಿಸಾರದೋ.

೧೩೪. ಪಞ್ಚದ್ವಾರಾವಜ್ಜನತೋ, ದಸ ಚಿತ್ತಾನಿ ದೀಪಯೇ;

ಸೇಸಾವಜ್ಜನತೋ ಪಞ್ಚಚತ್ತಾಲೀಸನ್ತಿ ಭಾಸಿತಂ.

೧೩೫. ಪಞ್ಚವಿಞ್ಞಾಣತೋ ಪಾಪವಿಪಾಕಾ ಸಮ್ಪಟಿಚ್ಛನಾ;

ಪರಮೇಕಂ ದ್ವಯಂ ಪುಞ್ಞವಿಪಾಕಾ ಸಮ್ಪಟಿಚ್ಛನಾ.

೧೩೬. ಸನ್ತೀರಣಾ ದ್ವಿಹೇತುಮ್ಹಾ, ಪಾಕಾ ದ್ವಾದಸ ಜಾಯರೇ;

ತಿಹೇತುಕಾಮಪಾಕಮ್ಹಾ, ಏಕವೀಸತಿ ಲಬ್ಭರೇ.

೧೩೭. ರೂಪಾವಚರಪಾಕಮ್ಹಾ, ಪರಮೇಕೂನವೀಸತಿ;

ನವಟ್ಠಾರೂಪಪಾಕಮ್ಹಾ, ಸತ್ತ ಛಾಪಿ ಯಥಾಕ್ಕಮಂ.

೧೩೮. ಪಟಿಘಮ್ಹಾ ತು ಸತ್ತೇವ, ಸಿತಮ್ಹಾ ತೇರಸೇರಿತಾ;

ಪಾಪಪುಞ್ಞದ್ವಿಹೇತುಮ್ಹಾ, ಏಕವೀಸತಿ ಭಾವಯೇ.

೧೩೯. ದ್ವಿಹೇತುಕಾಮಕ್ರಿಯತೋ, ಅಟ್ಠಾರಸ ಉಪೇಕ್ಖಕಾ;

ಸತ್ತರಸ ಸುಖೋಪೇತಾ, ವಿಭಾವೇಯ್ಯ ವಿಚಕ್ಖಣೋ.

೧೪೦. ಕಾಮಪುಞ್ಞತಿಹೇತುಮ್ಹಾ, ತೇತ್ತಿಂಸೇವ ಉಪೇಕ್ಖಕಾ;

ತೇಪಞ್ಞಾಸ ಸುಖೋಪೇತಾ, ಭವನ್ತೀತಿ ಪಕಾಸಿತಂ.

೧೪೧. ತಿಹೇತುಕಾಮಕ್ರಿಯತೋ, ಚತುವೀಸತಿಪೇಕ್ಖಕಾ;

ಸುಖಿತಮ್ಹಾ ತು ದೀಪೇಯ್ಯ, ಪಞ್ಚವೀಸತಿ ಪಣ್ಡಿತೋ.

೧೪೨. ದಸರೂಪಜವಮ್ಹೇಕಾ-ದಸದ್ವಾದಸ ತೇರಸ;

ಯಥಾಕ್ಕಮಂ ಪಞ್ಚದಸ, ಆರುಪ್ಪಾ ಪರಿದೀಪಯೇ.

೧೪೩. ಫಲಮ್ಹಾ ಚುದ್ದಸೇವಾಹು, ಮಗ್ಗಮ್ಹಾ ತು ಸಕಂ ಫಲಂ;

ಪರಂ ಸಙ್ಗಹಮಿಚ್ಚೇವಂ, ವಿಗಣೇಯ್ಯ ವಿಸಾರದೋ.

೧೪೪. ಪುಬ್ಬಾಪರಸಮೋಧಾನ-ಮಿತಿ ಞತ್ವಾ ತತೋ ಪರಂ;

ವತ್ಥುವೀಥಿಸಮೋಧಾನಂ, ಯಥಾಸಮ್ಭವಮುದ್ದಿಸೇ.

೧೪೫. ಪಞ್ಚ ವತ್ಥೂನಿ ನಿಸ್ಸಾಯ, ಕಮತೋ ಪಞ್ಚಮಾನಸಾ;

ತೇತ್ತಿಂಸ ಪನ ನಿಸ್ಸಾಯ, ಹದಯಂ ಮಾನಸಾ ಸಿಯುಂ.

೧೪೬. ಕಾಮಪಾಕಮನೋಧಾತು-ಹಸಿತುಪ್ಪಾದಮಾನಸಾ;

ದೋಸಮೂಲಾನಿ ಮಗ್ಗೋ ಚ, ರೂಪಜ್ಝಾನಾವ ಸಬ್ಬಥಾ.

೧೪೭. ದಸಾವಸೇಸಾಪುಞ್ಞಾನಿ, ಕಾಮಪುಞ್ಞಮಹಾಕ್ರಿಯಾ;

ವೋಟ್ಠಬ್ಬಾರೂಪಜವನಂ, ಸತ್ತ ಲೋಕುತ್ತರಾನಿ ಚ.

೧೪೮. ದ್ವೇಚತ್ತಾಲೀಸ ಚಿತ್ತಾನಿ, ಪಞ್ಚವೋಕಾರಭೂಮಿಯಂ;

ನಿಸ್ಸಾಯ ಹದಯಂ ಹೋನ್ತಿ, ಅರೂಪೇ ನಿಸ್ಸಯಂ ವಿನಾ.

೧೪೯. ಆರುಪ್ಪಪಾಕಾ ಚತ್ತಾರೋ, ಅನಿಸ್ಸಾಯೇತಿ ಸಬ್ಬಥಾ;

ವಿತ್ಥಾರೇನಟ್ಠಧಾ ಭಿನ್ನಂ, ಸಙ್ಖೇಪಾ ತಿವಿಧಂ ಭವೇ.

೧೫೦. ತೇಚತ್ತಾಲೀಸ ನಿಸ್ಸಾಯ, ಅನಿಸ್ಸಾಯ ಚತುಬ್ಬಿಧಂ;

ನಿಸ್ಸಿತಾನಿಸ್ಸಿತಾ ಸೇಸಾ, ದ್ವೇಚತ್ತಾಲೀಸ ಮಾನಸಾ.

೧೫೧. ಪಞ್ಚ ಚಿತ್ತಪ್ಪನಾ ಹೋನ್ತಿ, ಕಮೇನೇಕೇಕವೀಥಿಯಂ;

ಮನೋಧಾತುತ್ತಿಕಂ ನಾಮ, ಪಞ್ಚದ್ವಾರಿಕಮೀರಿತಂ.

೧೫೨. ಸುಖತೀರಣವೋಟ್ಠಬ್ಬ-ಪರಿತ್ತಜವನಾ ಪನ;

ಏಕತಿಂಸಾಪಿ ಜಾಯನ್ತೇ, ಛಸು ವೀಥೀಸು ಸಮ್ಭವಾ.

೧೫೩. ಮಹಾಪಾಕಾ ಪನಟ್ಠಾಪಿ, ಉಪೇಕ್ಖಾತೀರಣದ್ವಯಂ;

ಛಸು ದ್ವಾರೇಸು ಜಾಯನ್ತಿ, ದಸ ಮುತ್ತಾ ಚ ವೀಥಿಯಾ.

೧೫೪. ಚುತಿಸನ್ಧಿಭವಙ್ಗಾನಂ, ವಸಾ ಪಾಕಾ ಮಹಗ್ಗತಾ;

ನವ ವೀಥಿವಿಮುತ್ತಾತಿ, ದಸಧಾ ವೀಥಿಸಙ್ಗಹೋ.

೧೫೫. ಏಕದ್ವಾರಿಕಚಿತ್ತಾನಿ, ಪಞ್ಚಛದ್ವಾರಿಕಾ ತಥಾ;

ಛದ್ವಾರಿಕವಿಮುತ್ತಾ ಚ, ವಿಮುತ್ತಾತಿ ಚ ಸಬ್ಬಥಾ.

೧೫೬. ಛತ್ತಿಂಸ ತಯೇಕತಿಂಸ, ದಸ ಚೇವ ನವೇತಿ ಚ;

ಞತ್ವಾ ವೀಥಿಸಮೋಧಾನಂ, ಗೋಚರಞ್ಚ ಸಮುದ್ದಿಸೇ.

೧೫೭. ಕಮತೋ ಪಞ್ಚವಿಞ್ಞಾಣಾ, ಲೋಕುತ್ತರಮಹಗ್ಗತಾ;

ಅಭಿಞ್ಞಾವಜ್ಜಿತಾ ಸಬ್ಬಾ, ಪಞ್ಚತಾಲೀಸ ಮಾನಸಾ.

೧೫೮. ಯಥಾಸಮ್ಭವತೋ ಹೋನ್ತಿ, ರೂಪಾದೇಕೇಕಗೋಚರಾ;

ಪಞ್ಚಗೋಚರಮೀರೇನ್ತಿ, ಮನೋಧಾತುತ್ತಿಕಂ ಪನ.

೧೫೯. ಸನ್ತೀರಣಮಹಾಪಾಕಾ, ಪರಿತ್ತಜವನಾನಿ ಚ;

ವೋಟ್ಠಬ್ಬನಮಭಿಞ್ಞಾ ಚ, ತೇಚತ್ತಾಲೀಸ ಸಮ್ಭವಾ.

೧೬೦. ಛಾರಮ್ಮಣೇಸು ಹೋನ್ತೀತಿ, ಅಟ್ಠಧಾ ತಿವಿಧಾ ಪುನ;

ಏಕಾರಮ್ಮಣಚಿತ್ತಾನಿ, ಪಞ್ಚಛಾರಮ್ಮಣಾನಿ ಚ.

೧೬೧. ಸಙ್ಖೇಪಾ ಮಾನಸಾ ಪಞ್ಚ-ಚತ್ತಾಲೀಸ ತಯೋ ತಥಾ;

ತೇಚತ್ತಾಲೀಸ ಚೇವೇತಿ, ಸತ್ತಧಾಪಿ ಸಿಯುಂ ಕಥಂ.

೧೬೨. ಕಾಮಪಾಕಮನೋಧಾತು-ಹಸಿತುಪ್ಪಾದಮಾನಸಾ;

ಪಞ್ಚವೀಸ ಯಥಾಯೋಗಂ, ಪರಿತ್ತಾರಮ್ಮಣಾ ಮತಾ.

೧೬೩. ಕಸಿಣುಗ್ಘಾಟಿಮಾಕಾಸಂ, ಪಠಮಾರುಪ್ಪಮಾನಸಂ;

ತಸ್ಸೇವ ನತ್ಥಿಭಾವಂ ತು, ತತಿಯಾರುಪ್ಪಕಂ ತಥಾ.

೧೬೪. ಆಲಮ್ಬಿತ್ವಾ ಪವತ್ತನ್ತಿ, ಆರುಪ್ಪಾ ಕಮತೋ ತತೋ;

ದುತಿಯಞ್ಚ ಚತುತ್ಥಞ್ಚ, ಛ ಮಹಗ್ಗತಗೋಚರಾ.

೧೬೫. ಅಪ್ಪಮಾಣಸಮಞ್ಞಾ ತೇ, ನಿಬ್ಬಾನೇ ಪನ ಗೋಚರೇ;

ಅಟ್ಠ ಲೋಕುತ್ತರಾ ಧಮ್ಮಾ, ನಿಯಮೇನ ವವತ್ಥಿತಾ.

೧೬೬. ಕಸಿಣಾಸುಭಕೋಟ್ಠಾಸೇ,

ಆನಾಪಾನೇ ಚ ಯೋಗಿನೋ;

ಪಟಿಭಾಗನಿಮಿತ್ತಮ್ಹಿ,

ಅಪ್ಪಮಞ್ಞಾನುಯುಞ್ಜತೋ.

೧೬೭. ಸತ್ತಪಣ್ಣತ್ತಿಯಞ್ಚೇವ, ರೂಪಜ್ಝಾನಂ ಪವತ್ತತಿ;

ಯಥಾವುತ್ತನಿಮಿತ್ತಮ್ಹಿ, ಸೇಸಮಾರುಪ್ಪಕನ್ತಿ ಚ.

೧೬೮. ಅಭಿಞ್ಞಾವಜ್ಜಿತಾ ಏಕವೀಸ ಮಹಗ್ಗತಾ ಸಬ್ಬಾ;

ಸಬ್ಬೇ ಪಣ್ಣತ್ತಿಸಙ್ಖಾತೇ, ನವತ್ತಬ್ಬೇ ಪವತ್ತರೇ.

೧೬೯. ಜಾಯನ್ತಾಕುಸಲಾ ಞಾಣವಿಪ್ಪಯುತ್ತಜವಾ ತಥಾ;

ಅಪ್ಪಮಾಣಂ ವಿನಾ ವೀಸ, ಪರಿತ್ತಾದೀಸು ತೀಸುಪಿ.

೧೭೦. ತಿಹೇತುಕಾಮಪುಞ್ಞಾನಿ, ಪುಞ್ಞಾಭಿಞ್ಞಾ ಚ ಪಞ್ಚಿಮೇ;

ಚತೂಸುಪಿ ಪವತ್ತನ್ತಿ, ಅರಹತ್ತದ್ವಯಂ ವಿನಾ.

೧೭೧. ಕ್ರಿಯಾಭಿಞ್ಞಾ ಚ ವೋಟ್ಠಬ್ಬಂ, ಕ್ರಿಯಾಕಾಮೇ ತಿಹೇತುಕಾ;

ಛ ಸಬ್ಬತ್ಥಾಪಿ ಹೋನ್ತೀತಿ, ಸತ್ತಧಾ ಮಾನಸಾ ಠಿತಾ.

೧೭೨. ಏಕತಿಚ್ಚತುಕೋಟ್ಠಾಸಗೋಚರಾ ತಿವಿಧಾ ಪನ;

ಸಮಸಟ್ಠಿ ತಥಾ ವೀಸ, ಕಮೇನೇಕಾದಸೇತಿ ಚ.

೧೭೩. ಪಞ್ಚದ್ವಾರೇಸು ಪಞ್ಚಾಪಿ, ಪಚ್ಚುಪ್ಪನ್ನಾವ ಗೋಚರಾ;

ತೇಕಾಲಿಕಾ ನವತ್ತಬ್ಬಾ, ಮನೋದ್ವಾರೇ ಯಥಾರಹಂ.

೧೭೪. ಅಜ್ಝತ್ತಾ ಚ ಬಹಿದ್ಧಾ ಚ, ಪಞ್ಚದ್ವಾರೇಸು ಗೋಚರಾ;

ಮನೋದ್ವಾರೇ ನವತ್ತಬ್ಬೋ, ನತ್ಥಿಭಾವೋಪಿ ಲಬ್ಭತಿ.

೧೭೫. ಪಞ್ಚದ್ವಾರೇಸು ಪಞ್ಚನ್ನ-ಮೇಕಮೇಕೋ ಚ ಗೋಚರೋ;

ಛಾಪಿ ಆರಮ್ಮಣಾ ಹೋನ್ತಿ, ಮನೋದ್ವಾರಮ್ಹಿ ಸಬ್ಬಥಾ.

೧೭೬. ಪಞ್ಚದ್ವಾರೇಸು ಗಹಿತಂ, ತದಞ್ಞಮ್ಪಿ ಚ ಗೋಚರಂ;

ಮನೋದ್ವಾರೇ ವವತ್ಥಾನಂ, ಗಚ್ಛತೀತಿ ಹಿ ದೇಸಿತಂ.

೧೭೭. ಅತೀತಾ ವತ್ತಮಾನಾ ಚ, ಸಮ್ಭವಾ ಕಾಮಸನ್ಧಿಯಾ;

ಛದ್ವಾರಗಹಿತಾ ಹೋನ್ತಿ, ತಿವಿಧಾ ತೇಪಿ ಗೋಚರಾ.

೧೭೮. ಕಮ್ಮನಿಮಿತ್ತಮೇವೇಕಂ, ಮನೋದ್ವಾರೇ ಉಪಟ್ಠಿತಂ;

ನವತ್ತಬ್ಬಮತೀತಞ್ಚ, ಧಮ್ಮಾರಮ್ಮಣಸಙ್ಗಹಂ.

೧೭೯. ಆಲಮ್ಬಿತ್ವಾ ಯಥಾಯೋಗಂ, ಪಟಿಸನ್ಧಿಮಹಗ್ಗತಾ;

ಅನ್ತೇ ಚುತಿ ಭವೇ ಮಜ್ಝೇ, ಭವಙ್ಗಮ್ಪಿ ಪವತ್ತತೀತಿ.

ಇತಿ ಚಿತ್ತವಿಭಾಗೇ ವೀಥಿಪರಿಕಮ್ಮಕಥಾ ನಿಟ್ಠಿತಾ.

ಚತುತ್ಥೋ ಪರಿಚ್ಛೇದೋ.