ದುತಿಯೋ ಪರಿಚ್ಛೇದೋ

೨. ಪಕಿಣ್ಣಕಕಥಾ

೪೬. ಕುಸಲಾನೇಕವೀಸೇವ, ದ್ವಾದಸಾಕುಸಲಾನಿ ಚ;

ಛತ್ತಿಂಸತಿ ವಿಪಾಕಾನಿ, ಕ್ರಿಯಾಚಿತ್ತಾನಿ ವೀಸತಿ.

೪೭. ಕಾಮೇಸು ಚತುಪಞ್ಞಾಸ, ರೂಪೇಸು ದಸ ಪಞ್ಚ ಚ;

ದ್ವಾದಸಾರುಪ್ಪಚಿತ್ತಾನಿ, ಅಟ್ಠಾನುತ್ತರಮಾನಸಾ.

೪೮. ಕಾಮೇ ತೇವೀಸ ಪಾಕಾನಿ, ಪುಞ್ಞಾಪುಞ್ಞಾನಿ ವೀಸತಿ;

ಏಕಾದಸ ಕ್ರಿಯಾ ಚೇತಿ, ಚತುಪಞ್ಞಾಸ ಸಬ್ಬಥಾ.

೪೯. ಪುಞ್ಞಪಾಕಕ್ರಿಯಾಭೇದಾ, ತಯೋ ರೂಪೇಸು ಪಞ್ಚಕಾ;

ಆರುಪ್ಪೇತಿ ಚತುಕ್ಕಾನಿ, ಸತ್ತವೀಸ ಮಹಗ್ಗತಾ.

೫೦. ಚತುಮಗ್ಗಫಲಾನಂ ತು, ವಸೇನಟ್ಠಪಿ ಝಾನತೋ;

ದಸೋಭಯಮ್ಪಿ ಮಿಸ್ಸೇತ್ವಾ, ತಾಲೀಸಾನುತ್ತರಾ ಸಿಯುಂ.

೫೧. ಪುಞ್ಞಪಾಕಕ್ರಿಯಾಪಾಪಾ, ಸನ್ತಿ ಕಾಮೇ ಮಹಗ್ಗತೇ;

ಪಾಪಂ ನತ್ಥಿ ಕ್ರಿಯಾಪಾಪಾ, ನ ವಿಜ್ಜನ್ತಿ ಅನುತ್ತರೇ.

೫೨. ಪಾಪಾಹೇತುಕಮುತ್ತಾನಿ, ಅನವಜ್ಜಾನಿ ಸಬ್ಬಥಾ;

ಏಕೂನಸಟ್ಠಿ ಚಿತ್ತಾನಿ, ಪುಞ್ಞಪಾಕಕ್ರಿಯಾವಸಾ.

೫೩. ಕಮ್ಮಚಿತ್ತಾನಿ ತೇತ್ತಿಂಸ, ಪುಞ್ಞಾಪುಞ್ಞಾನಿ ಸಬ್ಬಥಾ;

ಛತ್ತಿಂಸ ತೇಸಂ ಪಾಕಾನಿ, ಕ್ರಿಯಾ ವೀಸ ನ ಚೋಭಯಂ.

೫೪. ಚಕ್ಖುವಿಞ್ಞಾಣಧಾತಾದಿ, ಪಞ್ಚವಿಞ್ಞಾಣನಾಮಕಾ;

ಪಞ್ಚದ್ವಾರಾವಜ್ಜನಞ್ಚ, ದುವಿಧಂ ಸಮ್ಪಟಿಚ್ಛನಂ.

೫೫. ಮನೋಧಾತುತ್ತಯಂ ನಾಮ, ಛಸತ್ತತಿ ತತೋ ಪರೇ;

ಮನೋವಿಞ್ಞಾಣಧಾತೂತಿ, ಸತ್ತಧಾ ಧಾತುಭೇದತೋ.

೫೬. ಮನೋವಿಞ್ಞಾಣಧಾತುಞ್ಚ, ಮನೋಧಾತುತ್ತಯಂ ತಥಾ;

ಕತ್ವಾ ಮನೋವಿಞ್ಞಾಣನ್ತಿ, ಛ ವಿಞ್ಞಾಣಾ ಪಕಿತ್ತಿತಾ.

೫೭. ಆವಜ್ಜನಂ ದಸ್ಸನಞ್ಚ, ಸವನಂ ಘಾಯನಂ ತಥಾ;

ಸಾಯನಂ ಫುಸನಞ್ಚೇವ, ಸಮ್ಪಟಿಚ್ಛನತೀರಣಂ.

೫೮. ವೋಟ್ಠಬ್ಬನಞ್ಚ ಜವನಂ, ತದಾರಮ್ಮಣನಾಮಕಂ;

ಭವಙ್ಗಂ ಚುತಿ ಸನ್ಧೀತಿ, ಚಿತ್ತಂ ಚುದ್ದಸಧಾ ಠಿತಂ.

೫೯. ಆವಜ್ಜನಾದಯೋ ದ್ವೇ ದ್ವೇ, ಯುಗಾ ಸತ್ತ ಯಥಾಕ್ಕಮಂ;

ತೀಣಿ ತೀರಣಚಿತ್ತಾನಿ, ಏಕಂ ವೋಟ್ಠಬ್ಬನಂ ಮತಂ.

೬೦. ಕುಸಲಾಕುಸಲಾ ಸಬ್ಬೇ, ಫಲಾ ಚಾವಜ್ಜನಂ ವಿನಾ;

ಕ್ರಿಯಾ ಚ ಪಞ್ಚಪಞ್ಞಾಸ, ಜವನನ್ತಿ ಪವುಚ್ಚರೇ.

೬೧. ಸನ್ತೀರಣಮಹಾಪಾಕಾ, ತದಾರಮ್ಮಣನಾಮಕಾ;

ಏಕಾದಸ ಪವತ್ತನ್ತಿ, ಜವನಾರಮ್ಮಣೇ ಯತೋ.

೬೨. ಮಹಗ್ಗತಮಹಾಪಾಕಾ, ಉಪೇಕ್ಖಾತೀರಣದ್ವಯಂ;

ಚುತಿಸನ್ಧಿಭವಙ್ಗಾನಿ, ಚಿತ್ತಾನೇಕೂನವೀಸತಿ.

೬೩. ಜವನಾವಜ್ಜನಾದೀನಿ, ವೋಟ್ಠಬ್ಬಸುಖತೀರಣಾ;

ಮಹಗ್ಗತಮಹಾಪಾಕಾ, ಉಪೇಕ್ಖಾತೀರಣಾತಿ ಚ.

೬೪. ಅಟ್ಠಸಟ್ಠಿ ತಥಾ ದ್ವೇ ಚ, ನವಟ್ಠ ದ್ವೇ ಯಥಾಕ್ಕಮಂ;

ಏಕದ್ವಿತಿಚತುಪ್ಪಞ್ಚಕಿಚ್ಚಟ್ಠಾನಾನಿ ನಿದ್ದಿಸೇ.

೬೫. ರೂಪಪಾಕಾ ಮಹಾಪಾಕಾ, ಮನೋಧಾತು ಚ ತೀರಣಂ;

ರೂಪಂ ಜನೇನ್ತಿ ಏಕೂನವೀಸತಿ ನೇತರದ್ವಯಂ.

೬೬. ಅಭಿಞ್ಞಾವಜ್ಜಿತಾ ಸಬ್ಬೇ, ಅಪ್ಪನಾಜವನಾ ಪನ;

ರೂಪಂ ಜನೇನ್ತಿ ಛಬ್ಬೀಸ, ಪಣಾಮೇನ್ತಿರಿಯಾಪಥಂ.

೬೭. ಅಭಿಞ್ಞಾದ್ವಯವೋಟ್ಠಬ್ಬಪರಿತ್ತಜವನಾ ಪನ;

ದ್ವತ್ತಿಂಸ ರೂಪವಿಞ್ಞತ್ತಿಇರಿಯಾಪಥಸಾಧಕಾ.

೬೮. ಪಞ್ಚವಿಞ್ಞಾಣಮಾರುಪ್ಪ-ವಿಪಾಕಾ ಸಬ್ಬಸನ್ಧಿಯೋ;

ಚುತಿ ಖೀಣಾಸವಸ್ಸೇತಿ, ಸೋಳಸೇತೇ ನ ಕಿಞ್ಚಿಪಿ.

೬೯. ರೂಪಂ ಜನೇನ್ತಿ ಚಿತ್ತಾನಿ, ಸತ್ತಸತ್ತತಿ ಸಬ್ಬಥಾ;

ಅಟ್ಠಪಞ್ಞಾಸ ಚಿತ್ತಾನಿ, ಪಣಾಮೇನ್ತಿರಿಯಾಪಥಂ.

೭೦. ದ್ವತ್ತಿಂಸ ಚತುವಿಞ್ಞತ್ತಿಂ, ಸಮುಟ್ಠಾಪೇನ್ತಿ ಮಾನಸಾ;

ನ ಜನೇನ್ತಿ ತಸ್ಸಮ್ಪೇಕಂ, ಯಥಾವುತ್ತಾನಿ ಸೋಳಸ.

೭೧. ಸೋಮನಸ್ಸಸಹಗತಾ, ಪರಿತ್ತಜವನಾ ಪನ;

ಹಸನಮ್ಪಿ ಜನೇನ್ತೀತಿ, ಚತುಕಿಚ್ಚಾನಿ ತೇರಸ.

೭೨. ಸಬ್ಬಮ್ಪಿ ಪಞ್ಚವೋಕಾರೇ, ಕಿಚ್ಚಮೇತಂ ಪಕಾಸಿತಂ;

ಆರುಪ್ಪೇ ಪನ ಸಬ್ಬಮ್ಪಿ, ರೂಪಾಯತ್ತಂ ನ ವಿಜ್ಜತಿ.

೭೩. ಅಸಞ್ಞೀನಂ ತು ಸಬ್ಬಾನಿ, ಚಿತ್ತಾನೇವ ನ ಲಬ್ಭರೇ;

ರೂಪಕ್ಖನ್ಧೋವ ತೇಸಂ ತು, ಅತ್ತಭಾವೋತಿ ವುಚ್ಚತಿ.

೭೪. ಪಾಣಾತಿಪಾತಥೇಯ್ಯಾದಿವಸೇನೋಪಚಿತಂ ಪನ;

ಉದ್ಧಚ್ಚರಹಿತಾಪುಞ್ಞಂ, ಚತುರಾಪಾಯಭೂಮಿಯಂ.

೭೫. ದತ್ವಾ ಸನ್ಧಿಂ ಪವತ್ತೇ ತು, ಪಞ್ಚವೋಕಾರಭೂಮಿಯಂ;

ಉದ್ಧಚ್ಚಸಹಿತಞ್ಚಾಪಿ, ಸತ್ತ ಪಾಕಾನಿ ಪಚ್ಚತಿ.

೭೬. ದಾನಸೀಲಾದಿಭೇದೇನ, ಪವತ್ತಂ ಕುಸಲಂ ಪನ;

ಕಾಮೇ ಮಾನಸಮುಕ್ಕಟ್ಠಂ, ಚತುಕ್ಕಂ ತು ತಿಹೇತುಕಂ.

೭೭. ದತ್ವಾ ತಿಹೇತುಕಂ ಸನ್ಧಿಂ, ಕಾಮೇ ಸುಗತಿಯಂ ಪನ;

ಸೋಳಸ ಪುಞ್ಞಪಾಕಾನಿ, ಪವತ್ತೇ ತು ವಿಪಚ್ಚತಿ.

೭೮. ತಿಹೇತುಕೋಮಕಂ ಪುಞ್ಞಂ, ಉಕ್ಕಟ್ಠಞ್ಚ ದ್ವಿಹೇತುಕಂ;

ದತ್ವಾ ದ್ವಿಹೇತುಕಂ ಸನ್ಧಿಂ, ಕಾಮೇ ಸುಗತಿಯಂ ತಥಾ.

೭೯. ಪವತ್ತೇ ಪನ ಞಾಣೇನ, ಸಮ್ಪಯುತ್ತಂ ವಿವಜ್ಜಿಯ;

ದ್ವಾದಸ ಪುಞ್ಞಪಾಕಾನಿ, ವಿಪಚ್ಚತಿ ಯಥಾರಹಂ.

೮೦. ದ್ವಿಹೇತುಕೋಮಕಂ ಪುಞ್ಞಂ, ಪಟಿಸನ್ಧಿಮಹೇತುಕಂ;

ದೇತಿ ಮಾನುಸಕೇ ಚೇವ, ವಿನಿಪಾತಾಸುರೇ ತಥಾ.

೮೧. ಅಟ್ಠಾಹೇತುಕಪಾಕಾನಿ, ಪವತ್ತೇ ತು ವಿಪಚ್ಚರೇ;

ಚತ್ತಾರಿಪಿ ಚತುಕ್ಕಾನಿ, ಪಞ್ಚವೋಕಾರಭೂಮಿಯಂ.

೮೨. ಭಾವನಾಮಯಪುಞ್ಞಂ ತು, ಮಹಗ್ಗತಮನುತ್ತರಂ;

ಯಥಾಭೂಮಿನಿಯಾಮೇನ, ದೇತಿ ಪಾಕಂ ಯಥಾಸಕಂ.

೮೩. ಕಟತ್ತಾರೂಪಪಾಕಾನಿ, ಪಞ್ಚವೋಕಾರಭೂಮಿಯಂ;

ಆರುಪ್ಪಾನುತ್ತರೇ ಪಾಕಂ, ತಥಾ ರೂಪಮಸಞ್ಞಿಸು.

೮೪. ಪುಞ್ಞಾಪುಞ್ಞಾನಿ ಕಮ್ಮಾನಿ, ತೇತ್ತಿಂಸಾಪಿ ಚ ಯಬ್ಬಥಾ;

ಸಞ್ಜನೇನ್ತಿ ಯಥಾಯೋಗಂ, ಪಟಿಸನ್ಧಿಪವತ್ತಿಯಂ.

ಇತಿ ಚಿತ್ತವಿಭಾಗೇ ಪಕಿಣ್ಣಕಕಥಾ ನಿಟ್ಠಿತಾ.

ದುತಿಯೋ ಪರಿಚ್ಛೇದೋ.