ಛಬ್ಬಿಸತಿಮೋ ಪರಿಚ್ಛೇದೋ

೨೬. ವುಟ್ಠಾನವಿಸುದ್ಧಿಕಥಾ

೧೦೧೯. ತಸ್ಸೇವಂ ಪಟಿಪನ್ನಸ್ಸ, ಸಿಖಾಪತ್ತಾ ವಿಪಸ್ಸನಾ;

ವುಟ್ಠಾನಗಾಮಿನೀ ನಾಮ, ಯದಾ ಹೋತಿ ತದಾ ಪನ.

೧೦೨೦. ಪರಿಕಮ್ಮೋಪಚಾರಾನುಲೋಮಗೋತ್ರಭುತೋ ಪರಂ;

ಮಗ್ಗೋ ತತೋ ಫಲಂ ಹೋತಿ, ಭವಙ್ಗಾ ಪಚ್ಚವೇಕ್ಖಣಾ.

೧೦೨೧. ಪರಿಕಮ್ಮೋಪಚಾರಾನುಲೋಮಸಙ್ಖಾತಗೋಚರಾ;

ಮಗ್ಗಸ್ಸಾವಜ್ಜನಂ ಹುತ್ವಾ, ನಿಬ್ಬಾನೇ ಹೋತಿ ಗೋತ್ರಭು.

೧೦೨೨. ಚತುತ್ಥಂ ಪಞ್ಚಮಂ ವಾಥ, ಛಟ್ಠಂ ವಾಪಿ ಯಥಾರಹಂ;

ಅಪ್ಪೇತಿ ಮಗ್ಗಜವನಂ, ನಿಬ್ಬಾನೇ ಸಕಿಮೇವ ತಂ.

೧೦೨೩. ತತೋ ಫಲಾನಿ ತೀಣಿ ದ್ವೇ, ಏಕಂ ವಾಥ ಯಥಾಕ್ಕಮಂ;

ಮಗ್ಗಾವಸೇಸನಿರೋಧಮಗ್ಗವುಟ್ಠಾನವೀಥಿಯಂ.

೧೦೨೪. ತತೋ ಭವಙ್ಗಪಾತೋವ,

ತಂ ಛೇತ್ವಾ ಪಚ್ಚವೇಕ್ಖಣಾ;

ತಿಸ್ಸೋ ಪಞ್ಚವಿಧಾ ಹೋನ್ತಿ,

ಯಥಾಯೋಗಂ ತಥಾ ಹಿ ಚ.

೧೦೨೫. ಮಗ್ಗಂ ಫಲಞ್ಚ ನಿಬ್ಬಾನಂ, ಅವಸ್ಸಂ ಪಚ್ಚವೇಕ್ಖತಿ;

ಹೀನೇ ಕಿಲೇಸೇ ಸೇಸೇ ಚ, ಪಚ್ಚವೇಕ್ಖತಿ ವಾ ನ ವಾ.

೧೦೨೬. ತತೋ ಚ ಪುನ ಸಙ್ಖಾರೇ, ವಿಪಸ್ಸನ್ತೋ ಯಥಾ ಪುರೇ;

ಅಪ್ಪೇತಿ ಅನುಪುಬ್ಬೇನ, ಸೇಸಮಗ್ಗಫಲಾನಿ ಚ.

೧೦೨೭. ತತ್ಥ ವುಚ್ಚನ್ತಿ ನಿಬ್ಬಾನ-ಫಲಮಗ್ಗವಿಪಸ್ಸನಾ;

ಸುಞ್ಞತಾ ಚಾನಿಮಿತ್ತಾ ಚ, ತಥಾಪಣಿಹಿತಾನಿ ಚ.

೧೦೨೮. ಸುಞ್ಞತಾವಿಪಸ್ಸನಾದಿನಾಮೇನ ಹಿ ವಿಪಸ್ಸತಿ;

ವಿಮೋಕ್ಖಮುಖಭೂತಾತಿ, ತಿವಿಧಾ ಭಾಜಿತಾ ತಥಾ.

೧೦೨೯. ಸುಞ್ಞತಾದಿಕನಾಮೇನ, ವಿಮೋಕ್ಖಾ ತಿವಿಧಾ ಮತಾ;

ನಿಬ್ಬಾನಫಲಮಗ್ಗಾ ಚ, ಸಮಾಪತ್ತಿಸಮಾಧಯೋ.

೧೦೩೦. ತತ್ಥೇವ ಪಠಮಭೂಮಿಂ, ಪತ್ತೋ ಅರಿಯಪುಗ್ಗಲೋ;

ಸತ್ತಕ್ಖತ್ತುಪರಮೋ ಸೋ, ಸೋತಾಪನ್ನೋತಿ ವುಚ್ಚತಿ.

೧೦೩೧. ಪತ್ತೋ ದುತಿಯಭೂಮಿಞ್ಚ, ಸಕದಾಗಾಮಿನಾಮಕೋ;

ಸಕಿಮೇವ ಇಮಂ ಲೋಕಂ, ಆಗನ್ತ್ವಾ ಹೋತಿ ಮಾನುಸಂ.

೧೦೩೨. ಪತ್ತೋ ತತಿಯಭೂಮಿಞ್ಚ, ಅನಾಗಾಮೀತಿ ವುಚ್ಚತಿ;

ಬ್ರಹ್ಮಲೋಕಾ ಅನಾಗನ್ತ್ವಾ, ಇಧಕಾಮೋಪಪತ್ತಿಯಾ.

೧೦೩೩. ಪತ್ತೋ ಚತುತ್ಥಭೂಮಿಞ್ಚ, ಅರಹಾ ಅಗ್ಗಪುಗ್ಗಲೋ;

ದಿಟ್ಠೇವ ಧಮ್ಮೇ ದುಕ್ಖಗ್ಗಿಂ, ನಿಬ್ಬಾಪೇತೀತಿ ವುಚ್ಚತಿ.

೧೦೩೪. ಇತಿ ಮಗ್ಗಫಲಟ್ಠಾನಂ, ವಸಾ ಅರಿಯಪುಗ್ಗಲಾ;

ದ್ವಿಧಾಪಿ ಚತುಧಾ ಯುಗ್ಗಾ, ಅಟ್ಠ ಹೋನ್ತಿ ವಿಭಾಗತೋ.

೧೦೩೫. ಉಭತೋಭಾಗವಿಮುತ್ತ-

ವಿಭಾಗಾದಿವಸಾ ಪನ;

ವಿಭತ್ತಾ ಹೋನ್ತಿ ಸತ್ತೇತೇ,

ಯಥಾಯೋಗಂ ತಥಾ ಹಿ ಚ.

೧೦೩೬. ಸದ್ಧಾಧುರಸ್ಸಾನಿಚ್ಚತೋ, ವುಟ್ಠಾನಂ ದುಕ್ಖತೋಪಿ ಚ;

ಪಞ್ಞಾಧುರಸ್ಸಾನತ್ತತೋ, ಇತಿ ದೀಪೇನ್ತಿ ಪಣ್ಡಿತಾ.

೧೦೩೭. ಸದ್ಧಾನುಸಾರಿ ಆದಿಮ್ಹಿ, ಮಜ್ಝೇ ಸದ್ಧಾವಿಮುತ್ತಕೋ;

ಅನ್ತೇ ಪಞ್ಞಾವಿಮುತ್ತೋವ, ತಸ್ಮಾ ಸದ್ಧಾಧುರೋ ಸಿಯಾ.

೧೦೩೮. ಧಮ್ಮಾನುಸಾರಿ ಆದಿಮ್ಹಿ, ದಿಟ್ಠಿಪ್ಪತ್ತೋ ತತೋಪರಿ;

ಅನ್ತೇ ಪಞ್ಞಾವಿಮುತ್ತೋವ, ಹೋತಿ ಪಞ್ಞಾಧುರೋಪಿ ಚ.

೧೦೩೯. ಸಮಥಯಾನಿಕಾ ಚೇವ, ರೂಪಾನುತ್ತರಪಾದಕಾ;

ವಿಪಸ್ಸನಾಯಾನಿಕಾ ಚ, ಸಬ್ಬೇ ಸುಕ್ಖವಿಪಸ್ಸಕಾ.

೧೦೪೦. ಧುರವುಟ್ಠಾನಭೇದೇನ, ಹೋನ್ತಿ ಪಞ್ಚೇವ ಸಬ್ಬಥಾ;

ಆರುಪ್ಪಪಾದಕಾ ಚಾಪಿ, ಆದಿಮ್ಹಿ ದುವಿಧಾ ತಥಾ.

೧೦೪೧. ಛಸು ಠಾನೇಸು ಮಜ್ಝಕೇ, ಕಾಯಸಕ್ಖೀತಿ ಭಾಜಿತಾ;

ಉಭತೋಭಾಗವಿಮುತ್ತೋ, ಅರಹತ್ತೇ ಪತಿಟ್ಠಿತೋ.

೧೦೪೨. ಇತ್ಥಂ ವುತ್ತಯಾನಧುರ-ವುಟ್ಠಾನಾನಂ ವಿಭಾಗತೋ;

ಮಗ್ಗಪ್ಫಲಭೂಮಿಯೋ ಚ, ಸತ್ತಟ್ಠಾರಿಯಪುಗ್ಗಲಾ.

೧೦೪೩. ತತ್ಥ ಚಾನುತ್ತರಞಾಣಂ, ಸಚ್ಚಾನಂ ಪಟಿವೇಧಕಂ;

ಸಮುಚ್ಛೇದಪ್ಪಹಾನೇನ, ಕ್ಲೇಸಾನುಸಯಸೋಧನಂ.

೧೦೪೪. ಚತುಮಗ್ಗವಿಭಾಗೇನ, ವುಟ್ಠಾನನ್ತಿ ಪಕಿತ್ತಿತಂ;

ಞಾಣದಸ್ಸನವಿಸುದ್ಧಿ, ನಾಮ ಹೋತಿ ತಥಾಪಿ ಚ.

೧೦೪೫. ಮಗ್ಗೋ ಚ ಪರಿಜಾನಾತಿ, ದುಕ್ಖಂ ತೇಭೂಮಕಂ ತಥಾ;

ಯಥಾಯೋಗಂ ಪಜಹತಿ, ತಣ್ಹಾಸಮುದಯಮ್ಪಿ ಚ.

೧೦೪೬. ನಿರೋಧಂ ಸಚ್ಛಿಕರೋತಿ, ಮಗ್ಗಸಚ್ಚಮನುತ್ತರಂ;

ಭಾವನಾವೀಥಿಮೋತಿಣ್ಣೋ, ಭಾವೇತೀತಿ ಪವುಚ್ಚತಿ.

೧೦೪೭. ದಿಟ್ಠಿಗ್ಗತವಿಚಿಕಿಚ್ಛಾ-ಸೀಲಬ್ಬತಮಸೇಸತೋ;

ಅಪಾಯಗಮನೀಯಞ್ಚ, ರಾಗದೋಸಾದಿಕತ್ತಯಂ.

೧೦೪೮. ತದೇಕಟ್ಠೇ ಕಿಲೇಸೇ ಚ, ಸಹಜಾತಪ್ಪಹಾನತೋ;

ಪಜಹಾತಿ ಸೋತಾಪತ್ತಿ-ಮಗ್ಗೋ ಪಠಮಭೂಮಿಕೋ.

೧೦೪೯. ತದೇಕಟ್ಠೇ ಪಜಹತಿ, ರಾಗದೋಸಾದಿಕೇಪಿ ಚ;

ಥೂಲೇ ತು ಸಕದಾಗಾಮಿ-ಮಗ್ಗೋ ದುತಿಯಭೂಮಿಕೋ.

೧೦೫೦. ಪಜಹಾತಿ ಅನಾಗಾಮಿ-ಮಗ್ಗೋ ನಿರವಸೇಸತೋ;

ಕಾಮರಾಗಬ್ಯಾಪಾದೇ ಚ, ತದೇಕಟ್ಠೇ ಚ ಸಮ್ಭವಾ.

೧೦೫೧. ರೂಪಾರೂಪರಾಗಮಾನು-ದ್ಧಚ್ಚಾವಿಜ್ಜಾತಿ ಪಞ್ಚಕಂ;

ಅಗ್ಗಮಗ್ಗೋ ಪಜಹತಿ, ಕ್ಲೇಸೇ ಸೇಸೇ ಚ ಸಬ್ಬಥಾ.

೧೦೫೨. ಇತಿ ಸಚ್ಚಪಟಿವೇಧಂ, ಕ್ಲೇಸಕ್ಖಯಫಲಾವಹಂ;

ಮಗ್ಗಞಾಣಂ ಪಕಾಸೇನ್ತಿ, ವಿಸುದ್ಧಿಂ ಸತ್ತಮಂ ಬುಧಾ.

೧೦೫೩. ಛಬ್ಬಿಸುದ್ಧಿಕಮೇನೇವಂ, ಸಬ್ಬಥಾಯ ವಿಸುದ್ಧಿಯಾ;

ಸತ್ತಮಾಯಾನುಪತ್ತಬ್ಬಂ, ನಿಬ್ಬಾನನ್ತಿ ಪವುಚ್ಚತಿ.

೧೦೫೪. ಕ್ಲೇಸಕ್ಖಯಕರಂ ತಾಣಂ, ಸಂಸಾರಾತಿಕ್ಕಮಂ ಪರಂ;

ಪಾರಿಮಂ ತೀರಮಭಯಂ, ಸಬ್ಬಸಙ್ಖಾರನಿಸ್ಸಟಂ.

೧೦೫೫. ತೇನಮ್ಮದನಿಮ್ಮದನಂ, ಪಿಪಾಸವಿನಯಾದಿನಾ;

ಕ್ಲೇಸಸಂಸಾರಸಙ್ಖಾರ-ಪಟಿಪಕ್ಖನಿದಸ್ಸಿತಂ.

೧೦೫೬. ಅಜರಾಮರಮಚ್ಚನ್ತ-ಮನುಪ್ಪಾದಮಸಙ್ಖತಂ;

ಅನುತ್ತರಮಸಙ್ಖಾರಂ, ಅನನ್ತಮತುಲಞ್ಚ ತಂ.

೧೦೫೭. ಪರಮತ್ಥಮನೋಪಮ್ಮಂ, ಸನ್ತಿ ಅಪ್ಪಟಿಮಂ ಸುಖಂ;

ನಿರೋಧಸಚ್ಚ ನಿಬ್ಬಾನಂ, ಏಕನ್ತಂ ಅಮತಂ ಪದಂ.

೧೦೫೮. ಸೋಪಾದಿಸೇಸನಿಬ್ಬಾನ-ಧಾತು ಚೇವ ತಥಾಪರಾ;

ಅನುಪಾದಿಸೇಸಾ ಚೇತಿ, ದುವಿಧಾ ಪರಿಯಾಯತೋ.

೧೦೫೯. ಸುಞ್ಞತಂ ಚಾನಿಮಿತ್ತಞ್ಚ, ತಥಾಪಣಿಹಿತನ್ತಿ ಚ;

ಅತ್ತಾದಿಗಾಹಾಭಾವೇನ, ತಿವಿಧಾಪಿ ಚ ಭಾಜಿತಂ.

೧೦೬೦. ಕ್ಲೇಸಸಂಸಾರಸಙ್ಖಾರ-ಪಚ್ಚನೀಕವಿಭಾಗತೋ;

ಭವಕ್ಖಯಾದಿಭೇದೇಹಿ, ಬಹುಧಾಪಿ ಪವುಚ್ಚತಿ.

೧೦೬೧. ತದೇವಮಚ್ಚುತಂ ಧಮ್ಮಂ, ಲೋಕುತ್ತರಮಕಾಲಿಕಂ;

ವಾನಾಭಾವಾ ವಾನಾತೀತೋ, ‘‘ನಿಬ್ಬಾನ’’ನ್ತಿ ಪಕಿತ್ತಿತಂ.

ಇತಿ ನಿಬ್ಬಾನವಿಭಾಗೇ ವುಟ್ಠಾನವಿಸುದ್ಧಿಕಥಾ ನಿಟ್ಠಿತಾ.

ಛಬ್ಬೀಸತಿಮೋ ಪರಿಚ್ಛೇದೋ.

ನಿಟ್ಠಿತೋ ಚ ಸಬ್ಬಥಾಪಿ ನಿಬ್ಬಾನವಿಭಾಗೋ.