೨೪. ಪರಿಗ್ಗಹವಿಸುದ್ಧಿಕಥಾ

೯೪೦. ಸೀಲಚಿತ್ತವಿಸುದ್ಧೀಹಿ, ಯಥಾವುತ್ತಾಹಿ ಮಣ್ಡಿತೋ;

ಪಯೋಗಾಸಯಸಮ್ಪನ್ನೋ, ನಿಬ್ಬಾನಾಭಿರತೋ ತತೋ.

೯೪೧. ಖನ್ಧಾಯತನಧಾತಾದಿಪ್ಪಭೇದೇಹಿ ಯಥಾರಹಂ;

ಲಕ್ಖಣಪಚ್ಚುಪಟ್ಠಾನ-ಪದಟ್ಠಾನವಿಭಾಗತೋ.

೯೪೨. ಪರಿಗ್ಗಹೇತ್ವಾ ಸಙ್ಖಾರೇ, ನಾಮರೂಪಂ ಯಥಾಕಥಂ;

ವವತ್ಥಪೇನ್ತೋ ತತ್ಥೇವಮನುಪಸ್ಸತಿ ಪಞ್ಞವಾ.

೯೪೩. ನಾಮರೂಪಮಿದಂ ಸುದ್ಧಂ, ಅತ್ತಭಾವೋತಿ ವುಚ್ಚತಿ;

ನತ್ಥೇತ್ಥ ಕೋಚಿ ಅತ್ತಾ ವಾ, ಸತ್ತೋ ಜೀವೋ ಚ ಪುಗ್ಗಲೋ.

೯೪೪. ಯಥಾಪಿ ಅಙ್ಗಸಮ್ಭಾರಾ, ಹೋತಿ ಸದ್ದೋ ರಥೋ ಇತಿ;

ಏವಂ ಖನ್ಧೇಸು ಸನ್ತೇಸು, ಹೋತಿ ಸತ್ತೋತಿ ಸಮ್ಮುತಿ.

೯೪೫. ಖನ್ಧಾಯತನಧಾತೂನಂ, ಯಥಾಯೋಗಮನುಕ್ಕಮೋ;

ಅಬ್ಬೋಚ್ಛಿನ್ನೋ ಪವತ್ತನ್ತೋ, ಸಂಸಾರೋತಿ ಪವುಚ್ಚತಿ.

೯೪೬. ಇತಿ ನಾನಪ್ಪಕಾರೇನ, ತೇಭೂಮಕಪರಿಗ್ಗಹೋ;

ಭೂಮಿಧಮ್ಮವವತ್ಥಾನಂ, ಸುದ್ಧಸಙ್ಖಾರದಸ್ಸನಂ.

೯೪೭. ಅತ್ತದಿಟ್ಠಿಪಹಾನೇನ, ದಿಟ್ಠಿಸಂಕ್ಲೇಸಸೋಧನಂ;

ದಿಟ್ಠಿವಿಸುದ್ಧಿ ನಾಮಾತಿ, ಞಾಣಮೇತಂ ಪವುಚ್ಚತಿ.

೯೪೮. ಪರಿಗ್ಗಹಿತಸಙ್ಖಾರೋ, ನಾಮರೂಪಮಪತ್ಥಿಯಾ;

ತತೋ ಪರಂ ಯಥಾಯೋಗಂ, ಪರಿಗ್ಗಣ್ಹತಿ ಪಚ್ಚಯೇ.

೯೪೯. ದುಕ್ಖಸಮುದಯೋ ತತ್ಥ, ತಣ್ಹಾ ಸಂಸಾರನಾಯಿಕಾ;

ಸಮೋಧಾನೇತಿ ಸಙ್ಖಾರೇ, ತತ್ಥ ತತ್ಥುಪಪತ್ತಿಯಾ.

೯೫೦. ತಣ್ಹಾಸಮ್ಭವಮೇವೇತಂ, ತಸ್ಮಾ ದುಕ್ಖಂ ಪವುಚ್ಚತಿ;

ತದಪ್ಪವತ್ತಿ ನಿಬ್ಬಾನಂ, ಮಗ್ಗೋ ತಂಪಾಪಕೋತಿ ಚ.

೯೫೧. ಚತುಸಚ್ಚವವತ್ಥಾನ-ಮುಖೇನೇವಮ್ಪಿ ಪಚ್ಚಯೇ;

ಪರಿಗ್ಗಣ್ಹನ್ತಿ ಏಕಚ್ಚೇ, ಸಙ್ಖಾರಾನಮಥಾಪರೇ.

೯೫೨. ಆಲೋಕಾಕಾಸವಾಯಾಪಪಥವಿಞ್ಚುಪನಿಸ್ಸಯಂ;

ಭವಙ್ಗಪರಿಣಾಮಞ್ಚ, ಲಭಿತ್ವಾವ ಯಥಾರಹಂ.

೯೫೩. ಛ ವತ್ಥೂನಿ ಚ ನಿಸ್ಸಾಯ, ಛ ದ್ವಾರಾರಮ್ಮಣಾನಿ ಚ;

ಪಟಿಚ್ಚ ಮನಸಿಕಾರಂ, ಪವತ್ತನ್ತಿ ಅರೂಪಿನೋ.

೯೫೪. ಯಥಾಸಕಸಮುಟ್ಠಾನಂ, ವಿಭಾಗೇಹಿ ಚ ರೂಪಿನೋ;

ಪವತ್ತನ್ತಿ ಏಕಚ್ಚೇತಿ, ಪರಿಗ್ಗಣ್ಹನ್ತಿ ಪಚ್ಚಯೇ.

೯೫೫. ಅವಿಜ್ಜಾಪಚ್ಚಯಾ ಹೋನ್ತಿ, ಸಙ್ಖಾರಾ ತು ತತೋ ತಥಾ;

ವಿಞ್ಞಾಣಂ ನಾಮರೂಪಞ್ಚ, ಸಳಾಯತನನಾಮಕಂ.

೯೫೬. ಫಸ್ಸೋ ಚ ವೇದನಾ ತಣ್ಹಾ, ಉಪಾದಾನಂ ಭವೋ ತತೋ;

ಜಾತಿ ಜರಾ ಮರಣಞ್ಚ, ಪವತ್ತತಿ ಯಥಾರಹಂ.

೯೫೭. ತತೋ ಸೋಕೋ ಪರಿದೇವೋ, ದುಕ್ಖಞ್ಚೇವ ತಥಾಪರಂ;

ದೋಮನಸ್ಸಮುಪಾಯಾಸೋ, ಸಮ್ಭೋತಿ ಚ ಯಥಾರಹಂ.

೯೫೮. ಏತಸ್ಸ ಕೇವಲಸ್ಸೇವಂ, ದುಕ್ಖಕ್ಖನ್ಧಸ್ಸ ಸಮ್ಭವೋ;

ಪಟಿಚ್ಚಸಮುಪ್ಪಾದೋವ, ನತ್ಥಞ್ಞೋ ಕೋಚಿ ಕಾರಕೋ.

೯೫೯. ತತ್ಥಾವಿಜ್ಜಾದಯೋ ದ್ವೇಪಿ, ಅದ್ಧಾತೀತೋ ಅನಾಗತೋ;

ಜಾತಾದಯೋಪರೇ ಅಟ್ಠ, ಪಚ್ಚುಪ್ಪನ್ನೋತಿ ವಣ್ಣಿತೋ.

೯೬೦. ಪುಞ್ಞಾಪುಞ್ಞಾನೇಞ್ಜವಸಾ, ಸಙ್ಖಾರಾ ತಿವಿಧಾ ತಥಾ;

ಭವೇಕದೇಸೋ ಕಮ್ಮಞ್ಚ, ಕಮ್ಮವಟ್ಟನ್ತಿ ವುಚ್ಚತಿ.

೯೬೧. ಅವಿಜ್ಜಾತಣ್ಹುಪಾದಾನಾ, ಕ್ಲೇಸವಟ್ಟಮಥಾಪರೇ;

ವಿಪಾಕವಟ್ಟಂ ಸತ್ತಾಪಿ, ಉಪಪತ್ತಿಭವೋಪಿ ಚ.

೯೬೨. ಅವಿಜ್ಜಾಸಙ್ಖಾರಾನಂ ತು, ಗಹಣೇ ಗಹಿತಾವ ತೇ;

ತಣ್ಹುಪಾದಾನಭವಾತಿ, ಅತೀತೇ ಪಞ್ಚ ಹೇತವೋ.

೯೬೩. ತಣ್ಹುಪಾದಾನಭವಾನಂ, ಗಹಣೇ ಗಹಿತಾವ ತೇ;

ಅವಿಜ್ಜಾ ಸಙ್ಖಾರಾ ಚೇತಿ, ಪಚ್ಚುಪ್ಪನ್ನೇಪಿ ಪಞ್ಚಕೇ.

೯೬೪. ವಿಞ್ಞಾಣಾದಿಸರೂಪೇನ, ದಸ್ಸಿತಂ ಫಲಪಞ್ಚಕಂ;

ತಥಾ ತದೇವ ಜಾತಾದಿ-ನಾಮೇನಾನಾಗತನ್ತಿ ಚ.

೯೬೫. ಅತೀತೇ ಹೇತವೋ ಪಞ್ಚ, ಇದಾನಿ ಫಲಪಞ್ಚಕಂ;

ಇದಾನಿ ಹೇತವೋ ಪಞ್ಚ, ಆಯತಿಂ ಫಲಪಞ್ಚಕಂ.

೯೬೬. ಹೇತುಫಲಂ ಫಲಹೇತು, ಪುನ ಹೇತುಫಲಾನಿ ಚ;

ತಿಸನ್ಧಿ ಚತುಸಙ್ಖೇಪಂ, ವೀಸತಾಕಾರಮಬ್ರವುಂ.

೯೬೭. ಅತ್ಥಧಮ್ಮಪಟಿವೇಧ-ದೇಸನಾನಂ ಯಥಾರಹಂ;

ಗಮ್ಭೀರತ್ತಾ ಚತುನ್ನಮ್ಪಿ, ಚತುಗಮ್ಭೀರತಾ ಮತಾ.

೯೬೮. ಏಕತ್ತನಾನತ್ತನಯಾ, ಅಬ್ಯಾಪಾರನಯೋಪರೋ;

ತಥೇವಂಧಮ್ಮತಾ ಚೇತಿ, ನಯಾ ವುತ್ತಾ ಚತುಬ್ಬಿಧಾ.

೯೬೯. ಜರಾಮರಣಸೋಕಾದಿ-ಪೀಳಿತಾನಮಭಿಣ್ಹಸೋ;

ಆಸವಾನಂ ಸಮುಪ್ಪಾದಾ, ಅವಿಜ್ಜಾ ಚ ಪವತ್ತತಿ.

೯೭೦. ಅವಿಜ್ಜಾಪಚ್ಚಯಾ ಹೋನ್ತಿ, ಸಙ್ಖಾರಾಪಿ ಯಥಾ ಪುರೇ;

ಬದ್ಧಾವಿಚ್ಛೇದಮಿಚ್ಚೇವಂ, ಭವಚಕ್ಕಮನಾದಿಕಂ.

೯೭೧. ತಣ್ಹಾವಿಜ್ಜಾನಾಭಿಕಂ ತಂ, ಜರಾಮರಣನೇಮಿಕಂ;

ಸೇಸಾಕಾರಾದಿಘಟಿಕಂ, ತಿಭವಾರಥಯೋಜಿತಂ.

೯೭೨. ತಿಅದ್ಧಞ್ಚ ತಿವಟ್ಟಞ್ಚ, ತಿಸನ್ಧಿಘಟಿಕಂ ತಥಾ;

ಚತುಸಙ್ಖೇಪಗಮ್ಭೀರನಯಮಣ್ಡಿತದೇಸನಂ.

೯೭೩. ವೀಸತಾಕಾರವಿಭಾಗಂ, ದ್ವಾದಸಾಕಾರಸಙ್ಗಹಂ;

ಧಮ್ಮಟ್ಠಿತೀತಿ ದೀಪೇನ್ತಿ, ಇದಪ್ಪಚ್ಚಯತಂ ಬುಧಾ.

೯೭೪. ಪಟಿಚ್ಚಸಮುಪ್ಪಾದೋಯಂ, ಪಚ್ಚಯಾಕಾರನಾಮತೋ;

ಸಙ್ಖೇಪತೋ ಚ ವಿತ್ಥಾರಾ, ವಿವಿಧಾಕಾರಭೇದತೋ.

೯೭೫. ಜನೇತಿ ಪಚ್ಚಯುಪ್ಪನ್ನೇ, ಅವಿಜ್ಜಾದಿಪವತ್ತಿಯಾ;

ಅವಿಜ್ಜಾದಿನಿರೋಧೇನ, ನಿರೋಧೇತಿ ಚ ಸಬ್ಬಥಾ.

೯೭೬. ಪಚ್ಚಯಪ್ಪಚ್ಚಯುಪ್ಪನ್ನ-ವಸೇನೇವ ಪವತ್ತತಿ;

ಸಂಸಾರೋಯನ್ತಿ ಏಕಚ್ಚೇ, ಪರಿಗ್ಗಣ್ಹನ್ತಿ ಪಚ್ಚಯೇ.

೯೭೭. ಸಮನ್ತಪಟ್ಠಾನಮಹಾಪಕರಣವಿಭಾಗತೋ;

ಏಕಚ್ಚೇ ಪರಿಗ್ಗಣ್ಹನ್ತಿ, ಚತುವೀಸತಿ ಪಚ್ಚಯೇ.

೯೭೮. ಇತಿ ನಾನಪ್ಪಕಾರೇನ, ಪಚ್ಚಯಾನಂ ಪರಿಗ್ಗಹೋ;

ಸಪ್ಪಚ್ಚಯನಾಮರೂಪಂ, ವವತ್ಥಾನನ್ತಿ ವೇದಿತಂ.

೯೭೯. ಇದಪ್ಪಚ್ಚಯತಾಞಾಣಂ, ಪಚ್ಚಯಾಕಾರದಸ್ಸನಂ;

ಧಮ್ಮಟ್ಠಿತಿ ಯಥಾಭೂತಞಾಣದಸ್ಸನನಾಮಕಂ.

೯೮೦. ಕಾಲತ್ತಯವಿಭಾಗೇಸು, ಕಙ್ಖಾಸಂಕ್ಲೇಸಸೋಧನಂ;

ಕಙ್ಖಾವಿತರಣಾ ನಾಮ, ವಿಸುದ್ಧೀತಿ ಪವುಚ್ಚತೀತಿ.

ಇತಿ ನಿಬ್ಬಾನವಿಭಾಗೇ ಪರಿಗ್ಗಹವಿಸುದ್ಧಿಕಥಾ ನಿಟ್ಠಿತಾ.

ಚತುವೀಸತಿಮೋ ಪರಿಚ್ಛೇದೋ.