೧೪. ರಾಸಿಸಮ್ಭವಕಥಾ

೪೯೦. ನವೇವ ಯೇವಾಪನಕಾ, ಅಟ್ಠಾರಸ ಚ ರಾಸಯೋ;

ನವಭಿಂಸತಿಸಮ್ಭಿನ್ನಾ, ದಸ ದ್ವೇ ಸವಿಭತ್ತಿಕಾ.

೪೯೧. ಏಕದ್ವಯತಿಚತುಛಸತ್ತಟ್ಠಾನಾನವಜ್ಜಕೇ;

ಸತ್ತವೀಸತಿ ಸತ್ತೇಕೋ, ದ್ವಯಮೇಕೋ ಪುನೇಕಕೋ.

೪೯೨. ದಸೇವ ಯೇವಾಪನಕಾ, ಏಕಾದಸ ಚ ರಾಸಯೋ;

ಅಟ್ಠವೀಸತಿಸಮ್ಭಿನ್ನಾ, ದಸೇವ ಸವಿಭತ್ತಿಕಾ.

೪೯೩. ಏಕದ್ವಯತಿಚತುಕ್ಕಛಟ್ಠಾನನಿಯತಾ ಪನ;

ಅಟ್ಠಾರಸ ಚ ಸತ್ತೇಕೋ, ಏಕೋ ಚೇಕೋವ ಪಾಪಕೇ.

೪೯೪. ದ್ವೇ ಯೇವಾಪನಕಾ ಹೋನ್ತಿ, ರಾಸಯೋ ಚ ಚತುಬ್ಬಿಧಾ;

ತೇರಸೇತ್ಥ ಅಸಮ್ಭಿನ್ನಾ, ತಯೋವ ಸವಿಭತ್ತಿಕಾ.

೪೯೫. ಏಕದ್ವಯತಿಕಟ್ಠಾನಾ, ದಸ ದ್ವೇಕೋ ಅಹೇತುಕೇ;

ಇಚ್ಚಾನವಜ್ಜಾ ಸಾವಜ್ಜಾ-ಹೇತುಕೇ ಯೋಗನಿಚ್ಛಯೋ.

೪೯೬. ಸತ್ತಾಪಿ ನತ್ಥಿ ಸಾವಜ್ಜೇ, ನಿರವಜ್ಜೇ ಪಕಾಸಕೋ;

ಅಹೇತುಕೇ ಚ ಮಗ್ಗಾದಿರಾಸಯೋ ನತ್ಥಿ ಚುದ್ದಸ.

೪೯೭. ಅನವಜ್ಜಾ ತು ಸಾವಜ್ಜೇ, ಸಾವಜ್ಜಕಾನವಜ್ಜಕೇ;

ಚಿತ್ತುಪ್ಪಾದಮ್ಹಿ ನತ್ಥೇವ, ನತ್ಥೋಭಯಮಹೇತುಕೇ.

೪೯೮. ಸಾವಜ್ಜಾ ಪನ ಸಾವಜ್ಜೇ, ಅನವಜ್ಜಾನವಜ್ಜಕೇ;

ಗಹೇತಬ್ಬಾ ತು ಸಬ್ಬತ್ಥ, ಸಾಧಾರಣಾ ಪಕಿಣ್ಣಕಾ.

೪೯೯. ಝಾನಪಞ್ಚಕಚಿತ್ತೇಸು, ಸತ್ತಸಟ್ಠಿಸು ನಿದ್ದಿಸೇ;

ಝಾನಙ್ಗಯೋಗಭೇದೇನ, ರಾಸಿಭೇದಂ ತಹಿಂ ತಹಿಂ.

೫೦೦. ಚತುಛಕ್ಕಾನವಜ್ಜೇಸು, ಞಾಣಪೀತಿಕತಂ ತಥಾ;

ಚತುವೀಸ ಪರಿತ್ತೇಸು, ಚತುಧಾ ಭೇದಮುದ್ದಿಸೇ.

೫೦೧. ಸರಾಗವೀತರಾಗಾನಂ, ಅಪ್ಪಮಞ್ಞಾಪವತ್ತಿಯಂ;

ಕರುಣಾಮುದಿತಾ ಹೋನ್ತಿ, ಕಾಮಪುಞ್ಞಮಹಾಕ್ರಿಯೇ.

೫೦೨. ಉಪಚಾರಪ್ಪನಾಪತ್ತಾ, ಸುಖಿತಾ ಸತ್ತಗೋಚರಾ;

ತಸ್ಮಾ ನ ಪಞ್ಚಮಾರುಪ್ಪೇ, ಮಹಾಪಾಕೇ ಅನುತ್ತರೇ.

೫೦೩. ಸೋತಾಪತಿತುಪೇಕ್ಖಾಸು, ಪರಿಕಮ್ಮಾದಿಸಮ್ಭವೇ;

ಝಾನಾನಂ ತುಲ್ಯಪಾಕತ್ತಾ, ತಪ್ಪಾಕೇಸು ಚ ಲಬ್ಭರೇ.

೫೦೪. ವಿರತೀ ಚ ಸರಾಗಾನಂ, ವೀತಿಕ್ಕಮನಸಮ್ಭವಾ;

ಸಮ್ಪತ್ತೇ ಚ ಸಮಾದಾನೇ, ಕಾಮಪುಞ್ಞೇಸು ಲಬ್ಭರೇ.

೫೦೫. ತಂತಂದ್ವಾರಿಕದುಸ್ಸಿಲ್ಯ-ಚೇತನುಚ್ಛೇದಕಿಚ್ಚತೋ;

ಮಗ್ಗೇ ಚ ತುಲ್ಯಪಾಕತ್ತಾ, ಫಲೇ ಚ ನಿಯತಾ ಸಿಯುಂ.

೫೦೬. ಪವತ್ತಾಕಾರವಿಸಯಭಿನ್ನಾ ಪಞ್ಚಾಪಿ ಸಮ್ಭವಾ;

ಲೋಕಿಯೇ ಲಬ್ಭಮಾನಾಪಿ, ವಿಸುಂ ಚೇವ ಸಿಯುಂ ನ ವಾ.

೫೦೭. ಪಾಪಾ ಲಬ್ಭನ್ತಿ ಪಾಪೇಸು, ಸತ್ತ ಛಕ್ಕೇಕಕಾ ಕಮಾ;

ಸರೂಪಯೇವೋಭಯಕಾ, ನಿಯತಟ್ಠ ಛಳೇತರೇ.

೫೦೮. ಸಾಧಾರಣಾ ಚ ಸಬ್ಬತ್ಥ, ಯಥಾವುತ್ತಾ ಪಕಿಣ್ಣಕಾ;

ತತ್ಥ ಚೇಕಗ್ಗತಾ ನತ್ಥಿ, ಇನ್ದ್ರಿಯಾದೀಸು ಕಙ್ಖಿತೇ.

೫೦೯. ಛನ್ದಾಧಿಮೋಕ್ಖಾ ಯೇವಾಪಿ, ವೀಸೇಕಾದಸವಜ್ಜಿತೇ;

ಉದ್ಧಚ್ಚಮೇಕಾದಸಸು, ಮಜ್ಝತ್ತಮನವಜ್ಜಕೇ.

೫೧೦. ಸಬ್ಬತ್ಥ ಮನಸಿಕಾರೋ, ತಿದ್ವೇಕದ್ವಿತಿಕಾಪರೇ;

ಅಟ್ಠಟ್ಠವೀಸಚತೂಸು, ಪಞ್ಚದ್ವೀಸು ಯಥಾಕ್ಕಮಂ.

೫೧೧. ಸಮುದಾಯವಸೇನೇತ್ಥ, ಉದ್ಧಚ್ಚವಿರತಿತ್ತಯಂ;

ಸವಿಭತ್ತಿಕಮಞ್ಞತ್ಥ, ಅವಿಭತ್ತಿಕಮೇವ ತಂ.

೫೧೨. ಚಿತ್ತುಪ್ಪಾದೇಸು ತೇನೇತಂ, ವಿಭತ್ತಿಅವಿಭತ್ತಿಕಂ;

ಇತಿ ಸಾಧು ಸಲ್ಲಕ್ಖೇಯ್ಯ, ಸಮ್ಭವಾಸಮ್ಭವಂ ಬುಧೋತಿ.

ಇತಿ ಚೇತಸಿಕವಿಭಾಗೇ ರಾಸಿಸಮ್ಭವಕಥಾ ನಿಟ್ಠಿತಾ.

ಚುದ್ದಸಮೋ ಪರಿಚ್ಛೇದೋ.