ತೇರಸಮೋ ಪರಿಚ್ಛೇದೋ

೧೩. ರಾಸಿಯೋಗಕಥಾ

೪೪೧. ಇತಿ ರಾಸಿವೀಥಿಂ ಞತ್ವಾ, ಲಬ್ಭಮಾನವಸಾ ಬುಧೋ;

ತೇಸಮೇವಾಥ ಯೋಗಮ್ಪಿ, ಚಿತ್ತುಪ್ಪಾದೇಸು ದೀಪಯೇ.

೪೪೨. ಕಾಮಾವಚರಕುಸಲಸ್ಸ, ಪಠಮದ್ವಯಮಾನಸೇ;

ಸಬ್ಬೇಪಿ ರಾಸಯೋ ಹೋನ್ತಿ, ಯಥಾಸಮ್ಭವತೋ ಕಥಂ.

೪೪೩. ಫಸ್ಸಪಞ್ಚಕರಾಸೀ ಚ, ಝಾನಪಞ್ಚಕರಾಸಿ ಚ;

ಇನ್ದ್ರಿಯಟ್ಠಕರಾಸೀ ಚ, ಮಗ್ಗಪಞ್ಚಕರಾಸಿ ಚ.

೪೪೪. ಬಲಸತ್ತಕರಾಸೀ ಚ, ಹೇತುಕಮ್ಮಪಥತ್ತಿಕಾ;

ದಸಾವಸೇಸಾ ರಾಸೀ ಚ, ಲೋಕಪಾಲದುಕಾದಯೋ.

೪೪೫. ಯೇವಾಪನಕನವಕಂ, ನಿಯತುದ್ಧಚ್ಚವಜ್ಜಿತಾ;

ಅಪ್ಪಮಞ್ಞಾದ್ವಯಞ್ಚೇವ, ತಿಸ್ಸೋ ವಿರತಿಯೋತಿ ಚ.

೪೪೬. ಇತಿ ಸತ್ತರಸೇವೇತೇ, ದೇಸಿತಾ ಚ ಸರೂಪತೋ;

ಯೇವಾಪನಕರಾಸೀ ಚ, ಲಬ್ಭನ್ತಿಟ್ಠಾರಸಾಪಿ ಚ.

೪೪೭. ಛಪ್ಪಞ್ಞಾಸ ಪದಾನೇತ್ಥ, ದೇಸಿತಾನಿ ಸರೂಪತೋ;

ಧಮ್ಮಾ ಪನ ಸಮತಿಂಸ, ತತ್ಥ ಹೋನ್ತಿ ಸರೂಪತೋ.

೪೪೮. ತಾನಿ ಯೇವಾಪನಕೇಹಿ, ಪಞ್ಚಸಟ್ಠಿ ಪದಾನಿ ಚ;

ಧಮ್ಮಾ ಚೇಕೂನತಾಲೀಸ, ಭವನ್ತಿ ಪನ ಸಮ್ಭವಾ.

೪೪೯. ತತ್ಥ ದ್ವಾದಸ ಧಮ್ಮಾ ಚ, ದೇಸಿತಾ ಸವಿಭತ್ತಿಕಾ;

ಅವಸೇಸಾ ತು ಸಬ್ಬೇಪಿ, ಅವಿಭತ್ತಿಕನಾಮಕಾ.

೪೫೦. ಏಕದ್ವಿ ಚ ತಿಚತುಕ್ಕ-ಛಸತ್ತಟ್ಠಾನಿಕಾ ಪನ;

ಸತ್ತವೀಸ ಚ ಸತ್ತೇಕೋ, ದ್ವೇಕೇಕೋ ಚ ಯಥಾಕ್ಕಮಂ.

೪೫೧. ನಿಯತಾ ತು ಚತುತ್ತಿಂಸ, ಧಮ್ಮಾವ ಸಹವುತ್ತಿತೋ;

ಯಥಾಸಮ್ಭವವುತ್ತಿತೋ, ಪಞ್ಚಧಾ ನಿಯತಾ ಕಥಾ.

೪೫೨. ತತ್ಥ ಚಾನಿಯತೇ ಸಬ್ಬೇ, ಗಹೇತ್ವಾ ಚ ಪಹಾಯ ಚ;

ಪಚ್ಚೇಕಞ್ಚ ಗಹೇತ್ವಾಪಿ, ಸತ್ತಧಾ ಯೋಜನಕ್ಕಮೋ.

೪೫೩. ಸಕಿಮೇಕೂನತಾಲೀಸ, ಚತುತ್ತಿಂಸ ಯಥಾಕ್ಕಮಂ;

ಪಞ್ಚಕ್ಖತ್ತುಞ್ಚ ಯೋಜೇಯ್ಯ, ಪಞ್ಚತಿಂಸಾತಿ ಪಣ್ಡಿತೋ.

೪೫೪. ರಾಸಯೋ ಚ ಪದಾನೀಧ, ಧಮ್ಮನ್ತರವಿಭತ್ತಿಯೋ;

ಸರೂಪಯೇವಾಪನಕೇ, ನಿಯತಾನಿಯತೇ ಯಥಾ.

೪೫೫. ಯೋಜನಾನಯಭೇದಞ್ಚ, ಗಣನಾಸಙ್ಗಹಟ್ಠಿತಿ;

ಲಬ್ಭಮಾನಾನುಮಾನೇನ, ಸಲ್ಲಕ್ಖೇನ್ತೋ ತಹಿಂ ತಹಿಂ.

೪೫೬. ಞಾಣಂ ಞಾಣವಿಯುತ್ತಮ್ಹಿ, ಹಿತ್ವಾ ಪೀತಿಂ ಉಪೇಕ್ಖಿತೇ;

ವೇದನಾ ಪರಿವತ್ತೇನ್ತೋ, ಕಾಮಪುಞ್ಞೇ ಚ ಸೇಸಕೇ.

೪೫೭. ಮಹಾಕ್ರಿಯೇ ಚ ಯೋಜೇಯ್ಯ, ಪಹಾಯ ವಿರತಿತ್ತಯಂ;

ಅಪ್ಪಮಞ್ಞಾ ಚ ಹಿತ್ವಾಥ, ಮಹಾಪಾಕೇ ಚ ಯೋಜಯೇ.

೪೫೮. ತಕ್ಕಾದಿಂ ಕಮತೋ ಹಿತ್ವಾ, ಸಬ್ಬತ್ಥ ವಿರತಿತ್ತಯಂ;

ಪಞ್ಚಮೇ ಅಪ್ಪಮಞ್ಞಾಯ, ಹಿತ್ವಾ ರೂಪೇ ಚ ಯೋಜಯೇ.

೪೫೯. ಹಿತ್ವಾಪ್ಪಮಞ್ಞಾ ಯೋಜಯೇ, ಯಥಾಝಾನಮನುತ್ತರೇ;

ಲೋಕುತ್ತರಿನ್ದ್ರಿಯಞ್ಚೇವ, ಗಹೇತ್ವಾ ವಿರತಿತ್ತಯಂ.

೪೬೦. ಝಾನಾನಿ ಚತುತಾಲೀಸ, ಸುಖಯುತ್ತಾನಿ ವತ್ತರೇ;

ಉಪೇಕ್ಖಿತಾನಿ ತೇವೀಸ, ಪಞ್ಚಮಜ್ಝಾನೇ ಚ ಸಬ್ಬಥಾ.

೪೬೧. ಅಪ್ಪಮಞ್ಞಾವಿರತಿಯೋ, ಕಾಮಪುಞ್ಞೇಸು ಲಬ್ಭರೇ;

ಅಪ್ಪಮಞ್ಞಾ ರೂಪಜ್ಝಾನ-ಚತುಕ್ಕೇ ಚ ಮಹಾಕ್ರಿಯೇ.

೪೬೨. ಲೋಕುತ್ತರೇಸು ಸಬ್ಬತ್ಥ, ಸಮ್ಭೋತಿ ವಿರತಿತ್ತಯಂ;

ನತ್ಥಿದ್ವಯಮ್ಪಿ ಆರುಪ್ಪೇ, ಮಹಾಪಾಕೇ ಚ ಪಞ್ಚಮೇ.

೪೬೩. ವಿತಕ್ಕಾದಿತ್ತಯಂ ಪಞ್ಞಾ, ಪಞ್ಚ ಚಾನಿಯತಾ ಚಲಾ;

ಹಾನಿಬುದ್ಧಿವಸಾ ಸೇಸಾ, ನ ಚಲನ್ತಿ ಕುದಾಚನಂ.

೪೬೪. ಬಾವೀಸತಿವಿಧೋ ಚೇತ್ಥ, ಸಙ್ಗಹೋ ಅನವಜ್ಜಕೇ;

ದ್ವಯದ್ವಯವಸಾ ಚೇವ, ಝಾನಪಞ್ಚಕತೋಪಿ ಚ.

೪೬೫. ಇತಿ ಞತ್ವಾನವಜ್ಜೇಸು, ರಾಸಿಸಙ್ಗಹ ಸಮ್ಭವಂ;

ಸಾವಜ್ಜೇಸುಪಿ ವಿಞ್ಞೇಯ್ಯಾ, ವಿಞ್ಞುನಾ ರಾಸಯೋ ಕಥಂ.

೪೬೬. ಲೋಭಮೂಲೇಸು ಪಠಮೇ, ಫಸ್ಸಪಞ್ಚಕರಾಸಿ ಚ;

ಝಾನಪಞ್ಚಕರಾಸೀ ಚ, ತಥೇವಿನ್ದ್ರಿಯಪಞ್ಚಕಂ.

೪೬೭. ಮಗ್ಗಬಲಚತುಕ್ಕಞ್ಚ, ಹೇತುಕಮ್ಮಪಥದುಕಾ;

ಲೋಕನಾಸಕರಾಸೀ ಚ, ಸಮಥೋ ಸಮಥದ್ದುಕಾ.

೪೬೮. ತತ್ರಮಜ್ಝತ್ತತಂ ಹಿತ್ವಾ, ಯೇವಾಪನಕನಾಮಕಾ;

ಚತ್ತಾರೋ ಚೇತಿ ಲಬ್ಭನ್ತಿ, ತತ್ಥೇಕಾದಸ ರಾಸಯೋ.

೪೬೯. ದ್ವತ್ತಿಂಸೇವ ಪದಾನೇತ್ಥ, ದೇಸಿತಾನಿ ಸರೂಪತೋ;

ತಾನಿ ಯೇವಾಪನಕೇಹಿ, ಛತ್ತಿಂಸೇವ ಭವನ್ತಿ ಚ.

೪೭೦. ಅಸಮ್ಭಿನ್ನಪದಾನೇತ್ಥ, ಸಮವೀಸತಿ ಸಮ್ಭವಾ;

ಸವಿಭತ್ತಿಕನಾಮಾ ಚ, ನವ ಧಮ್ಮಾ ಪಕಾಸಿತಾ.

೪೭೧. ಏಕದ್ವಯತಿಚತುಕ್ಕ-ಛಟ್ಠಾನನಿಯತಾ ಪನ;

ಏಕಾದಸ ಛಳೇಕಾ ಚ, ಕಮೇನೇಕೋ ಪುನೇಕಕೋ.

೪೭೨. ನತ್ಥೇವಾನಿಯತಾ ಹೇತ್ಥ, ಯೇವಾಪನಕನಾಮಕಾ;

ಯೋಜನಾನಯಭೇದೋ ಚ, ತಸ್ಮಾ ತತ್ಥ ನ ವಿಜ್ಜತಿ.

೪೭೩. ಮಾನೋ ಚ ಥಿನಮಿದ್ಧಞ್ಚ, ಇಸ್ಸಾ ಮಚ್ಛರಿಯಂ ತಥಾ;

ಕುಕ್ಕುಚ್ಚಮಿತಿ ಸಾವಜ್ಜೇ, ಛಳೇವಾನಿಯತಾ ಮತಾ.

೪೭೪. ಮಾನೋ ದಿಟ್ಠಿವಿಯುತ್ತೇಸು, ಸಸಙ್ಖಾರೇಸು ಪಞ್ಚಸು;

ಥಿನಮಿದ್ಧಂ ತಯೋ ಸೇಸಾ, ಪಟಿಘದ್ವಯಯೋಗಿನೋ.

೪೭೫. ಇಚ್ಚೇವಮಟ್ಠ ಸಾವಜ್ಜಾ, ಅನವಜ್ಜಟ್ಠವೀಸತಿ;

ಛತ್ತಿಂಸ ಮಾನಸಾ ಸಬ್ಬೇ, ಹೋನ್ತಾನಿಯತಯೋಗಿನೋ.

೪೭೬. ತೇಹಿ ಯುತ್ತಾ ಯಥಾಯೋಗಂ, ಏಕದ್ವಿತ್ತಯಪಞ್ಚಹಿ;

ದ್ವೇ ದ್ವಾವೀಸಂ ತಯೋ ಚೇವ, ನವ ಚಾಥ ಯಥಾಕ್ಕಮಂ.

೪೭೭. ಇತಿ ವುತ್ತಾನುಸಾರೇನ, ಲಬ್ಭಮಾನವಸಾ ಪನ;

ತದಞ್ಞೇಸುಪಿ ಯೋಜೇಯ್ಯ, ಸಾವಜ್ಜೇಸು ಯಥಾಕ್ಕಮಂ.

೪೭೮. ಲೋಭಮೂಲೇಸು ಲೋಭಞ್ಚ, ದೋಸಞ್ಚ ಪಟಿಘದ್ವಯೇ;

ಮೋಹಮೂಲೇ ಕಙ್ಖುದ್ಧಚ್ಚಂ, ಗಹೇತ್ವಾ ಹೇತುರಾಸಿಯಂ.

೪೭೯. ದಿಟ್ಠಿಂ ದಿಟ್ಠಿವಿಯುತ್ತಮ್ಹಿ, ಹಿತ್ವಾ ಪೀತಿಮುಪೇಕ್ಖಿತೇ;

ವೇದನಂ ಪರಿವತ್ತೇನ್ತೋ, ದೋಸಮೂಲೇ ಚ ಪಣ್ಡಿತೋ.

೪೮೦. ತಥಾ ಕಮ್ಮಪಥಂ ದಿಟ್ಠಿಂ,

ಪೀತಿಂ ಛನ್ದಞ್ಚ ಮೋಮುಹೇ;

ಕಙ್ಖಿತೇ ಅಧಿಮೋಕ್ಖಞ್ಚ,

ಹಿತ್ವಾ ಯೋಜೇಯ್ಯ ರಾಸಯೋ.

೪೮೧. ಚಿತ್ತಸ್ಸ ಠಿತಿಂ ಪತ್ತಾಸು, ಚಿತ್ತಸ್ಸೇಕಗ್ಗತಾ ಪನ;

ಕಙ್ಖಿತೇ ಪರಿಹೀನಾವ, ಇನ್ದ್ರಿಯಾದೀಸು ಪಞ್ಚಸು.

೪೮೨. ಇತಿ ದ್ವಾದಸಧಾ ಞತ್ವಾ, ಸಾವಜ್ಜೇಸುಪಿ ಸಙ್ಗಹಂ;

ಅಹೇತುಕೇಪಿ ವಿಞ್ಞೇಯ್ಯಾ, ಯಥಾಸಮ್ಭವತೋ ಕಥಂ.

೪೮೩. ಅಟ್ಠಾರಸಾಹೇತುಕೇಸು, ಪಞ್ಚವಿಞ್ಞಾಣಮಾನಸೇ;

ಫಸ್ಸಪಞ್ಚಕರಾಸೀ ಚ, ಝಾನಟ್ಠಾನದುಕಂ ತಥಾ.

೪೮೪. ಇನ್ದ್ರಿಯತ್ತಿಕರಾಸೀ ಚ, ಯೇವಾಪನಕನಾಮಕೋ;

ಏಕೋ ಮನಸಿಕಾರೋತಿ, ಚತ್ತಾರೋ ರಾಸಯೋ ಸಿಯುಂ.

೪೮೫. ಅಸಮ್ಭಿನ್ನಾ ಪನಟ್ಠೇವ, ದ್ವೇ ತತ್ಥ ಸವಿಭತ್ತಿಕಾ;

ಏಕದ್ವಯತಿಕಟ್ಠಾನಾ, ಛಳೇಕೋ ಚ ಪುನೇಕಕೋ.

೪೮೬. ಮನೋಧಾತುತ್ತಿಕಾಹೇತು-ಪಟಿಸನ್ಧಿಯುಗೇ ಪನ;

ವಿತಕ್ಕೋ ಚ ವಿಚಾರೋ ಚ, ಅಧಿಕಾ ಝಾನರಾಸಿಯಂ.

೪೮೭. ಸುಖಸನ್ತೀರಣೇ ಪೀತಿ, ದುತಿಯಾವಜ್ಜನೇ ಪನ;

ವೀರಿಯಞ್ಚ ಸಮಾಧಿಞ್ಚ, ಲಬ್ಭತಿನ್ದ್ರಿಯರಾಸಿಯಂ.

೪೮೮. ಅಧಿಕಾ ಹಸಿತೇ ಹೋನ್ತಿ, ಪೀತಿ ಚ ವೀರಿಯಾದಯೋ;

ಯೇವಾಪನಾಧಿಮೋಕ್ಖೋ ಚ, ಪಞ್ಚವಿಞ್ಞಾಣವಜ್ಜಿತೇ.

೪೮೯. ಇಚ್ಚಾನವಜ್ಜೇ ಬಾವೀಸ,

ಸಾವಜ್ಜೇ ದ್ವಾದಸಾಪರೇ;

ಯೋಗಾ ಹೇತುಮ್ಹಿ ಪಞ್ಚೇತೇ,

ತಾಲೀಸೇಕೂನಕಾ ಕಥಾತಿ.

ಇತಿ ಚೇತಸಿಕವಿಭಾಗೇ ರಾಸಿಯೋಗಕಥಾ ನಿಟ್ಠಿತಾ.

ತೇರಸಮೋ ಪರಿಚ್ಛೇದೋ.