೧೨. ದ್ವಾದಸಮೋ ಪರಿಚ್ಛೇದೋ

ದಸಾವತ್ಥಾವಿಭಾಗೋ

೧೬೪೨. ಇಚ್ಚಟ್ಠಾರಸಧಾ ಭಿನ್ನಾ, ಪಟಿಪಕ್ಖಪ್ಪಹಾನತೋ;

ಲಕ್ಖಣಾಕಾರಭೇದೇನ, ತಿವಿಧಾಪಿ ಚ ಭಾವನಾ.

೧೬೪೩. ಕಲಾಪತೋ ಸಮ್ಮಸನಂ, ಉದಯಬ್ಬಯದಸ್ಸನಂ;

ಭಙ್ಗೇ ಞಾಣಂ ಭಯೇ ಞಾಣಂ, ಞಾಣಮಾದೀನವೇಪಿ ಚ.

೧೬೪೪. ತಥೇವ ನಿಬ್ಬಿದಾಞಾಣಂ, ಞಾಣಂ ಮುಚ್ಚಿತುಕಮ್ಯತಾ;

ಪಟಿಸಙ್ಖಾ ಚ ಸಙ್ಖಾರು-ಪೇಕ್ಖಾಞಾಣಾನುಲೋಮಕಂ.

೧೬೪೫. ಇಚ್ಚಾವತ್ಥಾಪಭೇದೇನ, ದಸಧಾಪಿ ವಿಭಾವಿತಾ;

ಸಭಾಗತ್ಥವಿಸೇಸೇನ, ತಿಧಾ ಸಙ್ಗಹಿತಾ ಪುನ.

೧೬೪೬. ಯಥಾಭೂತಂ ನಾಮ ಞಾಣತ್ತಯಂ ಸಮ್ಮಸನಾದಿಕಂ;

ಭಯಾದಿಞಾಣಂ ತಿವಿಧಂ, ನಿಬ್ಬಿದಾತಿ ಪವುಚ್ಚತಿ.

೧೬೪೭. ತಥಾ ಮುಚ್ಚಿತುಕಾಮಾದಿ, ವಿರಾಗೋವ ಚತುಬ್ಬಿಧಂ;

ಲಕ್ಖಣತ್ತಯನಿಜ್ಝಾನವಸೇನ ಪುನ ವುಟ್ಠಿತಾ.

೧೬೪೮. ಸುಞ್ಞತಞ್ಚಾನಿಮಿತ್ತಞ್ಚ, ತಥಾಪ್ಪಣಿಹಿತನ್ತಿ ಚ;

ಸಾಧೇತಿ ಮಗ್ಗಸಙ್ಖಾತಂ, ವಿಮೋಕ್ಖತ್ತಯಮುತ್ತಮಂ.

೧೬೪೯. ಇತಿ ಭಾವೇತುಕಾಮಸ್ಸ, ವಿಭಾವೇತಿ ಯಥಾಕ್ಕಮಂ;

ದಸಾವತ್ಥಾವಿಭಾಗೇನ, ಸಮಾದಾಯ ಯಥಾ ಕಥಂ.

೧೬೫೦. ವಿಸುದ್ಧೋ ಪಠಮಂ ತಾವ, ಸಾಧು ಸೀಲವಿಸುದ್ಧಿಯಾ;

ಉಪಚಾರಪ್ಪನಾಯಞ್ಚ, ಠತ್ವಾ ಚಿತ್ತವಿಸುದ್ಧಿಯಂ.

೧೬೫೧. ಸಪ್ಪಚ್ಚಯಂ ಪರಿಗ್ಗಯ್ಹ, ನಾಮರೂಪಂ ಸಭಾವತೋ;

ದಿಟ್ಠಿಕಙ್ಖಾವಿತರಣಂ, ಪತ್ವಾ ಸುದ್ಧಿಂ ತತೋ ಪರಂ.

೧೬೫೨. ಅತೀತಾನಾಗತೇ ಖನ್ಧೇ, ಪಚ್ಚುಪ್ಪನ್ನೇ ಚ ಸಾಸವೇ;

ಕಲಾಪತೋ ಸಮ್ಮಸಿತ್ವಾ, ಸಮ್ಮಸೇಯ್ಯ ತಿಲಕ್ಖಣಂ.

೧೬೫೩. ಆದಾನನಿಕ್ಖೇಪನತೋ,

ವಯೋವುದ್ಧತ್ಥಗಾಮಿತೋ;

ಆಹಾರತೋಪಿ ಉತುತೋ,

ಕಮ್ಮತೋ ಚಾಪಿ ಚಿತ್ತತೋ.

೧೬೫೪. ಧಮ್ಮತಾರೂಪತೋ ಚಾಪಿ, ರೂಪಸತ್ತಕತೋ ನಯೇ;

ಕಲಾಪತೋ ಯಮಕತೋ, ಖಣಿಕಾ ಪಟಿಪಾಟಿತೋ.

೧೬೫೫. ದಿಟ್ಠಿಮುಗ್ಘಾಟಯನ್ತೋ ಚ, ಮಾನಮುಗ್ಘಾಟಯಂ ತಥಾ;

ನಿಕನ್ತಿಪರಿಯಾದಾನೋ, ನಾಮಸತ್ತಕತೋ ನಯೇ.

೧೬೫೬. ನಿಚ್ಚಾ ಚೇ ನ ನಿರುಜ್ಝೇಯ್ಯುಂ, ನ ಬಾಧೇಯ್ಯುಂ ಸುಖಾ ಯದಿ;

ವಸೇ ವತ್ತೇಯ್ಯುಮತ್ತಾ ಚೇ, ತದಭಾವಾ ನ ತಾದಿಸಾ.

೧೬೫೭. ಸಮ್ಭವನ್ತಿ ಹಿ ಸಙ್ಖಾರಾ, ಸತಿ ಪಚ್ಚಯಸಮ್ಭವೇ;

ತತೋ ಪಚ್ಚಯನಿಪ್ಫನ್ನಾ, ಅವಸ್ಸಂ ಭೇದಗಾಮಿನೋ.

೧೬೫೮. ತದನಿಚ್ಚಾ ಖಯಟ್ಠೇನ, ದುಕ್ಖಾ ನಾಮ ಭಯಟ್ಠತೋ;

ಅನತ್ತಾಸಾರಕಟ್ಠೇನ, ಸಙ್ಖಾರಾತಿ ವಿಭಾವಯಂ.

೧೬೫೯. ಕಾಲೇನ ಸಮ್ಮಸೇ ರೂಪಂ, ನಾಮಂ ಕಾಲೇನ ಸಮ್ಮಸೇ;

ಅಜ್ಝತ್ತಞ್ಚ ಬಹಿದ್ಧಾ ಚ, ಸಮಾಸಬ್ಯಾಸತೋ ತತೋ.

೧೬೬೦. ಯಥೋಪಟ್ಠಿತಭೇದೇನ, ಸಮ್ಮಸನ್ತೋ ಸಮೂಹತೋ;

ಕಲಾಪತೋ ಸಮ್ಮಸನಮಿತಿ ಭಾವೇತಿ ಪಣ್ಡಿತೋ.

೧೬೬೧. ತಸ್ಸೇವಂ ಸಮ್ಮಸನ್ತಸ್ಸ, ಕಮ್ಮಞ್ಞಂ ಹೋತಿ ಮಾನಸಂ;

ಸೂಪಟ್ಠನ್ತಿ ಚ ಸಙ್ಖಾರಾ, ವೋದಾಯತಿ ಚ ಭಾವನಾ.

೧೬೬೨. ತತೋ ಪರಂ ವಿಪಸ್ಸನ್ತೋ, ಪರಿಗ್ಗಣ್ಹಾತಿ ಪಣ್ಡಿತೋ;

ಪಚ್ಚುಪ್ಪನ್ನಸಭಾವಾನಂ, ಖನ್ಧಾನಮುದಯಬ್ಬಯಂ.

೧೬೬೩. ತಣ್ಹಾಸಮ್ಮೋಹಕಮ್ಮೇಹಿ,

ಖನ್ಧಪಞ್ಚಕಸಭಾವೋ;

ರೂಪಮಾಹಾರತೋ ಹೋತಿ,

ಫಸ್ಸತೋ ವೇದನಾದಯೋ.

೧೬೬೪. ವಿಞ್ಞಾಣಂ ನಾಮರೂಪಮ್ಹಾ, ಸಮ್ಭೋತೀತಿ ಚ ಪಸ್ಸತೋ;

ತಸ್ಸ ಪಚ್ಚಯತೋ ಹೋತಿ, ಖನ್ಧೇಸುದಯದಸ್ಸನಂ.

೧೬೬೫. ತಣ್ಹಾದೀನಂ ನಿರೋಧಾ ಚ,

ನಿರೋಧೋ ಹೋತಿ ಪಸ್ಸತೋ;

ತಥಾ ವೀಸತಿಧಾ ಹೋತಿ,

ತತ್ಥೇವ ವಯದಸ್ಸನಂ.

೧೬೬೬. ನಿಬ್ಬತ್ತಿವಿಪರಿಣಾಮಲಕ್ಖಣಂ ಪನ ಪಸ್ಸತೋ;

ಖಣತೋ ದಸಧಾ ನೇಸಮುದಯಬ್ಬಯದಸ್ಸನಂ.

೧೬೬೭. ಇತ್ಥಂ ಪಞ್ಞಾಸಧಾ ಭೇದೋ,

ಖನ್ಧಾನಮುದಯಬ್ಬಯೋ;

ಆಯತನಾದಿಭೇದೋಪಿ,

ಯೋಜೇತಬ್ಬೋ ಯಥಾರಹಂ.

೧೬೬೮. ತದೇವಮನುಪಸ್ಸನ್ತೋ, ಖನ್ಧಾಯತನಧಾತುಯೋ;

ಅನಿಚ್ಚಾ ದುಕ್ಖಾನತ್ತಾತಿ, ಭಾವೇತಿ ಬಹುಧಾ ಬುಧೋ.

೧೬೬೯. ಭಾವನಾಪಸುತಸ್ಸೇವಂ, ಪಸ್ಸತೋ ಬೋಧಿಪಕ್ಖಿಯಾ;

ಪಾತುಭೂತಾ ಪವತ್ತನ್ತಿ, ವಿಸೇಸೇನ ವಿಸಾರದಾ.

೧೬೭೦. ಸಲಕ್ಖಣಪರಿಚ್ಛಿನ್ನೇ, ತಿಲಕ್ಖಣವವತ್ಥಿತೇ;

ಛನ್ದೋ ಸಾಸವಸಙ್ಖಾರೇ, ಸಾರದಂ ಪರಿಯೇಸತಿ.

೧೬೭೧. ತತ್ಥ ಪುಬ್ಬಙ್ಗಮಂ ಹುತ್ವಾ, ಸಂಪಕ್ಖನ್ದತಿ ಮಾನಸಂ;

ಸಙ್ಕಪ್ಪೋಭಿನಿರೋಪೇತಿ, ಆಹರನ್ತೋ ಪುನಪ್ಪುನಂ.

೧೬೭೨. ಯಥಾವತ್ಥುಸಭಾವೇನ, ತತೋ ಸದ್ಧಾಧಿಮುಚ್ಚತಿ;

ಸತಿ ಸೂಪಟ್ಠಿತಾ ಹೋತಿ, ಪರಿಗ್ಗಯ್ಹ ಸಭಾವತೋ.

೧೬೭೩. ಪಞ್ಞಾ ಸಮ್ಪಟಿವಿಜ್ಝನ್ತೀ, ಸಮಾಹಚ್ಚ ವಿಪಸ್ಸತಿ;

ಪಗ್ಗಹೇತ್ವಾನ ವಾಯಾಮೋ, ಪಟಿಪಾದೇತಿ ಭಾವನಂ.

೧೬೭೪. ತತೋ ಪೀತಿಮನೋ ಹೋತಿ, ನಿಪ್ಫಾದಿತಮನೋರಥೋ;

ಪಾಮೋಜ್ಜಬಹುಲೋ ಹುತ್ವಾ, ಪಸ್ಸದ್ಧದರಥೋ ಪನ.

೧೬೭೫. ವಿಕ್ಖೇಪುದ್ಧಚ್ಚನಿತ್ತಿಣ್ಣೋ, ಸಮಾಧಿಯತಿ ನಿಚ್ಚಲೋ;

ಉಪೇಕ್ಖಾ ಭಾವನಾವೀಥಿಂ, ಅಧಿಟ್ಠಾತಿ ತತೋ ಪರಂ.

೧೬೭೬. ಆರುಳ್ಹಯೋಗ್ಗಾಚರಿಯೋ, ಆಜಾನೀಯರಥೋ ವಿಯ;

ವಾತಾಭಾವೇ ಪದೀಪೋವ, ಪಸನ್ನೇಕಮುಖಟ್ಠಿತಾ.

೧೬೭೭. ಸುಖುಮಾ ನಿಪುಣಾಕಾರಾ, ಖುರಧಾರಾಗತಾ ವಿಯ;

ಗಣ್ಹನ್ತೀ ಭಾವನಾಗಬ್ಭಂ, ಪವಡ್ಢತಿ ವಿಪಸ್ಸನಾ.

೧೬೭೮. ಸಮ್ಪತ್ತಪಟಿವೇಧಸ್ಸ,

ತಸ್ಸೇವಂ ತಂ ವಿಪಸ್ಸತೋ;

ಜಾಯತೇಕೋ ಉಪಕ್ಲೇಸೋ,

ದಸೋಪಕ್ಲೇಸವತ್ಥುಕಾ.

೧೬೭೯. ಓಭಾಸೋ ಪೀತಿ ಪಸ್ಸದ್ಧಿ, ಅಧಿಮೋಕ್ಖೋ ಚ ಪಗ್ಗಹೋ;

ಸುಖಂ ಞಾಣಮುಪಟ್ಠಾನಮುಪೇಕ್ಖಾ ಚ ನಿಕನ್ತಿ ಚ.

೧೬೮೦. ಜಾತೇಸ್ವೇತೇಸು ಯಂ ಕಿಞ್ಚಿ, ಉಳಾರಂ ಜಾತವಿಮ್ಹಯೋ;

ದಿಸ್ವಾ ವಿಪಸ್ಸನಾಮಗ್ಗಾ, ವೋಕ್ಕಮಿತ್ವಾ ತತೋ ಪರಂ.

೧೬೮೧. ತಮಹಂಕಾರವಿಕ್ಖಿತ್ತೋ, ಅಸ್ಸಾದೇನ್ತೋ ಮಮಾಯತಿ;

ಹೋತಾಧಿಮಾನಿಕೋ ವಾಥ, ಮಞ್ಞನ್ತೋ ತಮನುತ್ತರಂ.

೧೬೮೨. ಸಿಯಾ ಚೇವಮುಪಕ್ಲಿಟ್ಠಾ, ಪತಿತಾ ವಾಥ ಭಾವನಾ;

ತತ್ಥೇವಂ ಪಟಿಸಙ್ಖಾಯ, ಪಟಿವಿಜ್ಝತಿ ಪಣ್ಡಿತೋ.

೧೬೮೩. ನ ತಣ್ಹಾದಿಟ್ಠಿಮಾನೇಹಿ, ಪರಿಯೋಗಾಹಹೇತುತೋ;

ಲಕ್ಖಣಾಲಮ್ಬಣತ್ತಾ ಚ, ಲೋಕಿಯಾಯಂ ವಿಪಸ್ಸನಾ.

೧೬೮೪. ದಿಟ್ಠಿಮಾನನಿಕನ್ತೀ ಚ, ಕುಮ್ಮಗ್ಗಾ ಪರಿಪನ್ಥಕಾ;

ಮಗ್ಗೋ ವಿಸುದ್ಧಿಯಾ ನಾಮ, ವಿಸುದ್ಧಾ ಚ ವಿಪಸ್ಸನಾ.

೧೬೮೫. ಸಾರಥೀವ ರಥಂ ಭನ್ತಮಿತಿ ಸಙ್ಖಾಯ ಸಾಧುಕಂ;

ಪವಿಟ್ಠಮಗ್ಗಂ ವಿಕ್ಖಿತ್ತಂ, ಸಮ್ಪಾದೇತಿ ಯಥಾ ಪುರೇ.

೧೬೮೬. ಇತ್ಥಂ ಮಗ್ಗೇ ಅಮಗ್ಗೇ ಚ, ಯಾಥಾವಪಟಿವೇಧಕಂ;

ಮಗ್ಗಾಮಗ್ಗವಿಸುದ್ಧೀತಿ, ಞಾಣದಸ್ಸನಮೀರಿತಂ.

೧೬೮೭. ಚೇತೋಪವತ್ತನಾಕಾರಮಿತಿ ಸಲ್ಲಕ್ಖಯಂ ಬುಧೋ;

ಸಾಧುಕಂ ಪಟಿವಿಜ್ಝನ್ತೋ, ಸುಖುಮಂ ನಿಪುಣಂ ತತೋ.

೧೬೮೮. ಪರಿಪನ್ಥೇ ವಿಮೋಚೇತ್ವಾ, ಬೋಧೇತ್ವಾ ಬೋಧಿಪಕ್ಖಿಯೇ;

ಭಾವನಂ ಪಟಿಪಾದೇನ್ತೋ, ಪುನದೇವೋದಯಬ್ಬಯಂ.

೧೬೮೯. ಸಮಧಿಟ್ಠಾಯ ಮೇಧಾವೀ, ವಿಪಸ್ಸತಿ ತಿಲಕ್ಖಣಂ;

ಉದಯಬ್ಬಯಞಾಣನ್ತಿ, ತಮೀರೇನ್ತಿ ತತೋ ಪರಂ.

೧೬೯೦. ಸಙ್ಖಾರಾನಂ ವಿಭೂತತ್ತಾ, ಸಾಕಾರಾನಂ ವಿಸೇಸತೋ;

ತಿಲಕ್ಖಣಾನಂ ದಿಟ್ಠತ್ತಾ, ಸಙ್ಖಾರೇಸು ಸಭಾವತೋ.

೧೬೯೧. ಪರಿಪನ್ಥಾ ವಿಮುತ್ತಸ್ಸ, ಮಗ್ಗಾಮಗ್ಗವಿಸುದ್ಧಿಯಾ;

ಯಥಾವೀಥಿಪ್ಪವತ್ತಸ್ಸ, ಪಟಿಪತ್ತಿವಿಸುದ್ಧಿಯಾ.

೧೬೯೨. ಇನ್ದ್ರಿಯಾನಂ ಸುತಿಕ್ಖತ್ತಾ, ಪರಿಪಕ್ಕಾ ವಿಪಸ್ಸನಾ;

ಉದಯಮ್ಹಾ ವಿಮುಚ್ಚಿತ್ವಾ, ಭಙ್ಗೇ ಠಾತಿ ಯಥಾ ಕಥಂ.

೧೬೯೩. ಉಪ್ಪಾದೋ ಪಚ್ಚಯಾಯತ್ತೋ, ಧಮ್ಮಾನಮಿತಿ ನಿಚ್ಛಿತೇ;

ನಿರೋಧಾನುಗತಾ ಜಾತಿ, ಸಿದ್ಧಾವಸ್ಸಂ ನಿಯಾಮತೋ.

೧೬೯೪. ತತೋದಯಾವ ಪಟ್ಠಾಯ, ಅತ್ಥಾಯ ಸೂರಿಯೋ ವಿಯ;

ವಿನಾಸಾಯ ಪವತ್ತನ್ತಾ, ವಯನ್ತೇವಾತಿ ಪೇಕ್ಖತಿ.

೧೬೯೫. ಉದಯಾಭೋಗಮೋಹಾಯ, ವಯನ್ತಿಚ್ಚೇವ ಸಬ್ಬಥಾ;

ಭೇದಸ್ಸಭಾವಮಾರಬ್ಭ, ಧಮ್ಮೇಸು ಸತಿ ತಿಟ್ಠತಿ.

೧೬೯೬. ಅತೀತಾ ಚ ನಿರುದ್ಧಾವ, ನಿರುಜ್ಝಿಸ್ಸನ್ತಿನಾಗತಾ;

ನಿರುಜ್ಝನ್ತೇವ ವತ್ತನ್ತಾ, ಇಚ್ಚೇವಮನುಪಸ್ಸತೋ.

೧೬೯೭. ನಿಜ್ಝರೋವ ಗಿರಗ್ಗಮ್ಹಿ, ವಾರಿವೋಣತಪೋಕ್ಖರೇ;

ಪದೀಪೋ ವಿಯ ಝಾಯನ್ತೋ, ಆರಗ್ಗೇರಿವ ಸಾಸಪೋ.

೧೬೯೮. ಆತಪೇ ವಿಯ ಉಸ್ಸಾವೋ, ಪರಿಸ್ಸಾವೇ ಜಲಂ ವಿಯ;

ಮದ್ದಿತಂ ಫೇಣಪಿಣ್ಡಂವ, ಲೋಣಪಿಣ್ಡಮಿವೋದಕೇ.

೧೬೯೯. ಉದಕೇ ದಣ್ಡರಾಜೀವ, ವಿಜ್ಜುತಾವ ವಲಾಹಕೇ;

ಜಲಂ ತತ್ತಕಪಾಲೇವ, ಸಲಿಲೇ ವಿಯ ಬುಬ್ಬುಳಂ.

೧೭೦೦. ವಾತಬ್ಭಾಹತತೂಲಂವ, ತೀರಂ ಪತ್ತಾವ ವೀಚಿಯೋ;

ಫಲಂ ಬನ್ಧನಮುತ್ತಂವ, ತಿಣಾನೀವ ಹುತಾವಹೇ.

೧೭೦೧. ಜಾಯನ್ತಾಪಿ ಚ ಜಿಯ್ಯನ್ತಾ, ಮಿಯ್ಯನ್ತಾ ಚ ನಿರನ್ತರಂ;

ನಿರೋಧಾಯಾಭಿಧಾವನ್ತಾ, ಭಙ್ಗಾಭಿಮುಖಪಾತಿನೋ.

೧೭೦೨. ವಿಗಚ್ಛನ್ತಾವ ದಿಸ್ಸನ್ತಿ, ಖೀಯನ್ತನ್ತರಧಾಯಿನೋ;

ವಿದ್ಧಂಸಯನ್ತಾ ಸಙ್ಖಾರಾ, ಪತನ್ತಾ ಚ ವಿನಾಸಿನೋ.

೧೭೦೩. ಭಙ್ಗಞಾಣಂ ತಮಕ್ಖಾತಂ, ಯೇನ ಞಾಣೇನ ಪಸ್ಸತೋ;

ಅನಿಚ್ಚನ್ತಾನುಧಾವನ್ತಿ, ತಿವಿಧಾಪಿ ವಿಪಸ್ಸನಾ.

೧೭೦೪. ಉದಯಬ್ಬಯಭಙ್ಗೇಸು, ಪಾಕಟಾ ಹಿ ಅನಿಚ್ಚತಾ;

ಭಯಾದೀನವನಿಬ್ಬೇದೇ, ದುಕ್ಖತಾನತ್ತತಾ ತತೋ.

೧೭೦೫. ಇತ್ಥಂ ಭಙ್ಗಮಧಿಟ್ಠಾಯ, ಪಸ್ಸನ್ತಸ್ಸ ತಿಲಕ್ಖಣಂ;

ಸಙ್ಖಾರಾ ಸಭಯಾ ಹುತ್ವಾ, ಸಮುಪಟ್ಠನ್ತಿ ಯೋಗಿನೋ.

೧೭೦೬. ವಾಳಮಿಗಾನುಬದ್ಧಾವ, ನಿಮ್ಮುಜ್ಜನ್ತಾ ವಿಯಣ್ಣವೇ;

ಅಮನುಸ್ಸಗಹಿತಾವ, ಪರಿಕ್ಖಿತ್ತಾವ ವೇರಿಹಿ.

೧೭೦೭. ಕಣ್ಹಸಪ್ಪಸಮಾಲೀಳ್ಹಾ, ಚಣ್ಡಹತ್ಥಿಸಮುಟ್ಠಿತಾ;

ಪಪಾತಾವಾಟಪಕ್ಖನ್ತಾ, ಪತನ್ತಾವ ಹುತಾವಹೇ.

೧೭೦೮. ವಜ್ಝಪ್ಪತ್ತಾ ಮಹಾಚೋರಾ, ಛಿಜ್ಜನ್ತಾ ವಿಯ ಸೀಸತೋ;

ಸೂಲಮಾರೋಪಿಯನ್ತಾವ, ಪಬ್ಬತೇನೋತ್ಥಟಾ ವಿಯ.

೧೭೦೯. ಜಾತಿಸಙ್ಕಟಪಕ್ಖನ್ತಾ, ಜರಾಬ್ಯಾಧಿನಿಪೀಳಿತಾ;

ಮರಣಾಸನಿಸಮ್ಮದ್ದಾ, ಮಹಾಬ್ಯಸನಭಾಗಿನೋ.

೧೭೧೦. ಮಚ್ಚುನಬ್ಭಾಹತಾ ನಿಚ್ಚಂ, ದುಕ್ಖಭಾರಸಮೋತ್ಥಟಾ;

ಸೋಕೋಪಾಯಾಸನಿಸ್ಸನ್ದಾ, ಪರಿದೇವಪರಾಯಣಾ.