೧೧. ಏಕಾದಸಮೋ ಪರಿಚ್ಛೇದೋ

ವಿಪಸ್ಸನಾವಿಭಾಗೋ

೧೫೦೬. ದ್ವಿಧಾ ಸಮುಟ್ಠಾನಧುರಾ, ತಿವಿಧಾ ಭೂಮಿಯೋ ಮತಾ;

ತಿವಿಧಾಭಿನಿವೇಸಾ ಚ, ಸರೀರಂ ತು ಚತುಬ್ಬಿಧಂ.

೧೫೦೭. ತಿವಿಧಾ ಭಾವನಾ ತತ್ಥ, ಸಙ್ಖಾರೇಸು ಯಥಾರಹಂ;

ದುವಿಧಾಕಾರಮಾರಬ್ಭ, ನಿಜ್ಝಾಯತಿ ತಿಲಕ್ಖಣಂ.

೧೫೦೮. ಅಟ್ಠಾರಸಾಕಾರಭಿನ್ನಾ, ದಸಾವತ್ಥಾ ವಿಭಾವಿತಾ;

ತಿಧಾ ವಿಭಾಗಾ ಸಾಧೇತಿ, ವಿಮೋಕ್ಖತ್ತಯಮುತ್ತಮಂ.

೧೫೦೯. ಚತುಸಚ್ಚಪಟಿವೇಧಾ, ಸತ್ತಟ್ಠಾರಿಯಪುಗ್ಗಲಾ;

ಕ್ಲೇಸಹಾನೀ ಯಥಾಯೋಗಂ, ಚತಸ್ಸೋ ಪಟಿಸಮ್ಭಿದಾ.

೧೫೧೦. ತಿವಿಧಾ ಚ ಸಮಾಪತ್ತಿ, ನಿರೋಧಾ ಚ ತಥಾಪರಾ;

ನಿಸ್ಸನ್ದಫಲಮಿಚ್ಚಾಹು, ತಸ್ಸಾ ಸಾಸನಕೋವಿದಾ.

೧೫೧೧. ವಿಪಸ್ಸನಾಭಾವನಾಯ-ಮಿತಿ ಭಾಸನ್ತಿ ಪಣ್ಡಿತಾ;

ತಮಿದಾನಿ ಪವಕ್ಖಾಮಿ, ಯಥಾನುಕ್ಕಮತೋ ಕಥಂ.

೧೫೧೨. ಭೂಮಿಧಮ್ಮೇ ಪರಿಗ್ಗಯ್ಹ, ವಿಚಿನನ್ತಸ್ಸ ಯೋಗಿನೋ;

ಸತಿಯಾ ಸಮಥಾ ವಾಥ, ಸಮುಟ್ಠಾತಿ ವಿಪಸ್ಸನಾ.

೧೫೧೩. ಸಭಾವಪಟಿವೇಧೇ ಚ, ಸದ್ಧಮ್ಮಪಟಿಪತ್ತಿಯಂ;

ಪಞ್ಞಾಸದ್ಧಾದ್ವಯಂ ತಸ್ಸಾ, ಧುರಮಾಹು ಧುರನ್ಧರಾ.

೧೫೧೪. ತೇಭೂಮಕಸಭಾವಾನಂ, ಸಪ್ಪಚ್ಚಯಪರಿಗ್ಗಹೋ;

ಞಾತಪರಿಞ್ಞಾ ನಾಮಾಯಂ, ಭೂಮೀತಿ ಪಠಮಾ ಮತಾ.

೧೫೧೫. ಕಲಾಪತೋ ಸಮ್ಮಸನಂ, ಉದಯಬ್ಬಯದಸ್ಸನಂ;

ಪರಿಞ್ಞಾತೀರಣಾ ನಾಮ, ದುತಿಯಾ ಭೂಮಿ ಭಾಸಿತಾ.

೧೫೧೬. ಪಹಾನಪರಿಞ್ಞಾ ಭೂಮಿ, ತತಿಯಾಹು ತತೋಪರಂ;

ಭಙ್ಗಾದಿಞಾಣಮಿಚ್ಚೇವಂ, ತಿವಿಧಾ ಭೂಮಿಯೋ ಮತಾ.

೧೫೧೭. ಖಣಸನ್ತತಿಅದ್ಧಾನ-ವಸೇನೇತ್ಥ ಸಮೀರಿತಾ;

ಅನಿಚ್ಚಾ ದುಕ್ಖಾನತ್ತಾತಿ, ತಿವಿಧಾಭಿನಿವೇಸನಾ.

೧೫೧೮. ದಿಟ್ಠಿಕಙ್ಖಾವಿತರಣಾ, ಮಗ್ಗಾಮಗ್ಗಪಟಿಪ್ಪದಾ;

ವಿಸುದ್ಧಿಯೋ ಚತಸ್ಸೋಪಿ, ಸರೀರನ್ತಿ ನಿದಸ್ಸಿತಾ.

೧೫೧೯. ಸಲಕ್ಖಣವವತ್ಥಾನಂ, ಪಚ್ಚಯಾಕಾರನಿಚ್ಛಯೋ;

ಕುಮ್ಮಗ್ಗಪರಿಹಾರೋ ಚ, ತಿಲಕ್ಖಣವಿಪಸ್ಸನಾ.

೧೫೨೦. ಇತಿ ಲಕ್ಖಣಭಿನ್ನತ್ತಾ, ಲಬ್ಭನ್ತೇಕಕ್ಖಣೇಪಿ ಚ;

ದೇಸಿತಾ ಹೇತುಭೂತೇನ, ಕಮೇನೇವಂ ವಿಸುದ್ಧಿಯೋ.

೧೫೨೧. ಸೀಲಬ್ಬಿಸುದ್ಧಿಆದೀನಂ, ತಥಾ ಸಾವ ಪರಮ್ಪರಾ;

ಚಿತ್ತಬ್ಬಿಸುದ್ಧಿಆದೀನಮತ್ಥಾಯಾತಿ ಪಕಾಸಿತಾ.

೧೫೨೨. ದಿಸ್ಸಮಾನಸಭಾವಾನಂ, ಪಸ್ಸನ್ತೋ ಪಚ್ಚಯಟ್ಠಿತಿ;

ಪರಿಪನ್ಥವಿಮುತ್ತೋ ಹಿ, ಪಟಿಪಾದೇತಿ ಭಾವನಂ.

೧೫೨೩. ತಥಾಪಿ ಚ ವಿಸೇಸೇನ, ಪಟಿಪನ್ನಸ್ಸ ಯೋಗಿನೋ;

ತತ್ಥ ತತ್ಥ ವಿಭೂತತ್ತಾ, ಠಾನತೋ ಭೇದಿತಾ ಕಥಂ.

೧೫೨೪. ರೂಪಪುಬ್ಬಙ್ಗಮಂ ವಾಥ, ನಾಮಪುಬ್ಬಙ್ಗಮಂ ತಥಾ;

ಅಜ್ಝತ್ತಂ ವಾ ಬಹಿದ್ಧಾ ವಾ, ಯಥಾಪಾಕಟಧಮ್ಮತೋ.

೧೫೨೫. ನಾಮರೂಪಾದಿಭೇದೇನ, ಭೂಮಿಧಮ್ಮಪರಿಗ್ಗಹೋ;

ವುತ್ತಾ ದಿಟ್ಠಿವಿಸುದ್ಧೀತಿ, ಅತ್ತದಿಟ್ಠಿಪ್ಪಹಾನತೋ.

೧೫೨೬. ಆಹಚ್ಚ ಪಚ್ಚಯುಪ್ಪನ್ನಾ, ತಥಾ ತಬ್ಭಾವಭಾವಿನೋ;

ಪವತ್ತನ್ತೀತಿ ಸಙ್ಖಾರೇ, ಪಸ್ಸತೋ ಪನ ಯೋನಿಸೋ.

೧೫೨೭. ಪಚ್ಚಯಗ್ಗಾಹಿನೀ ಪಞ್ಞಾ, ನಾಮರೂಪಪ್ಪವತ್ತಿಯಾ;

ಕಙ್ಖಾ ತರನ್ತಿ ತಾಯಾತಿ, ಕಙ್ಖಾವಿತರಣಾ ಮತಾ.

೧೫೨೮. ಅನಿಚ್ಚಾ ದುಕ್ಖಾನತ್ತಾತಿ, ಪಚ್ಚಯಾಯತ್ತವುತ್ತಿತೋ;

ಸಙ್ಖಿಪಿತ್ವಾ ಕಲಾಪೇನ, ಸಮ್ಮಸೀಯನ್ತಿ ಸಙ್ಖತಾ.

೧೫೨೯. ಉಪ್ಪಾದವಯಭಾವೋಪಿ, ಲಕ್ಖಣತ್ತಯಸಾಧಕೋ;

ಪಚ್ಚಯಾಕಾರಮಾರಬ್ಭ, ಲಕ್ಖೀಯತಿ ವಿಸೇಸತೋ.

೧೫೩೦. ತಸ್ಮಾ ಸಮ್ಮಸನಞಾಣಂ, ಉದಯಬ್ಬಯದಸ್ಸನಂ;

ಕಙ್ಖಾವಿತರಣಾಯಂ ತು, ಸಙ್ಗಯ್ಹತಿ ವಿಸುದ್ಧಿಯಂ.

೧೫೩೧. ತತ್ಥ ಸಂಕ್ಲೇಸವಿಕ್ಖೇಪಂ, ಕುಮ್ಮಗ್ಗಂ ಪರಿವಜ್ಜತೋ;

ಮಗ್ಗಾಮಗ್ಗವಿಸುದ್ಧೀತಿ, ಞಾಣದಸ್ಸನಮೀರಿತಂ.

೧೫೩೨. ತತೋ ಕಥೇನ್ತಿ ಅಕ್ಲಿಟ್ಠಮುದಯಬ್ಬಯದಸ್ಸನಂ;

ಆದಿಂ ಕತ್ವಾ ಪಟಿಪದಾಞಾಣದಸ್ಸನಸುದ್ಧಿಯಂ.

೧೫೩೩. ಪಚ್ಚಯಪಚ್ಚಯುಪ್ಪನ್ನೇ, ಯಥಾವತ್ಥುವವತ್ಥಿತೇ;

ಪಹಾತುಮೀಹಮಾನಾನಂ, ನಿಯ್ಯಾನಪಟಿಪತ್ತಿತೋ.

೧೫೩೪. ಉಪಕ್ಲೇಸವಿಸುದ್ಧೋ ಹಿ, ಪುನದೇವೋದಯಬ್ಬಯಂ;

ಅಧಿಟ್ಠಹಿತ್ವಾ ಭಙ್ಗಾದಿ-ಞಾಣೇಹಿ ಪಟಿಪಜ್ಜತಿ.

೧೫೩೫. ತಥಾ ಚಾಭಿನವುಪ್ಪನ್ನೇ, ಭಿಜ್ಜಮಾನೇ ವಿಪಸ್ಸತೋ;

ಸಂವೇಗಕಡ್ಢಿತಂ ಞಾಣಂ, ಭಙ್ಗಾದಿಮನುತಿಟ್ಠತಿ.

೧೫೩೬. ತತೋ ಪುಬ್ಬೇ ಪವತ್ತಾ ಹಿ, ಸಂಕ್ಲೇಸಾಪಾಯಸಮ್ಭವಾ;

ಪಟಿಪತ್ತಿವಿಸುದ್ಧೀತಿ, ನ ಸಙ್ಗಯ್ಹತಿ ಭಾವನಾ.

೧೫೩೭. ಸಮ್ಪಾದೇನ್ತೋ ಪನಿಚ್ಚೇತಾ, ಚತಸ್ಸೋಪಿ ವಿಸುದ್ಧಿಯೋ;

ಅನಿಚ್ಚಾ ದುಕ್ಖಾನತ್ತಾತಿ, ಭಾವೇಯ್ಯ ತಿವಿಧಾ ಕಥಂ.

೧೫೩೮. ಪಚ್ಚಯಪಚ್ಚಯುಪ್ಪನ್ನಾ, ಜಾತಾನನ್ತರಭೇದಿನೋ;

ಅನಿಚ್ಚಾ ಚ ಪಭಙ್ಗೂ ಚ, ಪಲುಜ್ಜನ್ತಿ ಚವನ್ತಿ ಚ.

೧೫೩೯. ಅದ್ಧುವಾ ಚ ಅಸಾರಾ ಚ, ವಿಭವಾ ಚ ವಿನಾಸಿನೋ;

ಸಙ್ಖತಾ ವಿಪರಿಣಾಮ-ಧಮ್ಮಾ ಇತ್ತರಕಾಲಿಕಾ.

೧೫೪೦. ಖಯಧಮ್ಮಾ ವಯಧಮ್ಮಾ, ಲಹುಕಾಲಪ್ಪವತ್ತಿನೋ;

ತಾವಕಾಲಿಕಧಮ್ಮಾ ಚ, ಪರಿತ್ತಟ್ಠಿತಿಕಾ ತಥಾ.

೧೫೪೧. ಖಣತ್ತಯಪರಿಚ್ಛಿನ್ನಾ, ಪುಬ್ಬಾಪರವಿಚಿತ್ತಕಾ;

ಪುರಕ್ಖತಾ ನಿರೋಧಸ್ಸ, ಸಸ್ಸತಾ ನ ಕುದಾಚನಂ.

೧೫೪೨. ಜಾಯನ್ತಿ ಪರಿಹಾನಾಯ, ನ ತು ಜಾಯನ್ತಿ ವುದ್ಧಿಯಾ;

ಜಿಯ್ಯಮಾನಾವ ತಿಟ್ಠನ್ತಿ, ಜಿಣ್ಣಾ ಭಙ್ಗಪರಾಯಣಾ.

೧೫೪೩. ಅಹುತ್ವಾಯೇವುಪ್ಪಜ್ಜನ್ತಿ, ನ ಕುತೋಚಿಪಿ ಆಗತಾ;

ಹುತ್ವಾ ಅನ್ತರಧಾಯನ್ತಿ, ನ ತು ಕತ್ಥಚಿ ಸಞ್ಚಿತಾ.

೧೫೪೪. ತಂ ತಂ ಪಚ್ಚಯಸಾಮಗ್ಗಿ-ಮತ್ತಲಾಭಾಯ ನಿಸ್ಸಿತಾ;

ನಿರೋಧಧಮ್ಮಾ ಜಾಯನ್ತಿ, ಜಾತಾ ಬ್ಯನ್ತಿ ಭವನ್ತಿ ತೇ.

೧೫೪೫. ಯಥಾ ನದೀ ಪಬ್ಬತೇಯ್ಯಾ, ಯಥಾ ದೀಪಸಿಖಾ ತಥಾ;

ಸೀಘಸೀಘಂ ಪವತ್ತನ್ತಾ, ಉಪ್ಪಜ್ಜನ್ತಿ ವಯನ್ತಿ ಚ.

೧೫೪೬. ಜಾತಾ ಜಾತಾ ನಿರುಜ್ಝನ್ತಿ, ಅಞ್ಞೇ ಅಞ್ಞೇ ತು ಜಾಯರೇ;

ಅವೀಚಿ ಅನುಸಮ್ಬನ್ಧಾ, ನ ಜಾನನ್ತಿ ವಿಸೇಸತೋ.

೧೫೪೭. ಇತಿ ನಾನಪ್ಪಕಾರೇನ, ವಿಪಸ್ಸನ್ತೋ ವಿಚಕ್ಖಣೋ;

ಅನಿಚ್ಚಭಾವನಂ ಧೀರೋ, ಪರಿಪಾಚೇತಿ ಸಾಧುಕಂ.

೧೫೪೮. ದುಕ್ಖಾ ಚ ದುಕ್ಖವತ್ಥೂ ಚ, ಅಭಿಣ್ಹಪರಿಪೀಳಿತಾ;

ರೋಗಾ ಗಣ್ಡಾ ಚ ಸಲ್ಲಾ ಚ, ಅಘತೋ ಚ ಉಪದ್ದವಾ.

೧೫೪೯. ಭಯೋಪಸಗ್ಗಾಘಮೂಲಾ,

ಸಾಸವಾದೀನವೀತಿತಾ;

ಅಲೇಣಾಸರಣಾತಾಣಾ,

ವಧಕಾ ಮಾರಕಾಮಿಸಾ.

೧೫೫೦. ಜಾತಿಧಮ್ಮಾ ಜರಾಬ್ಯಾಧಿ-

ಸೋಕೋಪಾಯಾಸಭಾಗಿನೋ;

ಪರಿದೇವಸಭಾವಾ ಚ,

ಸಂಕ್ಲೇಸಾ ದುಕ್ಖಭಾಗಿನೋ.

೧೫೫೧. ಜೇಗುಚ್ಛಾ ಪಟಿಕೂಲಾ ಚ, ಬೀಭಚ್ಛಾ ಚ ವಿರೂಪಿನೋ;

ಅಜಞ್ಞಾ ಚಪಲಾ ಹೀನಾ, ದುಗ್ಗನ್ಧಾ ಬಾಲಸೇವಿತಾ.

೧೫೫೨. ಸೋಕನ್ತರಿಕತಾನಿಚ್ಚಂ, ತಣ್ಹಾಯ ಕಡ್ಢಿತಾ ಭುಸಂ;

ಕಪಣಾ ದುಗ್ಗತಾ ದೀನಾ, ವಿಪನ್ನಾ ಚ ವಿಘಾತಿನೋ.

೧೫೫೩. ಅತ್ತಲಾಭಂ ಗವೇಸನ್ತಿ, ತಂತಂಪಚ್ಚಯನಿಸ್ಸಿತಾ;

ದುಕ್ಖಾಧಿಟ್ಠಾನಮಚ್ಚನ್ತಂ, ಜಾತಾ ಪುನ ವಿಹಞ್ಞರೇ.

೧೫೫೪. ಅಗ್ಗಿಕೂಪೇ ನಿಮುಗ್ಗಾವ, ಕ್ಲೇಸಸನ್ತಾಪಭಾಗಿನೋ;

ಓವಿದ್ಧಾ ವಿಯ ಸತ್ತೀಹಿ, ಸಙ್ಖಾರಾ ನಿಚ್ಚದುಕ್ಖಿತಾ.

೧೫೫೫. ಜಾಯಮಾನಾ ಚ ಜಿಯ್ಯನ್ತಾ, ಮಿಯ್ಯನ್ತಾ ಚ ಖಣೇ ಖಣೇ;

ಪಸುಕಾ ವಿಯ ನಿಚ್ಚಮ್ಮಾ, ಹಞ್ಞನ್ತಿ ಸೇರಿಕಾತುರಾ.

೧೫೫೬. ತಿಲಾನಿ ತಿಲಯನ್ತೇವ, ಉಚ್ಛುಯನ್ತೇವ ಉಚ್ಛುಯೋ;

ಉದಯಬ್ಬಯಾವಸ್ಸಂ ತೇ, ಪೀಳಯನ್ತಿ ಅಭಿಣ್ಹಸೋ.

೧೫೫೭. ಮನೋರಮನವಾಕಾರಾ, ವಿಪಲ್ಲಾಸಪರಿಕ್ಖತಾ;

ಇರಿಯಾಪಥಸಞ್ಛನ್ನಾ, ನೋಪತಿಟ್ಠನ್ತಿ ದುಕ್ಖತೋ.

೧೫೫೮. ಸಙ್ಖಾರೇಸು ಪನೇತೇಸು, ವೇದನಾಸ್ಸಾದರೋಧಿನೋ;

ಸಾವ ಸನ್ದುಲಸಮ್ಬದ್ಧಾ, ಸಮ್ಮೋಹಪರಿವಾರಿತಾ.

೧೫೫೯. ‘‘ಅದುಂ ದುಕ್ಖಮಿದಂ ದುಕ್ಖ’’-ಮಿತಿ ಸಂಸಾರಚಾರಿನೋ;

ದುಕ್ಖಹೇತುಮಜಾನನ್ತಾ, ಸಮ್ಭಮನ್ತಿ ಅವಿದ್ದಸು.

೧೫೬೦. ಸುಖಾಕಾರಮಪಸ್ಸನ್ತಾ, ದುಕ್ಖಭಾರನಿಪೀಳಿತಾ;

ಪತ್ಥೇನ್ತಿ ದುಕ್ಖಮೇವಞ್ಞಂ, ಬಾಲಾ ಬ್ಯಸನಭಾಗಿನೋ.

೧೫೬೧. ಚವನ್ತಾ ಉಪಪಜ್ಜನ್ತಾ, ರುಕ್ಖಸಾಖಂವ ಮಕ್ಕಟೋ;

ದುಕ್ಖಮೇಕಂ ವಿಮುಚ್ಚನ್ತಿ, ತತೋ ಗಣ್ಹನ್ತಿ ಚಾಪರಂ.

೧೫೬೨. ತೇ ದೀಘರತ್ತಂ ಸೋಚನ್ತಿ, ತಣ್ಹಾಸಲ್ಲಸಮಪ್ಪಿತಾ;

ದಿಟ್ಠಿಪಾಸಸಮುಪೇತಾ, ಮಾನತ್ಥಮ್ಭಾನುಸಾಯಿನೋ.

೧೫೬೩. ತಮಾಕಾರಂ ಪನಿಚ್ಚೇವಂ, ವಿಪಸ್ಸನ್ತೋ ವಿಸಾರದೋ;

ದುಕ್ಖಾನುಪಸ್ಸನಂ ನಾಮ, ಪರಿಪಾಚೇತಿ ಭಾವನಂ.

೧೫೬೪. ಧಮ್ಮಟ್ಠಿತಿನಿಯಾಮಾ ಹಿ, ಖನ್ಧಾಯತನಧಾತುಯೋ;

ಅನತ್ತಾಸಸ್ಸತನ್ತಾ ಚ, ಈಹಾಭೋಗವಿವಜ್ಜಿತಾ.

೧೫೬೫. ಪಯೋಜನಮಧಿಟ್ಠಾಯ, ನ ತು ಬ್ಯಾಪಾರಯನ್ತಿ ಚ;

ಪಚ್ಚಯಪಚ್ಚಯುಪ್ಪನ್ನಾ, ಜನೇತುಂ ವಾಥ ಜಾಯಿತುಂ.

೧೫೬೬. ತಥಾಪಿ ಹೇತುಸಾಮಗ್ಗಿ-ಸಮ್ಭವೇ ಸಮ್ಭವನ್ತಿ ತೇ;

ತಬ್ಭಾವಭಾವಿಭಾವೇನ, ಅಞ್ಞಮಞ್ಞಪವತ್ತಿತಾ.

೧೫೬೭. ಅಜಾಯಿತುಂ ನ ಸಕ್ಕೋನ್ತಿ, ಸತಿ ಪಚ್ಚಯಸಮ್ಭವೇ;

ಪಚ್ಚಯಾನಮಲಾಭೇ ತು, ನ ಜಾಯನ್ತಿ ಕುದಾಚನಂ.

೧೫೬೮. ನ ಕಿಞ್ಚೇತ್ಥ ಅಪೇಕ್ಖಿತ್ವಾ, ಸಮಗ್ಗಾ ಹೋನ್ತಿ ಪಚ್ಚಯಾ;

ನ ಜನೇತುಂ ನ ಸಕ್ಕೋನ್ತಿ, ಸಮಗ್ಗಾ ಚ ಕುದಾಚನಂ.

೧೫೬೯. ಯಥಾಪಚ್ಚಯಲಾಭೇನ, ಪವತ್ತನ್ತಿ ಯಥಾ ತಥಾ;

ರಕ್ಖಿತಾ ವಾ ವಿಧಾತಾ ವಾ, ನತ್ಥಿ ಅಸ್ಸಾಮಿಕಾ ತಥಾ.

೧೫೭೦. ‘‘ಅಹಂ ಮಮ’’ನ್ತಿ ಗಣ್ಹನ್ತಾ, ಪರಿಣಾಮೇನ್ತಿ ಅಞ್ಞಥಾ;

ವಿಸ್ಸಸನ್ತಾ ಹರನ್ತೇತೇ, ಪರಾಭೂತಾ ಪಲಮ್ಭಿನೋ.

೧೫೭೧. ರಿತ್ತಾ ತುಚ್ಛಾ ಚ ಸುಞ್ಞಾ ಚ, ವಿವಿತ್ತಾ ಸಾರವಜ್ಜಿತಾ;

ಸಲಕ್ಖಣಪರಿಚ್ಛಿನ್ನಾ, ಧಮ್ಮಾ ನತ್ಥೇತ್ಥ ಪುಗ್ಗಲೋ.

೧೫೭೨. ಜಾಯಮಾನಾ ಚ ಜಿಯ್ಯನ್ತಾ, ಮಿಯ್ಯಮಾನಾ ಚ ಸಙ್ಖತಾ;

ವಿವಸಾ ಪರಿವತ್ತನ್ತಿ, ವಸೋ ತೇಸಂ ನ ಕತ್ಥಚಿ.

೧೫೭೩. ನ ತೇಸು ಕಸ್ಸಚಿಸ್ಸೇರಂ, ನ ತೇಸಞ್ಚತ್ಥಿ ಕತ್ಥಚಿ;

ನ ಚತ್ತನೀತಿ ಸಙ್ಖಾರಾ, ಆಧಿಪಚ್ಚವಿವಜ್ಜಿತಾ.

೧೫೭೪. ಕದಲೀಪತ್ತವಟ್ಟೀವ, ಅಞ್ಞಮಞ್ಞಪತಿಟ್ಠಿತಾ;

ಸಹಜಾತಗ್ಘನೀಭೂತಾ, ನೋಪಟ್ಠನ್ತಿ ಅನತ್ತತೋ.

೧೫೭೫. ಅರೂಪನಿಸ್ಸಿತಂ ರೂಪಂ, ಅರೂಪಂ ರೂಪನಿಸ್ಸಿತಂ;

ಜಚ್ಚನ್ಧಪೀಠಸಪ್ಪೀವ, ಅಞ್ಞಮಞ್ಞವವತ್ಥಿತಂ.

೧೫೭೬. ಯನ್ತಸುತ್ತೇನ ಯನ್ತಂವ, ಕಾಯಯನ್ತಂ ಪವತ್ತತಿ;

ನಾಮಾವಕಡ್ಢಿತಂ ತತ್ಥ, ನತ್ಥಿ ಅತ್ತಾ ಸಯಂವಸೀ.

೧೫೭೭. ಚೇತೋವಿಪ್ಫಾರನಿಪ್ಫನ್ನಾ, ವಾಯೋಧಾತುಸಮುಟ್ಠಿತಾ;

ಇರಿಯಾಪಥವಿಞ್ಞತ್ತಿವಿಕಾರಾ ಪಾಲಕಾ ಮತಾ.