೧೦. ದಸಮೋ ಪರಿಚ್ಛೇದೋ

ಸೇಸಕಮ್ಮಟ್ಠಾನವಿಭಾಗೋ

೧೨೯೮. ಬ್ಯಾಪಾದಾದೀನವಂ ದಿಸ್ವಾ, ಖೇಮಭಾವಞ್ಚ ಖನ್ತಿಯಂ;

ಅಪ್ಪಮಞ್ಞಾ ತು ಭಾವೇನ್ತೋ, ವಿನೇಯ್ಯ ಪಟಿಘಂ ಕಥಂ.

೧೨೯೯. ಚೇತೋಸನ್ತಾಪನೋ ಕೋಧೋ,

ಸಮ್ಪಸಾದವಿಕೋಪನೋ;

ವಿರೂಪಬೀಭಚ್ಛಕರೋ,

ಮುಖವಣ್ಣಪ್ಪಧಂಸನೋ.

೧೩೦೦. ಸೀಲಕಾಲುಸ್ಸಿಯುಪ್ಪಾದೋ, ಚಿತ್ತವಿಕ್ಖೇಪಸಮ್ಭವೋ;

ಪಞ್ಞಾಪಜ್ಜೋತವಿದ್ಧಂಸೀ, ಪಟಿಪತ್ತಿವಿಬನ್ಧಕೋ.

೧೩೦೧. ಅಪಾಯೇಕಾಯನೋ ಮಗ್ಗೋ, ಪಾಪಕಣ್ಟಕಬನ್ಧಕೋ;

ಧಮ್ಮಮಗ್ಗಸಮುಚ್ಛೇದೀ, ಮಗ್ಗದ್ವಾರಪಿಧಾನಕೋ.

೧೩೦೨. ಯಸೋವಣ್ಣವಿಸಙ್ಖಾರೋ, ಗುಣಮೂಲಪ್ಪಭಞ್ಜಕೋ;

ದುಕ್ಖಧಮ್ಮಸಮೋಧಾನೋ, ಬ್ಯಸನೋಪದ್ದವಾಕರೋ.

೧೩೦೩. ದುನ್ನಿಮಿತ್ತಮಿದಂ ಜಾತಂ, ಸಬ್ಬಸಮ್ಪತ್ತಿಧಂಸನಂ;

ಧೂಮಕೇತುಸಮುಪ್ಪಾದೋ, ಸಬ್ಬಲೋಕವಿನಾಸಕೋ.

೧೩೦೪. ಸಬ್ಬಕಲ್ಯಾಣಧಮ್ಮಾನಂ, ಅವಮಙ್ಗಲಮುಟ್ಠಿತಂ;

ಹಿತಾರಮ್ಭಸಮುಗ್ಘಾತೀ, ಅನ್ತರಾಯಸಮಾಗಮೋ.

೧೩೦೫. ಸಬ್ಬಾಕಾರಪಟಿಕ್ಕೂಲಂ, ಸಬ್ಬವಿದ್ದೇಸಕಾರಣಂ;

ವಿಪತ್ತಿಮುಖಮುಪ್ಪನ್ನಂ, ಅಮಿತ್ತಜನಪತ್ಥಿತಂ.

೧೩೦೬. ಸಪತ್ತಕರಣಂ ಘೋರಂ, ಸಬ್ಬಾನತ್ಥವಿಧಾಯಕಂ;

ಭಯಮನ್ತರತೋ ಜಾತಂ, ತಂ ಜನೋ ನಾವಬುಜ್ಝತಿ.

೧೩೦೭. ಖುರಧಾರಂ ಲಿಹನ್ತಾವ, ಗಿಲನ್ತಾವ ಹುತಾಸನಂ;

ತಿತ್ತಲಾಬುಂವ ಖಾದನ್ತಾ, ಗಣ್ಹನ್ತಾದಿತ್ತಮಾಯುಧಂ.

೧೩೦೮. ಬ್ಯಾಪಾದಮತ್ತಸಮ್ಭವ-ಮತ್ತಘಞ್ಞಾಯ ಕೇವಲಂ;

ಉಪಲಾಳೇನ್ತಿ ದುಮ್ಮೇಧಾ, ಘೋರಮಾಸೀವಿಸಂ ಯಥಾ.

೧೩೦೯. ದೋಸತೇಜೇನ ರುಕ್ಖೋವ, ಸುಸಿರಾರುಳ್ಹಪಾವಕೋ;

ಅನ್ತೋನುದಯ್ಹಮಾನಾಪಿ, ವಿಪ್ಫನ್ದನ್ತಿ ವಿಘಾತಿನೋ.

೧೩೧೦. ನಾವಬುಜ್ಝನ್ತಿ ದುಮ್ಮೇಧಾ, ಚೇತೋಸಙ್ಕಪ್ಪವಾಯುನಾ;

ಉಕ್ಕಾಮುಖಾಮಿವಾದಿತ್ತ-ಮುಜ್ಜಲನ್ತಾ ಪುನಪ್ಪುನಂ.

೧೩೧೧. ಭಯಮಗ್ಗಸಮಾರುಳ್ಹಾ, ಖೇಮಮಗ್ಗವಿರೋಧಿನೋ;

ಬ್ಯಾಪನ್ನಾ ಕಿಬ್ಬಿಸಾಕಿಣ್ಣಾ, ಅತ್ಥದ್ವಯವಿರೋಧಿನೋ.

೧೩೧೨. ಅನಾಥಾ ಸಲ್ಲಕಾವಿದ್ಧಾ, ವಿಸಟ್ಟಾ ಅನುಸೋಚಿನೋ;

ಅನ್ಧಾ ವಿಯ ಮಿಗಾರಞ್ಞೇ, ಭಮನ್ತಿ ಹತಚಕ್ಖುಕಾ.

೧೩೧೩. ಅಸಂವಿಹಿತಕಮ್ಮನ್ತಾ, ಬಾಲಾ ಕೋಧವಸಾನುಗಾ;

ಖಿಪ್ಪಂ ಲಕ್ಖಿಂ ಪರಿಚ್ಚತ್ತಾ, ಯಸೋಭೋಗೇಹಿ ಧಂಸರೇ.

೧೩೧೪. ದುಪ್ಪಟಿಪ್ಪಾದಿತಾರಮ್ಭಾ, ಕೋಧಸಙ್ಖೋಭಮೋಹಿತಾ;

ಧಮ್ಮಾಮತರಸಸ್ಸಾದಂ, ನ ವಿನ್ದನ್ತಿ ಅವಿದ್ದಸು.

೧೩೧೫. ಬಹ್ವಾದೀನವಮಿಚ್ಚೇವ-ಮನ್ತೋ ಬ್ಯಾಧಿಮಿವುಟ್ಠಿತಂ;

ಜಾತಾನಲಮಿವುಚ್ಛಙ್ಗೇ, ಅಜ್ಝುಪೇಕ್ಖನ್ತಿ ದುಜ್ಜನಾ.

೧೩೧೬. ಚೋದಯಮಾನಾ ದುಕ್ಖೇಹಿ, ಕ್ಲೇಸಾಚಿಣ್ಣಮಲೀಮಹಾ;

ಪಾಪಕಮ್ಮೇಹಿ ಪೂರೇನ್ತಾ, ಸೇನ್ತಿ ಮಚ್ಚುಪಥೇ ಚಿರಂ.

೧೩೧೭. ತಮೇವಂ ಪಟಿಸಙ್ಖಾಯ, ಪಟಿಘಂ ಪನ ಯೋನಿಸೋ;

ವಾಳಮಿಗಂವ ಧಾವನ್ತಂ, ಆವಿಸನ್ತಂವ ರಕ್ಖಸಂ.

೧೩೧೮. ಪಾವಕಂವ ಪರಿಬ್ಯುಳ್ಹಂ, ಭಾಯಮಾನಸ್ಸ ಯೋಗಿನೋ;

ಸೋತ್ಥಿಭಾವಾಯ ಖೇಮನ್ತ-ಮುಪಞ್ಞತ್ತಂ ಮಹೇಸಿನಾ.

೧೩೧೯. ಮಾತಾ ಕಲ್ಯಾಣಧಮ್ಮಾನಂ, ಖಮಾ ನಾಮ ಮಹಿದ್ಧಿಕಾ;

ಸಮಪ್ಪವತ್ತಿ ಸತ್ತೇಸು, ಸಬ್ಬಸಮ್ಪತ್ತಿಸಾಧಿಕಾ.

೧೩೨೦. ಕೋಧಾನಲಜಲಾಸೇಕೋ,

ಸೋಕೋಪಾಯಾಸನಾಸನಂ;

ಆಘಾತಸಲ್ಲನಿದ್ಧಾರೀ,

ಉಪನಾಹವಿಮೋಚನಂ.

೧೩೨೧. ವಣ್ಣಕಿತ್ತಿಸಮುಟ್ಠಾನಂ, ಗುಣಮೂಲಾಭಿಸೇವನಂ;

ಅಪಾರುತಮುಖಂವೇತ-ಮತ್ಥದ್ವಯಸಮಿದ್ಧಿಯಾ.

೧೩೨೨. ವಿಘಾತಪರಿಯಾದಾನ-ಮಾಸವಾನಮಸೇಸತೋ;

ಪಟಿಪಸ್ಸಮ್ಭನಂ ಚೇತೋ-ಪೀತಿಕರಣಚನ್ದನಂ.

೧೩೨೩. ಸಬ್ಬದುಕ್ಖಸಮುಗ್ಘಾತಿ, ಸುಖುಪಟ್ಠಾನಮುತ್ತಮಂ;

ಬ್ಯಸನೋದಯವಿಚ್ಛೇದೋ, ಭಯಭೇರವನಿಗ್ಗಮೋ.

೧೩೨೪. ಚೇತೋಪಸಾದಸನ್ಧಾನೋ, ಪಾಸಾದಿಕಫಲಾವಹೋ;

ಪವರೋ ಬೋಧಿಸಮ್ಭಾರೋ, ನರಾನರನಿಸೇವಿತೋ.

೧೩೨೫. ಪಾಪಕನ್ತಾರನಿತ್ಥಾರೋ, ಚತುರಾಪಾಯರೋಧಕೋ;

ದ್ವಾರಾವಾಪುರಣಞ್ಚೇತಂ, ದೇವಲೋಕೂಪಪತ್ತಿಯಾ.

೧೩೨೬. ಪಞ್ಞಾಸೀಲಸಮಾಧಾನಂ, ಪಟಿಪತ್ತಿವಿಸೋಧನೋ;

ಪಿಯಙ್ಕರೋ ಸೋಮ್ಮಭಾವೋ, ದುಲ್ಲಭೋ ಬಹುಪತ್ಥಿತೋ.

೧೩೨೭. ಕ್ಲೇಸಸಙ್ಖೋಭವಿಕ್ಖೇಪ-ವಿಪ್ಫನ್ದಪಟಿಬನ್ಧನಂ;

ತಿತಿಕ್ಖಾಗುಣಮಕ್ಖಾತ-ಮಾರಕ್ಖವಿಧಿಮತ್ತನೋ.

೧೩೨೮. ವಿಹಿಂಸಾರತಿಸಾರಮ್ಭ-ಪಟಿರೋಧವಿಮೋಚನಂ;

ವೇರಿಕಿಬ್ಬಿಸವಿದ್ಧಂಸೀ, ಲೋಕಾನುಗ್ಗಹಕಾರಣಂ.

೧೩೨೯. ಧಮ್ಮಪಜ್ಜೋತಕರಣಂ, ಸಂಯೋಗಮಲಸೋಧನಂ;

ಸಮ್ಮೋಹತಿಮಿರುದ್ಧಾರಿ, ಸಮ್ಪತ್ತಿಪಟಿಪಾದನಂ.

೧೩೩೦. ಇಚ್ಚತ್ತತ್ಥಂ ಪರತ್ಥಞ್ಚ, ಸಮ್ಪಾದೇತ್ವಾ ಖಮಾಪರೋ;

ಸಾಧೇತಿ ಸಬ್ಬಸಮ್ಪತ್ತಿ-ಮಿಧ ಚೇವ ಪರತ್ಥ ಚ.

೧೩೩೧. ತಿತಿಕ್ಖಾಗುಣಸಮ್ಪನ್ನೋ, ಪಾಣಭೂತಾನುಕಮ್ಪಕೋ;

ಅನಾಕುಲಿತಕಮ್ಮನ್ತೋ, ಸೋರತೋ ಸಖಿಲೋ ಸುಚಿ.

೧೩೩೨. ನಿವಾತೋ ಸಮಿತಾಚಾರೋ, ಸುಭಗೋ ಪಿಯದಸ್ಸನೋ;

ಪಟಿಸಙ್ಖಾಬಲಪ್ಪತ್ತೋ, ಧಿತಿಮಾ ಮತಿಪಾಟವೋ.

೧೩೩೩. ಅಕ್ಖೋಭೋ ಅಧಿವಾಸೇನ್ತೋ,

ಸಬ್ಬಾನತ್ಥೇ ಪರಿಸ್ಸಯೇ;

ಭೀಮಸಙ್ಗಾಮಾವಚರೋ,

ಹತ್ಥಿನಾಗೋವ ಸೋಭತಿ.

೧೩೩೪. ಇತ್ಥಂ ಸಮನ್ತತೋ ಭದ್ದಂ, ತಿತಿಕ್ಖಂ ಪಚ್ಚವೇಕ್ಖತೋ;

ಪಸ್ಸಮ್ಭೇತಿ ಸಮುಟ್ಠಾಯ, ಖಮಾ ಬ್ಯಾಪಾದಸಮ್ಭಮಂ.

೧೩೩೫. ದಿಬ್ಬೋಸಧಮಿವಾತಙ್ಕಂ, ಮೇಘಜ್ಜವಂ ಹುತಾಸನಂ;

ಖಿಪ್ಪಮನ್ತರಧಾಪೇತಿ, ತಿತಿಕ್ಖಾ ಕೋಧಮತ್ತನೋ.

೧೩೩೬. ತತೋನೇಕಗುಣೋಪೇತಂ, ನೇಕದೋಸಪ್ಪಭಞ್ಜನಂ;

ಖನ್ತಿಧಮ್ಮಮಧಿಟ್ಠಾಯ, ಪಸನ್ನಧೀರಮಾನಸೋ.

೧೩೩೭. ಭಾವೇಯ್ಯ ಪಠಮಂ ತಾವ, ಮೇತ್ತಾಭಾವನಮುತ್ತಮಂ;

ಅತ್ತಾನಮುಪಮಂ ಕತ್ವಾ, ಸತ್ತೇಸು ಹಿತವುಡ್ಢಿಯಾ.

೧೩೩೮. ಸಬ್ಬೇ ಸತ್ತಾ ಚ ಪಾಣಾ ಚ, ಭೂತಾ ಜೀವಾ ಚ ಪುಗ್ಗಲಾ;

ಅಬ್ಯಾಪಜ್ಜಾ ತಥಾವೇರಾ, ಅನೀಘಾ ಚ ಸುಖೇಧಿನೋ.

೧೩೩೯. ವಿಜ್ಜಾಸಮ್ಪತ್ತಿಭೋಗೇಹಿ, ಪವಡ್ಢನ್ತು ಯಸಸ್ಸಿನೋ;

ಪರಿವಾರಬಲಪ್ಪತ್ತಾ, ಭಯೋಪದ್ದವವಜ್ಜಿತಾ.

೧೩೪೦. ಸಖಿಲಾ ಸುಖಸಮ್ಭಾಸಾ, ಅಞ್ಞಮಞ್ಞಾವಿರೋಧಿನೋ;

ಮೋದನ್ತು ಸುಹಿತಾ ಸಬ್ಬೇ, ಮಾ ಕಿಞ್ಚಿ ಪಾಪಮಾಗಮಾ.

೧೩೪೧. ಸದ್ಧಾಪಾಮೋಜ್ಜಬಹುಲಾ, ದಾನಸೀಲಮಹುಸ್ಸವಾ;

ಗುಣಭೂಸಿತಸನ್ತಾನಾ, ಆಯುಂ ಪಾಲೇನ್ತನಾಮಯಂ.

೧೩೪೨. ಸಮ್ಮಾದಿಟ್ಠಿಂ ಪುರೋಧಾಯ, ಸದ್ಧಮ್ಮಪಟಿಪತ್ತಿಯಾ;

ಆರಾಧೇನ್ತು ಹಿತೋಪಾಯ-ಮಚ್ಚನ್ತಂ ಸುಖಸಾಧನಂ.

೧೩೪೩. ಇತಿ ನಾನಪ್ಪಕಾರೇನ, ಸತ್ತೇಸು ಹಿತಮಾನಸಂ;

ಮಾತಾವ ಪಿಯಪುತ್ತಮ್ಹಿ, ಪವತ್ತೇಯ್ಯ ನಿರನ್ತರಂ.

೧೩೪೪. ಸಿನೇಹಂ ಪರಿವಜ್ಜೇನ್ತೋ, ಬ್ಯಾಪಾದಞ್ಚ ವಿನಾಸಯಂ;

ಪರಿಸುದ್ಧೇನ ಚಿತ್ತೇನ, ಹಿತಕಾಮೋವ ಕೇವಲಂ.

೧೩೪೫. ಮೇತ್ತಾಯ ಮಿತ್ತೇ ಮಜ್ಝತ್ತೇ, ವೇರಿಕೇ ಚ ಯಥಾಕ್ಕಮಂ;

ಕರೋನ್ತೋ ಸೀಮಸಮ್ಭೇದಂ, ಅತ್ತನಿ ಚ ಸಮಂ ಫರೇ.

೧೩೪೬. ಆಸೇವನ್ತಸ್ಸ ತಸ್ಸೇವಂ, ಹಿತಾಭೋಗಸಮಾಹಿತಂ;

ಸತ್ತಪಞ್ಞತ್ತಿಮಾರಬ್ಭ, ಸಮಾಧಿಯತಿ ಮಾನಸಂ.

೧೩೪೭. ತತೋ ಅನೀಘೋ ಏಕಗ್ಗೋ, ಉಪಸನ್ತಮನೋರಥೋ;

ಝಾನತ್ತಿಕಂ ಚತುಕ್ಕಂ ವಾ, ಮೇತ್ತಾಚೇತೋವಿಮುತ್ತಿಯಾ.

೧೩೪೮. ಭೂಮಿದೇಸದಿಸಾಸತ್ತ-ಭೇದಭಿನ್ನೇಸು ಓಧಿಸೋ;

ಯಥಾಸಮ್ಭವಮಪ್ಪೇತಿ, ಸಬ್ಬಸತ್ತೇಸ್ವನೋಧಿಸೋ.

೧೩೪೯. ತದೇವಮೇಕಸತ್ತಮ್ಹಿ, ಪರಿಚ್ಛೇದನಿಯಾಮತೋ;

ಬಹುಕೇಸು ಚ ಸತ್ತೇಸು, ಸಬ್ಬೇಸು ಚ ಪವತ್ತತಿ.

೧೩೫೦. ತಥಾಸೇವಿತಸನ್ತಾನೋ,

ಮೇತ್ತಾಚೇತೋವಿಮುತ್ತಿಯಾ;

ಕರುಣಾಭಾವನಾಯೋಗ-

ಮಾರಭೇಯ್ಯ ತತೋ ಪರಂ.

೧೩೫೧. ಸತ್ತಾನಂ ದುಕ್ಖಿತಾಕಾರ-ಮಾವಜ್ಜಿತ್ವಾನ ಯೋನಿಸೋ;

‘‘ಅಹೋ ದುಕ್ಖಾ ವಿಮುಚ್ಚನ್ತು, ಸಬ್ಬೇ ಸತ್ತಾ’’ತಿ ಚಿನ್ತಯಂ.

೧೩೫೨. ಕಥಂ ಮಾಣವಕೋಯಞ್ಚ, ಭಯಭೇರವಕಮ್ಪಿತೋ;

ಬ್ಯಸನೋಪದ್ದವಾವಿದ್ಧೋ, ವಿಪ್ಫನ್ದತಿ ವಿಘಾತವಾ.

೧೩೫೩. ತಥಾ ಹೇತೇ ವಿಮೋಸಾಯ, ಪಟಿಪನ್ನಾ ವಿರೋಧಿನೋ;

ಸಬ್ಯಾಪಜ್ಜಾ ವಿಹಞ್ಞನ್ತಿ, ಚೇತೋದುಕ್ಖಸಮಪ್ಪಿತಾ.

೧೩೫೪. ಅಥಞ್ಞೇ ಪರಿದೇವನ್ತಿ, ವಿಪತ್ತಿವಿನಿಪಾತಿಕಾ;

ಪಧುಪಾಯಿಕಸಙ್ಕಪ್ಪಾ, ಸೋಕೋಪಾಯಾಸಭಾಗಿನೋ.

೧೩೫೫. ಅಥಾಪರೇ ಪರಾಭೂತಾ, ಕಾಮಕ್ಲೇಸವಸೀಕತಾ;

ಮೋಹನ್ಧಕಾರಪಕ್ಖನ್ತಾ, ಸತ್ತಾ ಗಚ್ಛನ್ತಿ ದುಗ್ಗತಿಂ.

೧೩೫೬. ತೇ ತತ್ಥ ಕಟುಕಂ ಘೋರಮನುಭೋನ್ತಾ ಸಕಂ ಫಲಂ;

ದುಕ್ಖಸೂಲಸಮಾವಿದ್ಧಾ, ಬಾಹಾ ಪಗ್ಗಯ್ಹ ಕನ್ದರೇ.

೧೩೫೭. ದೀಘರತ್ತಾಧಿಮುತ್ತಾಯ, ದೇವಲೋಕಸಮಿದ್ಧಿಯಾ;

ದೇವಕಾಯಾ ವಿಹಾಯನ್ತಿ, ಅಕಾಮಾ ಪರಿವತ್ತಿನೋ.

೧೩೫೮. ಚಿರಕಾಲಂ ಜಲಿತ್ವಾನ, ಸೂರಿಯೋವ ನಭನ್ತರೇ;

ಬ್ರಹ್ಮಾನೋಪಿ ಪತನ್ತೇವ, ಬ್ರಹ್ಮಲೋಕಾಪರಾಯಣಾ.

೧೩೫೯. ಖನ್ಧಪಞ್ಚಕಮಿಚ್ಚೇವಂ, ದುಕ್ಖಾಗಾರಂ ಸಮುಬ್ಬಹಂ;

ನಾನಾಗತೀಸು ವಿಕ್ಖಿತ್ತಂ, ಪಾಣಜಾತಂ ವಿಹಞ್ಞತಿ.

೧೩೬೦. ಅನಾಥಮನಯಾಪನ್ನಂ, ಪರಿಹಾನಿಭಯಾಕುಲಂ;

ವಾತಮಣ್ಡಲಿಕಕ್ಖಿತ್ತಪಕ್ಖೀವ ಪರಿವತ್ತತಿ.

೧೩೬೧. ಇತಿ ದಿಸ್ವಾನ ಸುತ್ವಾ ವಾ, ಸಮ್ಭಾವೇತ್ವಾನ ವಾ ಪುನ;

ದುಕ್ಖಾಪಗಮಮಿಚ್ಛನ್ತೋ, ದುಕ್ಖಾಪಗಮ ಪತ್ಥಯಂ.

೧೩೬೨. ಸುಖಿತೇಸು ಚ ಮೇಧಾವೀ, ದುಕ್ಖಾಕಾರಮನುಸ್ಸರಂ;

ಪವತ್ತೇಯ್ಯ ದಯಾಪನ್ನೋ, ಕರುಣಾಭಾವನಪ್ಪನಂ.

೧೩೬೩. ‘‘ಅಹೋ ಸತ್ತಾ ವಿಮುಚ್ಚನ್ತು, ದುಕ್ಖಧಮ್ಮೇಹಿ ಸಬ್ಬಥಾ;

ಸಾಧು ಸಮೇನ್ತುಪಾಯಾಸಾ, ಸೋಕಾ ಚ ಪರಿದೇವನಾ.

೧೩೬೪. ‘‘ಖೀಯನ್ತು ಪಾಪಧಮ್ಮಾ ಚ, ಪಸ್ಸಮ್ಭೇನ್ತಾಮಯಾ ತಥಾ;

ಸಂಕ್ಲೇಸಾ ಪಲಿಬೋಧಾ ಚ, ಸಮುಚ್ಛಿಜ್ಜನ್ತು ಪಾಣಿನಂ.

೧೩೬೫. ‘‘ಬ್ಯಾಪಾದಾ ಚ ವಿಹಾಯನ್ತು, ವಿನಿವತ್ತನ್ತುಪದ್ದವಾ;

ಬ್ಯಸನಾನಿ ವಿನಸ್ಸನ್ತು, ವಿಗಚ್ಛನ್ತು ವಿಪತ್ತಿಯೋ.

೧೩೬೬. ‘‘ವಿಹೇಸಾ ಚ ವಿಘಾತಾ ಚ, ಖೀಯನ್ತು ಭಯಭೇರವಾ;

ಪಟಿಕ್ಕಮನ್ತು ವಿಸ್ಸಟ್ಠಾ, ಸೋತ್ಥಿಂ ಪಸ್ಸನ್ತು ಪಾಣಿನೋ’’.

೧೩೬೭. ಇಚ್ಚೇವಮನುಕಮ್ಪನ್ತೋ, ಸಬ್ಬಸತ್ತೇಪಿ ಸಬ್ಬಥಾ;

ಸಬ್ಬದುಕ್ಖಸಮುಗ್ಘಾತಂ, ಪತ್ಥೇನ್ತೋ ಕರುಣಾಯತಿ.