೯. ನವಮೋ ಪರಿಚ್ಛೇದೋ

ದಸಾನುಸ್ಸತಿವಿಭಾಗೋ

೧೧೦೦. ಸದ್ಧಾಪಬ್ಬಜಿತೋ ಯೋಗೀ, ಭಾವೇನ್ತೋನುಸ್ಸತಿಂ ಪನ;

ದಸಾನುಸ್ಸತಿಭೇದೇಸು, ಭಾವೇಯ್ಯಞ್ಞತರಂ ಕಥಂ.

೧೧೦೧. ಅರಹಂ ಸುಗತೋ ಲೋಕೇ, ಭಗವಾ ಲೋಕಪಾರಗೂ;

ವಿಜ್ಜಾಚರಣಸಮ್ಪನ್ನೋ, ವಿಮುತ್ತಿಪರಿನಾಯಕೋ.

೧೧೦೨. ಜೇಟ್ಠೋ ಸಮ್ಮಾಭಿಸಮ್ಬುದ್ಧೋ, ಸೇಟ್ಠೋ ಪುರಿಸಸಾರಥೀ;

ಸತ್ಥಾ ದೇವಮನುಸ್ಸಾನಂ, ಬುದ್ಧೋ ಅಪ್ಪಟಿಪುಗ್ಗಲೋ.

೧೧೦೩. ಸಬ್ಬಲೋಕಹಿತೋ ಬನ್ಧು, ಸಮತ್ತರತನಾಲಯೋ;

ಸತ್ತಾನಮನುಕಮ್ಪಾಯ, ಜಾತೋ ನಾಥೋ ಸಿವಂಕರೋ.

೧೧೦೪. ಚಕ್ಖುಮಾ ತಿತ್ಥಕುಸಲೋ, ಧಮ್ಮಸ್ಸಾಮೀ ತಥಾಗತೋ;

ಮಚ್ಚುಧೇಯ್ಯವಿಮೋಕ್ಖಾಯ, ಪಟಿಪಾದಯಿ ಪಾಣಿನೋ.

೧೧೦೫. ಸತ್ಥವಾಹೋ ಮಹಾಯೋಗ್ಗೋ, ಮಗ್ಗಾಮಗ್ಗಯುಧನ್ಧರೋ;

ಸಿರಿಸತ್ಥಮಧಿಗ್ಗಯ್ಹ, ವಿಚರಿತ್ಥ ಮಹಾಪಥಂ,

೧೧೦೬. ಅನೋಮೋ ಅಸಮೋ ಧೀರೋ,

ಲೋಕಹೀತಪರಕ್ಕಮೋ;

ಸಬ್ಬಾಕಾರವರೋಪೇತೋ,

ಅಚ್ಛೇರಬ್ಭುತಪುಗ್ಗಲೋ.

೧೧೦೭. ಅತ್ಥಭೂತೋ ಧಮ್ಮಭೂತೋ,

ಬ್ರಹ್ಮಭೂತೋ ಮಹಾಯಸೋ;

ಞಾಣಾಲೋಕಪರಿಚ್ಛಿನ್ನ-

ಞೇಯ್ಯಾಸೇಸಪರಿಗ್ಗಹೋ.

೧೧೦೮. ಆನುಭಾವವಸಿಪ್ಪತ್ತೋ, ಆಸಭಣ್ಡಾನನಿಚ್ಚಲೋ;

ಮಹನ್ತಮರಿಯಾದೋಯಮನನ್ತಗತಿಗೋಚರೋ.

೧೧೦೯. ಸಬ್ಬಾ ಭಿಞ್ಞಾಬಲಪ್ಪತ್ತೋ, ವೇಸಾರಜ್ಜವಿಸಾರದೋ;

ಸಬ್ಬಸಮ್ಪತ್ತಿನಿಟ್ಠಾನೋ, ಗುಣಪಾರಮಿಪೂರಕೋ.

೧೧೧೦. ಅಪ್ಪಮೇಯ್ಯೋ ಮಹಾನಾಗೋ, ಮಹಾವೀರೋ ಮಹಾಮುನಿ;

ಮಹೇಸೀ ಮಹಿತಾಚಾರೋ, ಮಹಾಮಹೋ ಮಹಿದ್ಧಿಕೋ.

೧೧೧೧. ಸಬ್ಬತ್ಥಸಿದ್ಧಿಸಞ್ಚಾರೋ, ಮಹೇಸೀಗಣಪೂಜಿತೋ;

ರಾಜಾಧಿರಾಜಮಹಿತೋ, ದೇವಬ್ರಹ್ಮಾಭಿವನ್ದಿತೋ.

೧೧೧೨. ಅಭಿಭೂಯ ತಯೋ ಲೋಕೇ, ಆದಿಚ್ಚೋವ ನಭನ್ತರೇ;

ವಿರೋಚತಿ ಮಹಾತೇಜೋ, ಅನ್ಧಕಾರೇ ಪಭಙ್ಕರೋ.

೧೧೧೩. ಬ್ಯಾಮಪ್ಪಭಾಪರಿಕ್ಖಿತ್ತೋ, ಕೇತುಮಾಲಾಹಲಙ್ಕತೋ;

ದ್ವತ್ತಿಂಸಲಕ್ಖಣಾಸೀತಿಅನುಬ್ಯಞ್ಜನಸೋಭಿತೋ.

೧೧೧೪. ಛಬ್ಬಣ್ಣರಂಸಿಲಲಿತೋ, ರತನಗ್ಘಿಯಸನ್ನಿಭೋ;

ಸಮಿದ್ಧಿರೂಪಸೋಭಗ್ಗೋ, ದಸ್ಸನೇಯ್ಯಂವ ಪಿಣ್ಡಿತಂ.

೧೧೧೫. ಫುಲ್ಲಂ ಪದುಮಸಣ್ಡಂವ, ಕಪ್ಪರುಕ್ಖೋವಲಙ್ಕತೋ;

ನಭಂವ ತಾರಕಾಕಿಣ್ಣಂ, ಉತ್ತಮೋ ಪಟಿದಿಸ್ಸತಿ.

೧೧೧೬. ಸತ್ಥುಕಪ್ಪಮಹಾವೀರಪುತ್ತೇಹಿ ಪರಿವಾರಿತೋ;

ಸಬ್ಬಲೋಕಮಹಿದ್ಧಾಯ, ಧಮ್ಮರಾಜಾ ಸಯಂವಸೀ.

೧೧೧೭. ನಿದ್ಧೋತಮಲಚನ್ದೋವ, ನಕ್ಖತ್ತಪರಿವಾರಿತೋ;

ಖತ್ತಸಙ್ಘಪರಿಬ್ಯುಳ್ಹೋ, ಚಕ್ಕವತ್ತೀವ ಸೋಭತಿ.

೧೧೧೮. ಇಚ್ಚಾನನ್ತಗುಣಾಕಿಣ್ಣಮಸೇಸಮಲನಿಸ್ಸಟಂ;

ಸಬ್ಬಸಮ್ಪತ್ತಿದಾತಾರಂ, ವಿಪತ್ತಿವಿನಿಬನ್ಧಕಂ.

೧೧೧೯. ದಯಾಪರಮಹೋರತ್ತಂ, ಭಗವನ್ತಮನುಸ್ಸರಂ;

ಭಾವೇತಿ ಪಞ್ಞವಾ ಯೋಗೀ, ಬುದ್ಧಾನುಸ್ಸತಿಭಾವನಂ.

೧೧೨೦. ಸ್ವಾಖಾತೋ ತೇನ ಸದ್ಧಮ್ಮೋ, ಸಮ್ಬುದ್ಧೇನ ಸತೀಮತಾ;

ಪಚ್ಚತ್ತಪಟಿವೇಧೇನ, ಪಸ್ಸಿತಬ್ಬೋ ಯಥಾರಹಂ.

೧೧೨೧. ತಣ್ಹಾದಲಿದ್ದನಾಸಾಯ, ಮನೋರಥಸಮಿದ್ಧಿಯಾ;

ಕಾಲನ್ತರಮನಾಗಮ್ಮ, ಪಚ್ಚಕ್ಖಫಲದಾಯಕೋ.

೧೧೨೨. ಉಪನಿಸ್ಸಯವನ್ತಾನಂ, ‘‘ಏಹಿ ಪಸ್ಸಾ’’ತಿ ದಸ್ಸಿಯೋ;

ಪಚ್ಚತ್ತಮೇವ ವಿಞ್ಞೂಹಿ, ವೇದಿತಬ್ಬೋ ಸಭಾವತೋ.

೧೧೨೩. ಸಬ್ಬಾಸವಸಮುಗ್ಘಾತೀ, ಸುದ್ಧೋ ಸೋವತ್ಥಿಕೋ ಸಿವೋ;

ಪಿಹಿತಾಪಾಯಕುಮ್ಮಗ್ಗೋ, ಮಗ್ಗೋ ನಿಬ್ಬಾನಪತ್ತಿಯಾ.

೧೧೨೪. ಕ್ಲೇಸಸಂಕಟದುಗ್ಗಮ್ಹಾ, ದುಕ್ಖಕ್ಖನ್ಧಮಹಬ್ಭಯಾ;

ಖೇಮನ್ತಭೂಮಿಂ ನಿಯ್ಯಾತಿ, ಅಚ್ಚನ್ತಮನುಪದ್ದವಂ.

೧೧೨೫. ಪುಞ್ಞತಿತ್ಥಮಿದಂ ನಾಮ, ಮಙ್ಗಲಞ್ಚ ಸಿವಙ್ಕರಂ;

ಹಿತೋದಯಸುಖಾಧಾನ-ಮಮತಾಹಾರಮುತ್ತಮಂ.

೧೧೨೬. ಅವಿಜ್ಜಾಪಟಲುದ್ಧಾರವಿಜ್ಜಾನೇತ್ತೋಸಧಂ ವರಂ;

ಪಞ್ಞಾಧಾರಮಿದಂ ಸತ್ಥಂ, ಕ್ಲೇಸಗಣ್ಡಪ್ಪಭೇದಕಂ.

೧೧೨೭. ಚತುರೋಘನಿಮುಗ್ಗಾನಂ, ಸೇತುಬನ್ಧೋ ಸಮುಗ್ಗತೋ;

ಭವಚಾರಕರುದ್ಧಾನಂ, ಮಹಾದ್ವಾರೋ ಅಪಾರುತೋ.

೧೧೨೮. ಸೋಕೋಪಾಯಾಸವಿದ್ಧಾನಂ, ಪರಿದೇವಸಮಙ್ಗಿನಂ;

ಸಲ್ಲನೀಹರಣೋಪಾಯೋ, ಅಚ್ಚನ್ತಸುಖಮೀರಿತೋ.

೧೧೨೯. ಬ್ಯಸನೋಪದ್ದವಾಪೇತೋ, ಸಂಕ್ಲೇಸಮಲನಿಸ್ಸಟೋ;

ಉಜುಸಮ್ಮತ್ತನಿಯತೋ, ಪಟಿಪತ್ತಿವಿಸುದ್ಧಿಯಾ.

೧೧೩೦. ಸುದ್ಧಸೀಲಪರಿಕ್ಖಾರೋ, ಸಮಾಧಿಮಯಪಞ್ಜರೋ;

ಸಮ್ಮಾಸಙ್ಕಪ್ಪಚಕ್ಕಙ್ಗೋ, ಸಮ್ಮಾವಾಯಾಮವಾಹನೋ.

೧೧೩೧. ಸತಿಸಾರಥಿಸಂಯುತ್ತೋ, ಸಮ್ಮಾದಿಟ್ಠಿಪುರೇಜವೋ;

ಏಸ ಧಮ್ಮರಥೋ ಯಾತಿ, ಯೋಗಕ್ಖೇಮಸ್ಸ ಪತ್ತಿಯಾ.

೧೧೩೨. ವಿಪತ್ತಿಪಟಿಬಾಹಾಯ, ಸಬ್ಬಸಮ್ಪತ್ತಿಸಿದ್ಧಿಯಾ;

ಸಬ್ಬಖನ್ಧವಿಮೋಕ್ಖಾಯ, ಧಮ್ಮಂ ದೇಸೇಸಿ ಚಕ್ಖುಮಾ.

೧೧೩೩. ಹಿತೇಸೀ ಸಬ್ಬಪಾಣೀನಂ, ದಯಾಪನ್ನೋ ಮಹಾಮುನಿ;

ಧಮ್ಮಾಲೋಕಂ ಪಕಾಸೇಸಿ, ಚಕ್ಖುಮನ್ತಾನಮುತ್ತಮೋ.

೧೧೩೪. ಯಂ ಧಮ್ಮಂ ಸಮ್ಮದಞ್ಞಾಯ, ಖೇಮಮಗ್ಗಪ್ಪತಿಟ್ಠಿತಾ;

ಪಾಪಕಾಪಗತಾ ಧೀರಾ, ಪಸ್ಸದ್ಧಿದರಥಾಸಯಾ.

೧೧೩೫. ಭವಯೋಗಾ ವಿನಿಮುತ್ತಾ, ಪಹೀನಭಯಭೇರವಾ;

ಅಚ್ಚನ್ತಸುಖಮೇಧೇನ್ತಿ, ಸೋತ್ಥಿಪತ್ತಾ ಮಹೇಸಯೋ.

೧೧೩೬. ತಮೇವಮುತ್ತಮಂ ಧಮ್ಮಂ, ಚಿನ್ತೇನ್ತೋ ಪನ ಪಣ್ಡಿತೋ;

ಭಾವೇತೀತಿ ಪಕಾಸೇನ್ತಿ, ಧಮ್ಮಾನುಸ್ಸತಿಭಾವನಂ.

೧೧೩೭. ಚತ್ತಾರೋ ಚ ಪಟಿಪನ್ನಾ, ಚತ್ತಾರೋ ಚ ಫಲೇ ಠಿತಾ;

ಏಸ ಸಙ್ಘೋ ಉಜುಭೂತೋ, ಪಞ್ಞಾಸೀಲಸಮಾಹಿತೋ.

೧೧೩೮. ಪಲಾಪಾಪಗತೋ ಸುದ್ಧೋ, ಪಟಿಪತ್ತಿಪತಿಟ್ಠಿತೋ;

ಪರಿಗ್ಗಹಿತಸದ್ಧಮ್ಮೋ, ಸಮಿದ್ಧಿಗುಣಸೋಭಿತೋ.

೧೧೩೯. ಪಹೀನಾಪಾಯಗಮನೋ, ಪಾಪಕ್ಲೇಸವಿನಿಸ್ಸಟೋ;

ಪರಿಪನ್ಥಸಮುಚ್ಛೇದೀ, ಭವಚಾರಕಭೇದಕೋ.

೧೧೪೦. ಉತ್ತಮದಮಥಪ್ಪತ್ತೋ, ಸುವಿನೀತೋ ಮಹೇಸಿನಾ;

ವಿಜ್ಜಾವಿಮುತ್ತಿವೋದಾತೋ, ಆಜಾನೀಯಪಥೇ ಠಿತೋ.

೧೧೪೧. ಸುಗತೋರಸಿ ಸಮ್ಭೂತೋ, ಸುಚಿಧಮ್ಮಸಿರಿನ್ಧರೋ;

ಪಟಿಪಾದಿತಸಮ್ಪತ್ತೋ, ಧಮ್ಮಸಾಸನಸೇವಿತೋ.

೧೧೪೨. ಭಯಭೇರವನಿಸ್ಸಙ್ಗೋ, ಜಿನತೇಜಾನುಪಾಲಿತೋ;

ಮೋನೇಯ್ಯಪಥಸಞ್ಚಾರೋ, ಸುಗತೋವಾದಭಾಜನೋ.

೧೧೪೩. ಅಪ್ಪಮಾದಪರಿತ್ತಾಣೋ, ಸೀಲಾಲಙ್ಕಾರಭೂಸಿತೋ;

ಚೇತೋಸಮಾಧಿಸನ್ನದ್ಧೋ, ಪಞ್ಞಾಯುಧಸಮುಜ್ಜಲೋ.

೧೧೪೪. ಉಜುಮಗ್ಗಮಧಿಟ್ಠಾಯ, ಮಾರಕಾಯಪ್ಪದಾಲನೋ;

ಅಪರಾಜಿತಸಙ್ಗಾಮೋ, ಲಲಿತೋದಾತವಿಕ್ಕಮೋ.

೧೧೪೫. ಮಚ್ಚುಧೇಯ್ಯಮತಿಕ್ಕನ್ತೋ, ಬೋಧಿಧಮ್ಮಪ್ಪತಿಟ್ಠಿತೋ;

ಛಳಾಭಿಞ್ಞಾಬಲಪ್ಪತ್ತೋ, ಸಮಾರಾಧಿತಸಾಸನೋ.

೧೧೪೬. ಅನುಬೋಧಿಮನುಪ್ಪತ್ತೋ, ಪಭಿನ್ನಪಟಿಸಮ್ಭಿದೋ;

ಸಾಮಞ್ಞಪಾರಮಿಪ್ಪತ್ತೋ, ತೋಸೇತಿ ಜಿನಮಾನಸಂ.

೧೧೪೭. ನೇಕಾಕಾರವರೂಪೇತೋ, ನಾನಾಸಮ್ಪತ್ತಿಫುಲ್ಲಿತೋ;

ವಿಪತ್ತಿಪಥನಿತ್ತಿಣ್ಣೋ, ಅಭಿಬುದ್ಧಿಪರಾಯಣೋ.

೧೧೪೮. ಆಹುನೇಯ್ಯೋ ಪಾಹುನೇಯ್ಯೋ,

ದಕ್ಖಿಣೇಯ್ಯೋ ಸುದುಲ್ಲಭೋ;

ಸದೇವಕಸ್ಸ ಲೋಕಸ್ಸ,

ಪುಞ್ಞಕ್ಖೇತ್ತಮನುತ್ತರಂ.

೧೧೪೯. ಯತ್ಥ ಸುದ್ಧಿಮ್ಹಿ ನಿದ್ದೋಸೇ, ಸದ್ಧಾಬೀಜಂ ಪತಿಟ್ಠಿತಂ;

ಅಚ್ಚನ್ತಂ ಪರಿಪಾಚೇತಿ, ಸಮ್ಪತ್ತಿಫಲಮುತ್ತಮಂ.

೧೧೫೦. ಯಂ ಫಲಂ ಪರಿಭುಞ್ಜನ್ತಾ, ವಿಮುತ್ತಿರಸಸೇವನಂ;

ಅಚ್ಚನ್ತಸುಖಿತಾ ಧೀರಾ, ಭವನ್ತಿ ಅಜರಾಮರಾ.

೧೧೫೧. ತಂ ಫಲಂ ಪತ್ಥಯನ್ತೇನ, ಸಙ್ಘಾನುಸ್ಸತಿಭಾವನಾ;

ಭಾವೇತಬ್ಬಾ ಪನಿಚ್ಚೇವಮಿತಿ ಭಾಸನ್ತಿ ಪಣ್ಡಿತಾ.

೧೧೫೨. ಪಞ್ಚಸೀಲಂ ದಸಸೀಲಂ, ಪಾತಿಮೋಕ್ಖಮುಪೋಸಥಂ;

ಚಾತುಪಾರಿಸುದ್ಧಿಸೀಲಂ, ಧುತಙ್ಗಪರಿವಾರಿತಂ.

೧೧೫೩. ಏವಮೇತೇಸು ಯಂ ಕಿಞ್ಚಿ, ಸಮಾದಾಯ ರಹೋಗತೋ;

ತಮಾನಿಸಂಸಂ ಗುಣತೋ, ಫಲತೋ ಚ ವಿಚಿನ್ತಯೇ.

೧೧೫೪. ಆದಿ ಚೇತಂ ಪತಿಟ್ಠಾ ಚ, ಮುಖಂ ಪಮುಖಮುತ್ತಮಂ;

ಮೂಲಂ ಕುಸಲಧಮ್ಮಾನಂ, ಪಭವಂ ಪಟಿಪತ್ತಿಯಾ.

೧೧೫೫. ಸಾಸನೋತರಣದ್ವಾರಂ, ತಿತ್ಥಂ ಸದ್ಧಮ್ಮವಾಪಿಯಾ;

ಪಾರಿಸುದ್ಧಿಪದಟ್ಠಾನಂ, ಮಗ್ಗೋ ಖೇಮನ್ತಪಾಪಕೋ.

೧೧೫೬. ಸಾಧು ಸಿಕ್ಖಾಸಮಾದಾನಂ, ಬಾಹುಸಚ್ಚವಿಭೂಸನಂ;

ಅರಿಯಾಚಾರಚಾರಿತ್ತ-ಮವಣ್ಣಮಲವಜ್ಜನಂ.

೧೧೫೭. ಕುಲಪುತ್ತಅಲಙ್ಕಾರೋ, ಪಾಪಜಲ್ಲಪವಾಹನಂ;

ಅನಪಾಯಿ ಸುಗನ್ಧಞ್ಚ, ಮಹಾಪುರಿಸಸೇವಿತಂ.

೧೧೫೮. ಪಚ್ಛಾನುತಾಪಹರಣಂ, ಪೀತಿಪಾಮೋಜ್ಜವಡ್ಢನಂ;

ನೇಕ್ಖಮ್ಮಭಾವನೋಪೇತಂ, ಪಬ್ಬಜ್ಜಾವೇಸಸೋಭನಂ.

೧೧೫೯. ಸೋಪಾನಂ ಸಗ್ಗಲೋಕಸ್ಸ, ದಳ್ಹಾಪಾಯವಿಧಾನಕಂ;

ಅನುಪದ್ದವಸಮ್ಪತ್ತಿ, ಸಮತ್ಥಗುಣಸೂದನೀ.

೧೧೬೦. ಕ್ಲೇಸಪಞ್ಜರವಿಚ್ಛೇದಿ, ವಿಪತ್ತಿಪಥವಾರಣಂ;

ಸೋತ್ಥಿಕಮ್ಮಸಮುಟ್ಠಾನಂ, ಅಸಾಧಾರಣಮಙ್ಗಲಂ.

೧೧೬೧. ‘‘ಸುಲದ್ಧಾ ವತ ಮೇ ಲದ್ಧಾ, ಸದ್ಧಾ ಸುಗತಸಾಸನೇ;

ಸೀಲಂ ಮೇ ಯಸ್ಸ ಕಲ್ಯಾಣಂ, ಪರಿಸುದ್ಧಮಖಣ್ಡಿತಂ.

೧೧೬೨. ‘‘ದುಲ್ಲಭೋ ವತ ಮೇ ಲದ್ಧೋ,

ಮಹಾಲಾಭೋ ಅನಪ್ಪಕೋ;

ಯೋಹಮಕ್ಖಲಿತಾಚಾರೋ,

ಉಪಘಾತವಿವಜ್ಜಿತೋ.

೧೧೬೩. ‘‘ಧಮ್ಮಙ್ಕುರಿತಸನ್ತಾನೋ, ಮೂಲಜಾತೋಸ್ಮಿ ಸಾಸನೇ;

ಉಜುಮಗ್ಗಂ ಸಮಾರುಳ್ಹೋ, ಪಿಹಿತಾ ಸಭಯಾ ದಿಸಾ.

೧೧೬೪. ‘‘ಅವಞ್ಚಾ ವತ ಮೇ ಜಾತಿ, ಆರದ್ಧಾ ಖಣಸಮ್ಪದಾ;

ಪತಿಟ್ಠಿತೋಮ್ಹಿ ಸದ್ಧಮ್ಮೇ, ಸಫಲಂ ಮಮ ಜೀವಿತಂ’’.

೧೧೬೫. ಇತ್ಥಂ ನಾನಪ್ಪಕಾರೇನ, ಚಿನ್ತೇನ್ತೋ ಗುಣಮತ್ತನೋ;

ಸೀಲಕ್ಖನ್ಧಸ್ಸ ಭಾವೇತಿ, ಸೀಲಾನುಸ್ಸತಿಭಾವನಂ.

೧೧೬೬. ಸದ್ಧಾಯ ಸೀಲವನ್ತೇಸು, ದತ್ವಾ ದಾನಂ ಯಥಾರಹಂ;

ನಿದ್ಧೋತಮಲಮಚ್ಛೇರೋ, ವಿವಿತ್ತೋ ತಮನುಸ್ಸರೇ.

೧೧೬೭. ದಾನಂ ನಿಧಾನಮನುಗಂ, ಅಸಾಧಾರಣಮುತ್ತಮಂ;

ಅವಿನಾಸಸುಖಾಧಾನಂ, ಅಚ್ಚನ್ತಂ ಸಬ್ಬಕಾಮದಂ.

೧೧೬೮. ಕೋಪದಾಹೋಪಸಮನಂ, ಮಚ್ಛೇರಮಲಸೋಧನಂ;

ಪಮಾದನಿದ್ದಾವುಟ್ಠಾನಂ, ಲೋಭಪಾಸವಿಮೋಚನಂ.

೧೧೬೯. ಚೇತೋವಿಕಾರದಮನಂ, ಮಿಚ್ಛಾಮಗ್ಗನಿವಾರಣಂ;

ವಿತ್ತಿಲಾಭಸುಖಸ್ಸಾದೋ, ವಿಭವೋದಯಮಙ್ಗಲಂ.