೮. ಅಟ್ಠಮೋ ಪರಿಚ್ಛೇದೋ

ಕಸಿಣಾಸುಭವಿಭಾಗೋ

೮೮೦. ಇತೋ ಪರಂ ಪವಕ್ಖಾಮಿ, ಭಾವನಾನಯಮುತ್ತಮಂ;

ನಾಮರೂಪಂ ಪರಿಗ್ಗಯ್ಹ, ಪಟಿಪಜ್ಜಿತುಮೀಹತೋ.

೮೮೧. ಭಾವನಾ ದುವಿಧಾ ತತ್ಥ, ಸಮಥೋ ಚ ವಿಪಸ್ಸನಾ;

ಸಮಥೋ ದುವಿಧೋ ತತ್ಥ, ಪರಿತ್ತೋ ಚ ಮಹಗ್ಗತೋ.

೮೮೨. ಉಪಚಾರಮನುಪ್ಪತ್ತೋ, ಪರಿತ್ತೋತಿ ಪವುಚ್ಚತಿ;

ಮಹಗ್ಗತಪ್ಪನಾಪತ್ತೋ, ಸಮಥೋ ಲೋಕಿಯೋ ಮತೋ.

೮೮೩. ಕಸಿಣಾನಿ ದಸಾಸುಭಾ, ದಸಧಾನುಸ್ಸತೀ ತಥಾ;

ಅಪ್ಪಮಞ್ಞಾ ಚ ಸಞ್ಞಾ ಚ, ವವತ್ಥಾರುಪ್ಪಕಾನಿ ಚ.

೮೮೪. ಕಮ್ಮಟ್ಠಾನಾನಿ ತತ್ಥಾಹು, ಚತ್ತಾಲೀಸ ವಿಚಕ್ಖಣಾ;

ಯತ್ಥಾನುಯೋಗಂ ಕುಬ್ಬನ್ತಾ, ಭಾವೇನ್ತಿ ಸಮಥದ್ವಯಂ.

೮೮೫. ತಂ ಪಯೋಗವಿಸುದ್ಧೇನ, ಪತ್ವಾನೋಪಾಯಸಮ್ಪದಂ;

ಅಜ್ಝಾಸಯಂ ವಿಸೋಧೇತ್ವಾ, ಭಾವೇತಬ್ಬನ್ತಿ ಭಾಸಿತಂ.

೮೮೬. ಕಥಂ ಕರೋನ್ತೋ ಚಾರಿತ್ತಂ, ವಾರಿತ್ತಞ್ಚ ವಿವಜ್ಜಿಯ;

ಪಾತಿಮೋಕ್ಖಂ ಸಮಾದಾಯ, ಸದ್ಧಾಯ ಪರಿಪೂರಯೇ.

೮೮೭. ಪಟಿಸಙ್ಖಾಯ ಸೋಧೇತ್ವಾ, ಛದ್ವಾರೇಸು ಮಲಾಸವಂ;

ಛಳಿನ್ದ್ರಿಯಾನಿ ಮೇಧಾವೀ, ಸತಾರಕ್ಖೇನ ಗೋಪಯೇ.

೮೮೮. ಪಾಪಕಾಜೀವನಿಸ್ಸಙ್ಗೋ, ಕುಹಕಾಚಾರನಿಸ್ಸಟೋ;

ಆಜೀವಂ ಪರಿಸೋಧೇಯ್ಯ, ಪಹಿತತ್ತೇಟ್ಠಿಸುದ್ಧಿಯಾ.

೮೮೯. ಇದಮತ್ಥಿತಮಾರಬ್ಭ, ಪಟಿಸಙ್ಖಾಯ ಯೋನಿಸೋ;

ಪಞ್ಞವಾ ಸಮ್ಪಜಞ್ಞೇನ, ಪರಿಭುಞ್ಜೇಯ್ಯ ಪಚ್ಚಯೇ.

೮೯೦. ಸಂವರಂ ಪಾತಿಮೋಕ್ಖೇ ಚ, ಸೀಲಮಿನ್ದ್ರಿಯಸಂವರಂ;

ಆಜೀವಪಾರಿಸುದ್ಧಿಞ್ಚ, ತಥಾ ಪಚ್ಚಯನಿಸ್ಸಿತಂ.

೮೯೧. ಸಮಾದಾಯ ಚತುದ್ಧೇವ-ಮಧಿಟ್ಠೇಯ್ಯ ತತೋ ಪರಂ;

ತಸ್ಸೇವ ಪರಿವಾರಾಯ, ಧುತಙ್ಗಾನಿ ಯಥಾರಹಂ.

೮೯೨. ಪಂಸುಕೂಲಿಕಮಙ್ಗಂ ತಿ-ಚೀವರಂ ಚೀವರಾಯುಗಂ;

ಪಿಣ್ಡಪಾತಿಕಮಙ್ಗಞ್ಚ, ಸಪದಾನಿಕಮುತ್ತಮಂ.

೮೯೩. ಖಲುಪಚ್ಛಾಭತ್ತಿಕಙ್ಗಂ, ಧುತಙ್ಗಂ ಪತ್ತಪಿಣ್ಡಿಕಂ;

ಏಕಾಸನಿಕಮಿಚ್ಚೇವಂ, ಪಞ್ಚಧಾ ಭೋಜನೇ ಠಿತಂ.

೮೯೪. ಆರಞ್ಞಿಕಂ ಯಥಾಸನ್ಥ-

ತಿಕಙ್ಗಂ ರುಕ್ಖಮೂಲಿಕಂ;

ಅಬ್ಭೋಕಾಸಿಕಸೋಸಾನಿ-

ಕಙ್ಗಾ ನೇಸಜ್ಜಿಕಂ ತಥಾ.

೮೯೫. ಛ ಸೇನಾಸನಮಾರಬ್ಭ, ಧುತಙ್ಗಾನೀತಿ ತೇರಸ;

ಕಪ್ಪಿಯೇಪಿ ಚ ಲೋಲುಪ್ಪ-ಸಮಾಚಾರವಿಮುತ್ತಿಯಾ.

೮೯೬. ಸಾಮೀಚಿಪಟಿಪತ್ತೀತಿ, ಕತ್ವಾ ಸಲ್ಲೇಖವುತ್ತಿಯಾ;

ಪಚ್ಚಯತ್ತಯಮಾಹಚ್ಚ, ಪಞ್ಞತ್ತಾನಿ ಮಹೇಸಿನಾ.

೮೯೭. ಚತುಪಾರಿಸುದ್ಧಿಸೀಲಂ, ಧುತಙ್ಗಪರಿವಾರಿತಂ;

ಪೂರೇತ್ವಾನ ವಿಸುದ್ಧೇವಂ, ಪಯೋಗಪರಿಸುದ್ಧಿಯಾ.

೮೯೮. ತತೋ ಪಣಿಧಿಸಮ್ಪನ್ನೋ, ಭಾವನಾಯ ವಿಸಾರದೋ;

ಉಪಾಯಂ ಪಟಿಪಾದೇಯ್ಯ, ಪವಿವೇಕರತೋ ಕಥಂ?

೮೯೯. ಆವಾಸೋ ಚ ಕುಲಂ ಲಾಭೋ,

ಗಣೋ ಕಮ್ಮಞ್ಚ ಪಞ್ಚಮಂ;

ಅದ್ಧಾನಂ ಞಾತಿ ಆಬಾಧೋ,

ಗನ್ಥೋ ಇದ್ಧೀತಿ ತೇ ದಸ.

೯೦೦. ಛೇತ್ವಾನ ನಿಪಕೋ ಯೋಗೀ,

ಪಲಿಬೋಧೇ ಯಥಾರಹಂ;

ನಿರಾಲಯೋ ನಿರಾರಮ್ಭೋ,

ಪಪಞ್ಚೋಪಸಮೇ ರತೋ.

೯೦೧. ಪಿಯಂ ಗರುಂ ಭಾವನಿಯಂ, ವತ್ತಾರಂ ವಚನಕ್ಖಮಂ;

ಕತ್ತಾರಮತಿಗಮ್ಭೀರಕಥಂ ಠಾನನಿಯೋಜಕಂ.

೯೦೨. ಬಹುಸ್ಸುತಂ ಗುಣವನ್ತ-ಮಾಗಮ್ಮಾಚರಿಯಂ ಬುಧೋ;

ಖಮೋ ಪದಕ್ಖಿಣಗ್ಗಾಹೀ, ನಿಯ್ಯಾತತ್ತುಜು ಭದ್ರಕೋ.

೯೦೩. ಆರಾಧೇತ್ವಾನ ಗಣ್ಹೇಯ್ಯ, ತಂ ಕಮ್ಮಟ್ಠಾನದಾಯಕಂ;

ಕಮ್ಮಟ್ಠಾನಂ ಪರಿಕ್ಖಿತ್ವಾ, ಚರಿಯಾರಹಮತ್ತನೋ.

೯೦೪. ರಾಗೋ ದೋಸೋ ಚ ಮೋಹೋ ಚ,

ಚರಿಯಾ ತೀಹಿ ಪಣ್ಡಿತಾ;

ಸದ್ಧಾಬುದ್ಧಿವಿತಕ್ಕೇಹಿ,

ಛಬ್ಬಿಧಾ ಚ ವಿಭಾವಯುಂ.

೯೦೫. ರಾಗುಸ್ಸನ್ನಸ್ಸ ಸಪ್ಪಾಯಾ, ಕೋಟ್ಠಾಸಾಸುಭಭಾವನಾ;

ದೋಸುಸ್ಸನ್ನಸ್ಸಪ್ಪಮಞ್ಞಾ, ನೀಲಾದಿ ಚ ಚತುಬ್ಬಿಧಾ.

೯೦೬. ವಿತಕ್ಕಂ ಮೋಹುಸ್ಸನ್ನಾನಂ, ಆನಾಪಾನಂ ಪಕಾಸಿತಂ;

ಛ ಸದ್ಧಾಚರಿತಸ್ಸಾಹು, ಬುದ್ಧಾನುಸ್ಸತಿಆದಯೋ.

೯೦೭. ಮರಣೋಪಸಮಾಸಞ್ಞಾವವತ್ಥಾನಾನಿ ಬುದ್ಧಿನೋ;

ಸೇಸಾನಿ ಪನ ಸಬ್ಬೇಸಂ, ತತ್ಥಾಪಿ ಕಸಿಣಂ ಬುಧಾ.

೯೦೮. ವಿತಕ್ಕಪಕತಿಕಸ್ಸ, ಪರಿತ್ತಂ ಮೋಹಚಾರಿನೋ;

ಮಹನ್ತಮಿತಿ ಸಪ್ಪಾಯಂ, ಗಹೇತ್ವಾನ ತತೋ ಪರಂ.

೯೦೯. ಮಹಾವಾಸಂ ನವಂ ಜಿಣ್ಣಂ, ಪನ್ಥಸೋಣ್ಡಿಕಸನ್ತಿಕಂ;

ಪಣ್ಣಪುಪ್ಫಫಲಾಕಿಣ್ಣಂ, ಬಹುಸಮ್ಮಾನಪತ್ಥಿತಂ.

೯೧೦. ಸೀಮನ್ತದಾರುನಗರ-ಕ್ಖೇತ್ತಪಚ್ಚನ್ತನಿಸ್ಸಿತಂ;

ವಿಸಭಾಗಮಸಪ್ಪಾಯಂ, ಪಟ್ಟನಂ ಮಿತ್ತದುಲ್ಲಭಂ.

೯೧೧. ಠಾನಾನಿಟ್ಠಾರಸೇತಾನಿ, ಪರಿವಜ್ಜೇಯ್ಯ ಪಣ್ಡಿತೋ;

ಸೇವೇಯ್ಯ ಭಾವನಾಯೋಗ್ಗಂ, ಸೇನಾಸನಮತನ್ದಿತೋ.

೯೧೨. ನಾತಿದೂರಂ ನಾಚ್ಚಾಸನ್ನಂ, ಅಪ್ಪಸದ್ದಮನಾಕುಲಂ;

ಗಮನಾಗಮನಸಮ್ಪನ್ನಂ, ಅಪ್ಪಡಂಸಾನುಪದ್ದವಂ.

೯೧೩. ಅಕಿಚ್ಛಪಚ್ಚಯುಪ್ಪಾದಂ, ಲಜ್ಜೀಭಿಕ್ಖುಗಣೋಚಿತಂ;

ವಿವೇಕಟ್ಠಾನಬಹುಲಂ, ಬಹುಸ್ಸುತನಿಸೇವಿತಂ.

೯೧೪. ಅಪ್ಪಭಯಂ ನಿರಾಸಙ್ಕಂ, ಅಪ್ಪದೋಸಂ ಮಹಾಗುಣಂ;

ವಿಹಾರಮನುಸೇವನ್ತೋ, ತತ್ಥ ನಿಸ್ಸಙ್ಗಚೇತಸಾ.

೯೧೫. ತತೋ ಕೇಸನಖಚ್ಛೇದ-ರಜನಾದಿಮಸೇಸತೋ;

ಖುದ್ದಕಂ ಪಲಿಬೋಧಞ್ಚ, ಛಿನ್ದಿತ್ವಾನ ಯಥಾರಹಂ.

೯೧೬. ಆವಾಸಂ ಗೋಚರಂ ಭಸ್ಸಂ, ಪುಗ್ಗಲಂ ಭೋಜನಂ ತಥಾ;

ವಜ್ಜೇನ್ತೋತುಮಸಪ್ಪಾಯಂ, ಇರಿಯಾಪಥಮತ್ತನೋ.

೯೧೭. ಸೇವನ್ತೋ ಸತ್ತ ಸಪ್ಪಾಯೇ, ತೇ ಏವಾತಿ ಪಧಾನವಾ;

ಭಾವನೂಪಾಯಸಮ್ಪನ್ನೋ, ವೂಪಕಟ್ಠೋ ರಹೋಗತೋ.

೯೧೮. ಕಾಮೇಸ್ವಾದೀನವಂ ದಿಸ್ವಾ, ನೇಕ್ಖಮ್ಮಂ ದಟ್ಠು ಖೇಮತೋ;

ಪರಿಯುಟ್ಠಾನನಿಬ್ಬಿನ್ದೋ, ಸೋಧೇಯ್ಯಜ್ಝಾಸಯಂ ಕಥಂ.

೯೧೯. ಅಪ್ಪಸ್ಸಾದಾ ಮಹಾದುಕ್ಖಾ, ಕಾಮಾ ಹಿ ಕಟುಕಪ್ಫಲಾ;

ದುಸ್ಸಂಹಾರಾ ದುರಾರಕ್ಖಾ, ಬಹ್ವಾದೀನವಸಣ್ಠಿತಾ.

೯೨೦. ಅಟ್ಠಿಕಾ ಖಜ್ಜಮಾನಾವ, ವಿಘಾತಾಯ ಪಭಿಜ್ಜಿತಾ;

ಗಯ್ಹನ್ತತ್ತವಧಾಯೇತೇ, ಮಂಸಪೇಸೀವ ಪಕ್ಖಿಭಿ.

೯೨೧. ಪಟಿವಾತೇ ತಿಣುಕ್ಕಾವ, ಪರಿಗ್ಗಾಹಕದಾಹಿನೋ;

ಅಙ್ಗಾರಕಾಸುಸಙ್ಕಾಸಾ, ಸಬ್ಬಙ್ಗಪರಿತಾಸಕಾ.

೯೨೨. ಸುಪಿನೇ ಪರಿಭುತ್ತಾವ, ನಾಲಂ ಕಸ್ಸಚಿ ತಿತ್ತಿಯಾ;

ನ ತು ಕಸ್ಸಚಿ ಅಚ್ಚನ್ತಾ, ಅಲಙ್ಕಾರಾವ ಯಾಚಿತಾ.

೯೨೩. ಛಜ್ಜನ್ತಾ ಫಲರುಕ್ಖಾವ, ಪಟಿಪನ್ನಪಭಞ್ಜಿನೋ;

ಅಸಿಸೂನೂಪಮಾ ನಿಚ್ಚ-ಮಧಿಕೋಟ್ಟೇನ್ತಿ ಪಾಣಿನೋ.

೯೨೪. ಸತ್ತಿಸೂಲೂಪಮಾ ದಳ್ಹಂ, ತಣ್ಹಾಸಲ್ಲಾನುವೇಧಿನೋ;

ಘೋರಾನತ್ಥವಿಸಾಕಿಣ್ಣಾ, ಕಣ್ಹಸಪ್ಪಸಿರೂಪಮಾ.

೯೨೫. ಸಬ್ಬಾಸವಪರಿಕ್ಲಿಟ್ಠಾ, ಸಬ್ಬಾಸಂಕ್ಲೇಸವತ್ಥುಕಾ;

ಗಮ್ಮಾ ಚ ಚಪಲಾ ನೀಚಾ, ಪುಥುಜ್ಜನಮಮಾಯಿತಾ.

೯೨೬. ಬಹುಸಾಧಾರಣಾ ಚೇತೇ, ಸಪತ್ತಜನಪತ್ಥಿತಾ;

ಮಹೋಪದ್ದವುಪಯಟ್ಠಾ, ಬಹ್ವಾಯಾಸಾ ಭಯಾವಹಾ.

೯೨೭. ಮಹಾರಮ್ಭಸಮಾರದ್ಧಾ, ಖಿಪ್ಪಾಕಾರವಿಧಂಸಿನೋ;

ಸೋಕಸಲ್ಲಂ ಪವೇಸೇನ್ತಾ, ವಿಗಚ್ಛನ್ತಿ ಸುವೇ ಸುವೇ.

೯೨೮. ನಾಲಂ ಕಸ್ಸಚಿ ತಾಣಾಯ, ನಾಲಮಸ್ಸಾಸನಾಯ ಚ;

ಅವಿಸಾಸನಿಯಾವಸ್ಸಂ, ಕಿತವಾ ಮಾರಕಿಂಕರಾ.

೯೨೯. ಸತ್ತಾನಮುಪಘಾತಾಯ, ಮಧುರಾಕಾರನಿಮ್ಮಿತಾ;

ರಕ್ಖಸೀ ವಿಯ ಸನ್ತಾನ-ಮಾವಿಸನ್ತಿ ಮನೋಹರಾ.

೯೩೦. ಆವಿಟ್ಠಾ ಯೇಹಿ ದುಮ್ಮೇಧಾ, ಬ್ಯಸನಾಹಿತಸಮ್ಭವಾ;

ವಿಪಲ್ಲಾಸಪರಾಭೂತಾ, ಬ್ಯಾಪಜ್ಜನ್ತಾ ವಿಹಞ್ಞರೇ.

೯೩೧. ಚೇತೋಸಙ್ಕಪ್ಪರಚಿತಾ, ನನ್ದಿರಾಗೋಪಸೇವನಾ;

ಮಧುಲಿತ್ತಾಸಿಧಾರಾವ, ಬ್ಯಾಪಾರೇನೋಪಸೇವಿತಾ.

೯೩೨. ಮನೋರಮಸುಭಾಕಾರಾ, ಪಿಯರೂಪೋಪಲಮ್ಭಿನೋ;

ಮಿತ್ತಮುಖಂ ಸಪತ್ತಾವ, ವಞ್ಚಯನ್ತಿ ಮಹಾಜನಂ.

೯೩೩. ವಞ್ಚಿತಾ ಯೇಹಿ ದುಮ್ಮೇಧಾ, ಸಬ್ಬಸಮ್ಪತ್ತಿಧಂಸಿತಾ;

ಖೇಮಮಗ್ಗಾ ಪರಿಬ್ಭಟ್ಠಾ, ಧಾರೇನ್ತಿ ವಧಮತ್ತನೋ.

೯೩೪. ವಿರೂಪರೂಪಾಕಾರೇನ, ನಿಮ್ಮಥೇನ್ತಾ ಪಲೋಭಿನೋ;

ಅಭಾವಿತಾನಂ ಬಾಲಾನಂ, ಮಾನಸಂ ನಿಹನನ್ತಿಮೇ.

೯೩೫. ಯತ್ಥ ರಾಗಸಲ್ಲವಿದ್ಧಾ, ಸಲ್ಲೇನೇವ ವನೇ ಮಿಗಾ;

ತತ್ಥ ತತ್ಥಾನುಧಾವನ್ತಾ, ವಿಪ್ಫನ್ದನ್ತಿ ನಿರನ್ತರಂ.

೯೩೬. ಮಮಂಕಾರೇನ ವುಡ್ಢನ್ತಾ, ಘೋರಮಾಸೀವಿಸಂ ಯಥಾ;

ವಿಸ್ಸಟ್ಠಾ ಭೋಗಧಮ್ಮೇಸು, ಅಸ್ಸಾದೇನ್ತಿ ಅವಿದ್ದಸು.

೯೩೭. ಅನಯಬ್ಯಸನಾಯೇತೇ, ವಸೀ ಕುಬ್ಬನ್ತಿ ಪಾಣಿನೋ;

ವಿಚಿತ್ತಾಕಾರಸಣ್ಠಾನಾ, ಪಿಸಾಚನಗರಂ ಯಥಾ.

೯೩೮. ಅನತ್ಥಾವಹಿತಾ ಬಾಲಾ, ವಾಗುರಂ ನಾವಬುಜ್ಝರೇ;

ತತ್ಥೇವ ಪಟಿವಮನ್ತಿ, ಯಥಾ ಹಞ್ಞನ್ತಿ ಮುಚ್ಛಿತಾ.

೯೩೯. ಸೀಘವಾಹೀ ಮಹೋಘೋಯಂ, ಕ್ಲೇಸವಟ್ಟಂ ಮಹಬ್ಭಯೋ;

ಸಕಣ್ಟಕಞ್ಚ ಗಹನಂ, ಪಙ್ಕೋವ ದುರತಿಕ್ಕಮೋ.

೯೪೦. ಚೇತೋಸಂಮೋಹನಟ್ಠಾನಂ, ಪಮಾದಪಟಿಸನ್ಧಿತಂ;

ಓಹಾರಿ ಸಿಥಿಲಂ ಚೇತಂ, ದುಪ್ಪಮುಞ್ಚಞ್ಚ ಬನ್ಧನಂ.

೯೪೧. ಜಾಲಂವ ವಿತ್ಥತಂ ಲೋಕೇ,

ಮಾರಪಾಸೋ ಸಮೋಡ್ಡಿತೋ;

ಪಞ್ಜರಂ ಚಾರಕೋ ಚೇಸೋ,

ಸತ್ತಾನಮನಯಾವಹೋ.

೯೪೨. ಯತ್ಥಾನುರಾಗಸಮ್ಬದ್ಧಾ, ಪಲಿಗುಣ್ಠಿತಸಾಯಿನೋ;

ಮಕ್ಕಟಾಲೇಪಬದ್ಧಾವ, ನಿತ್ಥುನನ್ತಿ ವಿಘಾತಿನೋ.

೯೪೩. ಬಳಿಸಂವಾಮಿಸಚ್ಛನ್ನಂ, ಸವಿಸಂ ವಿಯ ಭೋಜನಂ;

ಮಿಗಲುದ್ದನಿವಾಪೋವ, ವಿನಾಸಾಯ ಸಮೋಡ್ಡಿತಾ.

೯೪೪. ಮೀನಕಾ ವಙ್ಕಗಿದ್ಧಾವ, ಯೇ ಗಿಲಿತ್ವಾ ಪುಥುಜ್ಜನಾ;

ಘೋರಂ ಮಚ್ಚುಮುಖಂ ಪತ್ವಾ, ಸೋಚನ್ತಾಪಾಯಭಾಗಿನೋ.

೯೪೫. ಪಾಪಕ್ಖೇತ್ತಮಿದಂ ಠಾನಂ, ಮಿಚ್ಛಾಲೋಭನಿಸೇವನಂ;

ದುಚ್ಚರೀತಙ್ಕುರಾರೋಹಂ, ಅಪಾಯಫಲಪೂರಣಂ.

೯೪೬. ಅಜ್ಝೋಸಿತಾ ಪನೇತ್ಥ ಚ, ಲೋಭಮುಚ್ಛಾವಿದಾಹಿನೋ;

ಕೋಧೂಪನಾಹಜಲಿತಾ, ಇಸ್ಸಾಮಚ್ಛೇರಧೂಪಿತಾ.

೯೪೭. ಸಾರಮ್ಭಾಯುಧಸನ್ನದ್ಧಾ, ವಿಪ್ಫುರನ್ತಾ ಮನೋರಥಾ;

ಆಬನ್ಧಿಚ್ಛಾ ಮಹಾಕಚ್ಛಾ, ಠನ್ತಿ ಲೋಕವಿಪತ್ತಿಯಾ.

೯೪೮. ಅವಜ್ಜಂ ನತ್ಥಿ ಏತೇಸ-ಮಕತ್ತಬ್ಬಂ ನ ವಿಜ್ಜತಿ;

ಸಮ್ಮುಟ್ಠಸಚ್ಚತಾ ತೇಸು, ನ ಪತಿಟ್ಠಾತಿ ಸಾಧುತಾ.