೫. ಪಞ್ಚಮೋ ಪರಿಚ್ಛೇದೋ

ಕಮ್ಮವಿಭಾಗೋ

೩೨೮. ವಿಭಾಗಂ ಪನ ಕಮ್ಮಾನಂ,

ಪವಕ್ಖಾಮಿ ಇತೋ ಪರಂ;

ಕಮ್ಮಪಾಕಕ್ರಿಯಾಭೇದೇ,

ಅಮೋಹಾಯ ಸಮಾಸತೋ.

೩೨೯. ಕಮ್ಮಪಚ್ಚಯಕಮ್ಮನ್ತಿ, ಚೇತನಾವ ಸಮೀರಿತಾ;

ತತ್ಥಾಪಿ ನಾನಕ್ಖಣಿಕಾ, ಪುಞ್ಞಾಪುಞ್ಞಾವ ಚೇತನಾ.

೩೩೦. ದೇತಿ ಪಾಕಮಧಿಟ್ಠಾಯ, ಸಮ್ಪಯುತ್ತೇ ಯಥಾರಹಂ;

ಕಮ್ಮಸ್ಸಾಯೂಹನಟ್ಠೇನ, ಪವತ್ತತ್ತಾ ಹಿ ಚೇತನಾ.

೩೩೧. ಕ್ಲೇಸಾನುಸಯಸನ್ತಾನೇ, ಪಾಕಧಮ್ಮಾ ಹಿ ಜಾಯರೇ;

ಪಹೀನಾನುಸಯಾನಂ ತು, ಕ್ರಿಯಾಮತ್ತಂ ಪವತ್ತತಿ.

೩೩೨. ಮೂಲಭಾವಾ ಚ ಸಬ್ಬೇಸಂ, ತಥೇವಾವಜ್ಜನದ್ವಯಂ;

ಜನಿತಾನಿ ಚ ಕಮ್ಮೇಹಿ, ವಿಪಾಕಾನಿ ಪವತ್ತರೇ.

೩೩೩. ಚಿತ್ತುಪ್ಪಾದವಸೇನೇವ, ಕಮ್ಮಂ ತೇತ್ತಿಂಸಧಾ ಠಿತಂ;

ಕಮ್ಮಚತುಕ್ಕಭೇದೇಹಿ, ವಿಭಾವೇಯ್ಯ ವಿಚಕ್ಖಣೋ.

೩೩೪. ಪಚ್ಚುಪ್ಪನ್ನಾದಿಕಣ್ಹಾದಿ-ಜನಕಾದಿಗರಾದಿತೋ;

ದಿಟ್ಠಧಮ್ಮಾದಿಕಾಮಾದಿ-ಭೇದಾ ಛಧಾ ಯಥಾಕ್ಕಮಂ.

೩೩೫. ಯಂ ಪಾಪಂ ಸುಖವೋಕಿಣ್ಣಂ, ಅಕಿಚ್ಛೇನ ಕರೀಯತಿ;

ಪಚ್ಚುಪ್ಪನ್ನಸುಖಂ ಕಮ್ಮಂ, ಆಯತಿಂ ದುಕ್ಖಪಾಕಜಂ.

೩೩೬. ಕಿಚ್ಛೇನ ದುಕ್ಖವೋಕಿಣ್ಣಂ, ಯದಿ ಪಾಪಂ ಕರೀಯತಿ;

ಪಚ್ಚುಪ್ಪನ್ನೇ ಚ ತಂ ದುಕ್ಖಂ, ಆಯತಿಂ ದುಕ್ಖಪಾಕಜಂ.

೩೩೭. ಕಿಚ್ಛೇನ ದುಕ್ಖವೋಕಿಣ್ಣಂ, ಯದಿ ಪುಞ್ಞಂ ಕರೀಯತಿ;

ಪಚ್ಚುಪ್ಪನ್ನಮ್ಹಿ ತಂ ದುಕ್ಖಂ, ಆಯತಿಂ ಸುಖಪಾಕಜಂ.

೩೩೮. ಯಂ ಪುಞ್ಞಂ ಸುಖವೋಕಿಣ್ಣಂ, ಅಕಿಚ್ಛೇನ ಕರೀಯತಿ;

ಪಚ್ಚುಪ್ಪನ್ನಸುಖಞ್ಚೇವ, ಆಯತಿಂ ಸುಖಪಾಕಜಂ.

೩೩೯. ವಿಸಸಂಸಟ್ಠಮಧುರಂ, ಸವಿಸಂ ತಿತ್ತಕಂ ತಥಾ;

ಗೋಮುತ್ತಮಧುಭೇಸಜ್ಜ-ಮಿಚ್ಚೋಪಮ್ಮಂ ಯಥಾಕ್ಕಮಂ.

೩೪೦. ಸಮಾದಾನೇ ವಿಪಾಕೇ ಚ, ಸುಖದುಕ್ಖಪ್ಪಭೇದಿತಂ;

ಕಮ್ಮಮೇವಂ ಚತುದ್ಧಾತಿ, ಪಕಾಸೇನ್ತಿ ತಥಾಗತಾ.

೩೪೧. ಆನನ್ತರಿಯಕಮ್ಮಾದಿ, ಏಕನ್ತಕಟುಕಾವಹಂ;

ಕಣ್ಹಂ ಕಣ್ಹವಿಪಾಕನ್ತಿ, ಕಮ್ಮಂ ದುಗ್ಗತಿಗಾಮಿಕಂ.

೩೪೨. ಪಠಮಜ್ಝಾನಕಮ್ಮಾದಿ, ಏಕನ್ತೇನ ಸುಖಾವಹಂ;

ಸುಕ್ಕಂ ಸುಕ್ಕವಿಪಾಕನ್ತಿ, ಕಮ್ಮಂ ಸಗ್ಗೂಪಪತ್ತಿಕಂ.

೩೪೩. ವೋಕಿಣ್ಣಕಮ್ಮ ವೋಕಿಣ್ಣ-ಸುಖದುಕ್ಖೂಪಪತ್ತಿಕಂ;

ಕಣ್ಹಸುಕ್ಕಂ ಕಣ್ಹಸುಕ್ಕ-ವಿಪಾಕನ್ತಿ ಸಮೀರಿತಂ.

೩೪೪. ಅಕಣ್ಹಸುಕ್ಕಮೀರೇನ್ತಿ, ಅಕಣ್ಹಸುಕ್ಕಪಾಕದಂ;

ಕಮ್ಮಂ ಲೋಕುತ್ತರಂ ಲೋಕೇ, ಗತಿಕಮ್ಮಕ್ಖಯಾವಹಂ.

೩೪೫. ಇತಿ ವಟ್ಟಪ್ಪವತ್ತಮ್ಹಿ, ಕ್ಲೇಸವೋದಾನಭೇದಿತಂ;

ಕಮ್ಮಕ್ಖಯೇನ ಸಙ್ಗಯ್ಹ, ಚತುಧಾ ಕಮ್ಮಮೀರಿತಂ.

೩೪೬. ಜನಕಞ್ಚೇವುಪತ್ಥಮ್ಭ-ಮುಪಪೀಳೋಪಘಾತಕಂ;

ಚತುಧಾ ಕಿಚ್ಚಭೇದೇನ, ಕಮ್ಮಮೇವಂ ಪವುಚ್ಚತಿ.

೩೪೭. ಜನೇತಿ ಜನಕಂ ಪಾಕಂ, ತಂ ಛಿನ್ದತುಪಪೀಳಕಂ;

ತಂ ಪವತ್ತೇತುಪತ್ಥಮ್ಭಂ, ತಂ ಘಾತೇತೋಪಘಾತಕಂ.

೩೪೮. ಕರೋತಿ ಅತ್ತನೋ ಪಾಕ-ಸ್ಸಾವಕಾಸನ್ತಿ ಭಾಸಿತಂ;

ಪಾಕದಾಯಕಕಮ್ಮಂ ತು, ಯಂ ಕಿಞ್ಚಿ ಜನಕಂ ಭವೇ.

೩೪೯. ಬಾಧಮಾನಕಕಮ್ಮಂ ತು, ತಂ ಪಾಕಮುಪಪೀಳಕಂ;

ಉಪಘಾತಕಮೀರೇನ್ತಿ, ತದುಪಚ್ಛೇದಕಂಪರೇ.

೩೫೦. ಗರುಕಾಸನ್ನಮಾಚಿಣ್ಣಂ, ಕಟತ್ತಾಕಮ್ಮುನಾ ಸಹ;

ಕಮ್ಮಂ ಚತುಬ್ಬಿಧಂ ಪಾಕ-ಪರಿಯಾಯಪ್ಪಭೇದತೋ.

೩೫೧. ಮಹಗ್ಗತಾನನ್ತರಿಯಂ, ಗರುಕಮ್ಮನ್ತಿ ವುಚ್ಚತಿ;

ಕತಂ ಚಿನ್ತಿತಮಾಸನ್ನ-ಮಾಸನ್ನಮರಣೇನ ತು.

೩೫೨. ಬಾಹುಲ್ಲೇನ ಸಮಾಚಿಣ್ಣಮಾಚಿಣ್ಣನ್ತಿ ಪವುಚ್ಚತಿ;

ಸೇಸಂ ಪುಞ್ಞಮಪುಞ್ಞಞ್ಚ, ಕಟತ್ತಾಕಮ್ಮಮೀರಿತಂ.

೩೫೩. ದಿಟ್ಠಧಮ್ಮೇ ವೇದನೀಯಮುಪಪಜ್ಜಾಪರೇ ತಥಾ;

ಪರಿಯಾಯವೇದನೀಯಮಿತಿ ಚಾಹೋಸಿಕಮ್ಮುನಾ.

೩೫೪. ಪಾಕಕಾಲವಸೇನಾಥ, ಕಾಲಾತೀತವಸೇನ ಚ;

ಚತುಧೇವಮ್ಪಿ ಅಕ್ಖಾತಂ, ಕಮ್ಮಮಾದಿಚ್ಚಬನ್ಧುನಾ.

೩೫೫. ದಿಟ್ಠಧಮ್ಮೇ ವೇದನೀಯಂ, ಪಠಮಂ ಜವನಂ ಭವೇ;

ಅಲದ್ಧಾಸೇವನತ್ತಾವ, ಅಸಮತ್ಥಂ ಭವನ್ತರೇ.

೩೫೬. ವೇದನೀಯಂ ತುಪಪಜ್ಜಪರಿಯೋಸಾನಮೀರಿತಂ;

ಪರಿನಿಟ್ಠಿತಕಮ್ಮತ್ತಾ, ವಿಪಚ್ಚತಿ ಅನನ್ತರೇ.

೩೫೭. ಸೇಸಾನಿ ವೇದನೀಯಾನಿ, ಪರಿಯಾಯಾಪರೇ ಪನ;

ಲದ್ಧಾಸೇವನತೋ ಪಾಕಂ, ಜನೇನ್ತಿ ಸತಿ ಪಚ್ಚಯೇ.

೩೫೮. ವುಚ್ಚನ್ತಾಹೋಸಿಕಮ್ಮಾನಿ, ಕಾಲಾತೀತಾನಿ ಸಬ್ಬಥಾ;

ಉಚ್ಛಿನ್ನತಣ್ಹಾಮೂಲಾನಿ, ಪಚ್ಚಯಾಲಾಭತೋ ತಥಾ.

೩೫೯. ಚತುಧಾ ಪುನ ಕಾಮಾದಿಭೂಮಿಭೇದೇನ ಭಾಸಿತಂ;

ಪುಞ್ಞಾಪುಞ್ಞವಸಾ ದ್ವೇಧಾ, ಕಾಮಾವಚರಿಕಂ ಭವೇ.

೩೬೦. ಅಪುಞ್ಞಂ ತತ್ಥ ಸಾವಜ್ಜ-ಮನಿಟ್ಠಫಲದಾಯಕಂ;

ತಂ ಕಮ್ಮಫಸ್ಸದ್ವಾರೇಹಿ, ದುವಿಧಂ ಸಮ್ಪವತ್ತತಿ.+

೩೬೧. ಕಾಯದ್ವಾರಂ ವಚೀದ್ವಾರಂ, ಮನೋದ್ವಾರನ್ತಿ ತಾದಿನಾ;

ಕಮ್ಮದ್ವಾರತ್ತಯಂ ವುತ್ತಂ, ಫಸ್ಸದ್ವಾರಾ ಛ ದೀಪಿತಾ.

೩೬೨. ಕಮ್ಮದ್ವಾರೇ ಮನೋದ್ವಾರೇ, ಪಞ್ಚದ್ವಾರಾ ಸಮೋಹಿತಾ;

ಫಸ್ಸದ್ವಾರಮನೋದ್ವಾರಂ, ಕಮ್ಮದ್ವಾರತ್ತಯಂ ಕತಂ.

೩೬೩. ತಥಾ ಹಿ ಕಾಯವಿಞ್ಞತ್ತಿಂ, ಜನೇತ್ವಾ ಜಾತಚೇತನಾ;

ಕಾಯಕಮ್ಮಂ ವಚೀಕಮ್ಮಂ, ವಚೀಭೇದಪವತ್ತಿಕಾ.

೩೬೪. ವಿಞ್ಞತ್ತಿದ್ವಯಸಮ್ಪತ್ತಾ, ಮನೋಕಮ್ಮನ್ತಿ ವುಚ್ಚತಿ;

ಭೇದೋಯಂ ಪರಿಯಾಯೇನ, ಕಮ್ಮಾನಮಿತಿ ದೀಪಿತೋ.

೩೬೫. ಪಾಣಘಾತಾದಿಕಂ ಕಮ್ಮಂ, ಕಾಯೇ ಬಾಹುಲ್ಲವುತ್ತಿತೋ;

ಕಾಯಕಮ್ಮಂ ವಚೀಕಮ್ಮಂ, ಮುಸಾವಾದಾದಿಕಂ ತಥಾ.

೩೬೬. ಅಭಿಜ್ಝಾದಿ ಮನೋಕಮ್ಮಂ, ತೀಸು ದ್ವಾರೇಸು ಜಾಯತಿ;

ದ್ವೀಸು ದ್ವಾರೇಸು ಸೇಸಾನಿ, ಭೇದೋಯಂ ಪರಮತ್ಥತೋ.

೩೬೭. ಫಸ್ಸದ್ವಾರಮನೋದ್ವಾರೇ, ವಿಞ್ಞತ್ತಿದ್ವಯಮೀರಿತಂ;

ಪಞ್ಚದ್ವಾರೇ ದ್ವಯಂ ನತ್ಥಿ, ಅಯಮೇತ್ಥ ವಿನಿಚ್ಛಯೋ.

೩೬೮. ಅಕ್ಖನ್ತಿಞಾಣ ಕೋಸಜ್ಜಂ, ದುಸ್ಸಿಲ್ಯಂ ಮುಟ್ಠಸಚ್ಚತಾ;

ಇಚ್ಚಾಸಂವರಭೇದೇನ, ಅಟ್ಠದ್ವಾರೇಸು ಜಾಯತಿ.

೩೬೯. ಕಮ್ಮದ್ವಾರತ್ತಯಞ್ಚೇವ, ಪಞ್ಚದ್ವಾರಾ ತಥಾಪರೇ;

ಅಸಂವರಾನಂ ಪಞ್ಚನ್ನಂ, ಅಟ್ಠ ದ್ವಾರಾ ಪಕಾಸಿತಾ.

೩೭೦. ತತ್ಥ ಕಮ್ಮಪಥಪ್ಪತ್ತಂ, ಪಟಿಸನ್ಧಿಫಲಾವಹಂ;

ಪಾಣಘಾತಾದಿಭೇದೇನ, ದಸಧಾ ಸಮ್ಪವತ್ತತಿ.

೩೭೧. ಪಾಣಾತಿಪಾತೋ ಫರುಸಂ, ಬ್ಯಾಪಾದೋ ಚ ತಥಾಪರೋ;

ಇಚ್ಚೇವಂ ತಿವಿಧಂ ಕಮ್ಮಂ, ದೋಸಮೂಲೇಹಿ ಜಾಯತಿ.

೩೭೨. ಮಿಚ್ಛಾಚಾರೋ ಅಭಿಜ್ಝಾ ಚ, ಮಿಚ್ಛಾದಿಟ್ಠಿ ತಥಾಪರಾ;

ಇಚ್ಚೇವಂ ತಿವಿಧಂ ಕಮ್ಮಂ, ಲೋಭಮೂಲೇಹಿ ಜಾಯತಿ.

೩೭೩. ಥೇಯ್ಯಾದಾನಂ ಮುಸಾವಾದೋ, ಪಿಸುಣಂ ಸಮ್ಫಲಾಪನಂ;

ಕಮ್ಮಂ ಚತುಬ್ಬಿಧಮ್ಮೇತಂ, ದ್ವಿಮೂಲೇಹಿ ಪವತ್ತತಿ.

೩೭೪. ಛನ್ದಾದೋಸಾ ಭಯಾ ಮೋಹಾ, ಪಾಪಂ ಕುಬ್ಬನ್ತಿ ಪಾಣಿನೋ;

ತಸ್ಮಾ ಛನ್ದಾದಿಭೇದೇನ, ಚತ್ತಾಲೀಸವಿಧಂ ಭವೇ.

೩೭೫. ಇಚ್ಚಾಪುಞ್ಞಂ ಪಕಾಸೇನ್ತಿ, ಚತುರಾಪಾಯಸಾಧಕಂ;

ಅಞ್ಞತ್ಥಾಪಿ ಪವತ್ತಮ್ಹಿ, ವಿಪತ್ತಿಫಲಸಾಧನಂ.

೩೭೬. ತಿವಿಧಂ ಪನ ಪುಞ್ಞಂ ತು, ಅನವಜ್ಜಿಟ್ಠಪಾಕದಂ;

ದಾನಂ ಸೀಲಂ ಭಾವನಾ ಚ, ತೀಸು ದ್ವಾರೇಸು ಜಾಯತಿ.

೩೭೭. ಮಹತ್ತಗಾರವಾ ಸ್ನೇಹಾ, ದಯಾ ಸದ್ಧುಪಕಾರತೋ;

ಭೋಗಜೀವಾಭಯಧಮ್ಮಂ, ದದತೋ ದಾನಮೀರಿತಂ.

೩೭೮. ಪುಞ್ಞಮಾಚಾರವಾರಿತ್ತ-ವತ್ತಮಾರಬ್ಭ ಕುಬ್ಬತೋ;

ಪಾಪಾ ಚ ವಿರಮನ್ತಸ್ಸ, ಹೋತಿ ಸೀಲಮಯಂ ತದಾ.

೩೭೯. ದಾನಸೀಲವಿನಿಮುತ್ತಂ, ಭಾವನಾತಿ ಪವುಚ್ಚತಿ;

ಪುಞ್ಞಂ ಭಾವೇನ್ತಿ ಸನ್ತಾನೇ, ಯಸ್ಮಾ ತೇನ ಹಿತಾವಹಂ.

೩೮೦. ಜನೇತ್ವಾ ಕಾಯವಿಞ್ಞತ್ತಿಂ, ಯದಾ ಪುಞ್ಞಂ ಕರೀಯತಿ;

ಕಾಯಕಮ್ಮಂ ತದಾ ಹೋತಿ, ದಾನಂ ಸೀಲಞ್ಚ ಭಾವನಾ.

೩೮೧. ವಚೀವಿಞ್ಞತ್ತಿಯಾ ಸದ್ಧಿಂ, ಯದಾ ಪುಞ್ಞಂ ಕರೀಯತಿ;

ವಚೀಕಮ್ಮಂ ಮನೋಕಮ್ಮಂ, ವಿನಾ ವಿಞ್ಞತ್ತಿಯಾ ಕತಂ.

೩೮೨. ತಂತಂದ್ವಾರಿಕಮೇವಾಹು, ತಂತಂದ್ವಾರಿಕಪಾಪತೋ;

ವಿರಮನ್ತಸ್ಸ ವಿಞ್ಞತ್ತಿಂ, ವಿನಾ ವಾ ಸಹ ವಾ ಪುನ.

೩೮೩. ದಾನಂ ಸೀಲಂ ಭಾವನಾ ಚ, ವೇಯ್ಯಾವಚ್ಚಾಪಚಾಯನಾ;

ಪತ್ತಾನುಮೋದನಾ ಪತ್ತಿ-ದಾನಂ ಧಮ್ಮಸ್ಸ ದೇಸನಾ;

ಸವನಂ ದಿಟ್ಠಿಜುಕಮ್ಮ-ಮಿಚ್ಚೇವಂ ದಸಧಾ ಠಿತಂ.

೩೮೪. ಕಾಮಪುಞ್ಞಂ ಪಕಾಸೇನ್ತಿ, ಕಾಮೇ ಸುಗತಿಸಾಧಕಂ;

ಅಞ್ಞತ್ಥಾಪಿ ಪವತ್ತಮ್ಹಿ, ಸಮ್ಪತ್ತಿಫಲಸಾಧಕಂ.

೩೮೫. ಚಿತ್ತುಪ್ಪಾದಪ್ಪಭೇದೇನ, ಕಮ್ಮಂ ವೀಸತಿಧಾ ಠಿತಂ;

ಕಾಮಾವಚರಮಿಚ್ಚೇವಂ, ವಿಭಾವೇನ್ತಿ ವಿಭಾವಿನೋ.

೩೮೬. ರೂಪಾವಚರಿಕಂ ಕಮ್ಮ-ಮಪ್ಪನಾಭಾವನಾಮಯಂ;

ಕಸಿಣಾದಿಕಮಾರಬ್ಭ, ಮನೋದ್ವಾರೇ ಪವತ್ತತಿ.

೩೮೭. ಪಥವಾಪೋ ಚ ತೇಜೋ ಚ,

ವಾಯೋ ನೀಲಞ್ಚ ಪೀತಕಂ;

ಲೋಹಿತೋದಾತಮಾಕಾಸಂ,

ಆಲೋಕೋತಿ ವಿಸಾರದಾ.

೩೮೮. ಕಸಿಣಾನಿ ದಸೀರೇನ್ತಿ, ಆದಿಕಮ್ಮಿಕಯೋಗಿನೋ;

ಉದ್ಧುಮಾತಂ ವಿನೀಲಞ್ಚ, ವಿಪುಬ್ಬಕಂ ವಿಖಾದಿತಂ.

೩೮೯. ವಿಚ್ಛಿದ್ದಕಞ್ಚ ವಿಕ್ಖಿತ್ತಂ, ಹತವಿಕ್ಖಿತ್ತಲೋಹಿತಂ;

ಪುಳವಂ ಅಟ್ಠಿಕಞ್ಚೇತಿ, ಅಸುಭಂ ದಸಧಾ ಠಿತಂ.

೩೯೦. ಬುದ್ಧೇ ಧಮ್ಮೇ ಚ ಸಙ್ಘೇ ಚ, ಸೀಲೇ ಚಾಗೇ ಚ ಅತ್ತನೋ;

ದೇವತೋಪಸಮಾಯಞ್ಚ, ವುತ್ತಾನುಸ್ಸತಿಭಾವನಾ.

೩೯೧. ಮರಣೇ ಸತಿ ನಾಮೇಕಾ, ತಥಾ ಕಾಯಗತಾಸತಿ;

ಆನಾಪಾನಸತಿಚ್ಚೇವಂ, ದಸಧಾನುಸ್ಸತೀರಿತಾ.

೩೯೨. ಮೇತ್ತಾ ಕರುಣಾ ಮುದಿತಾ, ಉಪೇಕ್ಖಾ ಭಾವನಾತಿ ಚ;

ಚತುಬ್ರಹ್ಮವಿಹಾರಾ ಚ, ಅಪ್ಪಮಞ್ಞಾತಿ ಭಾಸಿತಾ.

೩೯೩. ಆಹಾರೇ ತು ಪಟಿಕ್ಕೂಲ-ಸಞ್ಞೇಕಾತಿ ಪಕಾಸಿತಾ;

ಚತುಧಾತುವವತ್ಥಾನಂ, ಚತುಧಾತುಪರಿಗ್ಗಹೋ.

೩೯೪. ಚತ್ತಾರೋರುಪ್ಪಕಾ ಚೇತಿ, ಚತ್ತಾಲೀಸ ಸಮಾಸತೋ;

ಕಮ್ಮಟ್ಠಾನಾನಿ ವುತ್ತಾನಿ, ಸಮಥೇ ಭಾವನಾನಯೇ.

೩೯೫. ಆನಾಪಾನಞ್ಚ ಕಸಿಣಂ, ಪಞ್ಚಕಜ್ಝಾನಿಕಂ ತಹಿಂ;

ಪಠಮಜ್ಝಾನಿಕಾ ವುತ್ತಾ, ಕೋಟ್ಠಾಸಾಸುಭಭಾವನಾ.

೩೯೬. ಮೇತ್ತಾದಯೋ ಚತುಜ್ಝಾನಾ, ಉಪೇಕ್ಖಾ ಪಞ್ಚಮೀ ಮತಾ;

ಆರುಪ್ಪಾರುಪ್ಪಕಾ ಸೇಸಾ, ಉಪಚಾರಸಮಾಧಿಕಾ.

೩೯೭. ಕಸಿಣಾಸುಭಕೋಟ್ಠಾಸೇ,

ಆನಾಪಾನೇ ಚ ಜಾಯತಿ;

ಪಟಿಭಾಗೋ ತಮಾರಬ್ಭ,

ತತ್ಥ ವತ್ತತಿ ಅಪ್ಪನಾ.

೩೯೮. ಕಮ್ಮಟ್ಠಾನೇಸು ಸೇಸೇಸು, ಪಟಿಭಾಗೋ ನ ವಿಜ್ಜತಿ;