೪. ಚತುತ್ಥೋ ಪರಿಚ್ಛೇದೋ

ಪಕಿಣ್ಣಕವಿಭಾಗೋ

೨೧೧. ಇತೋ ಪರಂ ಕಿಚ್ಚತೋ ಚ, ದ್ವಾರಾಲಮ್ಬಣವತ್ಥುತೋ;

ಭೂಮಿಪುಗ್ಗಲತೋ ಠಾನಾ, ಜನಕಾ ಚ ಯಥಾರಹಂ.

೨೧೨. ಸಙ್ಗಹೋ ಚ ಪವತ್ತಿ ಚ, ಪಟಿಸನ್ಧಿಪವತ್ತಿಸು;

ಚಿತ್ತುಪ್ಪಾದವಸೇನೇವ, ಸಂಖಿಪಿತ್ವಾನ ನಿಯ್ಯತೇ.

೨೧೩. ರೂಪಾರೂಪಮಹಾಪಾಕಾ, ಮುಪೇಕ್ಖಾತೀರಣದ್ವಯಂ;

ಚುತಿಸನ್ಧಿಭವಙ್ಗಾನಿ, ಚಿತ್ತಾನೇಕೂನವೀಸತಿ.

೨೧೪. ಆವಜ್ಜನಂ ತು ಯುಗಳಂ, ದಸ್ಸನಂ ಸವನಂ ತಥಾ;

ಘಾಯನಂ ಸಾಯನಞ್ಚೇವ, ಫುಸನಂ ಸಮ್ಪಟಿಚ್ಛನಂ.

೨೧೫. ತೀಣಿ ತೀರಣಚಿತ್ತಾನಿ, ಏಕಂ ವೋಟ್ಠಬ್ಬನಂ ಮತಂ;

ಪಞ್ಚದ್ವಾರೇ ಮನೋದ್ವಾರೇ, ತದಾವಜ್ಜನನಾಮಕಂ.

೨೧೬. ಪಞ್ಚಪಞ್ಞಾಸ ಜವನಕಿಚ್ಚಾನೀತಿ ವಿನಿದ್ದಿಸೇ;

ಕ್ರಿಯಾ ಚಾವಜ್ಜನಂ ಹಿತ್ವಾ, ಕುಸಲಾಕುಸಲಪ್ಫಲಂ.

೨೧೭. ತದಾಲಮ್ಬಣಚಿತ್ತಾನಿ, ಭವನ್ತೇಕಾದಸೇವ ಹಿ;

ಮಹಾವಿಪಾಕಚಿತ್ತಾನಿ, ಅಟ್ಠ ಸನ್ತೀರಣತ್ತಯಂ.

೨೧೮. ಪಞ್ಚಕಿಚ್ಚನ್ತಿ ಭಾಸನ್ತಿ, ಉಪೇಕ್ಖಾತೀರಣದ್ವಯಂ;

ಚತುಕಿಚ್ಚಾ ಮಹಾಪಾಕಾ, ತಿಕಕಿಚ್ಚಾ ಮಹಗ್ಗತಾ.

೨೧೯. ದುಕಿಚ್ಚಮಿತಿ ವೋಟ್ಠಬ್ಬಂ, ಸುಖತೀರಣಮೀರಿತಂ;

ಪಞ್ಚವಿಞ್ಞಾಣಜವನಮನೋಧಾತುತ್ತಿಕಂ ಪನ.

೨೨೦. ಏಕಕಿಚ್ಚಾತಿ ಭಾಸನ್ತಿ, ಅಟ್ಠಸಟ್ಠಿ ವಿಭಾವಿನೋ;

ಇಚ್ಚೇವಂ ಕಿಚ್ಚಭೇದೇನ, ಚಿತ್ತುಪ್ಪಾದಾ ವವತ್ಥಿತಾ.

೨೨೧. ಚಕ್ಖುಸೋತಘಾನಜಿವ್ಹಾ-ಕಾಯಧಾತು ಯಥಾಕ್ಕಮಂ;

ಪಞ್ಚದ್ವಾರಾ ಭವಙ್ಗಂ ತು, ಮನೋದ್ವಾರಂ ಪವುಚ್ಚತಿ.

೨೨೨. ಘಾನಾದಯೋ ತಯೋ ರೂಪೇ, ಪಞ್ಚ ಚಕ್ಖಾದಯೋ ತಥಾ;

ಅರೂಪೇ ನತ್ಥುಭಯತ್ಥ, ತದಾಲಮ್ಬಣಮಾನಸಂ.

೨೨೩. ಛ ದ್ವಾರಾ ವೀಥಿಚಿತ್ತಾನಿ, ಸತ್ತ ಕಾಮೀಸು ರೂಪಿಸು;

ದ್ವಾರತ್ತಯಂ ಛ ಚಿತ್ತಾನಿ, ಮನೋದ್ವಾರಮರೂಪಿಸು.

೨೨೪. ಪಟಿಸನ್ಧಾದಿಭೂತಾ ಹಿ, ಅವಸಾನೇ ಚುತಿಟ್ಠಿತಾ;

ಮಜ್ಝೇ ಭವಙ್ಗಂ ಛೇತ್ವಾನ, ಪಚ್ಚೇಕಂ ವೀಥಿ ಜಾಯತಿ.

೨೨೫. ರೂಪಾದಾರಮ್ಮಣೇ ಚಕ್ಖು-ಪಸಾದಾದಿಮ್ಹಿ ಘಟ್ಟಿತೇ;

ಆವಜ್ಜನಾದಯೋ ಹೋನ್ತಿ, ಭವಙ್ಗದ್ವಿಚಲಾ ಪರಂ.

೨೨೬. ಪರಿಣಾಮೇ ಭವಙ್ಗಸ್ಸ, ಆಲಮ್ಬೇ ಗಹಣಾರಹೇ;

ತಥಾ ವೀಥಿ ಮನೋದ್ವಾರೇ, ಯಥಾಸಮ್ಭವತೋ ಭವೇ.

೨೨೭. ಆವಜ್ಜಾ ಪಞ್ಚವಿಞ್ಞಾಣಂ, ಸಮ್ಪಟಿಚ್ಛನತೀರಣಂ;

ವೋಟ್ಠಬ್ಬಕಾಮಜವನಂ, ತದಾಲಮ್ಬಣಮಾನಸಂ.

೨೨೮. ಸತ್ತೇವಂ ವೀಥಿಚಿತ್ತಾನಿ, ಚಿತ್ತುಪ್ಪಾದಾ ಚತುದ್ದಸ;

ಚತುಪಞ್ಞಾಸ ವಿತ್ಥಾರಾ, ಪಞ್ಚದ್ವಾರೇ ಯಥಾರಹಂ.

೨೨೯. ಉಪ್ಪಾದಟ್ಠಿತಿಭಙ್ಗಾನಂ, ವಸಾ ಚಿತ್ತಕ್ಖಣಂ ತಯಂ;

ರೂಪಾನಂ ಠಿತಿ ಏಕೂನ-ಪಞ್ಞಾಸಞ್ಚ ದುಕೇ ದುಕಂ.

೨೩೦. ಪರಿತ್ತೇತಿಪರಿತ್ತೇ ಚ, ಮಹನ್ತೇತಿಮಹನ್ತಕೇ;

ವೋಟ್ಠಬ್ಬಮೋಘಜವನಂ, ತದಾಲಮ್ಬನ್ತಿ ತಂ ಕಮಾ.

೨೩೧. ಆವಜ್ಜನಞ್ಚ ಜವನಂ, ಮನೋದ್ವಾರೇ ತು ಗೋಚರೇ;

ವಿಭೂತೇ ತು ತದಾಲಮ್ಬಂ, ವಿತ್ಥಾರಾ ಸತ್ತಸಟ್ಠಿ ತೇ.

೨೩೨. ಕಾಮೇ ಜವನಸತ್ತಾಲ-ಮ್ಬಣಾನಂ ನಿಯಮೇ ಸತಿ;

ವಿಭೂತೇತಿಮಹನ್ತೇ ಚ, ತದಾಲಮ್ಬಣಮೀರಿತಂ.

೨೩೩. ಪಞ್ಚದ್ವಾರೇ ಮನೋಧಾತು, ಪಚ್ಚೇಕಮ್ಹಿ ಯಥಾಕ್ಕಮಂ;

ಪಞ್ಚವಿಞ್ಞಾಣಯುಗಳಂ, ಪಚ್ಚೇಕಂ ತು ಪಕಾಸಿತಂ.

೨೩೪. ಮನೋದ್ವಾರೇ ತು ಜವನಂ, ಮಹಗ್ಗತಮನುತ್ತರಂ;

ಸುಖತೀರಣವೋಟ್ಠಬ್ಬಂ, ಪರಿತ್ತಜವನಂ ಛಸು.

೨೩೫. ಮಹಾವಿಪಾಕಚಿತ್ತಾನಿ, ಉಪೇಕ್ಖಾತೀರಣದ್ವಯಂ;

ಛಸು ದ್ವಾರೇಸು ಜಾಯನ್ತಿ, ವೀಥಿಮುತ್ತಾನಿ ಚೇಕದಾ.

೨೩೬. ಸತ್ತತಿ ವೀಥಿಚಿತ್ತಾನಿ, ವಿಪಾಕಾ ತು ಮಹಗ್ಗತಾ;

ನವ ವೀಥಿವಿಮುತ್ತಾ ಚ, ದುವಿಧಾಪಿ ದಸೀರಿತಾ.

೨೩೭. ಇಚ್ಚೇವಂ ದ್ವಾರಭೇದೇನ, ವಿಭಾವೇತ್ವಾ ತತೋ ಪರಂ;

ಞೇಯ್ಯಾ ಗೋಚರಭೇದೇನ, ಚಿತ್ತುಪ್ಪಾದಾ ಯಥಾರಹಂ.

೨೩೮. ರೂಪಸದ್ದಗನ್ಧರಸಫೋಟ್ಠಬ್ಬಾ ಪಞ್ಚ ಗೋಚರಾ;

ಸೇಸಞ್ಚ ರೂಪಪಞ್ಞತ್ತಿನಾಮಞ್ಚ ಧಮ್ಮಗೋಚರಂ.

೨೩೯. ಪಞ್ಚದ್ವಾರೇ ವತ್ತಮಾನಂ, ಪಞ್ಚಾಲಮ್ಬಂ ಯಥಾಕ್ಕಮಂ;

ಛಾಲಮ್ಬಣಂ ಮನೋದ್ವಾರೇ, ಅತೀತಾನಾಗತಮ್ಪಿ ಚ.

೨೪೦. ಪಞ್ಞತ್ತಾತೀತವತ್ತನ್ತಂ, ಛದ್ವಾರಗ್ಗಹಿತಂ ಪನ;

ಛಳಾರಮ್ಮಣಸಙ್ಖಾತಂ, ಯೇಭುಯ್ಯೇನ ಭವನ್ತರೇ.

೨೪೧. ನಿಮಿತ್ತಗತಿಕಮ್ಮಾನಂ, ಕಮ್ಮಮೇವಾಥ ಗೋಚರಂ;

ಪಟಿಸನ್ಧಿಭವಙ್ಗಾನಂ, ಚುತಿಯಾವ ಯಥಾರಹಂ.

೨೪೨. ಪಞ್ಚಾಲಮ್ಬೇ ಮನೋಧಾತು, ಪಚ್ಚೇಕಮ್ಹಿ ಯಥಾಕ್ಕಮಂ;

ಪಞ್ಚವಿಞ್ಞಾಣಯುಗಳಂ, ಪಚ್ಚೇಕಂ ತು ಪಕಾಸಿತಂ.

೨೪೩. ಕಾಮಪಾಕಾನಿ ಸೇಸಾನಿ, ಹಸನಞ್ಚ ಪರಿತ್ತಕೇ;

ಞಾಣಹೀನಾನಿಪುಞ್ಞಾನಿ, ಜವನಾನಿ ಅನಿಮ್ಮಲೇ.

೨೪೪. ತಿಹೇತುಕಾಮಪುಞ್ಞಾನಿ, ಪುಞ್ಞಾಭಿಞ್ಞಾ ಚ ಲೋಕಿಯಾ;

ಸಬ್ಬಾಲಮ್ಬೇ ಪವತ್ತನ್ತಿ, ಅಗ್ಗಮಗ್ಗಫಲಂ ವಿನಾ.

೨೪೫. ಕ್ರಿಯಾಭಿಞ್ಞಾ ಚ ವೋಟ್ಠಬ್ಬಂ, ಕ್ರಿಯಾ ಕಾಮೇ ತಿಹೇತುಕಾ;

ಸಬ್ಬಾಲಮ್ಬೇ ಪವತ್ತನ್ತಿ, ನಿಬ್ಬಾನೇ ನಿಮ್ಮಲಾ ಸಿಯುಂ.

೨೪೬. ದುತಿಯಞ್ಚ ಚತುತ್ಥಞ್ಚ, ಆರುಪ್ಪೇಸು ಮಹಗ್ಗತೇ;

ಮಹಗ್ಗತಞ್ಞೇ ವೋಹಾರೇ, ಅಯಮಾಲಮ್ಬಣೇ ನಯೋ.

೨೪೭. ಚಕ್ಖುಸೋತಘಾನಜಿವ್ಹಾ-ಕಾಯಹದಯವತ್ಥುನಾ;

ಕಾಮಲೋಕೇ ಛವತ್ಥೂನಿ, ನಿಸ್ಸಿತಾ ಸತ್ತ ಧಾತುಯೋ.

೨೪೮. ಪಞ್ಚವಿಞ್ಞಾಣಧಾತೂ ಚ, ತಾಸಂ ಪುಬ್ಬಾಪರತ್ತಯಂ;

ಮನೋಧಾತು ತತೋ ಸೇಸಾ, ಮನೋವಿಞ್ಞಾಣಧಾತು ಚ.

೨೪೯. ಚತಸ್ಸೋ ಧಾತುಯೋ ರೂಪೇ, ತೀಣಿ ವತ್ಥೂನಿ ನಿಸ್ಸಿತಾ;

ಅರೂಪೇ ತು ಅನಿಸ್ಸಾಯ, ಧಾತ್ವೇಕಾವ ಪವತ್ತತಿ.

೨೫೦. ಪಞ್ಚಪ್ಪಸಾದೇ ನಿಸ್ಸಾಯ, ಪಚ್ಚೇಕಂ ತು ಯಥಾಕ್ಕಮಂ;

ಪಞ್ಚವಿಞ್ಞಾಣಯುಗಳಂ, ಭವತೀತಿ ಪಕಾಸಿತಂ.

೨೫೧. ಕಾಮಪಾಕಾನಿ ಸೇಸಾನಿ, ಮಗ್ಗಾವಜ್ಜನಮಾದಿತೋ;

ಹಸನಂ ಪಟಿಘಾರೂಪಾ-ವಚರಂ ವತ್ಥುನಿಸ್ಸಿತಂ.

೨೫೨. ದ್ವೇಚತ್ತಾಲೀಸ ನಿಸ್ಸಾಯ, ಅನಿಸ್ಸಾಯ ಚ ಜಾಯರೇ;

ಅನಿಸ್ಸಾಯ ವಿಪಾಕಾನಿ, ಆರುಪ್ಪೇತಿ ಸಮೀರಿತಂ.

೨೫೩. ಇಚ್ಚೇವಂ ವತ್ಥುಭೇದೇನ, ಚಿತ್ತುಪ್ಪಾದಾ ಪಕಾಸಿತಾ;

ತತೋ ಪರಂ ವಿಭಾವೇಯ್ಯ, ಭೂಮಿಭೇದೇನ ಪಣ್ಡಿತೋ.

೨೫೪. ನಿರಯೇ ಪೇತಲೋಕೇ ಚ, ತಿರಚ್ಛಾನಾಸುರೇ ತಥಾ;

ಪಾಪಕಮ್ಮೋಪಪಜ್ಜನ್ತಿ, ಪಾಪಪಾಕಾಯ ಸನ್ಧಿಯಾ.

೨೫೫. ಭೂಮಿಸ್ಸಿತೇಸು ದೇವೇಸು, ಮನುಸ್ಸೇಸುಪಿ ಹೀನಕಾ;

ಅಹೇತುಕಾಯ ಜಾಯನ್ತಿ, ಪುಞ್ಞಪಾಕಾಯ ಸನ್ಧಿಯಾ.

೨೫೬. ಚಾತುಮಹಾರಾಜಿಕಾ ಚ, ತಾವತಿಂಸಾ ಚ ಯಾಮಕಾ;

ತುಸಿತಾ ಚೇವ ನಿಮ್ಮಾನರತಿನೋ ವಸವತ್ತಿನೋ.

೨೫೭. ಇಚ್ಚೇವಂ ಛಸು ದೇವೇಸು, ಮನುಸ್ಸೇಸು ಚ ಜಾಯರೇ;

ಮಹಾವಿಪಾಕಸನ್ಧೀಹಿ, ಕಾಮಪುಞ್ಞಕತಾ ಜನಾ.

೨೫೮. ಬ್ರಹ್ಮಾನಂ ಪಾರಿಸಜ್ಜಾ ಚ, ತಥಾ ಬ್ರಹ್ಮಪುರೋಹಿತಾ;

ಮಹಾಬ್ರಹ್ಮಾ ಚ ಜಾಯನ್ತಿ, ಪಠಮಜ್ಝಾನಸನ್ಧಿಯಾ.

೨೫೯. ಪರಿತ್ತಾ ಅಪ್ಪಮಾಣಾಭಾ, ಜಾಯನ್ತಾಭಸ್ಸರಾ ತಥಾ;

ದುತಿಯಜ್ಝಾನಪಾಕಾಯ, ತತಿಯಾಯ ಚ ಸನ್ಧಿಯಾ.

೨೬೦. ಪರಿತ್ತಸುಭಪ್ಪಮಾಣಸುಭಾ ಚ ಸುಭಕಿಣ್ಹಕಾ;

ಚತುತ್ಥಾಯ ತು ಜಾಯನ್ತಿ, ತತಿಯಜ್ಝಾನಭೂಮಿಕಾ.

೨೬೧. ವೇಹಪ್ಫಲಾ ಅಸಞ್ಞೀ ಚ, ಸುದ್ಧಾವಾಸಾತಿ ಸತ್ತಸು;

ಪಞ್ಚಮಾಯ ಚ ಜಾಯನ್ತಿ, ಅಸಞ್ಞೀಚಿತ್ತವಜ್ಜಿತಾ.

೨೬೨. ಅವಿಹಾ ಚ ಅತಪ್ಪಾ ಚ, ಸುದಸ್ಸಾ ಚ ಸುದಸ್ಸಿನೋ;

ಅಕನಿಟ್ಠಾತಿ ಪಞ್ಚೇತೇ, ಸುದ್ಧಾವಾಸಾ ಪಕಾಸಿತಾ.

೨೬೩. ಆಕಾಸಾನಞ್ಚಾಯತನಪಾಕಾದೀಹಿ ಯಥಾಕ್ಕಮಂ;

ಆಕಾಸಾನಞ್ಚಾಯತನಭೂಮಿಕಾದೀಸು ಜಾಯರೇ.

೨೬೪. ಚುತಿಸನ್ಧಿಭವಙ್ಗಾನಂ, ವಸಾ ಪಾಕಾ ಮಹಗ್ಗತಾ;

ಕಾಮೇ ಸಹೇತುಕಾ ಪಾಕಾ, ತದಾಲಮ್ಬಣತೋಪಿ ಚ.

೨೬೫. ಯಥಾವುತ್ತನಿಯಾಮೇನ, ಭೂಮೀಸ್ವೇಕಾವ ಜಾಯರೇ;

ಚಿತ್ತುಪ್ಪಾದೇಸು ಸಬ್ಬತ್ಥ, ನ ತ್ವೇವಾಸಞ್ಞಿನೋ ಮತಾ.

೨೬೬. ಘಾನಜಿವ್ಹಾಕಾಯಧಾತು-ನಿಸ್ಸಿತಂ ಮಾನಸಂ ತಥಾ;

ಪಟಿಘದ್ವಯಮಿಚ್ಚೇವಮಟ್ಠ ಹೋನ್ತೇವ ಕಾಮಿಸು.

೨೬೭. ಚಕ್ಖುಸೋತಞ್ಚ ವಿಞ್ಞಾಣಂ, ಮನೋಧಾತು ಚ ತೀರಣಂ;

ಕಾಮರೂಪೇಸು ಜಾಯನ್ತಿ, ಯಥಾಸಮ್ಭವತೋ ದಸ.

೨೬೮. ವೋಟ್ಠಬ್ಬಕಾಮಪುಞ್ಞಾನಿ, ವಿಪ್ಪಯುತ್ತಾನಿ ದಿಟ್ಠಿಯಾ;

ಉದ್ಧಚ್ಚಸಹಿತಞ್ಚೇತಿ, ಸಬ್ಬತ್ಥೇತಾನಿ ಚುದ್ದಸ.

೨೬೯. ಕಙ್ಖಿತಂ ದಿಟ್ಠಿಯುತ್ತಾನಿ, ಸುದ್ಧಾವಾಸವಿವಜ್ಜಿತೇ;

ಸಿತಞ್ಚ ರೂಪಜವನ-ಮಾರುಪ್ಪಾಪಾಯವಜ್ಜಿತೇ.

೨೭೦. ಕಾಮಕ್ರಿಯಾ ಸಹೇತೂ ಚ, ಉದ್ಧಂ ಲೋಕುತ್ತರತ್ತಯಂ;

ಚತುತ್ಥಾರುಪ್ಪಜವನಂ, ಸಬ್ಬತ್ಥಾಪಾಯವಜ್ಜಿತೇ.

೨೭೧. ಸೇಸಮಾರುಪ್ಪಜವನಂ, ಹಿತ್ವಾಪಾಯಂ ಯಥಾಕ್ಕಮಂ;

ಉದ್ಧಮಾರುಪ್ಪಭೂಮಿಞ್ಚ, ಜಾಯತೀತಿ ವಿಭಾವಯೇ.

೨೭೨. ಸೋತಾಪತ್ತಿಫಲಾದೀನಿ, ಚತ್ತಾರಾನುತ್ತರಾನಿ ತು;

ಸುದ್ಧಾವಾಸಮಪಾಯಞ್ಚ, ಹಿತ್ವಾ ಸಬ್ಬತ್ಥ ಜಾಯರೇ.

೨೭೩. ಸುದ್ಧಾವಾಸಮಪಾಯಞ್ಚ, ಹಿತ್ವಾರೂಪಞ್ಚ ಸಬ್ಬಥಾ;

ಪಠಮಾನುತ್ತರೋ ಮಗ್ಗೋ, ಸೇಸಟ್ಠಾನೇಸು ಜಾಯತಿ.

೨೭೪. ಸತ್ತತಿಂಸ ಅಪಾಯೇಸು, ಕಾಮೇಸೀತಿ ಪಕಾಸಿತಾ;

ಪಞ್ಚಪಞ್ಞಾಸ ಸುದ್ಧೇಸು, ರೂಪೇಸ್ವೇಕೂನಸತ್ತತಿ.

೨೭೫. ಛಚತ್ತಾಲೀಸ ಆರುಪ್ಪೇ, ಉಪ್ಪಜ್ಜನ್ತಿ ಯಥಾರಹಂ;

ಇಚ್ಚೇವಂ ಭೂಮಿಭೇದೇನ, ಚಿತ್ತುಪ್ಪಾದಾ ಪಕಾಸಿತಾ.

೨೭೬. ತಿಹೇತುಸತ್ತೇ ಸಬ್ಬಾನಿ, ದ್ವಿಹೇತುಕಾಹೇತುಕೇ ಪನ;

ಪರಿತ್ತಾನಿ ವಿವಜ್ಜೇತ್ವಾ, ಞಾಣಪಾಕಕ್ರಿಯಾಜವೇ.

೨೭೭. ಪುಥುಜ್ಜನಾನಂ ಸಮ್ಭೋನ್ತಿ, ದಿಟ್ಠಿಯುತ್ತಞ್ಚ ಕಙ್ಖಿತಂ;

ಸೋತಾಪನ್ನಾದಿತಿಣ್ಣಮ್ಪಿ, ಫಲಂ ಹೋತಿ ಯಥಾಸಕಂ.

೨೭೮. ವೀತರಾಗಸ್ಸ ಜವನಂ, ಕ್ರಿಯಾ ಚನ್ತಿಮನುತ್ತರಂ;

ಪುಥುಜ್ಜನಾದಿತಿಣ್ಣಮ್ಪಿ, ಪಟಿಘಂ ಸಮುದೀರಿತಂ.

೨೭೯. ಜವಾ ಪುಥುಜ್ಜನಾದೀನಂ, ಚತುನ್ನಂ ಸೇಸ ಸಾಸವಾ;

ಸಾಸವಾವಜ್ಜಪಾಕಾನಿ, ಪಞ್ಚನ್ನಮಪಿ ದೀಪಯೇ.

೨೮೦. ಪುಥುಜ್ಜನೇಸು ತೇಸಟ್ಠಿ, ಸೋತಾಪನ್ನಾದಿಕದ್ವಯೇ;

ಏಕೂನಸಟ್ಠಿ ಚಿತ್ತಾನಿ, ಅನಾಗಾಮಿಕಪುಗ್ಗಲೇ.

೨೮೧. ಸತ್ತಪಞ್ಞಾಸ ಜಾಯನ್ತಿ, ತೇಪಞ್ಞಾಸ ಅನಾಸವೇ;

ಮಗ್ಗಟ್ಠೇಸು ಸಕೋ ಮಗ್ಗೋ, ಪುಗ್ಗಲೇಸು ಅಯಂ ನಯೋ.

೨೮೨. ತಿಹೇತುಕಾಮಚುತಿಯಾ, ಸಬ್ಬಾಪಿ ಪಟಿಸನ್ಧಿಯೋ;

ದ್ವಿಹೇತಾಹೇತುಚುತಿಯಾ, ಕಾಮಾವಚರಸನ್ಧಿಯೋ.

೨೮೩. ರೂಪಾವಚರಚುತಿಯಾ, ಸಹೇತುಪಟಿಸನ್ಧಿಯೋ;

ಆರುಪ್ಪಾರುಪ್ಪಚುತಿಯಾ, ಹೇಟ್ಠಿಮಾರುಪ್ಪವಜ್ಜಿತಾ.

೨೮೪. ಪಟಿಸನ್ಧಿ ತಥಾ ಕಾಮೇ, ತಿಹೇತುಪಟಿಸನ್ಧಿಯೋ;

ಭವನ್ತೀತಿ ಚ ಮೇಧಾವೀ, ಚುತಿಸನ್ಧಿನಯಂ ನಯೇ.