೨೩. ತೇವೀಸತಿಮೋ ಪರಿಚ್ಛೇದೋ

ಕಿಲೇಸಪ್ಪಹಾನಕಥಾ

೧೩೭೫. ಏತೇಸು ಯೇನ ಯೇ ಧಮ್ಮಾ, ಪಹಾತಬ್ಬಾ ಭವನ್ತಿ ಹಿ;

ತೇಸಂ ದಾನಿ ಕರಿಸ್ಸಾಮಿ, ಪಕಾಸನಮಿತೋ ಪರಂ.

ಇಮೇಸು ಪನ ಚತೂಸು ಮಗ್ಗಞಾಣೇಸು ಯೇ ಧಮ್ಮಾ ಯೇನ ಞಾಣೇನ ಪಹಾತಬ್ಬಾ, ತೇಸಂ ಪಹಾನಮೇವಂ ವೇದಿತಬ್ಬಂ. ಏತಾನಿ ಹಿ ಯಥಾಯೋಗಂ ಸಂಯೋಜನಕಿಲೇಸಮಿಚ್ಛತ್ತಲೋಕಧಮ್ಮಮಚ್ಛರಿಯವಿಪಲ್ಲಾಸಗನ್ಥಾಗತಿಆಸವ- ಓಘಯೋಗನೀವರಣಪರಾಮಾಸಉಪಾದಾನಾನುಸಯಮಲಅಕುಸಲಕಮ್ಮಪಥ- ಅಕುಸಲಚಿತ್ತುಪ್ಪಾದಸಙ್ಖಾತಾನಂ ಪಹಾನಕರಾನಿ.

ತತ್ಥ ಸಂಯೋಜನಾನೀತಿ ದಸ ಸಂಯೋಜನಾನಿ. ಸೇಯ್ಯಥಿದಂ – ರೂಪರಾಗಾರೂಪರಾಗಮಾನಉದ್ಧಚ್ಚಾವಿಜ್ಜಾತಿ ಇಮೇ ಪಞ್ಚ ಉದ್ಧಂಭಾಗಿಯಸಂಯೋಜನಾನಿ ನಾಮ. ಸಕ್ಕಾಯದಿಟ್ಠಿ ವಿಚಿಕಿಚ್ಛಾ ಸೀಲಬ್ಬತಪರಾಮಾಸೋ ಕಾಮರಾಗೋ ಪಟಿಘೋತಿ ಇಮೇ ಪಞ್ಚ ಅಧೋಭಾಗಿಯಸಂಯೋಜನಾನಿ ನಾಮ.

ಕಿಲೇಸಾತಿ ದಸ ಕಿಲೇಸಾ. ಸೇಯ್ಯಥಿದಂ – ಲೋಭೋ ದೋಸೋ ಮೋಹೋ ಮಾನೋ ದಿಟ್ಠಿ ವಿಚಿಕಿಚ್ಛಾ ಥಿನಂ ಉದ್ಧಚ್ಚಂ ಅಹಿರಿಕಂ ಅನೋತ್ತಪ್ಪನ್ತಿ.

ಮಿಚ್ಛತ್ತಾತಿ ದಸ ಮಿಚ್ಛತ್ತಾ. ಸೇಯ್ಯಥಿದಂ – ಮಿಚ್ಛಾದಿಟ್ಠಿ ಮಿಚ್ಛಾಸಙ್ಕಪ್ಪೋ ಮಿಚ್ಛಾವಾಚಾ ಮಿಚ್ಛಾಕಮ್ಮನ್ತೋ ಮಿಚ್ಛಾಆಜೀವೋ ಮಿಚ್ಛಾವಾಯಾಮೋ ಮಿಚ್ಛಾಸತಿ ಮಿಚ್ಛಾಸಮಾಧಿ ಮಿಚ್ಛಾಞಾಣಂ ಮಿಚ್ಛಾವಿಮುತ್ತೀತಿ.

ಲೋಕಧಮ್ಮಾತಿ ಅಟ್ಠ ಲೋಕಧಮ್ಮಾ ಲಾಭೋ ಅಲಾಭೋ ಯಸೋ ಅಯಸೋ ನಿನ್ದಾ ಪಸಂಸಾ ಸುಖಂ ದುಕ್ಖನ್ತಿ. ಇಧ ಪನ ಕಾರಣೂಪಚಾರೇನ ಲಾಭಾದಿವತ್ಥುಕಸ್ಸ ಅನುನಯಸ್ಸ, ಅಲಾಭಾದಿವತ್ಥುಕಸ್ಸ ಪಟಿಘಸ್ಸ ಚೇತಂ ಲೋಕಧಮ್ಮಗಹಣೇನ ಗಹಣಂ ಕತನ್ತಿ ವೇದಿತಬ್ಬಂ.

ಮಚ್ಛರಿಯಾನೀತಿ ಪಞ್ಚ ಮಚ್ಛರಿಯಾನಿ ಆವಾಸಮಚ್ಛರಿಯಂ ಕುಲಮಚ್ಛರಿಯಂ ಲಾಭಮಚ್ಛರಿಯಂ ಧಮ್ಮಮಚ್ಛರಿಯಂ ವಣ್ಣಮಚ್ಛರಿಯನ್ತಿ. ಇಮಾನಿ ಆವಾಸಾದೀಸು ಅಞ್ಞೇಸಂ ಸಾಧಾರಣಭಾವಂ ಅಸಹನಾಕಾರೇನ ಪವತ್ತಾನಿ ಮಚ್ಛರಿಯಾನಿ.

ವಿಪಲ್ಲಾಸಾತಿ ಅನಿಚ್ಚದುಕ್ಖಅನತ್ತಅಸುಭೇಸುಯೇವ ವತ್ಥೂಸು ‘‘ನಿಚ್ಚಂ ಸುಖಂ ಅತ್ತಾ ಸುಭ’’ನ್ತಿ ಏವಂ ಪವತ್ತಾ ಸಞ್ಞಾವಿಪಲ್ಲಾಸೋ ಚಿತ್ತವಿಪಲ್ಲಾಸೋ ದಿಟ್ಠಿವಿಪಲ್ಲಾಸೋತಿ ಇಮೇ ತಯೋ ವಿಪಲ್ಲಾಸಾ.

ಗನ್ಥಾತಿ ಚತ್ತಾರೋ ಗನ್ಥಾ ಅಭಿಜ್ಝಾಕಾಯಗನ್ಥೋ, ಬ್ಯಾಪಾದೋ, ಸೀಲಬ್ಬತಪರಾಮಾಸೋ, ಇದಂಸಚ್ಚಾಭಿನಿವೇಸೋ ಕಾಯಗನ್ಥೋತಿ.

ಅಗತೀತಿ ಛನ್ದದೋಸಮೋಹಭಯಾನಿ. ಆಸವಾತಿ ಚತ್ತಾರೋ ಆಸವಾ – ಕಾಮರಾಗಭವರಾಗಮಿಚ್ಛಾದಿಟ್ಠಿಅವಿಜ್ಜಾಸವೋತಿ. ಓಘಯೋಗಾನೀತಿಪಿ ತೇಸಮೇವಾಧಿವಚನಂ. ನೀವರಣಾನೀತಿ ಕಾಮಚ್ಛನ್ದಾದಯೋ. ಪರಾಮಾಸೋತಿ ಮಿಚ್ಛಾದಿಟ್ಠಿಯಾ ಅಧಿವಚನಂ.

ಉಪಾದಾನಾತಿ ಚತ್ತಾರಿ ಉಪಾದಾನಾನಿ ಕಾಮುಪಾದಾನಾದೀನೀತಿ. ಅನುಸಯಾತಿ ಸತ್ತ ಅನುಸಯಾ ಕಾಮರಾಗಾನುಸಯೋ ಪಟಿಘಮಾನದಿಟ್ಠಿವಿಚಿಕಿಚ್ಛಾಭವರಾಗಾವಿಜ್ಜಾನುಸಯೋತಿ. ಮಲಾತಿ ತಯೋ ಮಲಾ – ಲೋಭೋ ದೋಸೋ ಮೋಹೋತಿ.

ಅಕುಸಲಕಮ್ಮಪಥಾತಿ ದಸ ಅಕುಸಲಕಮ್ಮಪಥಾ. ಸೇಯ್ಯಥಿದಂ – ಪಾಣಾತಿಪಾತೋ ಅದಿನ್ನಾದಾನಂ ಕಾಮೇಸುಮಿಚ್ಛಾಚಾರೋ ಮುಸಾವಾದೋ ಪಿಸುಣವಾಚಾ ಫರುಸವಾಚಾ ಸಮ್ಫಪ್ಪಲಾಪೋ ಅಭಿಜ್ಝಾ ಬ್ಯಾಪಾದೋ ಮಿಚ್ಛಾದಿಟ್ಠೀತಿ ದಸ.

ಅಕುಸಲಚಿತ್ತುಪ್ಪಾದಾತಿ ಲೋಭಮೂಲಾನಿ ಅಟ್ಠ, ದೋಸಮೂಲಾನಿ ದ್ವೇ, ಮೋಹಮೂಲಾನಿ ದ್ವೇತಿ ಇಮೇ ದ್ವಾದಸಾತಿ.

ಏತೇಸಂ ಸಂಯೋಜನಾದೀನಂ ಏತಾನಿ ಯಥಾಸಮ್ಭವಂ ಪಹಾನಕರಾನಿ. ಕಥಂ? ಸಂಯೋಜನೇಸು ತಾವ ಸಕ್ಕಾಯದಿಟ್ಠಿವಿಚಿಕಿಚ್ಛಾಸೀಲಬ್ಬತಪರಾಮಾಸಾ ಅಪಾಯಗಮನೀಯಾ ಕಾಮರಾಗಪಟಿಘಾತಿ ಏತೇ ಪಠಮಮಗ್ಗಞಾಣವಜ್ಝಾ, ಸೇಸಾ ಕಾಮರಾಗಪಟಿಘಾ ಓಳಾರಿಕಾ ದುತಿಯಮಗ್ಗಞಾಣವಜ್ಝಾ, ಸುಖುಮಾ ತತಿಯಮಗ್ಗಞಾಣವಜ್ಝಾ, ರೂಪರಾಗಾದಯೋ ಪಞ್ಚಪಿ ಚತುತ್ಥಮಗ್ಗಞಾಣವಜ್ಝಾ ಏವ.

ಕಿಲೇಸೇಸು ದಿಟ್ಠಿವಿಚಿಕಿಚ್ಛಾ ಪಠಮಮಗ್ಗಞಾಣವಜ್ಝಾ, ದೋಸೋ ತತಿಯಮಗ್ಗಞಾಣವಜ್ಝೋ, ಲೋಭಮೋಹಮಾನಥಿನಉದ್ಧಚ್ಚಅಹಿರಿಕಾನೋತ್ತಪ್ಪಾನಿ ಚತುತ್ಥಮಗ್ಗಞಾಣವಜ್ಝಾನಿ.

ಮಿಚ್ಛತ್ತೇಸು ಮಿಚ್ಛಾದಿಟ್ಠಿ ಮುಸಾವಾದೋ ಮಿಚ್ಛಾಕಮ್ಮನ್ತೋ ಮಿಚ್ಛಾಆಜೀವೋತಿ ಇಮೇ ಪಠಮಮಗ್ಗಞಾಣವಜ್ಝಾ, ಮಿಚ್ಛಾಸಙ್ಕಪ್ಪೋ ಪಿಸುಣವಾಚಾ ಫರುಸವಾಚಾತಿ ಇಮೇ ತತಿಯಮಗ್ಗಞಾಣವಜ್ಝಾ, ಚೇತನಾಯೇವ ಚೇತ್ಥ ಮಿಚ್ಛಾವಾಚಾತಿ ವೇದಿತಬ್ಬಾ, ಸಮ್ಫಪ್ಪಲಾಪಮಿಚ್ಛಾವಾಯಾಮಸತಿಸಮಾಧಿವಿಮುತ್ತಿಞಾಣಾನಿ ಚತುತ್ಥಮಗ್ಗಞಾಣವಜ್ಝಾನಿ.

ಲೋಕಧಮ್ಮೇಸು ಪಟಿಘೋ ತತಿಯಮಗ್ಗಞಾಣವಜ್ಝೋ, ಅನುನಯೋ ಚತುತ್ಥಮಗ್ಗಞಾಣವಜ್ಝೋ, ಯಸೇ ಪಸಂಸಾಯ ಚ ಅನುನಯೋ ಚತುತ್ಥಮಗ್ಗಞಾಣವಜ್ಝೋತಿ ಏಕೇ.

ಮಚ್ಛರಿಯಾನಿ ಪಠಮಮಗ್ಗಞಾಣವಜ್ಝಾನಿ ಏವ.

ವಿಪಲ್ಲಾಸೇಸು ಪನ ಅನಿಚ್ಚೇ ನಿಚ್ಚಂ, ಅನತ್ತನಿ ಅತ್ತಾತಿ ಚ ಸಞ್ಞಾಚಿತ್ತದಿಟ್ಠಿವಿಪಲ್ಲಾಸಾ, ದುಕ್ಖೇ ಸುಖಂ, ಅಸುಭೇ ಸುಭನ್ತಿ ದಿಟ್ಠಿವಿಪಲ್ಲಾಸೋ ಚಾತಿ ಇಮೇ ಪಠಮಮಗ್ಗಞಾಣವಜ್ಝಾ, ಅಸುಭೇ ಸುಭನ್ತಿ ಸಞ್ಞಾಚಿತ್ತವಿಪಲ್ಲಾಸಾ ತತಿಯಮಗ್ಗಞಾಣವಜ್ಝಾ, ದುಕ್ಖೇ ಸುಖನ್ತಿ ಚತುತ್ಥಮಗ್ಗಞಾಣವಜ್ಝಾ.

ಗನ್ಥೇಸು ಸೀಲಬ್ಬತಪರಾಮಾಸಇದಂಸಚ್ಚಾಭಿನಿವೇಸಕಾಯಗನ್ಥಾ ಪಠಮಮಗ್ಗಞಾಣವಜ್ಝಾ, ಬ್ಯಾಪಾದಕಾಯಗನ್ಥೋ ತತಿಯಮಗ್ಗಞಾಣವಜ್ಝೋ, ಅಭಿಜ್ಝಾಕಾಯಗನ್ಥೋ ಚತುತ್ಥಮಗ್ಗಞಾಣವಜ್ಝೋವ.

ಅಗತಿಯೋ ಪಠಮಮಗ್ಗಞಾಣವಜ್ಝಾ.

ಆಸವೇಸು ದಿಟ್ಠಾಸವೋ ಪಠಮಞಾಣವಜ್ಝೋ, ಕಾಮಾಸವೋ ತತಿಯಞಾಣವಜ್ಝೋ, ಇತರೇ ದ್ವೇ ಚತುತ್ಥಞಾಣವಜ್ಝಾ. ಓಘಯೋಗೇಸುಪಿ ಏಸೇವ ನಯೋ.

ನೀವರಣೇಸು ವಿಚಿಕಿಚ್ಛಾನೀವರಣಂ ಪಠಮಞಾಣವಜ್ಝಂ, ಕಾಮಚ್ಛನ್ದೋ ಬ್ಯಾಪಾದೋ ಕುಕ್ಕುಚ್ಚನ್ತಿ ತೀಣಿ ತತಿಯಞಾಣವಜ್ಝಾನಿ, ಥಿನಮಿದ್ಧಉದ್ಧಚ್ಚಾನಿ ಚತುತ್ಥಞಾಣವಜ್ಝಾನಿ.

ಪರಾಮಾಸೋ ಪಠಮಞಾಣವಜ್ಝೋ.

ಉಪಾದಾನೇಸು ಸಬ್ಬೇಸಮ್ಪಿ ಲೋಕಿಯಧಮ್ಮಾನಂ ವತ್ಥುಕಾಮವಸೇನ ‘‘ಕಾಮಾ’’ತಿ ಆಗತತ್ತಾ ರೂಪಾರೂಪೇಸು ರಾಗೋಪಿ ಕಾಮುಪಾದಾನೇ ಪತತಿ, ತಸ್ಮಾ ತಞ್ಚ ಕಾಮುಪಾದಾನಂ ಚತುತ್ಥಞಾಣವಜ್ಝಂ, ಸೇಸಾನಿ ಪಠಮಞಾಣವಜ್ಝಾನಿ.

ಅನುಸಯೇಸು ದಿಟ್ಠಿವಿಚಿಕಿಚ್ಛಾನುಸಯಾ ಪಠಮಞಾಣವಜ್ಝಾ, ಕಾಮರಾಗಪಟಿಘಾನುಸಯಾ ತತಿಯಞಾಣವಜ್ಝಾ, ಮಾನಭವರಾಗಾವಿಜ್ಜಾನುಸಯಾ ಚತುತ್ಥಞಾಣವಜ್ಝಾ.

ಮಲೇಸು ದೋಸಮಲಂ ತತಿಯಞಾಣವಜ್ಝಂ, ಇತರಾನಿ ಚತುತ್ಥಞಾಣವಜ್ಝಾನೇವ.

ಅಕುಸಲಕಮ್ಮಪಥೇಸು ಪಾಣಾತಿಪಾತೋ ಅದಿನ್ನಾದಾನಂ ಮಿಚ್ಛಾಚಾರೋ ಮುಸಾವಾದೋ ಮಿಚ್ಛಾದಿಟ್ಠೀತಿ ಇಮೇ ಪಠಮಞಾಣವಜ್ಝಾ, ಪಿಸುಣವಾಚಾ ಫರುಸವಾಚಾ ಬ್ಯಾಪಾದೋತಿ ತತಿಯಞಾಣವಜ್ಝಾ, ಸಮ್ಫಪ್ಪಲಾಪೋ ಅಭಿಜ್ಝಾ ಚತುತ್ಥಞಾಣವಜ್ಝಾವ.

ಅಕುಸಲಚಿತ್ತುಪ್ಪಾದೇಸು ಚತ್ತಾರೋ ದಿಟ್ಠಿಗತಚಿತ್ತುಪ್ಪಾದಾ, ವಿಚಿಕಿಚ್ಛಾಸಮ್ಪಯುತ್ತೋ ಚಾತಿ ಪಞ್ಚ ಪಠಮಞಾಣವಜ್ಝಾ, ದ್ವೇ ಪಟಿಘಸಮ್ಪಯುತ್ತಾ ತತಿಯಞಾಣವಜ್ಝಾ, ಸೇಸಾ ಚತುತ್ಥಞಾಣವಜ್ಝಾತಿ.

ಯಞ್ಚ ಯೇನ ವಜ್ಝಂ, ತಂ ತೇನ ಪಹಾತಬ್ಬಂ ನಾಮ. ತೇನ ವುತ್ತಂ ‘‘ಏತೇಸಂ ಸಂಯೋಜನಾದೀನಂ ಧಮ್ಮಾನಂ ಏತಾನಿ ಯಥಾಯೋಗಂ ಪಹಾನಕರಾನೀ’’ತಿ.

೧೩೭೬. ಏತೇಸು ಞಾಣೇಸು ಚ ಯೇನ ಯೇನ,

ಯೋ ಯೋ ಹಿ ಧಮ್ಮೋ ಸಮುಪೇತಿ ಘಾತಂ;

ಸೋ ಸೋ ಅಸೇಸೇನ ಚ ತೇನ ತೇನ,

ಸನ್ದಸ್ಸಿತೋ ಸಾಧು ಮಯಾ ಪನೇವಂ.

ಕಿಲೇಸಪಹಾನಕ್ಕಮಕಥಾಯಂ.

೧೩೭೭. ಪರಿಞ್ಞಾದೀನಿ ಕಿಚ್ಚಾನಿ, ಯಾನಿ ವುತ್ತಾನಿ ಸತ್ಥುನಾ;

ಸಚ್ಚಾಭಿಸಮಯೇ ತಾನಿ, ಪವಕ್ಖಾಮಿ ಇತೋ ಪರಂ.

೧೩೭೮. ಏಕೇಕಸ್ಸ ಪನೇತೇಸು,

ಞಾಣಸ್ಸೇಕಕ್ಖಣೇ ಸಿಯಾ;

ಪರಿಞ್ಞಾ ಚ ಪಹಾನಞ್ಚ,

ಸಚ್ಛಿಕಿರಿಯಾ ಚ ಭಾವನಾ.

೧೩೭೯. ಪರಿಞ್ಞಾದೀನಿ ಏತಾನಿ, ಕಿಚ್ಚಾನೇಕಕ್ಖಣೇ ಪನ;

ಯಥಾಸಭಾವತೋ ತಾನಿ, ಜಾನಿತಬ್ಬಾನಿ ವಿಞ್ಞುನಾ.

೧೩೮೦. ಪದೀಪೋ ಹಿ ಯಥಾ ಲೋಕೇ, ಅಪುಬ್ಬಾಚರಿಮಂ ಇಧ;

ಚತ್ತಾರಿ ಪನ ಕಿಚ್ಚಾನಿ, ಕರೋತೇಕಕ್ಖಣೇ ಪನ.

೧೩೮೧. ಆಲೋಕಞ್ಚ ವಿದಂಸೇತಿ, ನಾಸೇತಿ ತಿಮಿರಮ್ಪಿ ಚ;

ಪರಿಯಾದಿಯತಿ ತೇಲಞ್ಚ, ವಟ್ಟಿಂ ಝಾಪೇತಿ ಏಕತೋ.

೧೩೮೨. ಏವಂ ತಂ ಮಗ್ಗಞಾಣಮ್ಪಿ, ಅಪುಬ್ಬಾಚರಿಮಂ ಪನ;

ಚತ್ತಾರಿಪಿ ಚ ಕಿಚ್ಚಾನಿ, ಕರೋತೇಕಕ್ಖಣೇ ಪನ.

೧೩೮೩. ಪರಿಞ್ಞಾಭಿಸಮಯೇನೇವ, ದುಕ್ಖಂ ಅಭಿಸಮೇತಿ ಸೋ;

ಪಹಾನಾಭಿಸಮಯೇನೇವ, ತಥಾ ಸಮುದಯಮ್ಪಿ ಚ.

೧೩೮೪. ಭಾವನಾವಿಧಿನಾಯೇವ, ಮಗ್ಗಂ ಅಭಿಸಮೇತಿ ತಂ;

ಆರಮ್ಮಣಕ್ರಿಯಾಯೇವ, ನಿರೋಧಂ ಸಚ್ಛಿಕರೋತಿ ಸೋ.

ವುತ್ತಮ್ಪಿ ಚೇತಂ ‘‘ಮಗ್ಗಸಮಙ್ಗಿಸ್ಸ ಞಾಣಂ ದುಕ್ಖೇಪೇತಂ ಞಾಣಂ, ದುಕ್ಖಸಮುದಯೇಪೇತಂ ಞಾಣಂ, ದುಕ್ಖನಿರೋಧೇಪೇತಂ ಞಾಣಂ, ದುಕ್ಖನಿರೋಧಗಾಮಿನಿಯಾ ಪಟಿಪದಾಯಪೇತಂ ಞಾಣ’’ನ್ತಿ. ತತ್ಥ ಯಥಾ ಪದೀಪೋ ವಟ್ಟಿಂ ಝಾಪೇತಿ, ಏವಂ ಮಗ್ಗಞಾಣಂ ದುಕ್ಖಂ ಪರಿಜಾನಾತಿ. ಯಥಾ ಅನ್ಧಕಾರಂ ನಾಸೇತಿ, ಏವಂ ಸಮುದಯಂ ಪಜಹತಿ. ಯಥಾ ಆಲೋಕಂ ವಿದಂಸೇತಿ, ಏವಂ ಸಹಜಾತಾದಿಪಚ್ಚಯತಾಯ ಸಮ್ಮಾಸಙ್ಕಪ್ಪಾದಿಮಗ್ಗಂ ಭಾವೇತಿ. ಯಥಾ ತೇಲಂ ಪರಿಯಾದಿಯತಿ, ಏವಂ ಕಿಲೇಸಪರಿಯಾದಾನೇನ ನಿರೋಧಂ ಸಚ್ಛಿಕರೋತೀತಿ ವೇದಿತಬ್ಬಂ.

೧೩೮೫. ಉಗ್ಗಚ್ಛನ್ತೋ ಯಥಾದಿಚ್ಚೋ, ಅಪುಬ್ಬಾಚರಿಮಂ ಪನ;

ಚತ್ತಾರಿ ಪನ ಕಿಚ್ಚಾನಿ, ಕರೋತೇಕಕ್ಖಣೇ ಇಧ.

೧೩೮೬. ಓಭಾಸೇತಿ ಚ ರೂಪಾನಿ, ನಾಸೇತಿ ತಿಮಿರಮ್ಪಿ ಚ;

ಆಲೋಕಞ್ಚ ವಿದಂಸೇತಿ, ಸೀತಞ್ಚ ಪಟಿಹಞ್ಞತಿ.

೧೩೮೭. ಯಥಾ ಚ ಮಹತೀ ನಾವಾ, ಅಪುಬ್ಬಾಚರಿಮಂ ಪನ;

ಚತ್ತಾರಿ ಪನ ಕಿಚ್ಚಾನಿ, ಕರೋತೇಕಕ್ಖಣೇ ಪನ.

೧೩೮೮. ಜಹತೀ ಓರಿಮಂ ತೀರಂ, ಸೋತಂ ಛಿನ್ದತಿ ಸಾ ಪನ;

ತಥಾ ವಹತಿ ಭಣ್ಡಞ್ಚ, ತೀರಮಪ್ಪೇತಿ ಪಾರಿಮಂ.

೧೩೮೯. ನಾವಾಯೋರಿಮತೀರಸ್ಸ, ಯಥಾ ಪಜಹನಂ ಪನ;

ತಥೇವ ಮಗ್ಗಞಾಣಸ್ಸ, ದುಕ್ಖಸ್ಸ ಪರಿಜಾನನಂ.

೧೩೯೦. ಯಥಾ ಛಿನ್ದತಿ ತಂ ಸೋತಂ, ತಣ್ಹಂ ಜಹತಿ ತಂ ತಥಾ;

ಯಥಾ ವಹತಿ ತಂ ಭಣ್ಡಂ, ಸಹಜಾತಾದಿನಾ ಪನ.

೧೩೯೧. ತಥೇವ ಪಚ್ಚಯತ್ತೇನ, ಮಗ್ಗಂ ಭಾವೇತಿ ನಾಮ ಸೋ;

ಯಥಾ ಪಾರಂ ಪನ ಏವಂ, ನಿರೋಧಾರಮ್ಮಣಂ ಭವೇ.

೧೩೯೨. ಲೋಕುತ್ತರೇನ ನಿದ್ದಿಟ್ಠಾ, ಯಾ ಲೋಕುತ್ತರಭಾವನಾ;

ಸಾ ಸಙ್ಖೇಪನಯೇನೇವಂ, ಮಯಾ ಸಾಧು ಪಕಾಸಿತಾ.

೧೩೯೩. ಕೋ ಹಿ ನಾಮ ನರೋ ಲೋಕೇ,

ಲೋಕುತ್ತರಸುಖಾವಹಂ;

ಭಾವನಂ ಪನ ಪಞ್ಞಾಯ,

ನ ಚ ಭಾವೇಯ್ಯ ಪಣ್ಡಿತೋ.

೧೩೯೪. ಇಮಂ ವಿದಿತ್ವಾ ಹಿತಭಾವನಂ ವನಂ,

ಉಪೇತಿ ಯೋ ವೇ ಸುಖಸಂಹಿತಂ ಹಿತಂ;

ವಿಧೂಯ ಚಿತ್ತಸ್ಸ ಅನುತ್ತಮಂ ತಮಂ,

ಉಪೇತಿ ಚಾವಿಗ್ಗಹಕಮ್ಪದಂ ಪದಂ.

ಇತಿ ಅಭಿಧಮ್ಮಾವತಾರೇ ಞಾಣದಸ್ಸನವಿಸುದ್ಧಿನಿದ್ದೇಸೋ ನಾಮ

ತೇವೀಸತಿಮೋ ಪರಿಚ್ಛೇದೋ.