೨೪. ಚತುವೀಸತಿಮೋ ಪರಿಚ್ಛೇದೋ

ಪಚ್ಚಯನಿದ್ದೇಸೋ

೧೩೯೫. ಯೇಸಂ ಪಚ್ಚಯಧಮ್ಮಾನಂ, ವಸಾ ಸಪ್ಪಚ್ಚಯಾ ಇಮೇ;

ಧಮ್ಮಾ ತೇ ಪಚ್ಚಯೇ ಚಾಹಂ, ದಸ್ಸಯಿಸ್ಸಾಮಿತೋ ಪರಂ.

ಕತಮೇ ಪಚ್ಚಯಾತಿ? ವುಚ್ಚತೇ – ಹೇತಾರಮ್ಮಣಾಧಿಪತಿಅನನ್ತರಸಮನನ್ತರಸಹಜಾತ- ಅಞ್ಞಮಞ್ಞನಿಸ್ಸಯೂಪನಿಸ್ಸಯಪುರೇಜಾತಪಚ್ಛಾಜಾತಾಸೇವನಕಮ್ಮವಿಪಾಕಾಹಾರಿನ್ದ್ರಿಯ- ಝಾನಮಗ್ಗಸಮ್ಪಯುತ್ತವಿಪ್ಪಯುತ್ತಅತ್ಥಿನತ್ಥಿವಿಗತಾವಿಗತವಸೇನ ಚತುವೀಸತಿವಿಧಾ ಹೋನ್ತಿ.

ತತ್ಥ ಹೇತುಪಚ್ಚಯೋತಿ ಲೋಭೋ ದೋಸೋ ಮೋಹೋ ಅಲೋಭೋ ಅದೋಸೋ ಅಮೋಹೋತಿ ಇಮೇ ಛ ಧಮ್ಮಾ ಹೇತುಪಚ್ಚಯಾ. ಆರಮ್ಮಣಪಚ್ಚಯೋತಿ ಸಬ್ಬಲೋಕಿಯಲೋಕುತ್ತರಂ ಯಂ ಯಂ ಧಮ್ಮಂ ಆರಬ್ಭ ಯೇ ಯೇ ಧಮ್ಮಾ ಉಪ್ಪಜ್ಜನ್ತಿ ಚಿತ್ತಚೇತಸಿಕಾ ಧಮ್ಮಾ, ತೇ ತೇ ಧಮ್ಮಾ ತೇಸಂ ತೇಸಂ ಧಮ್ಮಾನಂ ಆರಮ್ಮಣಪಚ್ಚಯೇನ ಪಚ್ಚಯೋ.

ಅಧಿಪತಿಪಚ್ಚಯೋತಿ ಏತ್ಥ ಸಹಜಾತಾಧಿಪತಿಆರಮ್ಮಣಾಧಿಪತಿವಸೇನ ದುವಿಧೋ. ತತ್ಥ ಸಹಜಾತಾಧಿಪತಿ ಛನ್ದಚಿತ್ತವೀರಿಯವೀಮಂಸಾವಸೇನ ಚತುಬ್ಬಿಧೋ, ಆರಮ್ಮಣಾಧಿಪತಿ ಪನ ದೋಮನಸ್ಸವಿಚಿಕಿಚ್ಛುದ್ಧಚ್ಚಕಿರಿಯಾಬ್ಯಾಕತಾಕುಸಲವಿಪಾಕೇ ಚ ಅನಿಟ್ಠಸಮ್ಮತಞ್ಚ ರೂಪಂ ಠಪೇತ್ವಾ ಅವಸೇಸಂ. ಅನನ್ತರಪಚ್ಚಯೋತಿ ಅನನ್ತರನಿರುದ್ಧಾ ಚಿತ್ತಚೇತಸಿಕಾ ಧಮ್ಮಾ. ತಥಾ ಸಮನನ್ತರಪಚ್ಚಯೋಪಿ.

ಸಹಜಾತಪಚ್ಚಯೋತಿ ಚಿತ್ತಚೇತಸಿಕಾ, ಮಹಾಭೂತಾ ಚೇವ ಹದಯವತ್ಥು ಚ. ತಥಾ ಅಞ್ಞಮಞ್ಞಪಚ್ಚಯೋಪಿ. ನಿಸ್ಸಯಪಚ್ಚಯೋತಿ ವತ್ಥುರೂಪಾನಿ ಚೇವ ಮಹಾಭೂತಾ, ಚಿತ್ತಚೇತಸಿಕಾ ಚ. ಉಪನಿಸ್ಸಯಪಚ್ಚಯೋತಿ ಆರಮ್ಮಣಾನನ್ತರಪಕತೂಪನಿಸ್ಸಯವಸೇನ ತಿವಿಧೋ. ತತ್ಥ ಆರಮ್ಮಣೂಪನಿಸ್ಸಯೋ ಆರಮ್ಮಣಾಧಿಪತಿಯೇವ, ಅನನ್ತರೂಪನಿಸ್ಸಯೋ ಪನ ಅನನ್ತರಪಚ್ಚಯೋವ, ಪಕತೂಪನಿಸ್ಸಯೋ ಪನ ಕಾಯಿಕಸುಖದುಕ್ಖಉತುಭೋಜನಸೇನಾಸನಪುಗ್ಗಲಾ ಸದ್ಧಾಸೀಲಸುತಚಾಗಪಞ್ಞಾರಾಗದೋಸಮೋಹಾದಯೋ ಚ.

ಪುರೇಜಾತಪಚ್ಚಯೋತಿ ವತ್ಥಾರಮ್ಮಣವಸೇನ ದುವಿಧೋ. ತತ್ಥ ವತ್ಥುಪುರೇಜಾತೋ ನಾಮ ವತ್ಥುರೂಪಾನಿ, ಆರಮ್ಮಣಪುರೇಜಾತೋ ನಾಮ ಪಚ್ಚುಪ್ಪನ್ನರೂಪಾದೀನೇವ. ಪಚ್ಛಾಜಾತಪಚ್ಚಯೋತಿ ಚಿತ್ತಚೇತಸಿಕಾ ಚ. ಆಸೇವನಪಚ್ಚಯೋತಿ ಠಪೇತ್ವಾ ಆವಜ್ಜನದ್ವಯಂ ಲೋಕಿಯಕುಸಲಾಕುಸಲಕಿರಿಯಾಬ್ಯಾಕತಾ ಧಮ್ಮಾವ.

ಕಮ್ಮಪಚ್ಚಯೋತಿ ಸಹಜಾತನಾನಕ್ಖಣಿಕವಸೇನ ದುವಿಧೋ. ತತ್ಥ ಸಹಜಾತಾ ಲೋಕಿಯಲೋಕುತ್ತರಾ ಏವ, ನಾನಕ್ಖಣಿಕಾ ಪನ ಸಾಸವಕುಸಲಾಕುಸಲಚೇತನಾ, ಅನಾಸವಕುಸಲಚೇತನಾ ಅನನ್ತರಮೇವ ಅತ್ತನೋ ವಿಪಾಕಸ್ಸ ಪಚ್ಚಯೋ ಹೋತಿ. ವಿಪಾಕಪಚ್ಚಯೋತಿ ವಿಪಾಕಚಿತ್ತಚೇತಸಿಕಾ. ಆಹಾರಪಚ್ಚಯೋತಿ ಕಬಳೀಕಾರಾಹಾರಫಸ್ಸಚೇತನಾವಿಞ್ಞಾಣವಸೇನ ಚತುಬ್ಬಿಧೋ.

ಇನ್ದ್ರಿಯಪಚ್ಚಯೋತಿ ರೂಪಸತ್ತಕಮನಜೀವಿತಸುಖದುಕ್ಖಸೋಮನಸ್ಸದೋಮನಸ್ಸಉಪೇಕ್ಖಾಸದ್ಧಾವೀರಿಯ- ಸತಿಸಮಾಧಿಪಞ್ಞಾಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಅಞ್ಞಿನ್ದ್ರಿಯಅಞ್ಞತಾವಿನ್ದ್ರಿಯಾನೀತಿ ವೀಸತಿನ್ದ್ರಿಯಾನಿ, ತೇಸು ಇತ್ಥಿನ್ದ್ರಿಯಪುರಿಸಿನ್ದ್ರಿಯಾನಿ ವಜ್ಜೇತ್ವಾ ವೀಸತಿನ್ದ್ರಿಯಾನಿ ಹೋನ್ತಿ. ಝಾನಪಚ್ಚಯೋತಿ ವಿತಕ್ಕವಿಚಾರಪೀತಿಸುಖಚಿತ್ತೇಕಗ್ಗತಾವಸೇನ ಪಞ್ಚವಿಧೋ. ಮಗ್ಗಪಚ್ಚಯೋತಿ ದಿಟ್ಠಿಸಙ್ಕಪ್ಪವಾಯಾಮಸತಿಸಮಾಧಿವಾಚಾಕಮ್ಮನ್ತಾಜೀವಮಿಚ್ಛಾದಿಟ್ಠಿವಸೇನ ನವವಿಧೋ.

ಸಮ್ಪಯುತ್ತಪಚ್ಚಯೋತಿ ಚಿತ್ತಚೇತಸಿಕಾವ. ವಿಪ್ಪಯುತ್ತಪಚ್ಚಯೋತಿ ವತ್ಥುಪುರೇಜಾತಾನಿ ಚೇವ ಪಚ್ಛಾಜಾತಾ ಚಿತ್ತಚೇತಸಿಕಾ ಚ. ಅತ್ಥಿಪಚ್ಚಯೋತಿ ಜೀವಿತಿನ್ದ್ರಿಯಕಬಳೀಕಾರಆಹಾರಆರಮ್ಮಣಪುರೇಜಾತಾನಿ ಚೇವ ನಿಸ್ಸಯಪಚ್ಚಯೇ ವುತ್ತಧಮ್ಮಾಪಿ ಚ. ನತ್ಥಿಪಚ್ಚಯೋತಿ ಅನನ್ತರಪಚ್ಚಯೋವ. ತಥಾ ವಿಗತಪಚ್ಚಯೋ ಚ. ಅವಿಗತಪಚ್ಚಯೋತಿ ಅತ್ಥಿಪಚ್ಚಯೋವ. ಏವಮಿಮೇ ಚತುವೀಸತಿ ಪಚ್ಚಯಾ ನಾಮ.

ಏತ್ಥ ಪನ ಕತಿಹಾಕಾರೇಹಿ ರೂಪಂ ರೂಪಸ್ಸ ಪಚ್ಚಯೋ ಹೋತೀತಿ? ಯಥಾರಹಂ ಸಹಜಾತಅಞ್ಞಮಞ್ಞನಿಸ್ಸಯಾಹಾರಿನ್ದ್ರಿಯಅತ್ಥಿಅವಿಗತವಸೇನ ಸತ್ತಧಾ ಪಚ್ಚಯೋ ಹೋತಿ.

ರೂಪಂ ಅರೂಪಸ್ಸ ಯಥಾರಹಂ ಆರಮ್ಮಣಾಧಿಪತಿಸಹಜಾತಅಞ್ಞಮಞ್ಞನಿಸ್ಸಯೂಪನಿಸ್ಸಯಪುರೇಜಾತಿನ್ದ್ರಿಯವಿಪ್ಪ- ಯುತ್ತಅತ್ಥಿಅವಿಗತವಸೇನ ಏಕಾದಸಹಿ ಆಕಾರೇಹಿ ಪಚ್ಚಯೋ ಹೋತಿ.

ರೂಪಂ ರೂಪಾರೂಪಸ್ಸಾತಿ ನತ್ಥಿ.

೧೩೯೬. ಸತ್ತಧಾ ರೂಪಂ ರೂಪಸ್ಸ, ಭವತೇಕಾದಸೇಹಿ ತಂ;

ಪಚ್ಚಯೋ ನಾಮಧಮ್ಮಸ್ಸ, ಮಿಸ್ಸಕಸ್ಸ ನ ಕಿಞ್ಚಿ ತು.

ಅರೂಪಂ ಅರೂಪಸ್ಸ ಯಥಾರಹಂ ಹೇತಾರಮ್ಮಣಾಧಿಪತಿಅನನ್ತರಸಮನನ್ತರಸಹಜಾತಅಞ್ಞಮಞ್ಞನಿಸ್ಸಯೂಪನಿಸ್ಸಯಾ- ಸೇವನಕಮ್ಮವಿಪಾಕಾಹಾರಿನ್ದ್ರಿಯಝಾನಮಗ್ಗಸಮ್ಪಯುತ್ತಅತ್ಥಿನತ್ಥಿವಿಗತಾವಿಗತ- ವಸೇನ ಏಕವೀಸತಿಧಾ ಪಚ್ಚಯೋ ಹೋತಿ.

ಅರೂಪಂ ರೂಪಸ್ಸ ಯಥಾರಹಂ ಹೇತಾಧಿಪತಿಸಹಜಾತಅಞ್ಞಮಞ್ಞನಿಸ್ಸಯಪಚ್ಛಾಜಾತಕಮ್ಮವಿಪಾಕಾಹಾರಿನ್ದ್ರಿಯ- ಝಾನಮಗ್ಗವಿಪ್ಪಯುತ್ತಅತ್ಥಿಅವಿಗತವಸೇನ ಪನ್ನರಸಧಾ ಪಚ್ಚಯೋ ಹೋತಿ.

ಅರೂಪಂ ರೂಪಾರೂಪಸ್ಸ ಯಥಾರಹಂ ಹೇತಾಧಿಪತಿಸಹಜಾತಅಞ್ಞಮಞ್ಞನಿಸ್ಸಯಕಮ್ಮವಿಪಾಕಾಹಾರಿನ್ದ್ರಿಯಝಾನಮಗ್ಗ- ಅತ್ಥಿಅವಿಗತವಸೇನ ತೇರಸಧಾ ಪಚ್ಚಯೋ ಹೋತಿ.

೧೩೯೭. ಏಕವೀಸತಿಧಾ ನಾಮಂ, ಪಚ್ಚಯೋ ಭವತತ್ತನೋ;

ತಿಪಞ್ಚಹಿ ತಂ ರೂಪಸ್ಸ, ಉಭಿನ್ನಂ ತೇರಸಧಾ ಪನ.

ರೂಪಾರೂಪಂ ರೂಪಸ್ಸ ಯಥಾರಹಂ ಸಹಜಾತನಿಸ್ಸಯಅತ್ಥಿಅವಿಗತವಸೇನ ಚತುಧಾ ಪಚ್ಚಯೋ ಹೋತಿ.

ರೂಪಾರೂಪಂ ಅರೂಪಸ್ಸ ಯಥಾರಹಂ ಸಹಜಾತಅಞ್ಞಮಞ್ಞನಿಸ್ಸಯಿನ್ದ್ರಿಯಅತ್ಥಿಅವಿಗತವಸೇನ ಛಧಾ ಪಚ್ಚಯೋ ಹೋತಿ.

ರೂಪಾರೂಪಂ ರೂಪಸ್ಸಾತಿ ನತ್ಥಿ.

೧೩೯೮. ಉಭೋಪಿ ರೂಪಧಮ್ಮಸ್ಸ, ಚತುಧಾ ಹೋನ್ತಿ ಪಚ್ಚಯಾ;

ಛಬ್ಬಿಧಾ ನಾಮಧಮ್ಮಸ್ಸ, ಮಿಸ್ಸಕಸ್ಸ ನ ಕಿಞ್ಚಿ ತು.

ಏತೇಸು ಪನ ಪಚ್ಚಯೇಸು ಕತಿ ರೂಪಾ, ಕತಿ ಅರೂಪಾ, ಕತಿಮಿಸ್ಸಕಾತಿ? ಪುರೇಜಾತಪಚ್ಚಯೋ ಏಕೋ ರೂಪಧಮ್ಮೋವ, ಹೇತುಅನನ್ತರಸಮನನ್ತರಪಚ್ಛಾಜಾತಾಸೇವನಕಮ್ಮವಿಪಾಕಝಾನಮಗ್ಗಸಮ್ಪಯುತ್ತನತ್ಥಿ- ವಿಗತಾನಂ ವಸೇನ ದ್ವಾದಸ ಪಚ್ಚಯಾ ಅರೂಪಧಮ್ಮಾವ, ಸೇಸಾ ಪನ ಏಕಾದಸ ಪಚ್ಚಯಾ ರೂಪಾರೂಪಮಿಸ್ಸಕಾತಿ ವೇದಿತಬ್ಬಾ.

ಪುನ ಕಾಲವಸೇನ ಹೇತುಸಹಜಾತಅಞ್ಞಮಞ್ಞನಿಸ್ಸಯಪುರೇಜಾತಪಚ್ಛಾಜಾತವಿಪಾಕಾಹಾರಿನ್ದ್ರಿಯಝಾನಮಗ್ಗ- ಸಮ್ಪಯುತ್ತವಿಪ್ಪಯುತ್ತಅತ್ಥಿಅವಿಗತಾನಂ ವಸೇನ ಪನ್ನರಸ ಪಚ್ಚಯಾ ಪಚ್ಚುಪ್ಪನ್ನಾವ ಹೋನ್ತಿ. ಅನನ್ತರಸಮನನ್ತರಾಸೇವನನತ್ಥಿವಿಗತಪಚ್ಚಯಾ ಅತೀತಾವ, ಕಮ್ಮಪಚ್ಚಯೋ ಅತೀತೋ ವಾ ಹೋತಿ ಪಚ್ಚುಪ್ಪನ್ನೋ ವಾ, ಆರಮ್ಮಣಾಧಿಪತಿಉಪನಿಸ್ಸಯಪಚ್ಚಯಾ ಪನ ತಿಕಾಲಿಕಾ ಹೋನ್ತಿ ಕಾಲವಿನಿಮುತ್ತಾ ಚ.

೧೩೯೯. ಪಚ್ಚುಪ್ಪನ್ನಾವ ಹೋನ್ತೇತ್ಥ,

ಪಚ್ಚಯಾ ದಸ ಪಞ್ಚ ಚ;

ಅತೀತಾ ಏವ ಪಞ್ಚೇಕೋ,

ದ್ವೇಕಾಲಿಕೋವ ದಸ್ಸಿತೋ;

ತಯೋ ತಿಕಾಲಿಕಾ ಚೇವ,

ವಿನಿಮುತ್ತಾಪಿ ಕಾಲತೋ.

ಸಬ್ಬೇ ಪನಿಮೇ ಚತುವೀಸತಿ ಪಚ್ಚಯಾ ಯಥಾರಹಂ ಆರಮ್ಮಣೂಪನಿಸ್ಸಯಕಮ್ಮಅತ್ಥಿಪಚ್ಚಯಾನಂ ವಸೇನ ಚತೂಸು ಪಚ್ಚಯೇಸು ಸಙ್ಗಹಂ ಗಚ್ಛನ್ತೀತಿ ವೇದಿತಬ್ಬಾ.

ಇತಿ ಅಭಿಧಮ್ಮಾವತಾರೇ ಪಚ್ಚಯನಿದ್ದೇಸೋ ನಾಮ

ಚತುವೀಸತಿಮೋ ಪರಿಚ್ಛೇದೋ.

ನಿಗಮನಕಥಾ

೧೪೦೦. ಅಭಿಧಮ್ಮಾವತಾರೋಯಂ, ವರೋ ಪರಮಗಮ್ಭೀರೋ;

ಇಚ್ಛತಾ ನಿಪುಣಂ ಬುದ್ಧಿಂ, ಭಿಕ್ಖುನಾ ಪನ ಸೋತಬ್ಬೋ.

೧೪೦೧. ಸುಮತಿಮತಿವಿಚಾರಬೋಧನೋ,

ವಿಮತಿವಿಮೋಹವಿನಾಸನೋ ಅಯಂ;

ಕುಮತಿಮತಿಮಹಾತಮೋನಾಸೋ,

ಪಟುಮತಿಭಾಸಕರೋ ಮತೋ ಮಯಾ.

೧೪೦೨. ಯತೋ ಸುಮತಿನಾ ಮತೋ ನಾಮತೋ,

ಆಯಾಚಿತಸಮ್ಮಾನತೋ ಮಾನತೋ;

ತತೋ ಹಿ ರಚಿತೋ ಸದಾ ತೋಸದಾ,

ಮಯಾ ಹಿತವಿಭಾವನಾ ಭಾವನಾ.

೧೪೦೩. ಅತ್ಥತೋ ಗನ್ಥತೋ ಚಾಪಿ, ಯುತ್ತಿತೋ ಚಾಪಿ ಏತ್ಥ ಚ;

ಅಯುತ್ತಂ ವಾ ವಿರುದ್ಧಂ ವಾ, ಯದಿ ದಿಸ್ಸತಿ ಕಿಞ್ಚಿಪಿ.

೧೪೦೪. ಪುಬ್ಬಾಪರಂ ವಿಲೋಕೇತ್ವಾ, ವಿಚಾರೇತ್ವಾ ಪುನಪ್ಪುನಂ;

ಧೀಮತಾ ಸಙ್ಗಹೇತಬ್ಬಂ, ಗಹೇತಬ್ಬಂ ನ ದೋಸತೋ.

೧೪೦೫. ತಿವಿಧಾ ಬ್ಯಪ್ಪಥಾನಞ್ಹಿ, ಗತಿಯೋ ದುಬ್ಬಿಧಾಪಿ ಚೇ;

ತಸ್ಮಾ ಉಪಪರಿಕ್ಖಿತ್ವಾ, ವೇದಿತಬ್ಬಂ ವಿಭಾವಿನಾ.

೧೪೦೬. ನಿಕಾಯನ್ತರಲದ್ಧೀಹಿ, ಅಸಮ್ಮಿಸ್ಸೋ ಅನಾಕುಲೋ;

ಮಹಾವಿಹಾರವಾಸೀನಂ, ವಾಚನಾಮಗ್ಗನಿಸ್ಸಿತೋ.

೧೪೦೭. ಮಧುರಕ್ಖರಸಂಯುತ್ತೋ, ಅತ್ಥೋ ಯಸ್ಮಾ ಪಕಾಸಿತೋ;

ತಸ್ಮಾ ಹಿತತ್ಥಕಾಮೇನ, ಕಾತಬ್ಬೋ ಏತ್ಥ ಆದರೋ.

೧೪೦೮. ಸದ್ಧಮ್ಮಟ್ಠಿತಿಕಾಮೇನ, ಕರೋನ್ತೇನ ಚ ಯಂ ಮಯಾ;

ಪುಞ್ಞಮಧಿಗತಂ ತೇನ, ಸುಖಂ ಪಪ್ಪೋನ್ತು ಪಾಣಿನೋ.

೧೪೦೯. ಅನ್ತರಾಯಂ ವಿನಾ ಚಾಯಂ, ಯಥಾಸಿದ್ಧಿಮುಪಾಗತೋ;

ತಥಾ ಕಲ್ಯಾಣಸಙ್ಕಪ್ಪಾ, ಸಿದ್ಧಿಂ ಗಚ್ಛನ್ತು ಪಾಣಿನಂ.

೧೪೧೦. ನರನಾರಿಗಣಾಕಿಣ್ಣೇ, ಅಸಂಕಿಣ್ಣಕುಲಾಕುಲೇ;

ಫೀತೇ ಸಬ್ಬಙ್ಗಸಮ್ಪನ್ನೇ, ಸುಪಸನ್ನಸಿತೋದಕೇ.

೧೪೧೧. ನಾನಾರತನಸಮ್ಪುಣ್ಣೇ, ವಿವಿಧಾಪಣಸಙ್ಕಟೇ;

ಕಾವೇರಪಟ್ಟನೇ ರಮ್ಮೇ, ನಾನಾರಾಮೋಪಸೋಭಿತೇ.

೧೪೧೨. ಕೇಲಾಸಸಿಖರಾಕಾರಪಾಸಾದಪಟಿಮಣ್ಡಿತೇ;

ಕಾರಿತೇ ಕಣ್ಹದಾಸೇನ, ದಸ್ಸನೀಯೇ ಮನೋರಮೇ.

೧೪೧೩. ವಿಹಾರೇ ವಿವಿಧಾಕಾರಚಾರುಪಾಕಾರಗೋಪುರೇ;

ತತ್ಥ ಪಾಚೀನಪಾಸಾದೇ, ಮಯಾ ನಿವಸತಾ ಸದಾ.

೧೪೧೪. ಅಸಲ್ಲೇಖಮಸಾಖಲ್ಯೇ, ಸೀಲಾದಿಗುಣಸೋಭಿನಾ;

ಅಯಂ ಸುಮತಿನಾ ಸಾಧು, ಯಾಚಿತೇನ ಕತೋ ಸತಾ.

೧೪೧೫. ದೇವಾ ಕಾಲೇನ ವಸ್ಸನ್ತು, ವಸ್ಸಂ ವಸ್ಸವಲಾಹಕಾ;

ಪಾಲಯನ್ತು ಮಹೀಪಾಲಾ, ಧಮ್ಮತೋ ಸಕಲಂ ಮಹಿಂ.

೧೪೧೬. ಯಾವ ತಿಟ್ಠತಿ ಲೋಕಸ್ಮಿಂ, ಹಿಮವಾ ಪಬ್ಬತುತ್ತಮೋ;

ತಾವ ತಿಟ್ಠತು ಸದ್ಧಮ್ಮೋ, ಧಮ್ಮರಾಜಸ್ಸ ಸತ್ಥುನೋತಿ.

ಉರಗಪುರನಿವಸನೇನ ಆಚರಿಯೇನ ಭದನ್ತಬುದ್ಧದತ್ತೇನ ಸೀಲಾಚಾರಸಮ್ಪನ್ನೇನ ಕತೋ ಅಭಿಧಮ್ಮಾವತಾರೋ ನಾಮಾಯಂ.

ಅಭಿಧಮ್ಮಾವತಾರೋ ನಿಟ್ಠಿತೋ.

ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ

ನಾಮರೂಪಪರಿಚ್ಛೇದೋ

ಗನ್ಥಾರಮ್ಭಕಥಾ

೧. ಸಮ್ಮಾ ಸಮ್ಮಾಭಿಸಮ್ಬುದ್ಧಂ, ಧಮ್ಮಂ ಧಮ್ಮಪ್ಪಕಾಸನಂ;

ಸಂಘಂ ಸಂಘುತ್ತಮಂ ಲೋಕೇ, ವನ್ದಿತ್ವಾ ವನ್ದನಾರಹಂ.

೨. ನಾಮರೂಪಪರಿಚ್ಛೇದಂ, ಪವಕ್ಖಾಮಿ ಸಮಾಸತೋ;

ಮಹಾವಿಹಾರವಾಸೀನಂ, ವಣ್ಣನಾನಯನಿಸ್ಸಿತಂ.