೨೨. ಬಾವೀಸತಿಮೋ ಪರಿಚ್ಛೇದೋ

ಞಾಣದಸ್ಸನವಿಸುದ್ಧಿನಿದ್ದೇಸೋ

೧೩೧೯. ಇತೋ ಪರಂ ತು ಭಿಕ್ಖುಸ್ಸ, ಹೋತಿ ಗೋತ್ರಭುಮಾನಸಂ;

ಆವಜ್ಜನಿಯಠಾನತ್ತಾ, ಮಗ್ಗಚಿತ್ತಸ್ಸ ತಂ ಪನ.

೧೩೨೦. ನ ಚಪ್ಪಟಿಪದಾಞಾಣ-ದಸ್ಸನಂ ವಾ ತಥೇವ ಚ;

ಞಾಣದಸ್ಸನಸುದ್ಧಿಂ ವಾ, ಭಜತೇ ನ ಕುದಾಚನಂ.

೧೩೨೧. ಉಭಿನ್ನಮನ್ತರಾ ಏತಂ, ಅಬ್ಬೋಹಾರಿಕಮೇವ ತಂ;

ವಿಪಸ್ಸನಾಯ ಸೋತಸ್ಮಿಂ, ಪತಿತತ್ತಾ ವಿಪಸ್ಸನಾ.

೧೩೨೨. ಪೋಥುಜ್ಜನಿಕಗೋತ್ತಂ ವಾ, ಅಭಿಭುಯ್ಯ ಪವತ್ತಿತೋ;

ಗೋತ್ತಂ ವುಚ್ಚತಿ ನಿಬ್ಬಾನಂ, ತತೋ ಭವತಿ ಗೋತ್ರಭು.

೧೩೨೩. ಞಾಣಂ ಚತೂಸು ಮಗ್ಗೇಸು, ಞಾಣದಸ್ಸನಸುದ್ಧಿಕಂ;

ತತ್ಥ ತಂ ಪಠಮಂ ಮಗ್ಗಂ, ಸಮ್ಪಾದೇತುಂ ಪನಿಚ್ಛತಾ.

೧೩೨೪. ಅಞ್ಞಂ ಕಿಞ್ಚಿಪಿ ಕಾತಬ್ಬಂ, ಭಿಕ್ಖುನಾ ತೇನ ನತ್ಥಿ ತಂ;

ಯಞ್ಹಿ ತೇನ ಚ ಕಾತಬ್ಬಂ, ಸಿಯಾ ತಂ ಕತಮೇವ ತು.

೧೩೨೫. ಅನುಲೋಮಾವಸಾನಞ್ಹಿ, ಸೂರಂ ತಿಕ್ಖಂ ವಿಪಸ್ಸನಂ;

ಉಪ್ಪಾದೇನ್ತೇನ ತಂ ಸಬ್ಬಂ, ಕತಮೇವ ಚ ಯೋಗಿನಾ.

೧೩೨೬. ತಸ್ಸಾನುಲೋಮಞಾಣಸ್ಸ, ಅನ್ತೇ ತು ಅನಿಮಿತ್ತಕಂ;

ವಿಸಙ್ಖಾರಂ ನಿರೋಧಞ್ಚ, ನಿಬ್ಬಾನಂ ಅಮತಂ ಪದಂ.

೧೩೨೭. ಗೋಚರಂ ಕುರುಮಾನಂ ತಂ, ನಿಬ್ಬಾನಾರಮ್ಮಣೇ ಪನ;

ಪಠಮಾವಜ್ಜನಞ್ಚೇವ, ಪಠಮಾಭೋಗತಾಪಿ ಚ.

೧೩೨೮. ಮಗ್ಗಸ್ಸಾನನ್ತರಾದೀಹಿ, ಪಚ್ಚಯೇಹಿ ಪನಚ್ಛಹಿ;

ತಸ್ಸ ಪಚ್ಚಯಭಾವಞ್ಚ, ಸಾಧಯನ್ತಂ ತತೋ ಪನ.

೧೩೨೯. ವಿಪಸ್ಸನಾಯ ಮುದ್ಧಞ್ಹಿ, ಸಿಖಾಪತ್ತಾಯ ತಾಯ ತಂ;

ಉಪ್ಪಜ್ಜತಿ ಅನಾವತ್ತಂ-ರಮ್ಮಣಂ ತಸ್ಸ ಗೋತ್ರಭು.

೧೩೩೦. ಏಕೇನಾವಜ್ಜನೇನೇವ, ಏಕಿಸ್ಸಾಯೇವ ವೀಥಿಯಾ;

ನಾನಾರಮ್ಮಣತಾ ಚಾನು-ಲೋಮಗೋತ್ರಭುಚೇತಸಂ.

೧೩೩೧. ಠತ್ವಾ ಆವಜ್ಜನಟ್ಠಾನೇ, ತಮನಾವಜ್ಜನಮ್ಪಿ ಚ;

ಮಗ್ಗಸ್ಸ ಪನ ತಂ ಸಞ್ಞಂ, ದತ್ವಾ ವಿಯ ನಿರುಜ್ಝತಿ.

೧೩೩೨. ಮಗ್ಗೋಪಿ ತೇನ ತಂ ದಿನ್ನಂ, ಅಮುಞ್ಚಿತ್ವಾವ ಸಞ್ಹಿತಂ;

ತಂ ಞಾಣಮನುಬನ್ಧನ್ತೋ, ಜಾಯತೇ ತದನನ್ತರಂ.

೧೩೩೩. ಕದಾಚಿಪಿ ಅನಿಬ್ಬಿದ್ಧಪುಬ್ಬಂ ಮಗ್ಗೋ ಪನೇಸ ಹಿ;

ಲೋಭಂ ದೋಸಞ್ಚ ಮೋಹಞ್ಚ, ವಿದ್ಧಂಸನ್ತೋವ ಜಾಯತಿ.

೧೩೩೪. ನ ಕೇವಲಮಯಂ ಮಗ್ಗೋ, ದೋಸನಾಸನಮೇವ ಚ;

ಕರೋತಿ ಅಥ ಖೋಪಾಯದ್ವಾರಾನಿಪಿ ಪಿಧೇತಿ ಚ.

೧೩೩೫. ಅನಾಮತಗ್ಗಸಂಸಾರವಟ್ಟದುಕ್ಖಮಹೋದಧಿಂ;

ಅಪಾರಮತಿಘೋರಞ್ಚ, ಸೋಸೇತಿ ಚ ಅಸೇಸತೋ.

೧೩೩೬. ಮಿಚ್ಛಾಮಗ್ಗಂ ಪನಟ್ಠಙ್ಗಂ, ಜಾಯಮಾನೋ ಚ ಉಜ್ಝತಿ;

ಸಬ್ಬವೇರಭಯಾನೇತ್ಥ, ನಿಚ್ಚಂ ವೂಪಸಮೇತಿ ಚ.

೧೩೩೭. ಬುದ್ಧಸ್ಸೋರಸಪುತ್ತತ್ತಂ, ಉಪನೇತಿ ನಯಂ ಪನ;

ಆನಿಸಂಸೇ ಅನೇಕೇಪಿ, ಪವತ್ತಯತಿ ಯೋಗಿನೋ.

೧೩೩೮. ದಾಯಕೇನಾನಿಸಂಸಾನಂ, ಅನೇಕೇಸಮನೇನ ಚ;

ಆದಿಮಗ್ಗೇನ ಸಂಯುತ್ತಂ, ಞಾಣನ್ತಿ ಞಾಣದಸ್ಸನಂ.

ಪಠಮಮಗ್ಗಞಾಣಂ.

೧೩೩೯. ತಸ್ಸೇವಾನನ್ತರಂ ತಸ್ಸ, ವಿಪಾಕಾ ದ್ವೇಪಿ ತೀಣಿ ವಾ;

ಫಲಚಿತ್ತಾನಿ ಜಾಯನ್ತೇ, ನ ಜಾಯನ್ತೇ ತತೋ ಪರಂ.

೧೩೪೦. ಕೇಚಿ ಏಕಞ್ಚ ದ್ವೇ ತೀಣಿ, ಚತ್ತಾರೀತಿ ವದನ್ತಿ ತು;

ನ ಪನೇತಂ ಗಹೇತಬ್ಬಂ, ಅಜಾನಿತ್ವಾ ವದನ್ತಿ ತೇ.

೧೩೪೧. ಏಕಸ್ಸಾಸೇವನಂ ನತ್ಥಿ, ತಸ್ಮಾ ದ್ವೇ ಅನುಲೋಮಕಾ;

ತೇಹಿ ಆಸೇವನಂ ಲದ್ಧಾ, ತತಿಯಂ ಹೋತಿ ಗೋತ್ರಭು.

೧೩೪೨. ಚತುತ್ಥಂ ಮಗ್ಗಚಿತ್ತಂ ತು,

ತಸ್ಮಾ ತೀಣಿ ಫಲಾನಿ ಹಿ;

ಅನುಲೋಮಾ ತಯೋ ಹೋನ್ತಿ,

ಚತುತ್ಥಂ ಹೋತಿ ಗೋತ್ರಭು.

೧೩೪೩. ಪಞ್ಚಮಂ ಮಗ್ಗಚಿತ್ತಞ್ಚ, ಫಲಾನಿ ದ್ವೇ ತತೋ ಪನ;

ಸತ್ತಚಿತ್ತಪರಮಾವ, ಏಕಾವಜ್ಜನವೀಥಿ ಹಿ.

೧೩೪೪. ಏತ್ತಾವತಾ ಪನೇಸೋ ಹಿ, ಸೋತಾಪನ್ನೋತಿ ವುಚ್ಚತಿ;

ಫಲಸ್ಸ ಪರಿಯೋಸಾನೇ, ಭವಙ್ಗೋತ್ತರಣಂ ಸಿಯಾ.

೧೩೪೫. ತತೋ ಭವಙ್ಗಂ ಛಿನ್ದಿತ್ವಾ, ಮಗ್ಗಪೇಕ್ಖನಹೇತುಕಂ;

ಉಪ್ಪಜ್ಜತಿ ಮನೋದ್ವಾರೇ, ಆವಜ್ಜನಮನೋ ಪನ.

೧೩೪೬. ತಸ್ಮಿಂ ನಿರುದ್ಧೇ ಮಗ್ಗಸ್ಸ, ಪಚ್ಚವೇಕ್ಖಣಸಞ್ಞಿತಾ;

ಜವನಾನಿ ಹಿ ಜಾಯನ್ತೇ, ಸತ್ತೇವ ಪಟಿಪಾಟಿಯಾ.

೧೩೪೭. ಏಸೇವ ಚ ನಯೋ ಞೇಯ್ಯೋ, ಫಲಾದೀನಮ್ಪಿ ಪೇಕ್ಖನೇ;

ಪಚ್ಚವೇಕ್ಖಣಞಾಣಾನಿ, ಭವನ್ತೇಕೂನವೀಸತಿ.

೧೩೪೮. ಮಗ್ಗೋ ಫಲಂ ಪಹೀನಾ ಚ, ಕಿಲೇಸಾ ಅವಸಿಟ್ಠಕಾ;

ನಿಬ್ಬಾನಞ್ಚೇತಿ ಪಞ್ಚೇತೇ, ಪಚ್ಚವೇಕ್ಖಣಭೂಮಿಯೋ.

೧೩೪೯. ಏವಂ ಸೋ ಪಚ್ಚವೇಕ್ಖಿತ್ವಾ, ಸೋತಾಪನ್ನೋಪಪತ್ತಿಯಾ;

ಯೋಗಮಾರಭತೇ ಧೀರೋ, ದುತಿಯಾಯ ಚ ಭೂಮಿಯಾ.

೧೩೫೦. ಖನ್ಧಪಞ್ಚಕಸಙ್ಖಾತಂ, ತಂ ಸಙ್ಖಾರಗತಂ ಪುನ;

ಅನಿಚ್ಚಂ ದುಕ್ಖಮನತ್ತಾತಿ, ಞಾಣೇನ ಪರಿಮಜ್ಜತಿ.

೧೩೫೧. ತತೋ ವಿಪಸ್ಸನಾವೀಥಿ-ಮೋಗಾಹತಿ ಚ ತಾವದೇ;

ತಸ್ಸೇವಂ ಪಟಿಪನ್ನಸ್ಸ, ಹೇಟ್ಠಾ ವುತ್ತನಯೇನ ತು.

೧೩೫೨. ತತೋ ಸಙ್ಖಾರುಪೇಕ್ಖಾಯ, ಅವಸಾನೇ ತಥೇವ ಚ;

ಏಕಾವಜ್ಜನವಾರಸ್ಮಿಂ, ಗೋತ್ರಭುಸ್ಸ ಅನನ್ತರಂ.

೧೩೫೩. ಬ್ಯಾಪಾದಕಾಮರಾಗಾನಂ, ತನುಭಾವಂ ತು ಸಾಧಯಂ;

ಸಕದಾಗಾಮಿಮಗ್ಗೋಯಂ, ಜಾಯತೇ ದುತಿಯೋ ಪನ.

ದುತಿಯಮಗ್ಗಞಾಣಂ.

೧೩೫೪. ಇಮಸ್ಸಾಪಿ ಚ ಞಾಣಸ್ಸ, ಹೇಟ್ಠಾ ವುತ್ತನಯೇನಿಧ;

ಫಲಚಿತ್ತಾನಿ ಞೇಯ್ಯಾನಿ, ವಿಞ್ಞುನಾ ದ್ವೇಪಿ ತೀಣಿ ವಾ.

೧೩೫೫. ಏತ್ತಾವತಾ ಪನೇಸೋ ಹಿ, ಸಕದಾಗಾಮಿ ನಾಮಯಂ;

ಸಕಿದೇವ ಇಮಂ ಲೋಕಂ, ಆಗನ್ತ್ವಾನ್ತಕರೋ ಭವೇ.

೧೩೫೬. ಹೇಟ್ಠಾ ವುತ್ತನಯೇನೇವ, ಪಞ್ಚಧಾ ಪಚ್ಚವೇಕ್ಖಣಂ;

ಏವಂ ಸೋ ಪಚ್ಚವೇಕ್ಖಿತ್ವಾ, ಸಕದಾಗಾಮಿಪತ್ತಿಯಾ.

೧೩೫೭. ಯೋಗಮಾರಭತೇ ಧೀರೋ, ತತಿಯಾಯ ಚ ಭೂಮಿಯಾ;

ಬ್ಯಾಪಾದಕಾಮರಾಗಾನಂ, ಪಹಾನಾಯ ಚ ಪಣ್ಡಿತೋ.

೧೩೫೮. ಖನ್ಧಪಞ್ಚಕಸಙ್ಖಾತಂ, ತಂ ಸಙ್ಖಾರಗತಂ ಪನ;

ಅನಿಚ್ಚಂ ದುಕ್ಖಮನತ್ತಾತಿ, ಞಾಣೇನ ಪರಿಮಜ್ಜತಿ.

೧೩೫೯. ತತೋ ವಿಪಸ್ಸನಾವೀಥಿ-ಮೋಗಾಹತಿ ಚ ತಾವದೇ;

ತಸ್ಸೇವಂ ಪಟಿಪನ್ನಸ್ಸ, ಹೇಟ್ಠಾ ವುತ್ತನಯೇನ ತು.

೧೩೬೦. ತತೋ ಸಙ್ಖಾರುಪೇಕ್ಖಾಯ, ಅವಸಾನೇ ತಥೇವ ಚ;

ಏಕಾವಜ್ಜನವೀಥಿಮ್ಹಿ, ಗೋತ್ರಭುಸ್ಸ ಅನನ್ತರಂ.

೧೩೬೧. ಬ್ಯಾಪಾದಕಾಮರಾಗಾನಂ, ಮೂಲಘಾತಂ ತು ಸಾಧಯಂ;

ತಸ್ಸಾನಾಗಾಮಿಮಗ್ಗೋಯಂ, ಜಾಯತೇ ತತಿಯೋ ಪನ.

ತತಿಯಮಗ್ಗಞಾಣಂ.

೧೩೬೨. ಇಮಸ್ಸಾಪಿ ಚ ಞಾಣಸ್ಸ, ಹೇಟ್ಠಾ ವುತ್ತನಯೇನಿಧ;

ಪವತ್ತಿ ಫಲಚಿತ್ತಾನಂ, ವೇದಿತಬ್ಬಾ ವಿಭಾವಿನಾ.

೧೩೬೩. ಏತ್ತಾವತಾ ಪನೇಸೋಪಿ, ಹೋತಿನಾಗಾಮಿ ನಾಮಯಂ;

ತತ್ಥೇವ ಪರಿನಿಬ್ಬಾಯೀ, ಅನಾವತ್ತಿಸಭಾವತೋ.

೧೩೬೪. ಹೇಟ್ಠಾ ವುತ್ತನಯೇನೇವ, ಪಞ್ಚಧಾ ಪಚ್ಚವೇಕ್ಖಣಂ;

ಏವಂ ಸೋ ಪಚ್ಚವೇಕ್ಖಿತ್ವಾ, ಅನಾಗಾಮಿರಿಯಸಾವಕೋ.

೧೩೬೫. ಯೋಗಮಾರಭತೇ ಧೀರೋ, ಚತುತ್ಥಾಯ ಚ ಭೂಮಿಯಾ;

ಪತ್ತಿಯಾರೂಪರಾಗಾದಿ-ಪಹಾನಾಯ ಚ ಪಣ್ಡಿತೋ.

೧೩೬೬. ತಥೇವ ಸಙ್ಖಾರಗತಂ, ಅನಿಚ್ಚಾದಿವಸೇನ ಸೋ;

ಪರಿವತ್ತತಿ ಞಾಣೇನ, ತಥೇವ ಪರಿಮಜ್ಜತಿ.

೧೩೬೭. ತತೋ ವಿಪಸ್ಸನಾವೀಥಿ-ಮೋಗಾಹತಿ ಚ ತಾವದೇ;

ತಸ್ಸೇವಂ ಪಟಿಪನ್ನಸ್ಸ, ಹೇಟ್ಠಾ ವುತ್ತನಯೇನ ತು.

೧೩೬೮. ತತೋ ಸಙ್ಖಾರುಪೇಕ್ಖಾಯ, ಅವಸಾನೇ ತಥೇವ ಚ;

ಏಕಾವಜ್ಜನವಾರಸ್ಮಿಂ, ಗೋತ್ರಭುಸ್ಸ ಅನನ್ತರಂ.

೧೩೬೯. ತಸ್ಸಾರಹತ್ತಮಗ್ಗೋಯಂ,

ಜಾಯತೇ ತು ತತೋ ಪರಂ;

ರೂಪರಾಗಾದಿದೋಸಾನಂ,

ವಿದ್ಧಂಸಾಯ ಕರೋ ಪನ.

ಚತುತ್ಥಮಗ್ಗಞಾಣಂ.

೧೩೭೦. ಇಮಸ್ಸಾಪಿ ಚ ಞಾಣಸ್ಸ, ಹೇಟ್ಠಾ ವುತ್ತನಯೇನಿಧ;

ಪವತ್ತಿ ಫಲಚಿತ್ತಾನಂ, ವೇದಿತಬ್ಬಾ ವಿಭಾವಿನಾ.

೧೩೭೧. ಏತ್ತಾವತಾ ಪನೇಸೋ ಹಿ,

ಅರಹಾ ನಾಮ ಅಟ್ಠಮೋ;

ಅರಿಯೋ ಪುಗ್ಗಲೋ ಹೋತಿ,

ಮಹಾಖೀಣಾಸವೋ ಅಯಂ.

೧೩೭೨. ಅನುಪ್ಪತ್ತಸದತ್ಥೋ ಚ,

ಖೀಣಸಂಯೋಜನೋ ಮುನಿ;

ಸದೇವಕಸ್ಸ ಲೋಕಸ್ಸ,

ದಕ್ಖಿಣೇಯ್ಯೋ ಅನುತ್ತರೋ.

೧೩೭೩. ಏತ್ತಾವತಾ ಚತಸ್ಸೋಪಿ, ಞಾಣದಸ್ಸನಸುದ್ಧಿಯೋ;

ಹಿತತ್ಥಾಯ ಚ ಭಿಕ್ಖೂನಂ, ಸಙ್ಖೇಪೇನೇವ ದಸ್ಸಿತಾ.

೧೩೭೪. ಸದ್ಧೇನ ಸಮ್ಮಾ ಪನ ಭಾವನೀಯಾ,

ಅರಿಯಾಯ ಪಞ್ಞಾಯ ಚ ಭಾವನಾಯ;

ವಿಸುದ್ಧಿಕಾಮೇನ ತಪೋಧನೇನ,

ಭವಕ್ಖಯಂ ಪತ್ಥಯತಾ ಬುಧೇನ.

ಇತಿ ಅಭಿಧಮ್ಮಾವತಾರೇ ಞಾಣದಸ್ಸನವಿಸುದ್ಧಿನಿದ್ದೇಸೋ ನಾಮ

ಬಾವೀಸತಿಮೋ ಪರಿಚ್ಛೇದೋ.