೫. ವೀಥಿಮುತ್ತಪರಿಚ್ಛೇದೋ

೧. ವೀಥಿಚಿತ್ತವಸೇನೇವಂ, ಪವತ್ತಿಯಮುದೀರಿತೋ.

ಪವತ್ತಿಸಙ್ಗಹೋ ನಾಮ, ಸನ್ಧಿಯಂ ದಾನಿ ವುಚ್ಚತಿ.

೨. ಚತಸ್ಸೋ ಭೂಮಿಯೋ, ಚತುಬ್ಬಿಧಾ ಪಟಿಸನ್ಧಿ, ಚತ್ತಾರಿ ಕಮ್ಮಾನಿ, ಚತುಧಾ ಮರಣುಪ್ಪತ್ತಿ ಚೇತಿ ವೀಥಿಮುತ್ತಸಙ್ಗಹೇ ಚತ್ತಾರಿ ಚತುಕ್ಕಾನಿ ವೇದಿತಬ್ಬಾನಿ.

ಭೂಮಿಚತುಕ್ಕಂ

೩. ತತ್ಥ ಅಪಾಯಭೂಮಿ ಕಾಮಸುಗತಿಭೂಮಿ ರೂಪಾವಚರಭೂಮಿ ಅರೂಪಾವಚರಭೂಮಿ ಚೇತಿ ಚತಸ್ಸೋ ಭೂಮಿಯೋ ನಾಮ.

೪. ತಾಸು ನಿರಯೋ ತಿರಚ್ಛಾನಯೋನಿ ಪೇತ್ತಿವಿಸಯೋ ಅಸುರಕಾಯೋ ಚೇತಿ ಅಪಾಯಭೂಮಿ ಚತುಬ್ಬಿಧಾ ಹೋತಿ.

೫. ಮನುಸ್ಸಾ ಚಾತುಮಹಾರಾಜಿಕಾ ತಾವತಿಂಸಾ ಯಾಮಾ ತುಸಿತಾ ನಿಮ್ಮಾನರತಿ ಪರನಿಮ್ಮಿತವಸವತ್ತೀ ಚೇತಿ ಕಾಮಸುಗತಿಭೂಮಿ ಸತ್ತವಿಧಾ ಹೋತಿ.

೬. ಸಾ ಪನಾಯಮೇಕಾದಸವಿಧಾಪಿ ಕಾಮಾವಚರಭೂಮಿಚ್ಚೇವ ಸಙ್ಖಂ ಗಚ್ಛತಿ.

೭. ಬ್ರಹ್ಮಪಾರಿಸಜ್ಜಾ ಬ್ರಹ್ಮಪುರೋಹಿತಾ ಮಹಾಬ್ರಹ್ಮಾ ಚೇತಿ ಪಠಮಜ್ಝಾನಭೂಮಿ.

೮. ಪರಿತ್ತಾಭಾ ಅಪ್ಪಮಾಣಾಭಾ ಆಭಸ್ಸರಾ ಚೇತಿ ದುತಿಯಜ್ಝಾನಭೂಮಿ.

೯. ಪರಿತ್ತಸುಭಾ ಅಪ್ಪಮಾಣಸುಭಾ ಸುಭಕಿಣ್ಹಾ ಚೇತಿ ತತಿಯಜ್ಝಾನಭೂಮಿ.

೧೦. ವೇಹಪ್ಫಲಾ ಅಸಞ್ಞಸತ್ತಾ ಸುದ್ಧಾವಾಸಾ ಚೇತಿ ಚತುತ್ಥಜ್ಝಾನಭೂಮೀತಿ ರೂಪಾವಚರಭೂಮಿ ಸೋಳಸವಿಧಾ ಹೋತಿ.

೧೧. ಅವಿಹಾ ಅತಪ್ಪಾ ಸುದಸ್ಸಾ ಸುದಸ್ಸೀ ಅಕನಿಟ್ಠಾ ಚೇತಿ ಸುದ್ಧಾವಾಸಭೂಮಿ ಪಞ್ಚವಿಧಾ ಹೋತಿ.

೧೨. ಆಕಾಸಾನಞ್ಚಾಯತನಭೂಮಿ ವಿಞ್ಞಾಣಞ್ಚಾಯತನಭೂಮಿ ಆಕಿಞ್ಚಞ್ಞಾಯತನಭೂಮಿ ನೇವಸಞ್ಞಾನಾಸಞ್ಞಾಯತನಭೂಮಿ ಚೇತಿ ಅರೂಪಭೂಮಿ ಚತುಬ್ಬಿಧಾ ಹೋತಿ.

೧೩. ಪುಥುಜ್ಜನಾ ನ ಲಬ್ಭನ್ತಿ, ಸುದ್ಧಾವಾಸೇಸು ಸಬ್ಬಥಾ.

ಸೋತಾಪನ್ನಾ ಚ ಸಕದಾಗಾಮಿನೋ ಚಾಪಿ ಪುಗ್ಗಲಾ.

೧೪. ಅರಿಯಾ ನೋಪಲಬ್ಭನ್ತಿ, ಅಸಞ್ಞಾಪಾಯಭೂಮಿಸು.

ಸೇಸಟ್ಠಾನೇಸು ಲಬ್ಭನ್ತಿ, ಅರಿಯಾನರಿಯಾಪಿ ಚ.

ಇದಮೇತ್ಥ ಭೂಮಿಚತುಕ್ಕಂ.

ಪಟಿಸನ್ಧಿಚತುಕ್ಕಂ

೧೫. ಅಪಾಯಪಟಿಸನ್ಧಿ ಕಾಮಸುಗತಿಪಟಿಸನ್ಧಿ ರೂಪಾವಚರಪಟಿಸನ್ಧಿ ಅರೂಪಾವಚರಪಟಿಸನ್ಧಿ ಚೇತಿ ಚತುಬ್ಬಿಧಾ ಪಟಿಸನ್ಧಿ ನಾಮ.

೧೬. ತತ್ಥ ಅಕುಸಲವಿಪಾಕೋಪೇಕ್ಖಾಸಹಗತಸನ್ತೀರಣಂ ಅಪಾಯಭೂಮಿಯಂ ಓಕ್ಕನ್ತಿಕ್ಖಣೇ ಪಟಿಸನ್ಧಿ ಹುತ್ವಾ ತತೋ ಪರಂ ಭವಙ್ಗಂ ಪರಿಯೋಸಾನೇ ಚವನಂ ಹುತ್ವಾ ವೋಚ್ಛಿಜ್ಜತಿ, ಅಯಮೇಕಾಪಾಯಪಟಿಸನ್ಧಿ ನಾಮ.

೧೭. ಕುಸಲವಿಪಾಕೋಪೇಕ್ಖಾಸಹಗತಸನ್ತೀರಣಂ ಪನ ಕಾಮಸುಗತಿಯಂ ಮನುಸ್ಸಾನಞ್ಚೇವ ಜಚ್ಚನ್ಧಾದೀನಂ ಭುಮ್ಮಸ್ಸಿತಾನಞ್ಚ ವಿನಿಪಾತಿಕಾಸುರಾನಂ ಪಟಿಸನ್ಧಿಭವಙ್ಗಚುತಿವಸೇನ ಪವತ್ತತಿ.

೧೮. ಮಹಾವಿಪಾಕಾನಿ ಪನ ಅಟ್ಠ ಸಬ್ಬತ್ಥಾಪಿ ಕಾಮಸುಗತಿಯಂ ಪಟಿಸನ್ಧಿಭವಙ್ಗಚುತಿವಸೇನ ಪವತ್ತನ್ತಿ.

೧೯. ಇಮಾ ನವ ಕಾಮಸುಗತಿಪಟಿಸನ್ಧಿಯೋ ನಾಮ.

೨೦. ಸಾ ಪನಾಯಂ ದಸವಿಧಾಪಿ ಕಾಮಾವಚರಪಟಿಸನ್ಧಿಚ್ಚೇವ ಸಙ್ಖಂ ಗಚ್ಛತಿ.

೨೧. ತೇಸು ಚತುನ್ನಂ ಅಪಾಯಾನಂ ಮನುಸ್ಸಾನಂ ವಿನಿಪಾತಿಕಾಸುರಾನಞ್ಚ ಆಯುಪ್ಪಮಾಣಗಣನಾಯ ನಿಯಮೋ ನತ್ಥಿ.

೨೨. ಚಾತುಮಹಾರಾಜಿಕಾನಂ ಪನ ದೇವಾನಂ ದಿಬ್ಬಾನಿ ಪಞ್ಚವಸ್ಸಸತಾನಿ ಆಯುಪ್ಪಮಾಣಂ, ಮನುಸ್ಸಗಣನಾಯ ನವುತಿವಸ್ಸಸತಸಹಸ್ಸಪ್ಪಮಾಣಂ ಹೋತಿ, ತತೋ ಚತುಗ್ಗುಣಂ ತಾವತಿಂಸಾನಂ, ತತೋ ಚತುಗ್ಗುಣಂ ಯಾಮಾನಂ, ತತೋ ಚತುಗ್ಗುಣಂ ತುಸಿತಾನಂ, ತತೋ ಚತುಗ್ಗುಣಂ ನಿಮ್ಮಾನರತೀನಂ, ತತೋ ಚತುಗ್ಗುಣಂ ಪರನಿಮ್ಮಿತವಸವತ್ತೀನಂ.

೨೩. ನವಸತಞ್ಚೇಕವೀಸ-ವಸ್ಸಾನಂ ಕೋಟಿಯೋ ತಥಾ.

ವಸ್ಸಸತಸಹಸ್ಸಾನಿ, ಸಟ್ಠಿ ಚ ವಸವತ್ತಿಸು.

೨೪. ಪಠಮಜ್ಝಾನವಿಪಾಕಂ ಪಠಮಜ್ಝಾನಭೂಮಿಯಂ ಪಟಿಸನ್ಧಿಭವಙ್ಗಚುತಿವಸೇನ ಪವತ್ತತಿ.

೨೫. ತಥಾ ದುತಿಯಜ್ಝಾನವಿಪಾಕಂ ತತಿಯಜ್ಝಾನವಿಪಾಕಞ್ಚ ದುತಿಯಜ್ಝಾನಭೂಮಿಯಂ.

೨೬. ಚತುತ್ಥಜ್ಝಾನವಿಪಾಕಂ ತತಿಯಜ್ಝಾನಭೂಮಿಯಂ.

೨೭. ಪಞ್ಚಮಜ್ಝಾನವಿಪಾಕಂ ಚತುತ್ಥಜ್ಝಾನಭೂಮಿಯಂ.

೨೮. ಅಸಞ್ಞಸತ್ತಾನಂ ಪನ ರೂಪಮೇವ ಪಟಿಸನ್ಧಿ ಹೋತಿ. ತಥಾ ತತೋ ಪರಂ ಪವತ್ತಿಯಂ ಚವನಕಾಲೇ ಚ ರೂಪಮೇವ ಪವತ್ತಿತ್ವಾ ನಿರುಜ್ಝತಿ, ಇಮಾ ಛ ರೂಪಾವಚರಪಟಿಸನ್ಧಿಯೋ ನಾಮ.

೨೯. ತೇಸು ಬ್ರಹ್ಮಪಾರಿಸಜ್ಜಾನಂ ದೇವಾನಂ ಕಪ್ಪಸ್ಸ ತತಿಯೋ ಭಾಗೋ ಆಯುಪ್ಪಮಾಣಂ.

೩೦. ಬ್ರಹ್ಮಪುರೋಹಿತಾನಂ ಉಪಡ್ಢಕಪ್ಪೋ.

೩೧. ಮಹಾಬ್ರಹ್ಮಾನಂ ಏಕೋ ಕಪ್ಪೋ.

೩೨. ಪರಿತ್ತಾಭಾನಂ ದ್ವೇ ಕಪ್ಪಾನಿ.

೩೩. ಅಪ್ಪಮಾಣಾಭಾನಂ ಚತ್ತಾರಿಕಪ್ಪಾನಿ.

೩೪. ಆಭಸ್ಸರಾನಂ ಅಟ್ಠ ಕಪ್ಪಾನಿ.

೩೫. ಪರಿತ್ತಸುಭಾನಂ ಸೋಳಸ ಕಪ್ಪಾನಿ.

೩೬. ಅಪ್ಪಮಾಣಸುಭಾನಂ ದ್ವತ್ತಿಂಸ ಕಪ್ಪಾನಿ.

೩೭. ಸುಭಕಿಣ್ಹಾನಂ ಚತುಸಟ್ಠಿ ಕಪ್ಪಾನಿ.

೩೮. ವೇಹಪ್ಫಲಾನಂ ಅಸಞ್ಞಸತ್ತಾನಞ್ಚ ಪಞ್ಚಕಪ್ಪಸತಾನಿ.

೩೯. ಅವಿಹಾನಂ ಕಪ್ಪಸಹಸ್ಸಾನಿ.

೪೦. ಅತಪ್ಪಾನಂ ದ್ವೇ ಕಪ್ಪಸಹಸ್ಸಾನಿ.

೪೧. ಸುದಸ್ಸಾನಂ ಚತ್ತಾರಿ ಕಪ್ಪಸಹಸ್ಸಾನಿ.

೪೨. ಸುದಸ್ಸೀನಂ ಅಟ್ಠ ಕಪ್ಪಸಹಸ್ಸಾನಿ.

೪೩. ಅಕನಿಟ್ಠಾನಂ ಸೋಳಸ ಕಪ್ಪಸಹಸ್ಸಾನಿ.

೪೪. ಪಠಮಾರುಪ್ಪಾದಿವಿಪಾಕಾನಿ ಪಠಮಾರುಪ್ಪಾದಿಭೂಮೀಸು ಯಥಾಕ್ಕಮಂ ಪಟಿಸನ್ಧಿಭವಙ್ಗಚುತಿವಸೇನ ಪವತ್ತನ್ತಿ. ಇಮಾ ಚತಸ್ಸೋ ಅರೂಪಪಟಿಸನ್ಧಿಯೋ ನಾಮ.

೪೫. ತೇಸು ಪನ ಆಕಾಸಾನಞ್ಚಾಯತನೂಪಗಾನಂ ದೇವಾನಂ ವೀಸತಿಕಪ್ಪಸಹಸ್ಸಾನಿ ಆಯುಪ್ಪಮಾಣಂ.

೪೬. ವಿಞ್ಞಾಣಞ್ಚಾಯತನೂಪಗಾನಂ ದೇವಾನಂ ಚತ್ತಾಲೀಸಕಪ್ಪಸಹಸ್ಸಾನಿ.

೪೭. ಆಕಿಞ್ಚಞ್ಞಾಯತನೂಪಗಾನಂ ದೇವಾನಂ ಸಟ್ಠಿಕಪ್ಪಸಹಸ್ಸಾನಿ.

೪೮. ನೇವಸಞ್ಞಾನಾಸಞ್ಞಾಯತನೂಪಗಾನಂ ದೇವಾನಂ ಚತುರಾಸೀತಿಕಪ್ಪಸಹಸ್ಸಾನಿ.

೪೯. ಪಟಿಸನ್ಧಿ ಭವಙ್ಗಞ್ಚ, ತಥಾ ಚವನಮಾನಸಂ.

ಏಕಮೇವ ತಥೇವೇಕವಿಸಯಞ್ಚೇಕಜಾತಿಯಂ.

ಇದಮೇತ್ಥ ಪಟಿಸನ್ಧಿಚತುಕ್ಕಂ.

ಕಮ್ಮಚತುಕ್ಕಂ

೫೦. ಜನಕಂ ಉಪತ್ಥಮ್ಭಕಂ ಉಪಪೀಳಕಂ ಉಪಘಾತಕಞ್ಚೇತಿ ಕಿಚ್ಚವಸೇನ.

೫೧. ಗರುಕಂ ಆಸನ್ನಂ ಆಚಿಣ್ಣಂ ಕಟತ್ತಾಕಮ್ಮಞ್ಚೇತಿ ಪಾಕದಾನಪರಿಯಾಯೇನ.

೫೨. ದಿಟ್ಠಧಮ್ಮವೇದನೀಯಂ ಉಪಪಜ್ಜವೇದನೀಯಂ ಅಪರಾಪರಿಯವೇದನೀಯಂ ಅಹೋಸಿಕಮ್ಮಞ್ಚೇತಿ ಪಾಕಕಾಲವಸೇನ ಚತ್ತಾರಿ ಕಮ್ಮಾನಿ ನಾಮ.

೫೩. ತಥಾ ಅಕುಸಲಂ ಕಾಮಾವಚರಕುಸಲಂ ರೂಪಾವಚರಕುಸಲಂ ಅರೂಪಾವಚರಕುಸಲಞ್ಚೇತಿ ಪಾಕಠಾನವಸೇನ.

೫೪. ತತ್ಥ ಅಕುಸಲಂ ಕಾಯಕಮ್ಮಂ ವಚೀಕಮ್ಮಂ ಮನೋಕಮ್ಮಞ್ಚೇತಿ ಕಮ್ಮದ್ವಾರವಸೇನ ತಿವಿಧಂ ಹೋತಿ.

೫೫. ಕಥಂ? ಪಾಣಾತಿಪಾತೋ ಅದಿನ್ನಾದಾನಂ ಕಾಮೇಸುಮಿಚ್ಛಾಚಾರೋ ಚೇತಿ ಕಾಯವಿಞ್ಞತ್ತಿಸಙ್ಖಾತೇ ಕಾಯದ್ವಾರೇ ಬಾಹುಲ್ಲವುತ್ತಿತೋ ಕಾಯಕಮ್ಮಂ ನಾಮ.

೫೬. ಮುಸಾವಾದೋ ಪಿಸುಣವಾಚಾ ಫರುಸವಾಚಾ ಸಮ್ಫಪ್ಪಲಾಪೋ ಚೇತಿ ವಚೀವಿಞ್ಞತ್ತಿಸಙ್ಖಾತೇ ವಚೀದ್ವಾರೇ ಬಾಹುಲ್ಲವುತ್ತಿತೋ ವಚೀಕಮ್ಮಂ ನಾಮ.

೫೭. ಅಭಿಜ್ಝಾ ಬ್ಯಾಪಾದೋ ಮಿಚ್ಛಾದಿಟ್ಠಿ ಚೇತಿ ಅಞ್ಞತ್ರಾಪಿ ವಿಞ್ಞತ್ತಿಯಾ ಮನಸ್ಮಿಂಯೇವ ಬಾಹುಲ್ಲವುತ್ತಿತೋ ಮನೋಕಮ್ಮಂ ನಾಮ.

೫೮. ತೇಸು ಪಾಣಾತಿಪಾತೋ ಫರುಸವಾಚಾ ಬ್ಯಾಪಾದೋ ಚ ದೋಸಮೂಲೇನ ಜಾಯನ್ತಿ.

೫೯. ಕಾಮೇಸುಮಿಚ್ಛಾಚಾರೋ ಅಭಿಜ್ಝಾ ಮಿಚ್ಛಾದಿಟ್ಠಿ ಚ ಲೋಭಮೂಲೇನ.

೬೦. ಸೇಸಾನಿ ಚತ್ತಾರಿಪಿ ದ್ವೀಹಿ ಮೂಲೇಹಿ ಸಮ್ಭವನ್ತಿ.

೬೧. ಚಿತ್ತುಪ್ಪಾದವಸೇನ ಪನೇತಂ ಅಕುಸಲಂ ಸಬ್ಬಥಾಪಿ ದ್ವಾದಸವಿಧಂ ಹೋತಿ.

೬೨. ಕಾಮಾವಚರಕುಸಲಮ್ಪಿ ಕಾಯದ್ವಾರೇ ಪವತ್ತಂ ಕಾಯಕಮ್ಮಂ, ವಚೀದ್ವಾರೇ ಪವತ್ತಂ ವಚೀಕಮ್ಮಂ, ಮನೋದ್ವಾರೇ ಪವತ್ತಂ ಮನೋಕಮ್ಮಞ್ಚೇತಿ ಕಮ್ಮದ್ವಾರವಸೇನ ತಿವಿಧಂ ಹೋತಿ.

೬೩. ತಥಾ ದಾನಸೀಲಭಾವನಾವಸೇನ.

೬೪. ಚಿತ್ತುಪ್ಪಾದವಸೇನ ಪನೇತಂ ಅಟ್ಠವಿಧಂ ಹೋತಿ.

೬೫. ದಾನಸೀಲಭಾವನಾಪಚಾಯನವೇಯ್ಯಾವಚ್ಚಪತ್ತಿದಾನಪತ್ತಾನುಮೋದನಧಮ್ಮಸ್ಸವನಧಮ್ಮದೇಸನಾ ದಿಟ್ಠಿಜುಕಮ್ಮವಸೇನ ದಸವಿಧಂ ಹೋತಿ.

೬೬. ತಂ ಪನೇತಂ ವೀಸತಿವಿಧಮ್ಪಿ ಕಾಮಾವಚರಕಮ್ಮಮಿಚ್ಚೇವ ಸಙ್ಖಂ ಗಚ್ಛತಿ.

೬೭. ರೂಪಾವಚರಕುಸಲಂ ಪನ ಮನೋಕಮ್ಮಮೇವ, ತಞ್ಚ ಭಾವನಾಮಯಂ ಅಪ್ಪನಾಪ್ಪತ್ತಂ, ಝಾನಙ್ಗಭೇದೇನ ಪಞ್ಚವಿಧಂ ಹೋತಿ.

೬೮. ತಥಾ ಅರೂಪಾವಚರಕುಸಲಞ್ಚ ಮನೋಕಮ್ಮಂ, ತಮ್ಪಿ ಭಾವನಾಮಯಂ ಅಪ್ಪನಾಪ್ಪತ್ತಂ. ಆರಮ್ಮಣಭೇದೇನ ಚತುಬ್ಬಿಧಂ ಹೋತಿ.

೬೯. ಏತ್ಥಾಕುಸಲಕಮ್ಮಮುದ್ಧಚ್ಚರಹಿತಂ ಅಪಾಯಭೂಮಿಯಂ ಪಟಿಸನ್ಧಿಂ ಜನೇತಿ, ಪವತ್ತಿಯಂ ಪನ ಸಬ್ಬಮ್ಪಿ ದ್ವಾದಸವಿಧಂ ಸತ್ತಾಕುಸಲಪಾಕಾನಿ ಸಬ್ಬತ್ಥಾಪಿ ಕಾಮಲೋಕೇ ರೂಪಲೋಕೇ ಚ ಯಥಾರಹಂ ವಿಪಚ್ಚತಿ.

೭೦. ಕಾಮಾವಚರಕುಸಲಮ್ಪಿ ಕಾಮಸುಗತಿಯಮೇವ ಪಟಿಸನ್ಧಿಂ ಜನೇತಿ, ತಥಾ ಪವತ್ತಿಯಞ್ಚ ಮಹಾವಿಪಾಕಾನಿ, ಅಹೇತುಕವಿಪಾಕಾನಿ ಪನ ಅಟ್ಠಪಿ ಸಬ್ಬತ್ಥಾಪಿ ಕಾಮಲೋಕೇ ರೂಪಲೋಕೇ ಚ ಯಥಾರಹಂ ವಿಪಚ್ಚತಿ.

೭೧. ತತ್ಥಾಪಿ ತಿಹೇತುಕಮುಕ್ಕಟ್ಠಂ ಕುಸಲಂ ತಿಹೇತುಕಂ ಪಟಿಸನ್ಧಿಂ ದತ್ವಾ ಪವತ್ತೇ ಸೋಳಸ ವಿಪಾಕಾನಿ ವಿಪಚ್ಚತಿ.

೭೨. ತಿಹೇತುಕಮೋಮಕಂ ದ್ವಿಹೇತುಕಮುಕ್ಕಟ್ಠಞ್ಚ ಕುಸಲಂ ದ್ವಿಹೇತುಕಂ ಪಟಿಸನ್ಧಿಂ ದತ್ವಾ ಪವತ್ತೇ ತಿಹೇತುಕರಹಿತಾನಿ ದ್ವಾದಸ ವಿಪಾಕಾನಿ ವಿಪಚ್ಚತಿ.

೭೩. ದ್ವಿಹೇತುಕಮೋಮಕಂ ಪನ ಕುಸಲಂ ಅಹೇತುಕಮೇವ ಪಟಿಸನ್ಧಿಂ ದೇತಿ, ಪವತ್ತೇ ಚ ಅಹೇತುಕವಿಪಾಕಾನೇವ ವಿಪಚ್ಚತಿ.

೭೪. ಅಸಙ್ಖಾರಂ ಸಸಙ್ಖಾರ-ವಿಪಾಕಾನಿ ನ ಪಚ್ಚತಿ.

ಸಸಙ್ಖಾರಮಸಙ್ಖಾರ-ವಿಪಾಕಾನೀತಿ ಕೇಚನ.

ತೇಸಂ ದ್ವಾದಸ ಪಾಕಾನಿ, ದಸಾಟ್ಠ ಚ ಯಥಾಕ್ಕಮಂ;

ಯಥಾವುತ್ತಾನುಸಾರೇನ ಯಥಾಸಮ್ಭವಮುದ್ದಿಸೇ.

೭೫. ರೂಪಾವಚರಕುಸಲಂ ಪನ ಪಠಮಜ್ಝಾನಂ ಪರಿತ್ತಂ ಭಾವೇತ್ವಾ ಬ್ರಹ್ಮಪಾರಿಸಜ್ಜೇಸು ಉಪ್ಪಜ್ಜತಿ.

೭೬. ತದೇವ ಮಜ್ಝಿಮಂ ಭಾವೇತ್ವಾ ಬ್ರಹ್ಮಪುರೋಹಿತೇಸು.

೭೭. ಪಣೀತಂ ಭಾವೇತ್ವಾ ಮಹಾಬ್ರಹ್ಮೇಸು.

೭೮. ತಥಾ ದುತಿಯಜ್ಝಾನಂ ತತಿಯಜ್ಝಾನಞ್ಚ ಪರಿತ್ತಂ ಭಾವೇತ್ವಾ ಪರಿತ್ತಾಭೇಸು.

೭೯. ಮಜ್ಝಿಮಂ ಭಾವೇತ್ವಾ ಅಪ್ಪಮಾಣಾಭೇಸು.

೮೦. ಪಣೀತಂ ಭಾವೇತ್ವಾ ಆಭಸ್ಸರೇಸು.

೮೧. ಚತುತ್ಥಜ್ಝಾನಂ ಪರಿತ್ತಂ ಭಾವೇತ್ವಾ ಪರಿತ್ತಸುಭೇಸು.

೮೨. ಮಜ್ಝಿಮಂ ಭಾವೇತ್ವಾ ಅಪ್ಪಮಾಣಸುಭೇಸು.

೮೩. ಪಣೀತಂ ಭಾವೇತ್ವಾ ಸುಭಕಿಣ್ಹೇಸು.

೮೪. ಪಞ್ಚಮಜ್ಝಾನಂ ಭಾವೇತ್ವಾ ವೇಹಪ್ಫಲೇಸು.

೮೫. ತದೇವ ಸಞ್ಞಾವಿರಾಗಂ ಭಾವೇತ್ವಾ ಅಸಞ್ಞಸತ್ತೇಸು.

೮೬. ಅನಾಗಾಮಿನೋ ಪನ ಸುದ್ಧಾವಾಸೇಸು ಉಪ್ಪಜ್ಜನ್ತಿ.

೮೭. ಅರೂಪಾವಚರಕುಸಲಞ್ಚ ಯಥಾಕ್ಕಮಂ ಭಾವೇತ್ವಾ ಆರುಪ್ಪೇಸು ಉಪ್ಪಜ್ಜನ್ತೀತಿ.

೮೮. ಇತ್ಥಂ ಮಹಗ್ಗತಂ ಪುಞ್ಞಂ, ಯಥಾಭೂಮಿವವತ್ಥಿತಂ.

ಜನೇತಿ ಸದಿಸಂ ಪಾಕಂ, ಪಟಿಸನ್ಧಿಪವತ್ತಿಯಂ.

ಇದಮೇತ್ಥ ಕಮ್ಮಚತುಕ್ಕಂ.

ಚುತಿಪಟಿಸನ್ಧಿಕ್ಕಮೋ

೮೯. ಆಯುಕ್ಖಯೇನ ಕಮ್ಮಕ್ಖಯೇನ ಉಭಯಕ್ಖಯೇನ ಉಪಚ್ಛೇದಕಕಮ್ಮುನಾ ಚೇತಿ ಚತುಧಾ ಮರಣುಪ್ಪತ್ತಿ ನಾಮ.

೯೦. ತಥಾ ಚ ಮರನ್ತಾನಂ ಪನ ಮರಣಕಾಲೇ ಯಥಾರಹಂ ಅಭಿಮುಖೀಭೂತಂ ಭವನ್ತರೇ ಪಟಿಸನ್ಧಿಜನಕಂ ಕಮ್ಮಂ ವಾ, ತಂಕಮ್ಮಕರಣಕಾಲೇ ರೂಪಾದಿಕಮುಪಲದ್ಧಪುಬ್ಬಮುಪಕರಣಭೂತಞ್ಚ ಕಮ್ಮನಿಮಿತ್ತಂ ವಾ, ಅನನ್ತರಮುಪ್ಪಜ್ಜಮಾನಭವೇ ಉಪಲಭಿತಬ್ಬಮುಪಭೋಗಭೂತಞ್ಚ ಗತಿನಿಮಿತ್ತಂ ವಾ ಕಮ್ಮಬಲೇನ ಛನ್ನಂ ದ್ವಾರಾನಂ ಅಞ್ಞತರಸ್ಮಿಂ ಪಚ್ಚುಪಟ್ಠಾತಿ, ತತೋ ಪರಂ ತಮೇವ ತಥೋಪಟ್ಠಿತಂ ಆರಮ್ಮಣಂ ಆರಬ್ಭ ವಿಪಚ್ಚಮಾನಕಕಮ್ಮಾನುರೂಪಂ ಪರಿಸುದ್ಧಂ ಉಪಕ್ಕಿಲಿಟ್ಠಂ ವಾ ಉಪಲಭಿತಬ್ಬಭವಾನುರೂಪಂ ತತ್ಥೋಣತಂವ ಚಿತ್ತಸನ್ತಾನಂ ಅಭಿಣ್ಹಂ ಪವತ್ತತಿ ಬಾಹುಲ್ಲೇನ, ತಮೇವ ವಾ ಪನ ಜನಕಭೂತಂ ಕಮ್ಮಂ ಅಭಿನವಕರಣವಸೇನ ದ್ವಾರಪ್ಪತ್ತಂ ಹೋತಿ.

೯೧. ಪಚ್ಚಾಸನ್ನಮರಣಸ್ಸ ತಸ್ಸ ವೀಥಿಚಿತ್ತಾವಸಾನೇ ಭವಙ್ಗಕ್ಖಯೇ ವಾ ಚವನವಸೇನ ಪಚ್ಚುಪ್ಪನ್ನಭವಪರಿಯೋಸಾನಭೂತಂ ಚುತಿಚಿತ್ತಂ ಉಪ್ಪಜ್ಜಿತ್ವಾ ನಿರುಜ್ಝತಿ, ತಸ್ಮಿಂ ನಿರುದ್ಧಾವಸಾನೇ ತಸ್ಸಾನನ್ತರಮೇವ ತಥಾಗಹಿತಂ ಆರಮ್ಮಣಂ ಆರಬ್ಭ ಸವತ್ಥುಕಂ ಅವತ್ಥುಕಮೇವ ವಾ ಯಥಾರಹಂ ಅವಿಜ್ಜಾನುಸಯಪರಿಕ್ಖಿತ್ತೇನ ತಣ್ಹಾನುಸಯಮೂಲಕೇನ ಸಙ್ಖಾರೇನ ಜನಿಯಮಾನಂ ಸಮ್ಪಯುತ್ತೇಹಿ ಪರಿಗ್ಗಯ್ಹಮಾನಂ ಸಹಜಾತಾನಮಧಿಟ್ಠಾನಭಾವೇನ ಪುಬ್ಬಙ್ಗಮಭೂತಂ ಭವನ್ತರಪಟಿಸನ್ಧಾನವಸೇನ ಪಟಿಸನ್ಧಿಸಙ್ಖಾತಂ ಮಾನಸಂ ಉಪ್ಪಜ್ಜಮಾನಮೇವ ಪತಿಟ್ಠಾತಿ ಭವನ್ತರೇ.

೯೨. ಮರಣಾಸನ್ನವೀಥಿಯಂ ಪನೇತ್ಥ ಮನ್ದಪ್ಪವತ್ತಾನಿ ಪಞ್ಚೇವ ಜವನಾನಿ ಪಾಟಿಕಙ್ಖಿತಬ್ಬಾನಿ, ತಸ್ಮಾ ಯದಿ ಪಚ್ಚುಪ್ಪನ್ನಾರಮ್ಮಣೇಸು ಆಪಾಥಗತೇಸು ಧರನ್ತೇಸ್ವೇವ ಮರಣಂ ಹೋತಿ, ತದಾ ಪಟಿಸನ್ಧಿಭವಙ್ಗಾನಮ್ಪಿ ಪಚ್ಚುಪ್ಪನ್ನಾರಮ್ಮಣತಾ ಲಬ್ಭತೀತಿ ಕತ್ವಾ ಕಾಮಾವಚರಪಟಿಸನ್ಧಿಯಾ ಛದ್ವಾರಗ್ಗಹಿತಂ ಕಮ್ಮನಿಮಿತ್ತಂ ಗತಿನಿಮಿತ್ತಞ್ಚ ಪಚ್ಚುಪ್ಪನ್ನಮತೀತಾರಮ್ಮಣಂ ಉಪಲಬ್ಭತಿ, ಕಮ್ಮಂ ಪನ ಅತೀತಮೇವ, ತಞ್ಚ ಮನೋದ್ವಾರಗ್ಗಹಿತಂ, ತಾನಿ ಪನ ಸಬ್ಬಾನಿಪಿ ಪರಿತ್ತಧಮ್ಮಭೂತಾನೇವಾರಮ್ಮಣಾನಿ.

೯೩. ರೂಪಾವಚರಪಟಿಸನ್ಧಿಯಾ ಪನ ಪಞ್ಞತ್ತಿಭೂತಂ ಕಮ್ಮನಿಮಿತ್ತಮೇವಾರಮ್ಮಣಂ ಹೋತಿ.

೯೪. ತಥಾ ಅರೂಪಪಟಿಸನ್ಧಿಯಾ ಚ ಮಹಗ್ಗತಭೂತಂ ಪಞ್ಞತ್ತಿಭೂತಞ್ಚ ಕಮ್ಮನಿಮಿತ್ತಮೇವ ಯಥಾರಹಮಾರಮ್ಮಣಂ ಹೋತಿ.

೯೫. ಅಸಞ್ಞಸತ್ತಾನಂ ಪನ ಜೀವಿತನವಕಮೇವ ಪಟಿಸನ್ಧಿಭಾವೇನ ಪತಿಟ್ಠಾತಿ, ತಸ್ಮಾ ತೇ ರೂಪಪಟಿಸನ್ಧಿಕಾ ನಾಮ.

೯೬. ಅರೂಪಾ ಅರೂಪಪಟಿಸನ್ಧಿಕಾ.

೯೭. ಸೇಸಾ ರೂಪಾರೂಪಪಟಿಸನ್ಧಿಕಾ.

೯೮. ಆರುಪ್ಪಚುತಿಯಾ ಹೋನ್ತಿ, ಹೇಟ್ಠಿಮಾರುಪ್ಪವಜ್ಜಿತಾ.

ಪರಮಾರುಪ್ಪಸನ್ಧೀ ಚ, ತಥಾ ಕಾಮತಿಹೇತುಕಾ.

ರೂಪಾವಚರಚುತಿಯಾ, ಅಹೇತುರಹಿತಾ ಸಿಯುಂ;

ಸಬ್ಬಾ ಕಾಮತಿಹೇತುಮ್ಹಾ, ಕಾಮೇಸ್ವೇವ ಪನೇತರಾ.

ಅಯಮೇತ್ಥ ಚುತಿಪಟಿಸನ್ಧಿಕ್ಕಮೋ.

೯೯. ಇಚ್ಚೇವಂ ಗಹಿತಪಟಿಸನ್ಧಿಕಾನಂ ಪನ ಪಟಿಸನ್ಧಿನಿರೋಧಾನನ್ತರತೋ ಪಭುತಿ ತಮೇವಾರಮ್ಮಣಮಾರಬ್ಭ ತದೇವ ಚಿತ್ತಂ ಯಾವ ಚುತಿಚಿತ್ತುಪ್ಪಾದಾ ಅಸತಿ ವೀಥಿಚಿತ್ತುಪ್ಪಾದೇ ಭವಸ್ಸ ಅಙ್ಗಭಾವೇನ ಭವಙ್ಗಸನ್ತತಿಸಙ್ಖಾತಂ ಮಾನಸಂ ಅಬ್ಬೋಚ್ಛಿನ್ನಂ ನದೀಸೋತೋ ವಿಯ ಪವತ್ತತಿ.

೧೦೦. ಪರಿಯೋಸಾನೇ ಚ ಚವನವಸೇನ ಚುತಿಚಿತ್ತಂ ಹುತ್ವಾ ನಿರುಜ್ಝತಿ.

೧೦೧. ತತೋ ಪರಞ್ಚ ಪಟಿಸನ್ಧಾದಯೋ ರಥಚಕ್ಕಮಿವ ಯಥಾಕ್ಕಮಂ ಏವ ಪರಿವತ್ತನ್ತಾ ಪವತ್ತನ್ತಿ.

೧೦೨. ಪಟಿಸನ್ಧಿಭವಙ್ಗವೀಥಿಯೋ, ಚುತಿಚೇಹ ತಥಾ ಭವನ್ತರೇ.

ಪುನ ಸನ್ಧಿ ಭವಙ್ಗಮಿಚ್ಚಯಂ, ಪರಿವತ್ತತಿ ಚಿತ್ತಸನ್ತತಿ.

ಪಟಿಸಙ್ಖಾಯಪನೇತಮದ್ಧುವಂ, ಅಧಿಗನ್ತ್ವಾ ಪದಮಚ್ಚುತಂ ಬುಧಾ;

ಸುಸಮುಚ್ಛಿನ್ನಸಿನೇಹಬನ್ಧನಾ, ಸಮಮೇಸ್ಸನ್ತಿ ಚಿರಾಯ ಸುಬ್ಬತಾ.

ಇತಿ ಅಭಿಧಮ್ಮತ್ಥಸಙ್ಗಹೇ ವೀಥಿಮುತ್ತಸಙ್ಗಹವಿಭಾಗೋ ನಾಮ

ಪಞ್ಚಮೋ ಪರಿಚ್ಛೇದೋ.