೧೦. ನಿರೋಧಸುತ್ತಂ

೨೫೭. ‘‘ನಿರೋಧಸಞ್ಞಾ, ಭಿಕ್ಖವೇ, ಭಾವಿತಾ ಬಹುಲೀಕತಾ ಮಹಪ್ಫಲಾ ಹೋತಿ ಮಹಾನಿಸಂಸಾ. ಕಥಂ ಭಾವಿತಾ ಚ, ಭಿಕ್ಖವೇ, ನಿರೋಧಸಞ್ಞಾ ಕಥಂ ಬಹುಲೀಕತಾ ಮಹಪ್ಫಲಾ ಹೋತಿ ಮಹಾನಿಸಂಸಾ? ಇಧ, ಭಿಕ್ಖವೇ, ಭಿಕ್ಖು ನಿರೋಧಸಞ್ಞಾಸಹಗತಂ ಸತಿಸಮ್ಬೋಜ್ಝಙ್ಗಂ ಭಾವೇತಿ…ಪೇ… ನಿರೋಧಸಞ್ಞಾಸಹಗತಂ ಉಪೇಕ್ಖಾಸಮ್ಬೋಜ್ಝಙ್ಗಂ ಭಾವೇತಿ ವಿವೇಕನಿಸ್ಸಿತಂ ವಿರಾಗನಿಸ್ಸಿತಂ ನಿರೋಧನಿಸ್ಸಿತಂ ವೋಸ್ಸಗ್ಗಪರಿಣಾಮಿಂ. ಏವಂ ಭಾವಿತಾ ಖೋ, ಭಿಕ್ಖವೇ, ನಿರೋಧಸಞ್ಞಾ ಏವಂ ಬಹುಲೀಕತಾ ಮಹಪ್ಫಲಾ ಹೋತಿ ಮಹಾನಿಸಂಸಾತಿ.

‘‘ನಿರೋಧಸಞ್ಞಾಯ, ಭಿಕ್ಖವೇ, ಭಾವಿತಾಯ ಬಹುಲೀಕತಾಯ ದ್ವಿನ್ನಂ ಫಲಾನಂ ಅಞ್ಞತರಂ ಫಲಂ ಪಾಟಿಕಙ್ಖಂ – ದಿಟ್ಠೇವ ಧಮ್ಮೇ ಅಞ್ಞಾ, ಸತಿ ವಾ ಉಪಾದಿಸೇಸೇ ಅನಾಗಾಮಿತಾ. ಕಥಂ ಭಾವಿತಾಯ, ಭಿಕ್ಖವೇ, ನಿರೋಧಸಞ್ಞಾಯ ಕಥಂ ಬಹುಲೀಕತಾಯ ದ್ವಿನ್ನಂ ಫಲಾನಂ ಅಞ್ಞತರಂ ಫಲಂ ಪಾಟಿಕಙ್ಖಂ – ದಿಟ್ಠೇವ ಧಮ್ಮೇ ಅಞ್ಞಾ, ಸತಿ ವಾ ಉಪಾದಿಸೇಸೇ ಅನಾಗಾಮಿತಾ? ಇಧ, ಭಿಕ್ಖವೇ, ಭಿಕ್ಖು ನಿರೋಧಸಞ್ಞಾಸಹಗತಂ ಸತಿಸಮ್ಬೋಜ್ಝಙ್ಗಂ ಭಾವೇತಿ…ಪೇ… ನಿರೋಧಸಞ್ಞಾಸಹಗತಂ ಉಪೇಕ್ಖಾಸಮ್ಬೋಜ್ಝಙ್ಗಂ ಭಾವೇತಿ ವಿವೇಕನಿಸ್ಸಿತಂ ವಿರಾಗನಿಸ್ಸಿತಂ ನಿರೋಧನಿಸ್ಸಿತಂ ವೋಸ್ಸಗ್ಗಪರಿಣಾಮಿಂ. ಏವಂ ಭಾವಿತಾಯ ಖೋ, ಭಿಕ್ಖವೇ, ನಿರೋಧಸಞ್ಞಾಯ ಏವಂ ಬಹುಲೀಕತಾಯ ದ್ವಿನ್ನಂ ಫಲಾನಂ ಅಞ್ಞತರಂ ಫಲಂ ಪಾಟಿಕಙ್ಖಂ – ದಿಟ್ಠೇವ ಧಮ್ಮೇ ಅಞ್ಞಾ, ಸತಿ ವಾ ಉಪಾದಿಸೇಸೇ ಅನಾಗಾಮಿತಾ’’ತಿ.

‘‘ನಿರೋಧಸಞ್ಞಾ, ಭಿಕ್ಖವೇ, ಭಾವಿತಾ ಬಹುಲೀಕತಾ ಮಹತೋ ಅತ್ಥಾಯ ಸಂವತ್ತತಿ, ಮಹತೋ ಯೋಗಕ್ಖೇಮಾಯ ಸಂವತ್ತತಿ, ಮಹತೋ ಸಂವೇಗಾಯ ಸಂವತ್ತತಿ, ಮಹತೋ ಫಾಸುವಿಹಾರಾಯ ಸಂವತ್ತತಿ. ಕಥಂ ಭಾವಿತಾ ಚ, ಭಿಕ್ಖವೇ, ನಿರೋಧಸಞ್ಞಾ ಕಥಂ ಬಹುಲೀಕತಾ ಮಹತೋ ಅತ್ಥಾಯ ಸಂವತ್ತತಿ, ಮಹತೋ ಯೋಗಕ್ಖೇಮಾಯ ಸಂವತ್ತತಿ, ಮಹತೋ ಸಂವೇಗಾಯ ಸಂವತ್ತತಿ, ಮಹತೋ ಫಾಸುವಿಹಾರಾಯ ಸಂವತ್ತತಿ? ಇಧ, ಭಿಕ್ಖವೇ, ಭಿಕ್ಖು ನಿರೋಧಸಞ್ಞಾಸಹಗತಂ ಸತಿಸಮ್ಬೋಜ್ಝಙ್ಗಂ ಭಾವೇತಿ…ಪೇ… ನಿರೋಧಸಞ್ಞಾಸಹಗತಂ ಉಪೇಕ್ಖಾಸಮ್ಬೋಜ್ಝಙ್ಗಂ ಭಾವೇತಿ ವಿವೇಕನಿಸ್ಸಿತಂ ವಿರಾಗನಿಸ್ಸಿತಂ ನಿರೋಧನಿಸ್ಸಿತಂ ವೋಸ್ಸಗ್ಗಪರಿಣಾಮಿಂ. ಏವಂ ಭಾವಿತಾ ಖೋ, ಭಿಕ್ಖವೇ, ನಿರೋಧಸಞ್ಞಾ ಏವಂ ಬಹುಲೀಕತಾ ಮಹತೋ ಅತ್ಥಾಯ ಸಂವತ್ತತಿ, ಮಹತೋ ಯೋಗಕ್ಖೇಮಾಯ ಸಂವತ್ತತಿ, ಮಹತೋ ಸಂವೇಗಾಯ ಸಂವತ್ತತಿ, ಮಹತೋ ಫಾಸುವಿಹಾರಾಯ ಸಂವತ್ತತೀ’’ತಿ. ದಸಮಂ.

ನಿರೋಧವಗ್ಗೋ ಅಟ್ಠಮೋ.

ತಸ್ಸುದ್ದಾನಂ –

ಅಸುಭಮರಣಆಹಾರೇ, ಪಟಿಕೂಲಅನಭಿರತೇನ [ಪಟಿಕೂಲೇನ ಚ ಸಬ್ಬಲೋಕೇ (ಸ್ಯಾ.)];

ಅನಿಚ್ಚದುಕ್ಖಅನತ್ತಪಹಾನಂ, ವಿರಾಗನಿರೋಧೇನ ತೇ ದಸಾತಿ.