೭. ಆನಾಪಾನವಗ್ಗೋ

೧. ಅಟ್ಠಿಕಮಹಪ್ಫಲಸುತ್ತಂ

೨೩೮. ಸಾವತ್ಥಿನಿದಾನಂ. ‘‘ಅಟ್ಠಿಕಸಞ್ಞಾ, ಭಿಕ್ಖವೇ, ಭಾವಿತಾ ಬಹುಲೀಕತಾ ಮಹಪ್ಫಲಾ ಹೋತಿ ಮಹಾನಿಸಂಸಾ. ಕಥಂ ಭಾವಿತಾ ಚ, ಭಿಕ್ಖವೇ, ಅಟ್ಠಿಕಸಞ್ಞಾ ಕಥಂ ಬಹುಲೀಕತಾ ಮಹಪ್ಫಲಾ ಹೋತಿ ಮಹಾನಿಸಂಸಾ? ಇಧ, ಭಿಕ್ಖವೇ, ಭಿಕ್ಖು ಅಟ್ಠಿಕಸಞ್ಞಾಸಹಗತಂ ಸತಿಸಮ್ಬೋಜ್ಝಙ್ಗಂ ಭಾವೇತಿ ವಿವೇಕನಿಸ್ಸಿತಂ ವಿರಾಗನಿಸ್ಸಿತಂ ನಿರೋಧನಿಸ್ಸಿತಂ ವೋಸ್ಸಗ್ಗಪರಿಣಾಮಿಂ…ಪೇ… ಅಟ್ಠಿಕಸಞ್ಞಾಸಹಗತಂ ಉಪೇಕ್ಖಾಸಮ್ಬೋಜ್ಝಙ್ಗಂ ಭಾವೇತಿ ವಿವೇಕನಿಸ್ಸಿತಂ ವಿರಾಗನಿಸ್ಸಿತಂ ನಿರೋಧನಿಸ್ಸಿತಂ ವೋಸ್ಸಗ್ಗಪರಿಣಾಮಿಂ. ಏವಂ ಭಾವಿತಾ ಖೋ, ಭಿಕ್ಖವೇ, ಅಟ್ಠಿಕಸಞ್ಞಾ ಏವಂ ಬಹುಲೀಕತಾ ಮಹಪ್ಫಲಾ ಹೋತಿ ಮಹಾನಿಸಂಸಾ’’ತಿ.

ಅಞ್ಞತರಫಲಸುತ್ತಂ

‘‘ಅಟ್ಠಿಕಸಞ್ಞಾಯ, ಭಿಕ್ಖವೇ, ಭಾವಿತಾಯ ಬಹುಲೀಕತಾಯ ದ್ವಿನ್ನಂ ಫಲಾನಂ ಅಞ್ಞತರಂ ಫಲಂ ಪಾಟಿಕಙ್ಖಂ – ದಿಟ್ಠೇವ ಧಮ್ಮೇ ಅಞ್ಞಾ, ಸತಿ ವಾ ಉಪಾದಿಸೇಸೇ ಅನಾಗಾಮಿತಾ. ಕಥಂ ಭಾವಿತಾಯ ಚ ಖೋ, ಭಿಕ್ಖವೇ, ಅಟ್ಠಿಕಸಞ್ಞಾಯ ಕಥಂ ಬಹುಲೀಕತಾಯ ದ್ವಿನ್ನಂ ಫಲಾನಂ ಅಞ್ಞತರಂ ಫಲಂ ಪಾಟಿಕಙ್ಖಂ – ದಿಟ್ಠೇವ ಧಮ್ಮೇ ಅಞ್ಞಾ, ಸತಿ ವಾ ಉಪಾದಿಸೇಸೇ ಅನಾಗಾಮಿತಾ? ಇಧ, ಭಿಕ್ಖವೇ, ಭಿಕ್ಖು ಅಟ್ಠಿಕಸಞ್ಞಾಸಹಗತಂ ಸತಿಸಮ್ಬೋಜ್ಝಙ್ಗಂ ಭಾವೇತಿ…ಪೇ… ಅಟ್ಠಿಕಸಞ್ಞಾಸಹಗತಂ ಉಪೇಕ್ಖಾಸಮ್ಬೋಜ್ಝಙ್ಗಂ ಭಾವೇತಿ ವಿವೇಕನಿಸ್ಸಿತಂ ವಿರಾಗನಿಸ್ಸಿತಂ ನಿರೋಧನಿಸ್ಸಿತಂ ವೋಸ್ಸಗ್ಗಪರಿಣಾಮಿಂ. ಏವಂ ಭಾವಿತಾಯ ಖೋ, ಭಿಕ್ಖವೇ, ಅಟ್ಠಿಕಸಞ್ಞಾಯ ಏವಂ ಬಹುಲೀಕತಾಯ ದ್ವಿನ್ನಂ ಫಲಾನಂ ಅಞ್ಞತರಂ ಫಲಂ ಪಾಟಿಕಙ್ಖಂ – ದಿಟ್ಠೇವ ಧಮ್ಮೇ ಅಞ್ಞಾ, ಸತಿ ವಾ ಉಪಾದಿಸೇಸೇ ಅನಾಗಾಮಿತಾ’’ತಿ.

ಮಹತ್ಥಸುತ್ತಂ

‘‘ಅಟ್ಠಿಕಸಞ್ಞಾ, ಭಿಕ್ಖವೇ, ಭಾವಿತಾ ಬಹುಲೀಕತಾ ಮಹತೋ ಅತ್ಥಾಯ ಸಂವತ್ತತಿ. ಕಥಂ ಭಾವಿತಾ ಚ, ಭಿಕ್ಖವೇ, ಅಟ್ಠಿಕಸಞ್ಞಾ ಕಥಂ ಬಹುಲೀಕತಾ ಮಹತೋ ಅತ್ಥಾಯ ಸಂವತ್ತತಿ? ಇಧ, ಭಿಕ್ಖವೇ, ಭಿಕ್ಖು ಅಟ್ಠಿಕಸಞ್ಞಾಸಹಗತಂ ಸತಿಸಮ್ಬೋಜ್ಝಙ್ಗಂ ಭಾವೇತಿ…ಪೇ… ಅಟ್ಠಿಕಸಞ್ಞಾಸಹಗತಂ ಉಪೇಕ್ಖಾಸಮ್ಬೋಜ್ಝಙ್ಗಂ ಭಾವೇತಿ ವಿವೇಕನಿಸ್ಸಿತಂ ವಿರಾಗನಿಸ್ಸಿತಂ ನಿರೋಧನಿಸ್ಸಿತಂ ವೋಸ್ಸಗ್ಗಪರಿಣಾಮಿಂ. ಏವಂ ಭಾವಿತಾ ಖೋ, ಭಿಕ್ಖವೇ, ಅಟ್ಠಿಕಸಞ್ಞಾ ಏವಂ ಬಹುಲೀಕತಾ ಮಹತೋ ಅತ್ಥಾಯ ಸಂವತ್ತತೀ’’ತಿ.

ಯೋಗಕ್ಖೇಮಸುತ್ತಂ

‘‘ಅಟ್ಠಿಕಸಞ್ಞಾ, ಭಿಕ್ಖವೇ, ಭಾವಿತಾ ಬಹುಲೀಕತಾ ಮಹತೋ ಯೋಗಕ್ಖೇಮಾಯ ಸಂವತ್ತತಿ. ಕಥಂ ಭಾವಿತಾ ಚ, ಭಿಕ್ಖವೇ, ಅಟ್ಠಿಕಸಞ್ಞಾ ಕಥಂ ಬಹುಲೀಕತಾ ಮಹತೋ ಯೋಗಕ್ಖೇಮಾಯ ಸಂವತ್ತತಿ? ಇಧ, ಭಿಕ್ಖವೇ, ಭಿಕ್ಖು ಅಟ್ಠಿಕಸಞ್ಞಾಸಹಗತಂ ಸತಿಸಮ್ಬೋಜ್ಝಙ್ಗಂ ಭಾವೇತಿ…ಪೇ… ಅಟ್ಠಿಕಸಞ್ಞಾಸಹಗತಂ ಉಪೇಕ್ಖಾಸಮ್ಬೋಜ್ಝಙ್ಗಂ ಭಾವೇತಿ ವಿವೇಕನಿಸ್ಸಿತಂ ವಿರಾಗನಿಸ್ಸಿತಂ ನಿರೋಧನಿಸ್ಸಿತಂ ವೋಸ್ಸಗ್ಗಪರಿಣಾಮಿಂ. ಏವಂ ಭಾವಿತಾ ಖೋ, ಭಿಕ್ಖವೇ, ಅಟ್ಠಿಕಸಞ್ಞಾ ಏವಂ ಬಹುಲೀಕತಾ ಮಹತೋ ಯೋಗಕ್ಖೇಮಾಯ ಸಂವತ್ತತೀ’’ತಿ.

ಸಂವೇಗಸುತ್ತಂ

‘‘ಅಟ್ಠಿಕಸಞ್ಞಾ, ಭಿಕ್ಖವೇ, ಭಾವಿತಾ ಬಹುಲೀಕತಾ ಮಹತೋ ಸಂವೇಗಾಯ ಸಂವತ್ತತಿ. ಕಥಂ ಭಾವಿತಾ ಚ, ಭಿಕ್ಖವೇ, ಅಟ್ಠಿಕಸಞ್ಞಾ ಕಥಂ ಬಹುಲೀಕತಾ ಮಹತೋ ಸಂವೇಗಾಯ ಸಂವತ್ತತಿ? ಇಧ, ಭಿಕ್ಖವೇ, ಭಿಕ್ಖು ಅಟ್ಠಿಕಸಞ್ಞಾಸಹಗತಂ ಸತಿಸಮ್ಬೋಜ್ಝಙ್ಗಂ ಭಾವೇತಿ…ಪೇ… ಅಟ್ಠಿಕಸಞ್ಞಾಸಹಗತಂ ಉಪೇಕ್ಖಾಸಮ್ಬೋಜ್ಝಙ್ಗಂ ಭಾವೇತಿ ವಿವೇಕನಿಸ್ಸಿತಂ ವಿರಾಗನಿಸ್ಸಿತಂ ನಿರೋಧನಿಸ್ಸಿತಂ ವೋಸ್ಸಗ್ಗಪರಿಣಾಮಿಂ. ಏವಂ ಭಾವಿತಾ ಖೋ, ಭಿಕ್ಖವೇ, ಅಟ್ಠಿಕಸಞ್ಞಾ ಏವಂ ಬಹುಲೀಕತಾ ಮಹತೋ ಸಂವೇಗಾಯ ಸಂವತ್ತತೀ’’ತಿ.

ಫಾಸುವಿಹಾರಸುತ್ತಂ

‘‘ಅಟ್ಠಿಕಸಞ್ಞಾ, ಭಿಕ್ಖವೇ, ಭಾವಿತಾ ಬಹುಲೀಕತಾ ಮಹತೋ ಫಾಸುವಿಹಾರಾಯ ಸಂವತ್ತತಿ. ಕಥಂ ಭಾವಿತಾ ಚ, ಭಿಕ್ಖವೇ, ಅಟ್ಠಿಕಸಞ್ಞಾ ಕಥಂ ಬಹುಲೀಕತಾ ಮಹತೋ ಫಾಸುವಿಹಾರಾಯ ಸಂವತ್ತತಿ? ಇಧ, ಭಿಕ್ಖವೇ, ಭಿಕ್ಖು ಅಟ್ಠಿಕಸಞ್ಞಾಸಹಗತಂ ಸತಿಸಮ್ಬೋಜ್ಝಙ್ಗಂ ಭಾವೇತಿ…ಪೇ… ಅಟ್ಠಿಕಸಞ್ಞಾಸಹಗತಂ ಉಪೇಕ್ಖಾಸಮ್ಬೋಜ್ಝಙ್ಗಂ ಭಾವೇತಿ ವಿವೇಕನಿಸ್ಸಿತಂ ವಿರಾಗನಿಸ್ಸಿತಂ ನಿರೋಧನಿಸ್ಸಿತಂ ವೋಸ್ಸಗ್ಗಪರಿಣಾಮಿಂ. ಏವಂ ಭಾವಿತಾ ಖೋ, ಭಿಕ್ಖವೇ, ಅಟ್ಠಿಕಸಞ್ಞಾ ಏವಂ ಬಹುಲೀಕತಾ ಮಹತೋ ಫಾಸುವಿಹಾರಾಯ ಸಂವತ್ತತೀ’’ತಿ. ಪಠಮಂ.

೨. ಪುಳವಕಸುತ್ತಂ

೨೩೯. ‘‘ಪುಳವಕಸಞ್ಞಾ [ಪುಳುವಕಸಞ್ಞಾ (ಕ.)], ಭಿಕ್ಖವೇ, ಭಾವಿತಾ…ಪೇ… ದುತಿಯಂ.

೩. ವಿನೀಲಕಸುತ್ತಂ

೨೪೦. ‘‘ವಿನೀಲಕಸಞ್ಞಾ, ಭಿಕ್ಖವೇ…ಪೇ… ತತಿಯಂ.

೪. ವಿಚ್ಛಿದ್ದಕಸುತ್ತಂ

೨೪೧. ‘‘ವಿಚ್ಛಿದ್ದಕಸಞ್ಞಾ, ಭಿಕ್ಖವೇ…ಪೇ… ಚತುತ್ಥಂ.

೫. ಉದ್ಧುಮಾತಕಸುತ್ತಂ

೨೪೨. ‘‘ಉದ್ಧುಮಾತಕಸಞ್ಞಾ, ಭಿಕ್ಖವೇ…ಪೇ… ಪಞ್ಚಮಂ.

೬. ಮೇತ್ತಾಸುತ್ತಂ

೨೪೩. ‘‘ಮೇತ್ತಾ, ಭಿಕ್ಖವೇ, ಭಾವಿತಾ…ಪೇ… ಛಟ್ಠಂ.

೭. ಕರುಣಾಸುತ್ತಂ

೨೪೪. ‘‘ಕರುಣಾ, ಭಿಕ್ಖವೇ, ಭಾವಿತಾ…ಪೇ… ಸತ್ತಮಂ.

೮. ಮುದಿತಾಸುತ್ತಂ

೨೪೫. ‘‘ಮುದಿತಾ, ಭಿಕ್ಖವೇ, ಭಾವಿತಾ…ಪೇ… ಅಟ್ಠಮಂ.

೯. ಉಪೇಕ್ಖಾಸುತ್ತಂ

೨೪೬. ‘‘ಉಪೇಕ್ಖಾ, ಭಿಕ್ಖವೇ, ಭಾವಿತಾ…ಪೇ… ನವಮಂ.

೧೦. ಆನಾಪಾನಸುತ್ತಂ

೨೪೭. ‘‘ಆನಾಪಾನಸ್ಸತಿ, ಭಿಕ್ಖವೇ, ಭಾವಿತಾ…ಪೇ… ದಸಮಂ.

ಆನಾಪಾನವಗ್ಗೋ ಸತ್ತಮೋ.

ತಸ್ಸುದ್ದಾನಂ –

ಅಟ್ಠಿಕಪುಳವಕಂ ವಿನೀಲಕಂ, ವಿಚ್ಛಿದ್ದಕಂ ಉದ್ಧುಮಾತೇನ ಪಞ್ಚಮಂ;

ಮೇತ್ತಾ ಕರುಣಾ ಮುದಿತಾ ಉಪೇಕ್ಖಾ, ಆನಾಪಾನೇನ ತೇ ದಸಾತಿ.