೩. ಆವೇಣಿಕದುಕ್ಖಸುತ್ತಂ

೨೮೨. ‘‘ಪಞ್ಚಿಮಾನಿ, ಭಿಕ್ಖವೇ, ಮಾತುಗಾಮಸ್ಸ ಆವೇಣಿಕಾನಿ ದುಕ್ಖಾನಿ, ಯಾನಿ ಮಾತುಗಾಮೋ ಪಚ್ಚನುಭೋತಿ, ಅಞ್ಞತ್ರೇವ ಪುರಿಸೇಹಿ. ಕತಮಾನಿ ಪಞ್ಚ? ಇಧ, ಭಿಕ್ಖವೇ, ಮಾತುಗಾಮೋ ದಹರೋವ ಸಮಾನೋ ಪತಿಕುಲಂ ಗಚ್ಛತಿ, ಞಾತಕೇಹಿ ವಿನಾ ಹೋತಿ. ಇದಂ, ಭಿಕ್ಖವೇ, ಮಾತುಗಾಮಸ್ಸ ಪಠಮಂ ಆವೇಣಿಕಂ ದುಕ್ಖಂ, ಯಂ ಮಾತುಗಾಮೋ ಪಚ್ಚನುಭೋತಿ, ಅಞ್ಞತ್ರೇವ ಪುರಿಸೇಹಿ. ಪುನ ಚಪರಂ, ಭಿಕ್ಖವೇ, ಮಾತುಗಾಮೋ ಉತುನೀ ಹೋತಿ. ಇದಂ, ಭಿಕ್ಖವೇ, ಮಾತುಗಾಮಸ್ಸ ದುತಿಯಂ ಆವೇಣಿಕಂ ದುಕ್ಖಂ, ಯಂ ಮಾತುಗಾಮೋ ಪಚ್ಚನುಭೋತಿ, ಅಞ್ಞತ್ರೇವ ಪುರಿಸೇಹಿ. ಪುನ ಚಪರಂ, ಭಿಕ್ಖವೇ, ಮಾತುಗಾಮೋ ಗಬ್ಭಿನೀ ಹೋತಿ. ಇದಂ, ಭಿಕ್ಖವೇ, ಮಾತುಗಾಮಸ್ಸ ತತಿಯಂ ಆವೇಣಿಕಂ ದುಕ್ಖಂ, ಯಂ ಮಾತುಗಾಮೋ ಪಚ್ಚನುಭೋತಿ, ಅಞ್ಞತ್ರೇವ ಪುರಿಸೇಹಿ. ಪುನ ಚಪರಂ, ಭಿಕ್ಖವೇ, ಮಾತುಗಾಮೋ ವಿಜಾಯತಿ. ಇದಂ, ಭಿಕ್ಖವೇ, ಮಾತುಗಾಮಸ್ಸ ಚತುತ್ಥಂ ಆವೇಣಿಕಂ ದುಕ್ಖಂ, ಯಂ ಮಾತುಗಾಮೋ ಪಚ್ಚನುಭೋತಿ, ಅಞ್ಞತ್ರೇವ ಪುರಿಸೇಹಿ. ಪುನ ಚಪರಂ, ಭಿಕ್ಖವೇ, ಮಾತುಗಾಮೋ ಪುರಿಸಸ್ಸ ಪಾರಿಚರಿಯಂ ಉಪೇತಿ. ಇದಂ ಖೋ, ಭಿಕ್ಖವೇ, ಮಾತುಗಾಮಸ್ಸ ಪಞ್ಚಮಂ ಆವೇಣಿಕಂ ದುಕ್ಖಂ, ಯಂ ಮಾತುಗಾಮೋ ಪಚ್ಚನುಭೋತಿ, ಅಞ್ಞತ್ರೇವ ಪುರಿಸೇಹಿ. ಇಮಾನಿ ಖೋ, ಭಿಕ್ಖವೇ, ಪಞ್ಚ ಮಾತುಗಾಮಸ್ಸ ಆವೇಣಿಕಾನಿ ದುಕ್ಖಾನಿ, ಯಾನಿ ಮಾತುಗಾಮೋ ಪಚ್ಚನುಭೋತಿ, ಅಞ್ಞತ್ರೇವ ಪುರಿಸೇಹೀ’’ತಿ. ತತಿಯಂ.