೧. ಯೋಗಕ್ಖೇಮಿಸುತ್ತಂ

೧೦೪. ಸಾವತ್ಥಿನಿದಾನಂ. ‘‘ಯೋಗಕ್ಖೇಮಿಪರಿಯಾಯಂ ವೋ, ಭಿಕ್ಖವೇ, ಧಮ್ಮಪರಿಯಾಯಂ ದೇಸೇಸ್ಸಾಮಿ. ತಂ ಸುಣಾಥ. ಕತಮೋ ಚ, ಭಿಕ್ಖವೇ, ಯೋಗಕ್ಖೇಮಿಪರಿಯಾಯೋ ಧಮ್ಮಪರಿಯಾಯೋ? ಸನ್ತಿ, ಭಿಕ್ಖವೇ, ಚಕ್ಖುವಿಞ್ಞೇಯ್ಯಾ ರೂಪಾ ಇಟ್ಠಾ ಕನ್ತಾ ಮನಾಪಾ ಪಿಯರೂಪಾ ಕಾಮೂಪಸಂಹಿತಾ ರಜನೀಯಾ. ತೇ ತಥಾಗತಸ್ಸ ಪಹೀನಾ ಉಚ್ಛಿನ್ನಮೂಲಾ ತಾಲಾವತ್ಥುಕತಾ ಅನಭಾವಙ್ಕತಾ ಆಯತಿಂ ಅನುಪ್ಪಾದಧಮ್ಮಾ. ತೇಸಞ್ಚ ಪಹಾನಾಯ ಅಕ್ಖಾಸಿ ಯೋಗಂ, ತಸ್ಮಾ ತಥಾಗತೋ ‘ಯೋಗಕ್ಖೇಮೀ’ತಿ ವುಚ್ಚತಿ…ಪೇ… ಸನ್ತಿ, ಭಿಕ್ಖವೇ, ಮನೋವಿಞ್ಞೇಯ್ಯಾ ಧಮ್ಮಾ ಇಟ್ಠಾ ಕನ್ತಾ ಮನಾಪಾ ಪಿಯರೂಪಾ ಕಾಮೂಪಸಂಹಿತಾ ರಜನೀಯಾ. ತೇ ತಥಾಗತಸ್ಸ ಪಹೀನಾ ಉಚ್ಛಿನ್ನಮೂಲಾ ತಾಲಾವತ್ಥುಕತಾ ಅನಭಾವಙ್ಕತಾ ಆಯತಿಂ ಅನುಪ್ಪಾದಧಮ್ಮಾ. ತೇಸಞ್ಚ ಪಹಾನಾಯ ಅಕ್ಖಾಸಿ ಯೋಗಂ, ತಸ್ಮಾ ತಥಾಗತೋ ‘ಯೋಗಕ್ಖೇಮೀ’ತಿ ವುಚ್ಚತಿ. ಅಯಂ ಖೋ, ಭಿಕ್ಖವೇ, ಯೋಗಕ್ಖೇಮಿಪರಿಯಾಯೋ ಧಮ್ಮಪರಿಯಾಯೋ’’ತಿ. ಪಠಮಂ.