೭. ನಾಗದತ್ತಸುತ್ತಂ

೨೨೭. ಏಕಂ ಸಮಯಂ ಆಯಸ್ಮಾ ನಾಗದತ್ತೋ ಕೋಸಲೇಸು ವಿಹರತಿ ಅಞ್ಞತರಸ್ಮಿಂ ವನಸಣ್ಡೇ. ತೇನ ಖೋ ಪನ ಸಮಯೇನ ಆಯಸ್ಮಾ ನಾಗದತ್ತೋ ಅತಿಕಾಲೇನ ಗಾಮಂ ಪವಿಸತಿ, ಅತಿದಿವಾ ಪಟಿಕ್ಕಮತಿ. ಅಥ ಖೋ ಯಾ ತಸ್ಮಿಂ ವನಸಣ್ಡೇ ಅಧಿವತ್ಥಾ ದೇವತಾ ಆಯಸ್ಮತೋ ನಾಗದತ್ತಸ್ಸ ಅನುಕಮ್ಪಿಕಾ ಅತ್ಥಕಾಮಾ ಆಯಸ್ಮನ್ತಂ ನಾಗದತ್ತಂ ಸಂವೇಜೇತುಕಾಮಾ ಯೇನಾಯಸ್ಮಾ ನಾಗದತ್ತೋ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಆಯಸ್ಮನ್ತಂ ನಾಗದತ್ತಂ ಗಾಥಾಹಿ ಅಜ್ಝಭಾಸಿ –

‘‘ಕಾಲೇ ಪವಿಸ ನಾಗದತ್ತ, ದಿವಾ ಚ ಆಗನ್ತ್ವಾ ಅತಿವೇಲಚಾರೀ;

ಸಂಸಟ್ಠೋ ಗಹಟ್ಠೇಹಿ, ಸಮಾನಸುಖದುಕ್ಖೋ.

‘‘ಭಾಯಾಮಿ ನಾಗದತ್ತಂ ಸುಪ್ಪಗಬ್ಭಂ, ಕುಲೇಸು ವಿನಿಬದ್ಧಂ;

ಮಾ ಹೇವ ಮಚ್ಚುರಞ್ಞೋ ಬಲವತೋ, ಅನ್ತಕಸ್ಸ ವಸಂ ಉಪೇಸೀ’’ತಿ [ವಸಮೇಯ್ಯಾತಿ (ಸೀ. ಪೀ.), ವಸಮೇಸೀತಿ (ಸ್ಯಾ. ಕಂ.)].

ಅಥ ಖೋ ಆಯಸ್ಮಾ ನಾಗದತ್ತೋ ತಾಯ ದೇವತಾಯ ಸಂವೇಜಿತೋ ಸಂವೇಗಮಾಪಾದೀತಿ.