೮. ಕುಲಘರಣೀಸುತ್ತಂ

೨೨೮. ಏಕಂ ಸಮಯಂ ಅಞ್ಞತರೋ ಭಿಕ್ಖು ಕೋಸಲೇಸು ವಿಹರತಿ ಅಞ್ಞತರಸ್ಮಿಂ ವನಸಣ್ಡೇ. ತೇನ ಖೋ ಪನ ಸಮಯೇನ ಸೋ ಭಿಕ್ಖು ಅಞ್ಞತರಸ್ಮಿಂ ಕುಲೇ ಅತಿವೇಲಂ ಅಜ್ಝೋಗಾಳ್ಹಪ್ಪತ್ತೋ ವಿಹರತಿ. ಅಥ ಖೋ ಯಾ ತಸ್ಮಿಂ ವನಸಣ್ಡೇ ಅಧಿವತ್ಥಾ ದೇವತಾ ತಸ್ಸ ಭಿಕ್ಖುನೋ ಅನುಕಮ್ಪಿಕಾ ಅತ್ಥಕಾಮಾ ತಂ ಭಿಕ್ಖುಂ ಸಂವೇಜೇತುಕಾಮಾ ಯಾ ತಸ್ಮಿಂ ಕುಲೇ ಕುಲಘರಣೀ, ತಸ್ಸಾ ವಣ್ಣಂ ಅಭಿನಿಮ್ಮಿನಿತ್ವಾ ಯೇನ ಸೋ ಭಿಕ್ಖು ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ತಂ ಭಿಕ್ಖುಂ ಗಾಥಾಯ ಅಜ್ಝಭಾಸಿ –

‘‘ನದೀತೀರೇಸು ಸಣ್ಠಾನೇ, ಸಭಾಸು ರಥಿಯಾಸು ಚ;

ಜನಾ ಸಙ್ಗಮ್ಮ ಮನ್ತೇನ್ತಿ, ಮಞ್ಚ ತಞ್ಚ [ತ್ವಞ್ಚ (ಕ.)] ಕಿಮನ್ತರ’’ನ್ತಿ.

‘‘ಬಹೂಹಿ ಸದ್ದಾ ಪಚ್ಚೂಹಾ, ಖಮಿತಬ್ಬಾ ತಪಸ್ಸಿನಾ;

ನ ತೇನ ಮಙ್ಕು ಹೋತಬ್ಬಂ, ನ ಹಿ ತೇನ ಕಿಲಿಸ್ಸತಿ.

‘‘ಯೋ ಚ ಸದ್ದಪರಿತ್ತಾಸೀ, ವನೇ ವಾತಮಿಗೋ ಯಥಾ;

ಲಹುಚಿತ್ತೋತಿ ತಂ ಆಹು, ನಾಸ್ಸ ಸಮ್ಪಜ್ಜತೇ ವತ’’ನ್ತಿ.