೩. ಕಸ್ಸಪಗೋತ್ತಸುತ್ತಂ

೨೨೩. ಏಕಂ ಸಮಯಂ ಆಯಸ್ಮಾ ಕಸ್ಸಪಗೋತ್ತೋ ಕೋಸಲೇಸು ವಿಹರತಿ ಅಞ್ಞತರಸ್ಮಿಂ ವನಸಣ್ಡೇ. ತೇನ ಖೋ ಪನ ಸಮಯೇನ ಆಯಸ್ಮಾ ಕಸ್ಸಪಗೋತ್ತೋ ದಿವಾವಿಹಾರಗತೋ ಅಞ್ಞತರಂ ಛೇತಂ ಓವದತಿ. ಅಥ ಖೋ ಯಾ ತಸ್ಮಿಂ ವನಸಣ್ಡೇ ಅಧಿವತ್ಥಾ ದೇವತಾ ಆಯಸ್ಮನ್ತಂ ಕಸ್ಸಪಗೋತ್ತಂ ಸಂವೇಜೇತುಕಾಮಾ ಯೇನಾಯಸ್ಮಾ ಕಸ್ಸಪಗೋತ್ತೋ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಆಯಸ್ಮನ್ತಂ ಕಸ್ಸಪಗೋತ್ತಂ ಗಾಥಾಹಿ ಅಜ್ಝಭಾಸಿ –

‘‘ಗಿರಿದುಗ್ಗಚರಂ ಛೇತಂ, ಅಪ್ಪಪಞ್ಞಂ ಅಚೇತಸಂ;

ಅಕಾಲೇ ಓವದಂ ಭಿಕ್ಖು, ಮನ್ದೋವ ಪಟಿಭಾತಿ ಮಂ.

‘‘ಸುಣಾತಿ ನ ವಿಜಾನಾತಿ, ಆಲೋಕೇತಿ ನ ಪಸ್ಸತಿ;

ಧಮ್ಮಸ್ಮಿಂ ಭಞ್ಞಮಾನಸ್ಮಿಂ, ಅತ್ಥಂ ಬಾಲೋ ನ ಬುಜ್ಝತಿ.

‘‘ಸಚೇಪಿ ದಸ ಪಜ್ಜೋತೇ, ಧಾರಯಿಸ್ಸಸಿ ಕಸ್ಸಪ;

ನೇವ ದಕ್ಖತಿ ರೂಪಾನಿ, ಚಕ್ಖು ಹಿಸ್ಸ ನ ವಿಜ್ಜತೀ’’ತಿ.

ಅಥ ಖೋ ಆಯಸ್ಮಾ ಕಸ್ಸಪಗೋತ್ತೋ ತಾಯ ದೇವತಾಯ ಸಂವೇಜಿತೋ ಸಂವೇಗಮಾಪಾದೀತಿ.