೪. ಸಮ್ಬಹುಲಸುತ್ತಂ

೨೨೪. ಏಕಂ ಸಮಯಂ ಸಮ್ಬಹುಲಾ ಭಿಕ್ಖೂ ಕೋಸಲೇಸು ವಿಹರನ್ತಿ ಅಞ್ಞತರಸ್ಮಿಂ ವನಸಣ್ಡೇ. ಅಥ ಖೋ ತೇ ಭಿಕ್ಖೂ ವಸ್ಸಂವುಟ್ಠಾ [ವಸ್ಸಂವುತ್ಥಾ (ಸೀ. ಸ್ಯಾ. ಕಂ. ಪೀ.)] ತೇಮಾಸಚ್ಚಯೇನ ಚಾರಿಕಂ ಪಕ್ಕಮಿಂಸು. ಅಥ ಖೋ ಯಾ ತಸ್ಮಿಂ ವನಸಣ್ಡೇ ಅಧಿವತ್ಥಾ ದೇವತಾ ತೇ ಭಿಕ್ಖೂ ಅಪಸ್ಸನ್ತೀ ಪರಿದೇವಮಾನಾ ತಾಯಂ ವೇಲಾಯಂ ಇಮಂ ಗಾಥಂ ಅಭಾಸಿ –

‘‘ಅರತಿ ವಿಯ ಮೇಜ್ಜ ಖಾಯತಿ,

ಬಹುಕೇ ದಿಸ್ವಾನ ವಿವಿತ್ತೇ ಆಸನೇ;

ತೇ ಚಿತ್ತಕಥಾ ಬಹುಸ್ಸುತಾ,

ಕೋಮೇ ಗೋತಮಸಾವಕಾ ಗತಾ’’ತಿ.

ಏವಂ ವುತ್ತೇ, ಅಞ್ಞತರಾ ದೇವತಾ ತಂ ದೇವತಂ ಗಾಥಾಯ ಪಚ್ಚಭಾಸಿ –

‘‘ಮಾಗಧಂ ಗತಾ ಕೋಸಲಂ ಗತಾ, ಏಕಚ್ಚಿಯಾ ಪನ ವಜ್ಜಿಭೂಮಿಯಾ;

ಮಗಾ ವಿಯ ಅಸಙ್ಗಚಾರಿನೋ, ಅನಿಕೇತಾ ವಿಹರನ್ತಿ ಭಿಕ್ಖವೋ’’ತಿ.