೮. ಸೀಸುಪಚಾಲಾಸುತ್ತಂ

೧೬೯. ಸಾವತ್ಥಿನಿದಾನಂ. ಅಥ ಖೋ ಸೀಸುಪಚಾಲಾ [ಸೀಸೂಪಚಾಲಾ (ಸೀ.)] ಭಿಕ್ಖುನೀ ಪುಬ್ಬಣ್ಹಸಮಯಂ ನಿವಾಸೇತ್ವಾ …ಪೇ… ಅಞ್ಞತರಸ್ಮಿಂ ರುಕ್ಖಮೂಲೇ ದಿವಾವಿಹಾರಂ ನಿಸೀದಿ. ಅಥ ಖೋ ಮಾರೋ ಪಾಪಿಮಾ ಯೇನ ಸೀಸುಪಚಾಲಾ ಭಿಕ್ಖುನೀ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಸೀಸುಪಚಾಲಂ ಭಿಕ್ಖುನಿಂ ಏತದವೋಚ – ‘‘ಕಸ್ಸ ನು ತ್ವಂ, ಭಿಕ್ಖುನಿ, ಪಾಸಣ್ಡಂ ರೋಚೇಸೀ’’ತಿ? ‘‘ನ ಖ್ವಾಹಂ, ಆವುಸೋ, ಕಸ್ಸಚಿ ಪಾಸಣ್ಡಂ ರೋಚೇಮೀ’’ತಿ.

‘‘ಕಂ ನು ಉದ್ದಿಸ್ಸ ಮುಣ್ಡಾಸಿ, ಸಮಣೀ ವಿಯ ದಿಸ್ಸಸಿ;

ನ ಚ ರೋಚೇಸಿ ಪಾಸಣ್ಡಂ, ಕಿಮಿವ ಚರಸಿ ಮೋಮೂಹಾ’’ತಿ.

‘‘ಇತೋ ಬಹಿದ್ಧಾ ಪಾಸಣ್ಡಾ, ದಿಟ್ಠೀಸು ಪಸೀದನ್ತಿ ತೇ;

ನ ತೇಸಂ ಧಮ್ಮಂ ರೋಚೇಮಿ, ತೇ ಧಮ್ಮಸ್ಸ ಅಕೋವಿದಾ.

‘‘ಅತ್ಥಿ ಸಕ್ಯಕುಲೇ ಜಾತೋ, ಬುದ್ಧೋ ಅಪ್ಪಟಿಪುಗ್ಗಲೋ;

ಸಬ್ಬಾಭಿಭೂ ಮಾರನುದೋ, ಸಬ್ಬತ್ಥಮಪರಾಜಿತೋ.

‘‘ಸಬ್ಬತ್ಥ ಮುತ್ತೋ ಅಸಿತೋ, ಸಬ್ಬಂ ಪಸ್ಸತಿ ಚಕ್ಖುಮಾ;

ಸಬ್ಬಕಮ್ಮಕ್ಖಯಂ ಪತ್ತೋ, ವಿಮುತ್ತೋ ಉಪಧಿಸಙ್ಖಯೇ;

ಸೋ ಮಯ್ಹಂ ಭಗವಾ ಸತ್ಥಾ, ತಸ್ಸ ರೋಚೇಮಿ ಸಾಸನ’’ನ್ತಿ.

ಅಥ ಖೋ ಮಾರೋ ಪಾಪಿಮಾ ‘‘ಜಾನಾತಿ ಮಂ ಸೀಸುಪಚಾಲಾ ಭಿಕ್ಖುನೀ’’ತಿ ದುಕ್ಖೀ ದುಮ್ಮನೋ ತತ್ಥೇವನ್ತರಧಾಯೀತಿ.