೯. ಸೇಲಾಸುತ್ತಂ

೧೭೦. ಸಾವತ್ಥಿನಿದಾನಂ. ಅಥ ಖೋ ಸೇಲಾ ಭಿಕ್ಖುನೀ ಪುಬ್ಬಣ್ಹಸಮಯಂ ನಿವಾಸೇತ್ವಾ…ಪೇ… ಅಞ್ಞತರಸ್ಮಿಂ ರುಕ್ಖಮೂಲೇ ದಿವಾವಿಹಾರಂ ನಿಸೀದಿ. ಅಥ ಖೋ ಮಾರೋ ಪಾಪಿಮಾ ಸೇಲಾಯ ಭಿಕ್ಖುನಿಯಾ ಭಯಂ ಛಮ್ಭಿತತ್ತಂ ಲೋಮಹಂಸಂ ಉಪ್ಪಾದೇತುಕಾಮೋ…ಪೇ… ಸೇಲಂ ಭಿಕ್ಖುನಿಂ ಗಾಥಾಯ ಅಜ್ಝಭಾಸಿ –

‘‘ಕೇನಿದಂ ಪಕತಂ ಬಿಮ್ಬಂ, ಕ್ವನು [ಕ್ವನ್ನು (ಸೀ. ಪೀ.), ಕ್ವಚಿ (ಸ್ಯಾ. ಕಂ. ಕ.)] ಬಿಮ್ಬಸ್ಸ ಕಾರಕೋ;

ಕ್ವನು ಬಿಮ್ಬಂ ಸಮುಪ್ಪನ್ನಂ, ಕ್ವನು ಬಿಮ್ಬಂ ನಿರುಜ್ಝತೀ’’ತಿ.

ಅಥ ಖೋ ಸೇಲಾಯ ಭಿಕ್ಖುನಿಯಾ ಏತದಹೋಸಿ – ‘‘ಕೋ ನು ಖ್ವಾಯಂ ಮನುಸ್ಸೋ ವಾ ಅಮನುಸ್ಸೋ ವಾ ಗಾಥಂ ಭಾಸತೀ’’ತಿ? ಅಥ ಖೋ ಸೇಲಾಯ ಭಿಕ್ಖುನಿಯಾ ಏತದಹೋಸಿ – ‘‘ಮಾರೋ ಖೋ ಅಯಂ ಪಾಪಿಮಾ ಮಮ ಭಯಂ ಛಮ್ಭಿತತ್ತಂ ಲೋಮಹಂಸಂ ಉಪ್ಪಾದೇತುಕಾಮೋ ಸಮಾಧಿಮ್ಹಾ ಚಾವೇತುಕಾಮೋ ಗಾಥಂ ಭಾಸತೀ’’ತಿ. ಅಥ ಖೋ ಸೇಲಾ ಭಿಕ್ಖುನೀ ‘‘ಮಾರೋ ಅಯಂ ಪಾಪಿಮಾ’’ ಇತಿ ವಿದಿತ್ವಾ ಮಾರಂ ಪಾಪಿಮನ್ತಂ ಗಾಥಾಹಿ ಪಚ್ಚಭಾಸಿ –

‘‘ನಯಿದಂ ಅತ್ತಕತಂ [ನಯಿದಂ ಪಕತಂ (ಸ್ಯಾ. ಕಂ.)] ಬಿಮ್ಬಂ, ನಯಿದಂ ಪರಕತಂ [ನಯಿದಂ ಪಕತಂ (ಸ್ಯಾ. ಕಂ.)] ಅಘಂ;

ಹೇತುಂ ಪಟಿಚ್ಚ ಸಮ್ಭೂತಂ, ಹೇತುಭಙ್ಗಾ ನಿರುಜ್ಝತಿ.

‘‘ಯಥಾ ಅಞ್ಞತರಂ ಬೀಜಂ, ಖೇತ್ತೇ ವುತ್ತಂ ವಿರೂಹತಿ;

ಪಥವೀರಸಞ್ಚಾಗಮ್ಮ, ಸಿನೇಹಞ್ಚ ತದೂಭಯಂ.

‘‘ಏವಂ ಖನ್ಧಾ ಚ ಧಾತುಯೋ, ಛ ಚ ಆಯತನಾ ಇಮೇ;

ಹೇತುಂ ಪಟಿಚ್ಚ ಸಮ್ಭೂತಾ, ಹೇತುಭಙ್ಗಾ ನಿರುಜ್ಝರೇ’’ತಿ.

ಅಥ ಖೋ ಮಾರೋ ಪಾಪಿಮಾ ‘‘ಜಾನಾತಿ ಮಂ ಸೇಲಾ ಭಿಕ್ಖುನೀ’’ತಿ ದುಕ್ಖೀ ದುಮ್ಮನೋ ತತ್ಥೇವನ್ತರಧಾಯೀತಿ.